másquegaites

Stolen Notes: de ganar n'Ortigueira a Tapia

2011-07-24T11:38:00.000-07:00

La banda andaluza de folk célticu Stolen Notes alzóse col primer premiu del concursu folk Runas nel Festival d'Ortigueira, eso fai que seya'l primer grupu confirmáu pa'l festival del añu que vien. Esti trunfu de xuru que-ys supón una gran inyeición de moral cuando tan a piques d'entrar a grabar el so segundo trabayu discográficu. El xuráu del concursu folk, patrocináu por Estrella de Galicia (yá que gasten perres en patrocinar música folk habrá que nomar a la cervecera gallega), destacó la so calidá musical y la seleición de pieces interpretaes polos andaluces.

Pa los que nun los conozáis dicir que, Stolen Notes, ye una banda de folk acústicu, especialmente efeutiva nel direutu, y el so repertoriu ye na so mayoría d'orixe irlandés anque atopamos nél melodíes de tolos países del Arcu Atlánticu. Amás, los aficionaos asturianos vamos tener la oportunidá de conocer la so música en direutu nel prósimu Festival Intercéltico d'Occidente, porque yá tienen confirmada una actuación en Tapia'l 21 d'agostu.

Yá sabéis, tenéis una cita en Tapia col folk célticu que mos vien del sur, dir abriendo boca:

Duerna presenta 'Manca La Maera' en Sama

2011-07-22T08:43:00.000-07:00

Duerna va presentar esti prósimu 24 de xunetu'l so primer discu grande, Manca La Maera, nel marcu de les fiestes de Santiagu de Sama, bien acompañaos por más de 100 músicos enriba l'escenariu. Los llangreanos vienen de ganar el cocursu folk Escenariu Prau en Cantabria y, va poco, presentaron el so videoclip Fiestes de Prau, esta prósima fin de selmana toca presentar el so primer trabayu discográficu tres d'asoleyar hai un par de temporaes la maqueta Dende'l Chigre.

Ente los collacios que van acompañar a Duerna nesta presentación de les fiestes de Sama tanLos Berrones, Dani Álvarez, Melanie Moers, Marisa Valle Roso, la Banda de Gaites Noega, la del Conceyu de Siero y la del Conceyu de Llangréu amás de dellos grupos de baille. De xuru que va entamase una buena folixa en Sama alredor d'esta presentación.

Pa abrir boca Fiestes de Prau

Presentóse'l XV Festival Intercélticu d'Avilés

2011-07-16T01:23:00.000-07:00

Ayeri presentóse nel Centru Cultural Niemeyer la XV edición del Festival Intercélticu d'Avilés, edición dedicada a Irlanda y ta sofitada pola Embaxada n'España de la República, pesie al sofitu del país vecín el presupuestu d'esta edición ye'l segundo más baxo de tola historia del festival. El gobiernu municipal avilesín aporta 11500€ de sovención al eventu que tien la distinción de ser fiesta de interés turístico regional, nun dexa de llamar l'atención la cuantía d'esa aportación cuando tan perdiendo'l culu por taer a Avilés la Semana Negra lo que-ys supondría a les arques avilesines una inversión añal d'unos 200000€. Tamién ye bien llamativo que, na presentación del eventu, la representación institucional municipal cuerra a cargu de los conceyales de la oposición (PP, FAC, IU), el conceyal de Cultura pesie a cobrar 43000€ añales vuelve a nun tar al altor ético que tien que tener un representante de tolos avilesinos.

Gracies a la collaboración desinteresada de grupos y bandes collacies, la organización, vuelve a presentar una programación de 10 díes.No qu'a folk se refier nun vamos alcontrar nomes de grandes bandes internacionales, pero sí un garrapieyu de grupos que nun avecen a tocar per Asturies: la primer fin de selmana va tar n'Avilés el dúo formáu pol gaiteru irlandés Fiachra O'Regan y la vigulinera quebecuá Sophie Lavoie; a lo llargo'l restu'l festival tamién pasarán pel escenariu d'El Carbayedo'l multiinstrumentista llionés Fran Allegre, los salmantinos Folk On Crest, el gaiteru gallegu Fernando Mosquera y so banda (que tienen previstu grabar el conciertu d'Avilés p'asoleyar un DVD), la banda portuguesa Velha Gaiteira y el grupu de folk-rock madrilán Xtramonio.

