Jean-Michel Veillon visita Asturies n'Ochobre

Sigún podemos lleer na so web, el xenial flauteru bretón, visitará'l nuesu país del 17 al 23 d'Ochobre, díes nos qu'ufrirá polo menos tres conciertos en llugares entá por confirmar, anque'l del día 17 parez que va ser n'Uviéu y podría tar acompañáu nel escenariu por Xel Pereda, yá fadremos por tenevos informaos d'estes cites.
El músicu de Frehel cuasi que nun necesita presentación, una braera institución na música tradicional de Bretaña que tien tocao en bandes mítiques como Pennou Skoulm, Kornog, Barzaz...
Nagüemos por que se confirmen les feches de los conciertos y podamos sintir la música de la flauta de Jean-Michel bien ceo.

Presencia comercial del folk asturianu na rede: Grupos

Pasamos agora a char una güeyada al llabor desendolcáu polos propios músicos a la hora de comercializar los sos discos n'internet. Los grupos tendrán abondo con ensayar, componer y tocar bona música dirán dalgunos, el trabayu de vender discos nun se-ys puede enxaretar tamién. Ye verdá, los músicos nun tienene porque saber vender CDs, pero visto na cabera entrada'l blogue'l llabor que faen les discográfiques nesi sen, nun-ys queda otra. Si una banda invierte perres, tiempu y trabayu en grabar un discu, cuido que tendría qu'implicase tamién na so comercialización y más nel casu d'un estilu de música minoritariu como'l folk y nun país tan pequeñu como Asturies. Una xestión personalizada de les grabaciones, amestada con una axeitada presencia na rede puede xenerar l'interés de programadores de festivales europeos por enxertar música asturiana nos sos eventos, el naguar por algamar esi oxetivu per un camín tradicional nun ye imposible, pero ye muncho más abegoso.
Camiento que na dómina que tamos poner estes coses por escritu podría resultar fatu, pero la güeyada que chamos a les discográfiques yá mos dio una mocada de rialidá que barrunto va volver repetise. Tar presente en MySpace ta bien, pero camentar que eso ye tolo que tengo que facer pa considerame músicu profesional ye un pocu probetayu. Na mio opinión cualisquier músicu o banda que, polo menos, quiera dar una imaxe de profesionalidá y seriedá tenía que facer por caltener un sitiu propiu internet, actualizáu y con un diseñu afayaízu, complementáu con una activa presencia en redes sociales como MySpace, Facebook o Twitter.
Paso agora repasar la presencia na rede de los principales grupos de folk asturianos:

• Tejedor. Los hermanos Tejedor pasen por ser anguañu una de les bandes asturianes más importantes y con un gráu de profesionalidá más altu, esto traduzse n'internet nuna web propia de diseñu profesional inmeyorable, anque'l nome de dominiu nun ye mui guapu, qu'apurre información de la banda, discografía, muestres d'audio, videos... Pero nun dispón de tienda ellectrónica nin apurre información de como mercar los sos discos. Los Tejes tan tamién en MySpace.
• Felpeyu. Anque tien dominiu propiu puntucom, podemos dicir que la web nun esiste porque tola información que mos apurre ye l'anucia de la publicación de Canteros y el rider. Tienen MySpace.
• Llan de Cubel. Tien páxina web propia, ensin actualizar dende febreru d'esti añu, apurre información del grupu pero'l diseñu ta un poco anticuáu. Nun hai módulu de comerciu ellectrónicu. Los Cubeles deben ser l'únicu grupu d'Asturies ensin MySpace.
• La Bandina. Tienen páxina web propia con un diseñu mui guapu basáu nel del so discu caberu, 13, pero tien dellos fallos formales (el fondu salta cada vez que siguimos un enllaz, el color de la tipografía fae que seya abegosu lleer los testos y lleva más d'un añu ensin actualizar -los conciertos anunciaos son de 2009-). Amás, esta web tien delles coses estrañes, namás ta disponible en castellán, anque parte del menú ta n'asturianu y propón unos enllaces pintorescos. Nun dispón de módulu de comerciu ellectrónicu, nin apurre información de como mercar los sos discos. La Bandina ta presente en MySpace y Facebook.
• Tuenda. Otru grupu que tien páxina web pero que ta ensin actualizar dende sabe dios cuándo, nun hai denguna referencia al so segundo discu. Namás ta disponible n'asturianu y nun dispón de módulu de comerciu ellectrónicu. Tuenda ta presente en MySpace.

Güei voi parar equí, nos prósimos díes seguiré con esta xera, pel momentu equí tenemos 5 bandes de les más conocíes del país, con dellos trabayos discográficos a xocostrines y con un merecíu prestixu ¿la so presencia na rede ta al altor de la so calidá musical?

