De gaites y subvenciones

Munches vegaes nun somos ver les estreches rellaciones que tien la cultura tradicional colos periódicos cambeos de gobiernu, pero habeles hailes. Na vecina Galicia, qu'emponderamos va poco por incluir el folk contemporáneu na programación cultural del nuevu Añu Xacobéu y qu' en seguida un collaciu gallegu féxonos ver que nun yera tan guapo como talantábamos (qué queréis, la yerba'l vecín siempre parez más verde), esti añu tuvo a piques de nun cellebrase'l principal concursu de gaita del país vecín por una d0estes inesplicables vendettes polítiques.
El Concursu Internacional de Gaita Galega Constantino Vellón, con 19 ediciones a xocostrines parez bien afitáu nel panorama de la música tradicional gallega, pero esti añu la Xunta de Galicia, al traviés de la Secretaría Xeral de Emigración, nun dio'l preste pa subvencionar el viaxe de los cuatro gaiteros de la Galicia Exterior que taben invitaos a participar nel concursu, polo que tuvo que suspendese. Agora va cellebrase'l 8 y el 9 de Payares, envede'l 31 d'agostu de costume, gracies al sofitu del Concello de Ferrol y a la Diputación d'A Coruña.

L'Atenéu Ferrolán, la entidá qu'entama'l concursu, yá ta a la gueta de patrocinaores privaos pa garantizar la cellebración de la vixésima edición y pa qu'ésta nun dependa del humor d'un burócrata con ganes medrar na so carrera política.

Lo meyor d'Irlanda visitarános n'Avientu

De xuru que, los veceros de Caxastur, tais fartucos de que vos cobren comisiones por facer cualisquier operación col vuestro dinero. Bono, la entidá bancaria tien a bien devolvenos parte d'eses comisiones colos ciclos de conciertos Música del Siglo XX y, el prósimu mes d'Avientu va facenos un regalu mui especial: un doble conciertu n'Asturies de Guidewires.
Asina, una de les bandes más fresques y orixinales del panorama folk irlandés d'anguañu va presentar en Xixón (17 d'Avientu) y Mieres (18 d'Avientu) el so discu Live, del que yá vos falamos equí va tiempu.
Amás de Guidewires, esti Avientu Caxastur tamién nos va a traer a la escocesa Emily Smith y Tim Edey nel mesmu ciclu de conciertos.

Homenax a The Bothy Band

Dellos de los más afamaos músicos irlandeses d'anguañu andechen pa rendir tributu a The Bothy Band. Asina, va poco más d'un mes, esta esbilla de mayestros, fixo'l so debú en direutu nel Open House Festival col nomatu d'After Hours, otru homenax a ún de los albums señeros de la Bothy. Esti tributu ñaz d'una iniciativa de Kane O'Rourke, que va cuntar dende l'entamu col sofitu d'Alan Burke, a la que van dir sumándose John McSherry, Caoimhin Vallely, Mike McGoldrick, Karan Kasey y Michael McCague, toos ellos músicos que reconocen tener a la música de la Bothy Band ente les sos principales influencies.

Y nun hai meyor homenax pa una banda que reinterpretar el so repertoriu.


Y, yá de pasu, desempolvar los vieyos vinilos pa sentir a los clásicos

Xacobeo Raíces

El prósimu añu vuelve a ser añu santu xacobeu y, ente los actos culturales entamaos dende la Xunta de Galicia pa cellebralu, el folk gallegu contemporáneu va tar mui presente. Delles de les bandes más importantes del país vecín van participar nuna serie de conciertos per toa Galicia, agrupaos embaxo'l nome de Xacobeo Raíces.
Ente les bandes confirmaes nesti cilu de conciertos ta xente tan prestosa como Faltriqueira, Berrogüetto, Luar na Lubre, Susana Seivane, Uxía... La Xunta vuelve remanar la música tradicional gallega como imaxe de marca identitaria como yá fixo otres vegaes y qu'otres comunidaes vecines, como Cantabria, tamién tan entamando a usar pa dinamizar la so industria turística. Dende esti blogue yá tamos fartos de penar, a la gueta de dalguna mente despierta a la que se-y ocurra daqué asemeyáu n'Asturies cola nuestra música de raigañu, pero ¡qué vamos esperar de los que marafundien 300000€ en LAB y conserven (sic) el Prerrománicu con 90000! La consigna ye acabar con tolo que seya asturiano.

Bob Dylan n'asturianu

El cantautor Toli Morilla va presentar, esti vienres a les 20.15, el so nuevu trabayu discográficu nel Nuevu Teatru de La Felguera. Esti discu tituláu Diez cantares de Bob Dylan n'asturianu fai honor al so títulu con diez magnífques versiones n'asturianu autorizaes personalmente por Bob Dylan. Contién canciones mítiques como Hurricane, Knockin' On Heaven's Door o Don't Think Twice It's All Right y ayalgues escondíes como The Man In Me o Sara, arropaes por una gran variedá de músicos y instrumentos. Un discu pa tolos públicos, que nos permite acercanos a esa parte de la obra de Dylan que siempre resultó más inaccesible: les sos lletres.
Bon plan pa la fin de selmana na que parez qu'a la fin va entrar la seronda, un folk distintu.