Como ye costume nel festival, hai una estensa ufierta de música y baille tradicional con agrupaciones de Bretaña, Escocia, Irlanda, Galicia y Asturies. Na programación cultural paralela destaca l'homenax al premiu nobel de lliteratura irlandés Seamus Heaney, que nun va tar n'Avilés por problemes de salú, pero sí la so poesía en voz de la so cuñada, Anne Devlin.

Más info en www.intercelticu.com

Énte la detención de Teddy...

2011-07-02T05:21:00.000-07:00

Nun me queda más que dicir que, si podéis, disfrutái compartiendo bona música colos collacios. Sacái un vieyu discu que nun escucharais dende fai tiempu y redescúbrelu en bona compaña tomando unes cerveces o unos cafés. Fai una copia, pa que t'acompañe nel coche nel trayeutu al trabayu o cuando marches de vacaciones...

Y nun escaezas que, los pirates, son otros.

Finalistes del Concursu Cuartu Los Val.les

2011-06-29T09:46:00.000-07:00

L'asociación cultural El Arbedeiro yá tien selecionaos a los seis grupos finalistes del concursu folk Cuartu Los Val.les, bandes qu'actuarán en Navelgas (Tinéu) los díes 29 y 30 de xunetu. Nesta edición presentáronse 90 formaciones musicales al concursu y foron selecionaes éstes que vienen darréu: John Bolduan, Tarna y Ojos Negros serán los grupos de pequeñu formatu finalistes; Caliu, Lokolé y Yone Rodríguez son los finalistes de gran formatu.

Bandes y músicos de toles partes del estáu, del Congo y Estaos Xuníos van tar presentes na competición musical d'esti añu, quedando nes manes y nel criteriu d'un xuráu formáu por prensa especializada decidir quien son les dos bandes ganadores d'un de los más prestixosos concursos de música folk de los que se cellebren nel estáu español.

El Beltaine preséntase énte los medios

2011-06-18T09:15:00.000-07:00

Ayeri presentóse énte los medios la tercer edición del festival Beltaine Intercéltico d'Avilés, otru añu La Villa va disfrutar de dos eventos rellacionaos cola música tradicional escasos de presupuestu. Munchos taréis pensando: ¿Por qué nun entamen unu curiosu envede dos faltos de perres? Pues porque tamos n'Avilés y Avilés ye diferente. El casu ye que sigún Xuntanza, el coleutivu qu'entama'l Beltaine, el presupuestu d'esti añu ye la mitá del de la cabera edición, una décima parte del presupuestu del primer Beltaine si nun me fallen les matemátiques.

Pesie al recorte, y visto sobre'l papel, la parte musical parezme abondo más interesante que la del añu pasáu, con un cartelu encabezáu pol vigués Carlos Núñez, que yá tocó nel Intercélticu orixinal hai años, y nel que tamién tan Anabel Santiago y les irlandeses Sharon Shannon y Niamh Ní Charra,a les que la prensa nun especializada nun debe conocer porque nómenles de pasada.

Na parte non musical, la organización rescata'l festival gastronómicu de la primer edición asitiándolu esta vuelta nel Parque'l Muelle y nun pudo algamar los permisos p'acompañar los puestos de xinta y bébora con un mercadín artesanal.

Última hora: La Shannon cayó del cartelu, parez ser que por problemes presupuestarios, los Tejes van ser los encargaos de tapar el gran furacu que dexa na programación la curdionera irlandesa :-(

VII Folkomillas con tastu asturianu

2011-06-05T08:56:00.000-07:00

El festival cántabru Folkomillas llega a la so sétima edición, colo que yá podemos falar d'un eventu consolidáu gracies al llabor de l'asociación cultural L'Escanillu. La presente edición tien una importante presencia asturiana, lo que siempre ye d'agradecer, que va materializase nes actuaciones de Corquiéu, P'Amusquis y Duerna que tan acabantes d'algamar el prestixosu concursu de folk Escenariu Prau.

