Beltaine Intercéltico

Lo qu'en su día foi'l Festival Intercélticu d'Avilés camuda d'organizaores y de nome, yá tenemos falao d'ello equí. El nuevu festival organizáu pol ayuntamientu d'Avilés, xunto con un garrapieyu d'asociaciones folklóriques llocales nomáu Xuntanza, pasa a denomase Beltaine Intercéltico. Igual ye que nun pudieron embarga-y'l nome rexistráu por Esbardu, igual ye por esborra-y cualaquier traza de llingua asturiana...
El nome elexío nun ye mui afayaízu, el 99% de los asturianos nun sabrán lo que significa y l'1% que sí lo sabe sabrá que Beltaine ye una de les grandes fiestes del calendariu celta, que nel xulianu actual coincide más menos col 1 de mayu, polo que la rellación col mes de xunetu ye improbable nel meyor de los casos...
No qu'a noticies musicales venceyaes col festival avilesín, pon tú'l nome que más te pete, dicir que yá podemos añadir otru grupu a los que yá confirmamos nel anterior post, LAU una de les grandes bandes del folk escocés d'anguaño, trunfadores na cabera edición de los BBC Folk Awards onde algamaron los tres premios a los que taben nominaos.

Posible programación del Festival Intercélticu d'Avilés Bis

A 23 díes del entamu del festival nun se conoz nin cartelu nin programación oficial. L'otru día yá vos fale de lo que me parez que mos alcontremos nesta situación y yá dixi que nun yera de recibu la xetión tan xostrona d'un eventu que ta declaráu d'Interés Turístico Regional. Nos caberos 12 meses asitimos a una aición coordinada ente la SGAE y la conceyalía de Cultura d'Avilés pa finiquitar el festival orixinal y los sos organizadores, Esbardu, los esgrimíos fueron motivos económicos (falta de pagu de los drechos d'autor) y la necesidá de dar un saltu de calidá na organización (los avilesinos pagamos-ys unes vacaciones en Bretaña a dellos conceyales pa que s'asesoraren de cómo se facía l'Interceltique de Lorient).
A 24 de xunu de 2009 esi saltu de calidá na organización traduzse nun festival que nun pue remanar el so nome d'Intercélticu d'Avilés, y al qu'hubo que pone-y otru rocambolescu. Traduzse nun festival organizáu por un trabayor de la estaya de festexos d'Avilés ensin denguna esperiencia cola música tradicional nin cola organización d'eventos d'esta triba y al que-y endosaron el panchu va poques selmanes, asesoráu, eso sí, por Rubén Arias. Traduzse nun festival ensin cartelu y ensin programación oficial a 23 díes de la inauguración. Con estos saltos de calidá igual salimos toos escalabraos.
Dempués de percorrer la rede, podemos dar un avance de la programación, que repito, nun ye oficial y ta ensin confirmar:

• Vienres 17 de xunetu, Banda de Gaites Llacín, que camentamos presentarán el so espectáculu Xideces.
• Sábadu 18 de xunetu, Liam O'Flynn y The Piper's Call Band.
• Domingu 19 de xunetu, Fraser Fifield Trio.
• Xueves 23 de xunetu, La Bandina.
• Sábadu 25 de xunetu, Hermanos Tejedor y Pennoù Skoulm.

Estos datos tan referíos namás a la música folk, desconocemos que grupos de folklore y bandes de gaites pueden tar o non invitaes al festival. Contratar 2 o 3 grupos de folk d'una selmana pa otra nun ye abegosu, pero colos grupos folklóricos ye otru tema, alcontrar agospiu pa 20 o 25 persones y contratalos cuando'l calendariu ya acostuma a tar peslláu ye otru telar y, a la fin, estes agrupaciones son les que dan vida a un festival, les que-y dan convivencia y xermandía. Una de les señes d'identidá que siempre caltuvo l'orixinal Intercélticu d'Avilés.
Dicho too esto nun creáis que me diba prestar el fracasu d'esti nuevu festival, deseyo tola suerte'l mundiu a los sos organizadores pero barrunto que tan faciendo mal les coses, permal, que lleven 12 meses faciéndoles mal y que son testerones, como bonos asturianos que son.

