viernes, 27 de febrero de 2009

Shona Kipling y Damien O'Kane visiten Asturies

El duu formáu pola curdionista Shona Kipling ya'l guitarrista ya banyoista Damien O'Kane visitará Asturies nos prósimos meses por partida doble, presentando'l so aclamáu discu Box On. Entrambos tan consideraos como de los meyores músicos tradicionales de les Islles Britániques (son irlandeses d'orixe pero viven n'Inglaterra, na ciudá de Newcastle, dende va años) de la cabera xeneración.
Pel momento ta confirmada la so presencia na Nueche de San Xuan de Tresona, en Corvera, compartiendo cartelu colos asturianos Dixebra. Un par de meses enantes, el 17 d'abril, tamién andarán per Asturies, concretamente per Mieres onde podremos velos y escuchalos gracies a los ciclos de conciertos que patrocina Cajastur.

domingo, 22 de febrero de 2009

La nada y tú d'Alfredo González meyor cantar n'asturianu

Dempués d'enfurruñame col anterior post torno a falar de música, músicos y autores de verdá de la bona. Ayeri'l cantautor turonés Alfredo González algamó'l premiu al meyor cantar n'asturianu del añu, nun ye folk pero suena perbién. Podéis sentir el cantar equí

La SGAE aconcéyase con delles bandes de gaites

Lleo esta noticia n'Asturies.com y, nun sé, dexame un poco fríu, ensin reaición. Cuido que tolos autores tienen drechu a cobrar pol so trabayu, lo mesmo que cualquier otru trabayaor, pero parezme que na música tradicional tan queriendo dir más p'alló de lo dixerible pola mayoría de la xente. Querer cobrar por unos arranchos que nun tan rexistraos y que nel 90% de los casos tan fechos ensin dengún interés económicu, ye daqué que nun veo con bonos güeyos, y que pue resultar interesante pa los 4 de siempre, que van tener otru tetu del que chupar, que nun tienen denguna rellación cola música tradicional.
Cuando falamos de música tradicional tamos falando de la herencia cultural d'un país (nel casu que mos ocupa, Asturies) y perteneznos a toos, la SGAE nun tien porque metese nesi tarrén. Un organismu d'esta mena camiento que tien que velar pola música, a la fin viven d'ella anque yá nun toquen nin canten nin ná de ná, y cobrando por tocar un tema tradicional nun se mira pola música de raigañu.
¿Ónde tan les iniciatives de la SGAE por salvaguardar la música tradicional? Yo nun conozo denguna, si la conocéis vosotros habéis de dicimela, yo sé qu'embarguen festivales y que me cobren un canon por si copio daqué (¿puede dicime tamién dalguién, que si yá que pago el canon por si copio, pueo copiar tolo que me dé pola gana?) pero nun conozo dengún concursu de composición de pieces pa banda de gaites o pa dulzaína nin denguna otra propuesta pa dignificar de verdá al músicu tradicional (que nel 90% de los casos ye un tresmisor non un autor). Eso sí, iniciatives pa rexistrar temes tradicionales (munches vegaes ensin cambiar un compás de tola melodía) y pih.aes d'esi estilu, les que queráis.

lunes, 16 de febrero de 2009

Dos por ún, Intercélticu d'Avilés en rebaxes

Esta selmana pasada hubo novedaes nel contenciosu que caltienen l'A. C. Esbardu, organizadora del mayor festival de música tradicional del país, col Ayuntamientu d'Avilés, principal patrocinador del mencionáu eventu. Pela parte de los organizadores fixose público la creación d'una xestora que sedría, d'equí p'alantre la encargada d'entamar el Festival col sofitu profesional d'una asesoría encargada de velar pola integridá económica del eventu y garantizar la so tresparencia, puesta en dulda dende dellos despachos del consistoriu.
De la otra banda, ñegan la llegalidá de tolos pasos que ta dando Esbardu pa organizar la XIII edición del festival, y vuelven dicir que-y se tan embargando sobenciones a la asociación (nesti casu 6000€ concedíos pol conceyu de Castrillón), y va más p'alló al afirmar que la marca Festival Intercélticu d'Avilés y Comarcal, rexistrada por Esbardu va años, foi tamién embargada. La posibilidá de que esto se fixere foi plantegada pol representante de la SGAE (únicu acreedor del festival) n'Asturies l'añu pasáu, pero polo que podemos saber a día de güei nun se llevó a cabu, polo que la afirmación del conceyal de cultura nun ye más qu'otra salida de pata de bancu d'esti ínclitu personax, como pudimos comprobar visitando la web de la Oficina Española de Patentes y Marcas, onde queda bien nidio que la marca ye propiedá d'Esbardu y que ta en vigor.
La conceyalía de cultura avilesina declaró que vien trabayando na prósima edición del festival dende'l pasáu mes de payares, la xestora vien faciendo poco menos que lo mesmo y Esbardu dixo que diben facer el so festival col sofitu l'ayuntamientu o ensin él, polo que nesti intre podemos afirmar qu'entrambos organizadores tan trabayando en dos programaciones alternatives pa esti branu.

lunes, 9 de febrero de 2009

Xiblates

Igual nun ye mui orixinal rellenar una entrada con videos, pero güei diome por colocar equí dellos atropaos en Youtube col común denominador de tener sobresalientes exemplos de música tradicional executada con esi humilde instrumentu que ye'l tin whistle, pa nós xiblata irlandesa.
Poques vegaes un instrumentu tan baratu (pues mercar ún por menos de 10€, d'ehí p'arriba lo que quieras pagar...) ye quien a tresmitir les emociones d'una mena tan direuta y emocionante. Nos videos hai xente perconocía, como Vinnie Kilduff, chavalinos irlandeses desconocíos que toquen de muerte, y dalgún artesanu, como'l texanu Nick Metcalf que toca un Low E fechu por él mesmu (el que toca un whistle decoráu con debuxos en prieto)...
Presta perder 15 minutinos escuchando música de xiblata.









domingo, 1 de febrero de 2009

Video de Capercaillie actuando na Radio Galega

Delles vegaes alcuéntranse perehí coses bien curioses, que dan bien de vueltes hasta dar con nós. Ún d'esos casos ye esti video de Capercaillie actuando pa los conciertos qu'entama Radio Galega, cola collaboración de Xosé Manuel Boudiño al Low Whistle y colgau en Youtube por un aficionáu escocés al que-y damos les gracies dende equí.