Nós, como nun podía ser d'otra forma, ponemos l'acentu na presencia asturiana pero'l Folkomillas ufierta munches más coses, concursu folk, teatru, mercáu medieval y una montonera d'actividaes culturales que se desendolquen paralelamente al festival folk. Llenar tres díes d'actividaes nun ye una xera que permita improvisaciones y siempre hai qu'agradecer qu'haiga xente que s'enfote en sacar alantre eventos d'esta mena.

La parte musical va tar protagonizada por Muyayos de Raíz, Metal Cambra, qu'actuarán la nueche'l sábadu 18 de xunu xunto con Corquiéu; los cántabros Jorge & David acompañarán a Duerna y P'Amusquis enriba l'escenariu'l domingu 19; la nueche del vienres 17 de xunu cellebrase la final del concursu folk Proyeutu Bígaru, con Keympa, Celtic Maze y Taray comu finalistes.

Más info en www.lescanillu.org

El Xixón 5º40' ta preparando una edición de luxu

2011-05-12T10:29:00.000-07:00

Sigún mos vamos acercando'l branu, vamos conociendo detalles de la programación de los festivales folk que tan por venir. Asina, dende Xixón siguin apostando pol 5º40', una apuesta estratéxica na promoción turística de la ciudá qu'echamos de menos notres ciudaes asturianes con más tradición a la hora d'entamar festivales celtes. El casu ye que Xixón ta faciendo los deberes y cola antelación que requier cualisquier bona planificación, dende equí la nuesa norabona a tolos implicaos na organización d'esi eventu.

El casu ye que yá conocemos 3 nomes, de restallu, de los que van poner la música nel Xixón 5º40', ensin conocer entá la programación d'otros festivales albidramos que va ser mui abegoso que seyan quién a superar al Jacky Molard Acoustic Quartet, a la Mairtin O'Connor Band y a los escoceses LAU. Tres bandes que faen que pague la pena dir hasta Xixón cualisquier nueche d'agostu y que, de xuru, nun van ser les úniques que podamos disfrutar na presente edición del 5º40'.

Y pa dir abriendo boca:

2011-05-05T10:07:00.000-07:00

L’Ayuntamientu de Llangréu y l’Agrupación d’Etnografía y Folclor Reija organicen esta quinta muestra cultural Tolo d’Asturies que va tener llugar los díes 7 y 8 de mayu. Tolo d’Asturies 2011 presenta una montonera actos que, dende primer hora de la mañana’l sábadu, van poner folixa y cultura tradicional nel recintu ferial de la estación central d’autobuses de Llangréu. Demientres los dos díes va desenvolvese’l yá clásicu mercáu tradicional d’artesanía y gastronomía y los talleres pa neñes y neños (animación, xuegos y deportes tradicionales, artesanía…) xunto cola Feria del discu y el llibru n’asturianu y de l’actuación de bandines tradicionales y grupos de baille.

A les 12:00h del sábadu 7 de mayu va tener llugar la inauguración oficial de Tolo d’Asturies cola intervención d’autoridaes y l’actuación de la Banda Gaites Conceyu Llangréu. Darréu d’esti actu inaugural va empezar la venta nel mercáu y l’actuación del gran Jerónimo Granda. A les 22:00 hores va tener llugar el gran conciertu de la feria cultural d’esti añu, l’escenariu de la carpa del recintu ferial va acoyer la música d’Héctor Braga, N’Arba y Los Berrones. Un gran conciertu pa la noche d’esti sábadu con xente de la Cuenca, del valle y la vuelta a los escenarios d’un grupu yá míticu de la música asturiana.

El domingu va siguir l’animación de bandines y grupos de bailles y l’actividá del mercáu dende les 11:00 hores hasta la clausura la feria. A les 13:00 va actuar la Banda Música de Llangréu. N’acabando esta guapa actuación va tener llugar la sesión vermú d’Asturianada con escenariu llibre y la participación de Marisa Valle Roso, . Yá de tarde, a les 18:00 va facese l’homenaxe a la tradición de la pandereta con un conciertu a cargu de Pandereteres de Fitoria y Les Filanderes. Como remate, el gran Xuacu Amieva va dar un conciertu pa pone-y el ramu a esta quinta edición de Tolo d’Asturies que va clausurase a les 21:00 hores del domingu 8 de mayu.