Presencia comercial del folk asturianu na rede: Discográfiques

Siguiendo l'argumentu desendolcáu na cabera entrada'l blogue, prestaríame analizar cuala ye la presencia comercial de la música folk asturiana nesi gran mercáu mundial que ye internet. Ayeri dixi que yera nula o tercermundista, camiento que foi una afirmación inxusta nel sen de que nun punxe apellíos a tala afirmación y anque, la visión de conxuntu sigui dándome esa impresión probetaya, entiendo qu'hai xente que ta faciendo más qu'otra y, d'ehí, que la mio afirmación seya inxusta. N'esta nueva entrada naguo por ser quien a dar una visión más axustada de la rialidá y, depués, que cada ún saque les sos conclusiones.

Discográfiques:

• Fonoastur. Tien páxina web propia, d'aspeutu bien poco atractivu y arcaicu, ta disponible n'asturianu, castellán y inglés. Nun cunta con muestres d'audio, nin serviciu de descarga d'archivos, nin con tienda ellectrónica propia, nin ufre la posibilidá de mercar contra-reembolsu. Tolo más, los discos tan enllazaos a Asturshop, onde pueden mercase. Nun tien presencia en redes sociales.
  
• L'Aguañaz. Tien páxina web, pero ensin dominiu propiu y, el catálogu qu'ufre, ta ensin actualizar dende hai munchos años. Si'l diseñu de la web de Fonoastur yera poco atractivu'l d'ésta nun tien perdón de dios, la única información qu'ufierta a los veceros ye la carátula'l discu. Nun ta disponible descarga, ni tienda ellectrónica propia, nin serviciu de venta por corréu. Los discos vuelven tar enllazaos a Asturshop. Dende hai unos años esta discográfica pertenez a Ediciones Ámbitu, empresa editorial qu'asoleya'l periódicu Les Noticies, fixe la prueba dende la so web y L'Aguañaz dispón d'una seición na tienda ellectrónica d'Ámbitu pero al nun tener un dominiu propiu queda tapecía ente'l restu de productos de la editorial. Nun hai muestres d'audio de los discos, nun se puen descargar pero, polo menos, puen mercase. La tienda ellectrónica d'Ámbitu namás ta disponible n'asturianu, un castellanufalante pue tener dalgún problema pa buscar y mercar los discos de L'Aguañaz, si'l veceru namás fala inglés sedrá imposible que lo faiga. L'Aguañaz nun tien presencia en redes sociales
  
• Tierra Discos. N'internet nun esiste, por nun tener nun tienen nin un murniu MySpace.
• Grabaciones Pola. Anque nun ta especializada en folk tien asoleyaos dellos discos d'esti estilu y otros venceyaos cola música tradicional. Tien páxina web, con tienda ellectrónica (namás almite'l pagu vía Paypal) y ésta tien una seición de folk. N'esta sigui ensin haber muestres d'audio nin posibilidá de descarga. Nun tien presencia en redes sociales.
• Algamar Producciones. Otra empresa promotora de conciertos y management musical, nun sé hasta que puntu la podemos denomar discográfica, pero tien asoleyáu dalgún discu de folk, como los caberos de La Col.lá Propinde o Skanda. Tien web propia, n'asturianu y en castellán, pero nun hai tienda de denguna mena. Tien presencia activa en redes sociales como Facebook o Twitter.

Eso ye lo qu'hai, nin más nin menos. Dende'l cero absoluto de Tierra Discos a tiendes onde los veceros non asturianos vense obligaos a deprender la nuesa llingua si quieren mercar un discu, pasando per empreses que publiquen discos pero nun nos dicen onde mercalos. Nin una sola posibilidá de sintir el discu enantes de mercalu, nin de descargalu ¿Tan estes empreses asturianes al altor de los tiempos nos que vivimos? Dexovos la entruga abierta, retrucáila vosotros.
Otru día miraremos lo que faen los grupos pa vender los discos.

Ventes de discos n'asturianu en picáu...