26 Grupos compiten por un puestu nel Folk Plasencia

El pasáu 15 de xunu cerróse l'almisión de grupos al I Certamen de Música Folk: Amigos del Folk Plasencia. Ventiséis bandes de dixebraos países unviáronlos sos meyores trabayos pa ganar una de les tres places de la final, el premiu ye una participación nel prestixosu festival Folk Plasencia'l prósimu agostu. La organización destaca l'ésitu de la convocatoria, recibieron maquetes d'Arxentina, Reinu Xuníu, Portugal y Italia, amás, de toles recibíes de la totalidá del estáu.

Agora, dende'l 19 de xunu y fasta'l 2 de xunetu, tolos aficionaos podrán votar les dixebraes propuestes presentaes dende la web oficial del festival http://www.folkplasencia.com

El folk asturianu va tar representáu pola Patriband Folk Orl.lestra, nun escaezáis votar por ellos ;-)

III Festival Celta Reinu de Llión

Más propuestes folkis alrodiu de la nueche de San Xuan, si nel casu de Penagos ye pa la fin de selmana siguiente nesti de Lleón ye pa les vísperes de la máxica nueche. Festival que cellebra la so tercer edición con una programación bien interesante, anque prollongar el festival 5 díes con un grupu per nueche parezme estirar la goma un poco muncho, igual yera más efeutivu concentralu nuna fin de selmana con dos bandes per nueche... Ye una opinión personal y cada ún gasta los euros como quier.
El festival abrelu'l miércoles 17 de xunu, mañana mesmo, Awen Magic Land, la banda de Carlos Soto multinstrumentista conocíu pel so pasu pelos Celtas Cortos, embarcáu va tiempu nesti proyeutu personal a metá de camín ente Valladolid y Bretaña. A min nun me dicen gran cosa y barrunto qu'un conciertu d'esta xente tien de ser bien aburríu...
El xueves 18 toquen los locales Gandalf, banda de folk-rock creada nel añu 2000 n'Astorga que tien asoleyáu un discu tituláu Con_Fusión.
El vienres toca-ys pasar pel escenariu de la Plaza Don Gutierre a los nuesos collacios de Los Gatos de Fornu, que siguin presentando'l so estupendu discu Na Cai. El primer platu fuerte del Festival.
Beoga y su animáu direutu sedrán los reponsables d'animar Lleón la nueche del sábadu.
El domingu, pa rematar con un broche d'oru, Fred Morrison, qu'escapa per un día de la so estensa xira asturiana pa tocar na comunidá vecina.

VI Festival San Juan d'El Arenal de Penagos

Entamen a publicitase los festivales folk rellacionaos cola nueche de San Xuan y, dende Cantabria, el collaciu Pablo de la Torriente de Radio Rabel fainos llegar el cartelu del VI Festival San Juan d'El Arenal de Penagos.
Esti festival celebrase la fin de selmana siguiente a la máxica nueche, en concretu'l día 27 de xunu y dende les 8 de la tarde pasucais con Atalaya Soria de Castilla y Lleón; Cote, Almudena López, Saray García y Alfonso Ahumada al rabel; Aura Kuby; los nuesos paisanos de La Bandina La Curuxa, que tan arrasando nel país vecín; y pa finar con Vallarna, ún de los más prestosos grupos de la última fornada salida en Cantabria, anque estos anden a mitá de camín ente Valladolid y Cantabria.
Un guapu plan d'escapada de fin de selmana.

Xira de Fred Morrison per Asturies

Esti mes de xunu vamos poder disfrutar d'una xira que va traer a Asturies a un gran gaiteru, un vieyu collaciu que torna a ésta la so segunda casa. El gaiteru nun ye otru que Fred Morrison, al que va pocos meses pudimos ver na cabera edición del Festival Intercélticu d'Avilés, y la xira va ser la más estensa de les que tien feches pel nuesu país.
Asina, vamos poder sintilu tocar el 17 de xunu en Mieres, el 19 nel Teatru Riera de Villaviciosa, el 20 nos X Alcuentros de Trebolgu, el 23 nuna inédita nueche folk de San Xuan n'Avilés, el 24 nel Taller de Músicos de Xixón y fina'l 26 de xunu n'A Caridá. Esta xira asturiana completase con otres dos actuaciones, una en Lleón el 21 de xunu y otra en Ribadeo el 28.
Toes estes feches tan sacaes del MySpace del gaiteru y trataremos de davos confirmación nes prósimes selmanes.