II Romería Tradicional de Primavera en Ciañu

2011-04-28T08:57:00.000-07:00

L’Ayuntamientu de Llangréu, en collaboración cola Asociación de vecinos San Antonio de Ciañu y la Escuela de Música Tradicional del AMPA del Conservatoriu Valle del Nalón organicen esta segunda fiesta de primavera que va tener llugar en Ciañu’l próximu domingu 1 de mayu.

La Romería presenta una montonera actos que, dende primer hora de la mañana’l domingu, van llevar folixa y cultura tradicional per tol distritu llangreanu de Ciañu. A les 11:00h va haber Diana floriada con gaita y tambor, desfile de Xigantes y Cabezudos y disparu de morteros. A les 12:00h va acompañase de música tradicional la misa los domingos. Dempués, a les 12:30 van ponese talleres de baille a lo suelto y de xuegos tradicionales pa neños y neñes nos xardinos del parque Rosario Felgueroso de Ciañu. A les 12:50, y dempués de repartir unes llambionaes ente la xente que participe nos xuegos y talleres, va empezar la Sesión Vermú amenizada polos escolinos de la Escuela de Música Tradicional "Llangréu" amás de Carlos Ronderos, Justino González, Xuan Nel Expósito y l’agrupación coral José León Delestal "El Carmen". N’acabando la sesión, a les 13:30 va tener llugar la segunda edición de Cantando pelos chigres, cola entrega llibros de cantares y ronda pelos chigres de Ciañu. Yá de tarde, a les 18:00h, el parque de Ciañu va acoyer la II ROMERIA DE PRIMAVERA amenizada polos alumnos y alumnes de la Escuela de Música Tradicional "Llangréu" y los sos profesores Anabel Santiago, Chema Fombona, Chus Solis, Hector Braga, Pelayo Fernandez, Pepín de Muñalen y Xose Ramon Navia. Too esto con escenariu llibre y pipa de sidra.

XII Concursu Folk Cuartu Los Val.les

2011-04-26T07:42:00.000-07:00

Yá ta abiertu'l plazu del clásicu concursu folk de Navelgas, qu'esti añu algama la so XII edición. Los grupos interesaos en participar nun de los más prestixosos concursos de música tradicional del estáu pueden unviar les sos maquetes hasta'l 8 de xunu, a:

XII Concursu Folk Internacional Cuartu Los Val.les

Museo del Oro de Asturias

33873 Navelgas

Conceyu de Tinéu

Asturies

Les maquetes tienen qu'incluir cuatro temes y diben dir acompañaes d'un dossier informativu de la trayeutoria del grupu, amás, de los sos datos de contautu. Esti añu, el concursu, vuelve tar dividíu en dos categoríes: grupos de pequeñu formatu (hasta tres componentes) y de gran formatu (con más de tres componentes. Los premios van ser de 1000€, troféu y emisión de conciertu en Radio 3, pa'l grupu de gran formatu ganador (los finalistes tienen un premiu de 600€); na categoría de pequeñu formatu, el ganador, va llevar 500€, troféu y emisión de conciertu en Radio 3 (los finalistes tienen un premiu de 300€).

El 20 de xunu daránse a conocer los tres finalistes de cada categoría y mediránse sobre les tables l'escenariu los díes 29,30 y 31 de xunetu en Navelgas.

Xuacu Amieva presentó'l documental Onde L'Agua Ñaz

2011-04-15T01:50:00.001-07:00

Esti pasáu llunes, 11 d'abril, presentóse nel Cine Felgueroso de Sama de Llangréu'l documental Xuacu Amieva: Onde l'Agua Ñaz, un repasu a la vida musical del multistrumentista d'El Mazucu, figura cimera de la música tradicional asturiana.El documental descúbrenos paisaxes y cantares de la man de xente como Carlos Núñez, Fred Morrison, Tejedor, Lisardo Lombardía, los L.lumerinos de L.lumes o Alberto Fernández Velasco. Grabóse nos conceyos de Casu, Llangréu, Xixón, Cabrales y Llanes, encargándose de la parte téunica Tumismocine y los escolinos de CISLAN.