La prensa serio del país fala del descensu de ventes de les discográfiques qu'asoleyen música n'asturianu, podéis lleer l'artículu d'El Comercio equí. Yo, depués de lleelu, quedé ablucáu dafechu. Toos persabemos que llevamos dos años de crisis y toos, más o menos, recortamos gastos nel consumu cultural y n'otres estayes, amás, hai que tener en cuenta l'usu d'internet pa descargar y compartir música, ye normal un descensu de ventes comparáu coles ventes de los años 90 del sieglu pasáu.
Agora bien, prestaríame facer delles entrugues ¿tan preparaos los responsables de los sellos discoráficos asturianos p'afrontar esa tresformación del mercáu? ¿Cuántes d'estes discográfiques ufierten descargues de pagu n'internet? ¿Cuántes tienen una tienda ellectrónica pa vender discos físicos? ¿Cuántes tienen una triste páxina web onde d'en anuncia de los sos llanzamientos? Nun voi responder estes entrugues porque, la respuesta que tienen, ye tan murnia y vergoñosa que nun me da pola gana ponela equí.
La presencia comercial de la música n'asturianu na rede ye TERCERMUNDISTA y l'analfabetismu teunolóxicu d'estes empreses ye, polo menos, ablucante. Hai 15 años valía vender discos pelos chigres, güei caltener eso como única canal de distribución ye de tontos. Una web de comerciu electrónicu cuesta 300-500€, igual un grupu non-profesional nun se pue permitir o nun quier facer esa inversión, pero una discográfica... home, por dios!

Cantares con hestoria: The Cruel Sister

Entamo equí una esbilla de cantares que, pa min, resulten fundamentales o, polo menos, mui importantes nos caberos 50 años de la música folk. Nun fai falta dicir que los criterios a la hora de facer esta escoyeta son personales y suxetivos dafechu.
Prestame pola vida entamar con una vieya balada inglesa, la primer versión recoyida ta fechada en 1656, que fala d'una moza que muerre afogada pola hermana por tar namoraes del mesmu home. Col pasu'l tiempu, los restos de la moza afogada son remanaos pa facer un arpa, un vigulín notres versiones. L'instrumentu tien l'habilidá de cantar el crime de la hermana. El cantar ye vieyu y tien munches variantes interpretaes embaxo dixebraos títulos (The Cruel Sister, The Twa Sisters, The Bonnie Swans...). La tema del cantar, los güesos que cunten un crime pa qu'ésti nun quede ensin castigu, ye un llugar común atopable en munchos cuentos tradicionales europeos, los hermanos Grimm tienen recoyida una versión nomada El Güesu que Canta y un poema de Lord Tennyson, tituláu The Sisters, ta inspiráu nesta tradición.
El cantar tien abondes versiones nel folk contemporaniu, foi interpretáu ente otros por Clannad, Loreena MacKennitt, valió pa dar títulu'l discu más tradicional de la mítica banda de folk rock The Pentagle en 1970 y, en 1993, la formación orixinal d'Old Blind Dogs fixo una perguapa versión pa'l so discu Close to the Bone. Son estes dos caberes versiones del cantar les que valen pa illustrar esta entrada.

Folkezblai d'Ermua

El concursu de música folk d'Ermua (Bizkaia) llega a la so quinta edición convertíu nuno de los más importantes del estáu. Los díes 10, 11 y 12 de setiembre los grupos finalistes d'esta edición (Lafra, Stolen Notes, Zamburiel, Keympa, La Camerata Cervantina y Olga y Los Ministriles) van presentar una bona esbilla de la música de raigañu que se ta faciendo anguaño nel estáu español, del folk pancélticu d'Stolen Notes al folk aragonés d'Olga y Los Ministriles, del folk balcánicu de Lafra al pop de tastu celta de Zamburiel. Toos ellos bien sofitaos nel escenariu por delles bandes invitaes, los incombustibles Acetre, los ganadores del añu pasáu Sokaide y la banda ermuatarra de folk-rock Seafóid.
Esti añu nun hai presencia asturiana, anque los sevillanos d'Stolen Notes tienen pieces asturianes nel so repertoriu, pero'l Folkezblai nun dexa de ser un plan bien interesante pa la prósima fin de selmana, tais convidaos.
ÚLTIMA HORA: El grupu asturianu Duerna, primer finalista reserva, entra na final del concursu al renunciar una de les bandes que tenía qu'actuar el vienres.

The Mahones nel Savoy de Xixón

La banda de punk folk irlandés The Mahones va tar esta nueche na sala Savoy de Xixón, nuna velada entamada por Algamar Producciones y na que tamién van tar presentes los asturianos Sambre y Mezá.
The Mahones ye una banda canadiense que nesta xira cellebra 20 años penriba los escenarios de mediu mundu, espardiendo un punk etílicu de raigañu irlandés heriede de la propuesta musical de The Pogues y Shane MacGowan. Pa desgracia de tolos amantes de la música y de tolos chigreros del mundiu Shane MacGowan namás hai ún. De toes formes esta banda canadiense ye una representante bien digna d'esti estilu mui popular en Norteamérica y n'Alemaña.