El festival de Mieres, qu'aveza dar entamu a la temporada folki n'Asturies, xuega seguro nesta edición na que nos ufierta la música d'unes bandes que lleven más de 20 años dando caña en bien d'escenarios internacionales. El vienres día 3 d'abril abren los asturianos Llan de Cubel, acabantes de llegar de Glasgow como quien diz y parez ser que yá enfrascaos nel trabayu del so prósimu y naguáu discu,;van tar acompañaos esa nueche per The Battlefield Band, hestoria viva del folk escocés que s'estrena nel nuesu país (anque va poco actuaron na vecina Cantabria) y que vien acompañada pola fama de tener un direutu brutal -ganaron el premiu al meyor direutu nel añu 2003 nos premios escoceses de música tradicional-. Pa la nueche del sábadu, Dixebra, nun fae falta preséntalos; como nun fae falta presentar a Altan, ún de los grupos irlandeses con mayor prestixu internacional y con una decena de discos asoleyaos. Los vieyos folkis nunca muerren, y la Folixa esti añu apuesta por ello. Equí vos dexo dellos videos p'abrir boca.
Seven For Old England ye'l títulu del caberu trabayu discográficu de la cantante Maddy Prior, a la que pudimos ver va pocos díes, na Ilesia parroquial de Piedrasblancas, presentando n'Asturies dichu discu, acompañada por Benji Fitzpatrick y Giles Lewin. Foi ésti ún de los conciertos folk más inesperaos de la temporada en cursu, inesperáu pol escenariu -debe ser la primer vegada que se programa música folk nesi escenariu, más acostumáu a les mases corales-, pola protagonista -avezaos a disfrutar de tantes bandes escoceses y irlandeses, ye d'agradecer la presencia d'otres sonoridaes-, inesperáu pola ciudá -pequeña, poco dada a la música tradicional y que rescampla al ver que les otres dos ciudaes de la minixira yeren Bilbao y Zaragoza- y inesperáu por una respetable presencia de públicu. El casu ye que Maddy actuó n'Asturies y tuvo a bien facelu na ilesia'l mio pueblu. Reconozo que sé bien poco del folk-rock inglés de los 70 y qu'enantes de dir pa'l conciertu anduve viendo, y escuchando, vieyos videos de Steeleye Span naguando por faceme una idega de lo que podía esperar de l'actuación. El conciertu superó toles espectatives, munches estrellones de la música popular pueden envidiar la voz d'esta muyer de 62 añazos, lo que pudiere haber perdío nos caberos 35 años supo suplilo con una esquisita téunica vocal, asina, brindónos una actuación d'hora y media llarga sublime, siempre bien arropada por dos grandes músicos, Benji y Giles, que-y brindaron dellos minutos de descansu a la vocalista interpretando temes del so repertoriu personal. Foi ensin dubia ún de los meyores conciertos del añu. El discu Seven For Old England ye una esbilla de cantares tradicionales británicos que fai volver a Maddy a los sos raigaños acompañada pa la ocasión polos músicos enantes citaos y tamién pol míticu curdionista John Fitzpatrick (padre de Benji y miembru de Steeleye Span nos 70). Son 16 cantares conocíos y familiares pa la vocalista, pero qu'enxamás grabara enantes, presentaos en formatu acústicu. El que da nome al discu ye'l que pieslla l'album y el que-y da nome, ye, amás, l'únicu orixinal, compuestu por Maddy nos años 60 cuandu formaba dúu con Tim Hart y enxamás fuera grabáu.
PD: Pa finar dellos videos del conciertu de Maddy en Zaragoza, gracies a Jose Erin por compartilos con nós en Youtube
El santu irlandés aporta a Avilés dempués d'una selmana de muncho trabayu pel restu del mundu. El prósimu día 21 de marzu, na plaza de Valdecarzana, la Asociación Esbardu, encargaráse de celebrar al santu con gaites, xuegos tradicionales y xinta popular, pa la nueche habrá conciertu de folk (la banda entá ta por confirmar). Pa los que nun tuvieron abondo'l martes, equí tienen una bona oportunidá d'estirar la folixa irlandofila un poquín más.
Una de les sedes mítiques onde se cellebra'l Celtic Connectionsprograma tamién conciertos de música folk nos meses de primavera, tamos falando del escenariu del Old Fruitmarket, per onde van pasar nos prosimos meses xente como Eric Bogle, Cris Stout o Peatbog Faeries. El 6 de mayu van dedicar una velada al Shetland Folk Festival, del que yá falaremos va tiempu, y a les bandes internacionales que van pasar per esi festival, asina, nel mesmu conciertu van actuar el grupu noruegu-finés Frigg, la música acadiana de Vishtèn y los nuesos paisanos de Felpeyu. Nuna pallabra, un conciertazu que mos pon los dientes llargos.
Sábadu 7 de marzu a les 20:15 hores. Preciu: 4 €. Nuevu Teatru La Felguera
El grupu Llangres estrena discu de forma oficial el sábadu 7 de marzu nel Nuevu Teatru La Felguera. Entá ye’l títulu del tercer y esperáu discu del grupu Llangres. El discu Entá ganó’l premiu al meyor discu pop del añu nos premios de la crítica RTPA 2008. Entá ye un discu que los mesmos componentes de Llangres nun consideren pop, sicasí, esti premiu confirma’l carácter d’anovación y apertura d’esti trabayu, qu’almite múltiples interpretaciones.
Entá ye’l tercer trabayu discográficu de Llangres que sigue a Stura (2002), el so primer discu, y Esnalar nel añu 2005. Once temes, 7 son cantaos y 4 instrumentales, que suponen un cambiu importante nel conceptu musical que Llangres manexara hasta agora, sobre manera nos temes cantaos, que s’averen a otros conceptos non estrictamente folk y nos que la voz d’Esther Fonseca (ganadora de la 13ª edición de los Premios de la Música na categoría al meyor cantar n'asturianu por "Negra") cobra muncha más relevancia. Un apueste de riesgu y calidá que vamos poder disfrutar el próximu sábadu 7 de marzu a les 20:15 hores nel Nuevu Teatru La Felguera.
PD: Esta entrada ye una nota de prensa que me unvió'l Serviciu de Normalización Llingüística del Ayuntamientu de Llangréu, tal cual la recibo vos la faigo llegar.