Senimos nun poder dar anuncia d'esta estrena la selmana pasada, pero nós nun recibimos la nota de prensa hasta esta mesma selmana, polo que nun fuimos quien a asistir a la proyeición del documental nin anuncialu en tiempu y forma. Naguamos por que dempués d'esta premier podamos ver el documental n'otres sales del país.

Tuenda presenta 3

2011-04-13T23:52:00.000-07:00

Esta tarde a les 20.00h Tuenda va presentar el so nuevu trabayu discográficu n'Uviéu, nel Auditoriu'l Maizón. El discu lleva'l títulu de 3 y sigui la filosofía que yá quedó bien nidia nos otros dos discos que yá conocemos, reinterpretación contemporania pero respetuosa de les fontes de la tradición asturiana dando-y un valir añadío al trabayu de campu de los miembros del grupu, n'especial al d'Ambás y el so Archivu de la Tradición Oral. Como diz un collaciu galego, tan nuna operación de rescate y recostrucción de la música asturiana qu'agora algama'l tercer episodiu.

Podéis sintir dellos cortes d'esti nuevu trabayu nel MySpace de Tuenda y, de xuru, qu'esta tarde yá podéis entamar a mercar el discu.

Delles propuestes musicales pa la fin de selmana

2011-04-06T09:26:00.000-07:00

El xueves, como anticipu de la fin de selmana, nel Café Trisquel de Xixón vamos poder ver y oyir a Acuei? un cuartetu formáu por Dolfu R. Fernández, Borja Baragaño, Alberto Ablanedo y Alberto Abad. Como ye vezu nesi local l'actuación entamará sobre les 22:00.

N'El Cafetón d'Avilés la sesión-folk de costume de los vienres va tomar esteroides pa medrar hasta ocupar la nueche'l vienres y la del sábadu. Corzobeyu va ser el grupu encargáu d'abrir esta fin de selmana folk nel chigre avilesín, quedando la música de los rapazos de Verdasca p'amenizar la nueche'l sábadu.

Y en Mieres la Folixa Na Primavera, con Corquiéu y Macadamia'l vienres y La Col.lá Propinde y Blima'l sábadu.

Duerna a la gueta de figurantes

2011-04-02T02:47:00.000-07:00

Duerna anda a la gueta de figurantes pa la grabación del so primer videoclip. La grabación va facese'l prósimu 17 d'abril a les 20:00h nel que foi campu fúbol L'Atarillu, en Formiguera (La Felguera), el rodax va simular un conciertu'l grupu y necesita gran númberu de figurantes, poro, Duerna quier invitavos a toos a que vos paséis per Formiguera a pasar una tarde de folixa con sidra, xinta y la so música.

El cantar que va grabase ye'l tituláu Fiestes de Prau, polo que pal video buscase criar un ambiente de típica romería asturiana. Si queréis collaborar nesta grabación yá sabéis onde tenéis que dir y cuando, los rapazos de Duerna esperen por vosostros.

Conciertos, conciertos, conciertos

2011-03-28T14:19:00.000-07:00

Cola entrada la primavera vamos conociendo nomes y feches de les bandes que van pasar per Asturies nos prósimos meses, diremos dando cumplida noticia de tolos que podamos sigún se van acercando los conciertos, pero nun podemos dexar pasar la ocasión de dir solliñando dalguna fecha pa que vaigáis iguando un calendariu afayaízu:

El 14 d'abril nel Auditoriu Príncipe Felipe d'Uviéu, Tuenda presenta'l so tercer discu, 3.
El 16 d'abril, na Feria Muestres de Xixón, el XXIII Conciertu Pola Oficialidá de la Llingua.
El 28 d'abril nel Teatru Xovellanos, en Xixón, Luar Na Lubre presenta n'Asturies el so caberu discu, Solsticio.
L'11 de xunu nel teatru La Laboral, en Xixón, va cellebrase l'acontecimientu la temporada, 4 hores de la meyor música l'Arcu Atlánticu cola presentación del nuevu discu de Chus Pedro y l'actuación d'Altan y Capercaillie.
El 23 de xunu, na Playa Poniente de Xixón, conciertu Blima & Amigos.

