Equí vos ufierto una entrevista fecha al artesán Marcelo Muttis, especializáu en facer Uilleann Pipes, esti arxentín autodidauta ta ganando prestixu na construición d'esti complexu instrumentu.La primera ye una entruga que, de xuru, tas avezáu a responder ¿cómo entama un arxentín a facer gaites irlandeses?
Bien, camiento que la entruga fai referencia al fechu de que n’Arxentina nun tien un tresfondu de cultura Celta Irlandesa, anque hai descendientes d’inmigrantes irlandeses y escoceses nun ye lo mesmo que la gaita gallega o l’asturiana, que la mayoría de los arxentinos tien sentío o visto dalguna vegada. Ye una entruga que cuasi podemos dividir en dos: cómo entamé a facer instrumentos y cómo alcontré la gaita irlandesa. Llevó naguando por facer un instrumentu de vientu dende que tenía 10 o 12 años, cuando m’aficioné pola música tradicional del noroeste arxentín y entamé a tocar el sikus, la quena y la flauta dulce (la que mos enseñaron a tocar na escuela), como yera natural quixi facer les míos propies quenes y sikus, ensin dengún ésitu por razones obvies, un nenu nun pue o nun sabe remanar delles ferramientes, asina que, dexelu y sigui desendolcando otres aficiones (aeromodelismo, costura de delles prendes, talla en madera…). Too eso foi preparándome en dixebraes destreces que, de mano, nun tienen dala cosa que ver unes con otres, que ye de lo que se trata la gaita irlandesa, una montonera de materiales y téuniques de trabayu mui distintes ente sí, pero necesaries pa facer un solu instrumentu.
Per otru llau conocí la gaita irlandesa gracies a un DVD de Riverdance onde hai un solu del instrumentu y namoreme dafechu; tamién na película Titanic foi onde sentí por primer vegada una xiblata irlandesa. Lo siguiente foi algamar un whistle, un instrumentu desconocíu nuna era de música dixital y bandes de “tecláu, guitarra, baxu y batería”. Primero fui quien a desendolcar el whistle y, col tiempu, alcontré los planos d’unes smallpipes esperimentales, más p’alantre fui quien a facer un penny chanter. Asina, un arxentín, entamó a facer gaites y xiblates.
¿Cuánto tiempo lleves dedicándote a ello y cómo te formaste?
Entamé coles xiblates en 1998 y finé’l mío primer practice set nel 2005 y la mío formación foi a base de midir, construir, intentar, perseverar, fallar, fallar, fallar y fallar, y a la fin vencer. Nesta formación aidaron les crítiques de la mío profesora de gaita, de dellos whistlers, información apurría poles persones qu’intervienen nos foros d’internet dedicaos a estos instrumentos… Pero siempre foi información, enxamás una tutela ni un aprendizax, la información sola nun diz nada y muncha xente cola mesma información nun algama los mesmos resultaos, el fechu de qu’esa información se tresforme en daqué granible por sí mesma ye dalgo qu’atribuyo a Dios.
Cuido que viniendo d’un país que, a priori, nun tien una tradición gaitera mui enraigonada tuviste que lluchar con munchos prejuicios ¿cómo reciben los músicos anglosaxones los instrumentos de un maker arxentín?
Jajajajaja!!!! Bueno los anglosaxones nun recibieron entá instrumentos de mió, los españoles foron los pioneros de fe, que creyeron ensín ver, o meyor dicho ensín oyir. Atalanto qu’ún tien que competir onde hai campu llibre y nos países anglosaxones yá tienen munchos makers perbonos, pero equí en Llatinoamérica nun hai. Los que más prexuicios tuvieron foron los argentinos (sí!), somos un país que siempre mira con más almiración y respetu a lo que vien de fuera, pero esos prexuicios fueron frañándose pasín ente pasu, anque entá nun gozó del crédito que me tan dando n’otros países al ver y oyir el mío trabayu. Y… sí, tuve que facer frente a esos prexuicios, pero ye prestoso baltalos gracies a los concocimientos adquiríos y a la experiencia, coses que siempre medren porque ún nun dexa de deprender. Como me dixo David Quinn nun de los nuesos alderiques per email: “Si pienses que nun vas desendolcar constantemente’l to trabayu, búscate otru oficiu”.