IV Festival Folk Cantabria Infinita

Yá tan los vecinos del oriente poniéndonos los dientes llargos y enriba de facer un festival d'acoyonar faenlo en San Vicente, al llau de casa, cagüenrós!!!
Bromes aparte, los díes 10, 11 y 12 de xunetu, na guapa villa cántabra de San Vicente de La Barquera va celebrase la IV edición d'un festival que convirtióse de sutrucu nuno de los más importantes del estáu, tamos falando del Cantabria Infinita. Los más espabilaos yá tais al tanto, la conseyería de turismu cántabra apuesta pol folk como reclamu p'atraer visitantes a la comunidá vecina. Esti añu, col cuentu la crisis, de xuru qu'hubo recortes n'otros festivales cántabros pero, nel de San Vicente, que ye'l buque insignia vuelven char otru órdagu.
Asina, el día 10 actuarán Aura Kuby, Rumantela Folk, A Doble Camba, Milladoiro y The Balkan Beat Box. Al otru día, los protagonistes van ser Chema Puente, Mailla, Vallarna, La Bottine Souriante, Celtas Cortos y Red Hot Chilli Pipers. Podemos pone-y tolos peros que queramos pero nos tan comiendo la tostada no que a festivales se refier, nós andamos h.odiendo lo poco digno qu'había n'Avilés y asina mos va...
Falando d'Avilés, a poco más d'un mes de la inauguración del festival anteriormente conocíu como festival Intercélticu d'Avilés, ni conocemos cartelu, ni organizadores, ni programa, ni web... res de res. El xerente de festexos dio dos nomes n'abril y ehí finó too. Un exemplu de lo que ye xestionar un festival declaráu d'interés turístico regional, a ver qu'aficionáu va reservar hotel n'Avilés cuando nun sabe qué va poder escuchar, ni dónde, ni cuándo... Rubenín tas cagándola.
En defensa del xerente de festexos d'Avilés hai que dicir que la web cántabra nun ta actualizada, pero polo menos tienen web...

http://www.festivalfolkcantabriainfinita.es/

Primeros nomes del Intercélticu d'Aviles bis

Yá se van conociendo los nomes de les bandes que van protagonizar l'Intercélticu bis, l'entamáu dende la conceyalía de cultura cola collaboración de dellos grupos folklóricos locales y cola discriminación de los organizadores del Festival, Esbardu.
Va delles selmanes yá salió na prensa local el nome de Liam O'Flynn, que va venir secundáu pola Pipers Call Band, y los bretones Pennoù Skoulm, que van presentar n'Avilés el so nuevu trabayu discográficu tituláu Trinkañ.
Agora nós podemos dar anuncia que The Fraser Fifield Trio y el so folk entemecíu con jazz, van tar tocando n'Avilés el día 19 de xunetu. Nesti formatu de banda'l saxofonista y gaiteru Fraser Fifield acompañase de Graeme Stephen a les guitarres y de Stu Ritchie a les percusiones.

Proyeutu empresarial venceyáu a la Música Celta

Nestos prósimos díes ñaz n'Asturies una nueva empresa venceyada, en parte, cola música folk. Esa empresa ye keltia-art.com
Una tienda llectrónica onde ente otres coses van poder mercase whistles y bodhráns de reputaos artesanos d'Europa y América, bisutería de peltre fecha a mán en Cornualles, llibros d'arte y una escoyeta d'artesanía. Amás, los promotores d'esta tienda confiaron nel qu'esto escribe pa diseñar la imaxe corporativa la empresa y tamién pa incluir un novedosu serviciu d'illustración celta a la carta.
Lo más interesante ye que vamos poder cuntar n'Asturies con una tienda especializada n'instrumentos tradicionales. Munches vegaes retafilé dende esti blogue de la carencia d'iniciatives empresariales alrodiu de la cultura tradicional qu'hai nesti país, güei entama un proyeutu nesi sen. Naguo por nun tar enquivocáu y qu'haiga mercáu pa iniciatives d'esta mena.