Primeres actuaciones confirmaes del Intercélticu d'Avilés

2011-03-05T04:04:00.000-08:00

Yá va confirmándose la presencia nel Festival Intercélticu d'Aviles de delles bandes y grupos, asina, hai unos díes la organización confirmó que la Bagad bretona de Kevrenn Brest St. Mark diba tar tar presente nel festival avilesín, qu'esti añu algama la so XVª edición.
Na estaya folk del festival tamién s'adelantó dalguna novedá, la presencia del duo irlando-quebecuá formáu pola vigulinera de Lac-St-Jean (Quebec) Sophie Lavoie y pol gaiteru de Connemara Fiachra O'Regan. Xente mozo que yá tien una llarga trayeutoria a xocostrines, asina Fiachra ye All Ireland Champion na categoría senior de gaita y xiblates y, va poco, asoleyó'l so primer discu en solitariu tituláu Aisling Gheal. Pela so parte Sophie tien formáu parte del grupu quebecuá L'Attisée, col que tocó n'Irlanda y Francia nos caberos años. N'Avilés presentarán el so primer discu como Sophie&Fiachra, nel que predomina la música baillable d'entrambos países.
Equí vos dexo una de les sos actuaciones pa la televisión irlandesa

Nuala Kennedy en Xixón

2011-02-28T09:22:00.000-08:00

La flautera irlandesa aporta a Xixón esti xueves, 3 de marzu, pa participar nos conciertos de Músiques del Sieglu XX entamaos por Cajastur. Nesta ocasión la Kennedy visita Asturies acompañada por Myke Bryan a la guitarra y Iain MacLeod a la mandolina, pa otres ocasiones venideres quedará'l disfrutar de la so banda'l completu. Anque cuido qu'aprovechará la visita pa promocionar el so segundo discu Tune In, asoleyáu en 2010 por Compass Records, naguo por que disfrutemos tamién de delles de les pieces, de xeitu más tradicional, que formaron parte del so discu de debú The New Shoes.
El conciertu va cellebrase nel pabellón Luis Adaro del recintu la Feria Muestres a les 20:00 y, como ye vezu, la entrada ye de baldre.

Shaun Davey vuelve a xuntar músiques irlandesa y balcániques

2011-02-22T09:28:00.000-08:00

El compositor irlandés Shaun Davey vuelve fusionar la música irlandesa con músiques de los Balcanes nel so caberu trabayu Voices From The Merry Cemetery, un camín que yá percorrieron otros grandes del folk irlandés nos años 80 y que valió pa fabricar el gran ésitu que punxo la música gaélica nes llistes de superventes, Riverdance.
Shaun Davey, acompañáu polos solistes irlandeses qu'avecen a andechar con él (Rita Connolly, Liam O'Flynn, Gerry O'Beirne...), esplora la música coral rumana coles colloristes cruces del campusantu de Sapinta (el Merry Cemetery del títulu del discu) venceyáu a les ilesies de madera de la rexón de Maramures.
Igual esti trabayu ta un poco alloñáu de la música de la solemos falar equí, pero'l trabayu de Davey siempre caltién una calidá musical enforma alta y, polo menos, interesante.

Corquiéu cuelga la so discografía en YouTube

2011-02-10T10:30:00.000-08:00

La banda de Ribeseya ta acabante d'abrir una canal oficial en Youtube onde punxeron, a disposición de tol mundiu, los sos dos primeros discos (La Barquera y Salia). Nesti intre d'engafentáu alderique sobre los drechos d'autor, iniciatives d'esta mena, ponen enriba la mesa puntos de vista bien alloñaos de los oyimos en boca de los presuntos representantes de los autores y d'otros músicos.
Cuido qu'esti alderique aportó cuánta yá a un puntu absurdu, con señores que lleven años ensin vender un discu cobrando 300000€ al añu a costa de la recaudación de drechos d'autor, mientres músicos de verdá (de los que componen, de los qu'interpreten) malviven trabayando nunes condiciones tercermundistes, tocando en llugares que nun pasaríen denguna inspeición de prevención de riesgos por cuatro perres (dacuando poles consumiciones...). ¿Nun ye hora de poner unes pingarates de sentíu común nesta agarrada? Yo toi fartu de que me cobren una tasa cuando compró un cd virxe por si copió daqué n'él ¿y si nun lo copio? ¿Va devolveme Teddy 15 céntimos?
Pa mi idega la solución yera que los autores, los socios de la SGAE dexaren d'antroxase d'avestruces y dixeren al altu la lleva lo qu'opinen. La creación intelectual tien que tener un beneficiu económicu, ta ñidio, pero esi beneficiu nun pue venir de tratar a tola población como presuntos lladrones. Naguo por que iniciatives como les de Corquiéu o les d'otres bandes qu'editen la so música baxo la llicencia creative commons como La Tarrancha o Xera, tengan continuidá y sirvan d'exemplu de qu'hai otres voces nel coleutivu d'autores estremaes de les de Teddy y otros zombies asemeyaos.