La Folixa del Tardíu

La Folixa del Tardíu, ta enfotada en facer honor al so nome y sigui ensin confirmar las bandes participantes na nueva edición de Llanes Al Cubo. A 15 díes del eventu la web ta cerrada y namás conocemos dellos datos del festival que pieslla la temporada n'Asturies. Lo poco que sé ye lo que vien darréu:
-Va cellebrase'l 31 d'ochobre y l'1 de payares.
-Va facese un homenax al gaiteru tradicional Ignacio Noriega, nel que va participar Hevia.
-Bandes confirmaes pa'l festival: Dixebra, que va presentar los temes del so nuevu discu Amor Incendiariu; el grupu noruegu-finés Frigg, del que vos dexo un videu embaxo'l post; Toumani Diabaté, cantautor de Mali que va actuar el día 1.
-Bandes ensin confirmar: Oysterband, na so web nun menciona Llanes y tien les feches bastante cargaes de conciertos pa presentar el so nuevu discu, parezme que va ser que non.
Yá sé que ye ranciar pero ¿enxamás vamos ser quién a entamar un festival en condiciones nesti país? Nun pido muncho, con que la web te fecha enantes del festival y les bandes ten confirmaes con un mes d'antelación yá me conformo. Ye razonable ¿non?

Lo meyor de Kíla

La banda irlandesa Kíla, protagonista dafechu del folk irlandés del cambiu de sieglu ta acabante d'asoleyar un doble CD embaxo'l títulu de Lo Meyor de Kíla, nesti trabayu faen un repasu a so estensa carrera carauterizada por entusiasmar en direutu a audiencies de mediu mundiu.
El recopilatoriu, amás d'atropar los meyores temes de la so discografía como banda, tamién escueye temes sacaos del discu grabáu en collaboración col xaponés Oki y de les sos dos bandes sonores, Monkey Soundtrack y la compuesta pala tamién reciente película d'animación francesa The Secret Of Kells.
Pa los que nun siguieran mui de cerca la carrera d'estos irlandeses, esti doble discu, ye una bona oportunidá de facese con un bon resume d'ella.

La Tarrancha, conciertu y discu

La banda asturiana de Ska-fusión La Tarrancha va dar el so postrer conciertu esti sábado 10 d’ochobre xusto enantes d’entrar a grabar lo que va ser el so primer discu de llarga duración.

La oportunidá pa gociar del so directu va ser esti sábado día 10 en “Les feries” de L.lena, onde van compartir escenariu con Los Berrones. Esta va ser la ultima oportunidá pa velos a unos díes de qu’entren en TuTu Estudidiu a grabar el discu qu’agora mesmo tan cocinando nel llar d’ensayu. El discu, asoleyau por Algamar Producciones, va tener por nome “Ó-3-3” (Otrestres) conocida frase coreada pol publico nos conciertos pa pidir mas canciones a los músicos. Siguen con esti nome cliptográficu el xuegu qu’empecipiaran va tiempu col so single “Exit-encia” y la so maqueta “Qlt” (Culete). Nel discu vamos poder disfrutar del mecigayu de sonios que van dir dende los sones del funk, el swing, o’l ragga, a tintes folk, tradicional o pachanga, siempre embaxo la clara llinia del Ska y el Reggae que caracteriza el so personal estilu. Esi estilu ta marcau pola llimpieza nel soniu, pol afalagu al baille, pola bona mezcla de ritmu y melodia y pola busqueda de complicidá col públicu. La banda, que durante munchu tiempu furruló con doce y trece músicos, anque agora ye un grupu d’ocho miembros nel que conviven guitarres, baxu, percusiones llatines y africanes, batería, curdión diatónica, trombón, flautes y voz.

La Tarrancha nun tubo nunca fácil la so xera, y a lo llargo d’estos 7 años d’esistencia tubo los sos problemes debío al gran númberu de músicos que yeren y la dificultá de mantenelos establemente nel tiempu, siendo la mayor causa d’éllo la emigración llaboral por gran parte de los sos miembros. Poro, ta claro qu’esto ye un enantes y un dempues, esti discu ye una forma de pagar una delda col so públicu y con éllos mesmos, ye una apueste pa dir p’alantre y dexar una etapa de dires y venires pa intentar estabilizar el grupu y dir trabayando ca vez mas nun soniu propiu. Nel conciertu d’esti sabado vamos poder disfrutar de temes vieyos y conocios de la banda, otros mas nuevos que vienen mostrando nes actuaciones d’esti branu y dalgún qu’otru estrenu.

I Alcuentru de Pandereteres de Llaviana

Pandereteres d'Asturies, Cantabria y Lleón van aconceyar esta fin de selmana en Llaviana, nun alcuentru entamáu pola asociación cultural El Molín d'Entrialgo. Tovía hai places disponibles nel Albergue de Tiraña p'asistir al alcuentru, pa apuntavos o recibir más info podéis escribir a molindentrialgo@gmail.com