Viera na to web que remanes cuasi esclusivamente madera de guayacén ¿qué asemeyances y diferencies tien coles maderes a les que tamos avezaos n’Europa (granadiyu, ébano, buxu)?
Les mayores semeyances son col granadiyu y l’ébanu, yá que, si bien estos caberos y el guayacán nun son de la mesma familia, el guayacán tien una densidá mui asemeyada a la del ébanu y una dureza ensin par, lo que-y da una capacidá mecánica y acústica fabulosa; un acabáu con una veta y granu compautu, firme, brillante con un color que va del marrón escuro abermeyao al marrón cuasi prieto. Tamién hai razones económiques, l’ébanu ye difícil de consiguir equí y sal mui caro, tanto que pa min nun saldría rentable.
Amás de los músicos de la puxante escena celta arxentina ¿d’ú proceden los tos veceros?
Los míos veceros son na so mayoría españoles, nos caberos meses tamién recibí pedíos de dalgún arxentín y de dellos chilenos y brasileños.
Anque tas especializáu en Uilleann Pipes, tamién faes whistles y smallpipes ¿pues falanos un poco de ellos?
Les smallpipes yá nun m’entusiasmen, son instrumentos mui guapos y melgueros, la primer gaita que fixi foi una smallpipe y les míos primeres esperiencies con fuelles, válvules y payueles tan venceyaes a esi instrumentu, pero cuando entamé coles uilleanns dexela de llau, hasta escaecí la so dixitación. Va poco fixi una pa un arxentín de Córdoba, pero sólo como favor personal a un paisanu. Los whistles fáigolos col tubu melódicu de bronce en dos versiones: col xiplu de bronce o de madera, entrambos afinables y nes tonalidaes de Re, Do y Sib. Tamién faigo Low whistles en Re col tubu de bronce pero col xiplu namás de madera, porque ye una costruición más precisa que la del bronce, qu’ameyora l’aprovechamientu l’aire nes notes agudes.
De xuru, a esti altor de la entrevista, yá habrá munchos asturianos interesaos n’oyir y probar dalgún de los tos instrumentos ¿cuánto-ys costaría encargate un de los tos practice sets y que plazu d’entrega tendríes?
Un practice set ensin adornos, ensin blocks nin llaves, col cap de bronce tien un valor de 600€. Anguaño tengo un plazu de 6 meses, porque nel 2009 treslladé’l taller y eso retrasó dellos pedíos al nun poder trabayar nunos meses. A lo llargo’l 2010 el plazu d’entrega dirá baxando.
Por esótico que mos resulte n’Europa, la música celta cunta con bona salú nel Cono Sur y, de xuru, nun yes l’únicu artesán interesáu nes gaites, por exemplu Iván Thaerigen que fae gaites escoceses, igual tú pues danos noticia de más artesanos ¿hailos o sois vosotros dos los pioneros nesti intre?
De uilleann pipes nun conozo, de gaita gallega hai dellos, taba Xesús Mariño que morrió va un par d’años. Fai tiempo tuve contautu con otru artesán de gaites gallegues, pero facíeles por afición. Y hai otros, anque nun los conoza, sé qu’hai dalgún que fae gaites escoceses.
Yá pa finar, prestaríame date les gracies, Marcelo, por dar el preste a facer esta entrevista ¿querríes añadir dalgo más que nun tocáramos?
Prestaríame solliñar qu’ahí un momentu perespecial na construición d’un instrumentu, ye l’intre nel que dexa de ser un pedazo de madera con un furacu en mediu, qu’entá nun tien la capacidá de producir soníu, nin d’afinar, ensin embargu, esa madera yá ye un instrumentu musical y como talo tien que ser tratada, la dureza quedó atrás, yá camudó’l so destín.
Pa contautar con Marcelo o conocer más del so trabayu podéis visitar la so web.