La Tarrancha prepara los conciertos de 2011

2011-01-24T07:48:00.000-08:00

La banda de fusión La Tarrancha, anuncia que tien abiertu el periodu de contratación de cara a esta primavera y branu. La Tarrancha arranca así l’añu pa dir afitando les feches nes que llantará enriba l’escenariu el so particular son, lo qu’ellos va tiempu nomaron “Mecigayu Ska”, una mecigaya d’influyencies sonores que partiendo del los ritmos hamaiquinos del Ska y el reggae van pasándolo pela musica tradicional asturiana a la bretona o sonios mas folkis, a aires llatinos, ensi escaecer otros estilos. Esi son particular y la so puesta n’escena convidando a la folixa, faen que ya sea nun festival grande a un conciertu pequeñu, ya seya n’Asturies o nos otros sitos onde tienen tocáo, como Andalucia, Galicia, Llión, Cantabria, Burgos… el publicu disfrute del primer minutu hasta l’ultimu.

La Tarrancha cunta con delles publicaciones, ente élles el single Exit-Encia, la maketa Qlt? Y el discu Ö-3-3 (otrestres) aparte de la participación nel discu compartíu Rock’n’Lingua y dellos discos compilatorios mas..

Una constante na vida de La Tarrancha ye’l dir y venir de los sos comonentes, y ye que les circustancies llaborales fain que too sea mas abegoso. La ultima ausencia del grupu ye la del baterista Ojeda (tamien bateria del grupu heavy Darksun) que tebo qu’emigrar a Suiza. Esti contratiempu ye lo qu’impide qu’el grupu grabe lo que diba ser el prosimu discu de La Tarrancha y que tenien intención de materializar en primavera. La so ausencia ta sustituyía por Simón, percusionista y luthier bien conocíu nel mundu de la música tradicional y les bandes de gaites, que tendrá la posivilidá de debutar cola banda el día 30 d’esti mesmu mes nel teatru Xovellanos de Xixón.

Una de les peculiaridáes de La Tarrancha ye que les sos composiciones tienen llicencia Creative Commons, y éllos nun pertenecen a la S.G.A.E., ya que nun comparten la so politica recaudatoria na xestión de drechos. Polo que amuesen como reclamu que les entidaes que los contraten tan esentes del pagar dichosu tantu por cinetu a la S.G.A.E. N’esi aspeutu, tola so música ta disponible llibremente y de baldre na rede.

Pa mas información: www.myspace.com/latarrancha

Blima presenta Express

2011-01-21T08:26:00.001-08:00

Blima entama l'añu con discu nuevu, Express (Tierra Discos). Nel nuevu trabayu discográficu afonden nel conceutu musical nel que vienen trabayando de 2006, folk acústicu, elegante y ensin estridencies que fadien la pureza d'arranchos. Igual, nesti Express, garra más protagonismu na parte instrumental el curdión de Marcos Alonso pero, yá vos digo que ye una evolución natural dientro del propiu soníu'l grupu. La sustitución de vocalista, Mapi Quintana por Silvia Quesada, aporta versatilidá nos cantares y delles querencies pol jazz a les que nun tábamos avezaos nel folk asturianu.
Ente los collaboradores de luxu, colos que cunta Blima nel so nuevu discu, destaquen Xurde Fernández a les flautes y l'escocés Martin O'Neill al bodhrán (ganó'l Scots Trad Music Award como meyor instrumentista nel añu 2010).
La presentación oficial d'Express va facese la selmana qu'entra nel Teatru Vital Aza de la Pola L.lena, el día 29 a les 20:30 (la entrada ye de baldre asina que la crisis nun ye escusa pa nun dir). Equí vos dexo un adelantu d'Express, la versión que fai Blima del vieyu cantar de Balandrán "Onde la Mar"

Premios AMAS

2011-01-17T07:54:00.000-08:00

Yá ta abiertu'l plazu pa votar les estremaes candidatures de los premios AMAS, la votación faise dende la web de los premios http://www.premiosamas.com/ y nun requier un rexistru pa emitir el votu, namás tenéis que rellenar el formulariu de votu y depués confirmalu retrucando un email.
Como cualisquier otru premiu hai que dicir que los criterios a la hora de facer les candidatures ye suxetivu, polo menos pa los que nun tamos involucraos na organización y que, na nuesa opinión, nun reflexa esautamente la escena musical d'anguaño n'Asturies y la estaya de música folk o tradicional nun se correspuende col pesu qu'ésta tien, por modesta que seya, nel mercáu musical asturianu.
El casu ye qu'éstos son los qu'hai y los que podéis votar dende yá.

Felpeyu cumple 20 años y estrena páxina web

2011-01-12T07:52:00.000-08:00

Depués de la lloriada d'ayeri tornamos a l'actividá normal del blogue: a falar de música, de músicos. Y qué meyor qu'entamar esti 2011 falando del aniversariu de Felpeyu, ún de los grandes nomes del folk asturianu que cumple 20 años enriba los escenarios y que, de xuru, tien preparáu un balagáu de sorpreses pa festexar esta prestosa efeméride.
La primer sorpresa d'esta conmemoración ye'l remocicamientu de la so imaxe na rede, asina, na direición www.felpeyu.com yá podéis alcontrar el nuevu diseñu de la páxina web oficial de la banda (nesti intre namás ta disponible n'asturianu, pero bien ceo tamién podrá consultase en castellán y inglés). Perinteresante resulta'l trabayu de recopilación de semeyes que ta faciendo la banda, pa resumir los sos 20 años d'hestoria, y pa la que pidi la collaboración de tolos aficionaos que-ys puean apurrir semeyes d'actuaciones y conciertos.
Amás del remocique de la web, Felpeyu, ta tamién acabante d'estrenar blogue nel qu'informarán de les noticies más inmediates de la banda. Entá nun hai muncha información, pero habrála nel futuru. Tamién la so presencia nes redes sociales va medrar cola apertura d'una páxina oficial en Facebook, amás de caltener el so MySpace qu'hasta agora yera la canal de comunicación principal de Felpeyu n'internet.

Intentaremos caltenevos informaos de toles novedaes referíes col 20º aniversariu de Felpeyu de les que vayamos teniendo noticia.

Mein Kampf 2011

2011-01-11T08:32:00.000-08:00

Tres del parón nadaliegu tornamos tresformaos polos nuesos democráticos representantes en militantes d'estrema derecha ¡Qué-ys vamos facer! Resulta qu'agora, pa la FSA-PSOE, el sentise arguyosu de ser asturianu ye sinónimu de ser ultraderechista, por ende, esti blogue, enfotáu n'esparder la música de raigón asturiana y el trabayu de los músicos asturianos, debe ser un mediu de la propaganda nazi...
Nun dexen de ser unes declaraciones absurdes feches por un bobu (el que diz bobaes ye eso, un bobu), el problema ye qu'esi bobu ta rodeáu de munchos más bobos y bobes como él y qu'esa reciella de borregos y borregues tienen secuestráu esti país dende hai 30 años. Décades de desanicíu'l texíu industrial d'Asturies, llustros d'esterminiu cultural, años de sindicalismu vertical y mediocridá intelectual antroxada de socialdemocracia... Igual hai que sentise arguyosu d'eso pa ser d'izquierdes, nós, illetraos facistes nun somos quién a atalantalo.
Nun quiero finar esta entrada del blogue ensin entrugar que, si somos un país d'ultraderechistes y nazis (porque cuasi toos -toos menos Lastra- tamos más o menos arguyosos de ser asturianos) y el partíu políticu que gana toles elleiciones n'Asturies ye'l PSOE... Entós, ellos, tamién son ultraderechistes y nazis ¿non?

Raigaños Celtes

2010-12-08T09:32:00.001-08:00

Asina se llama'l proyeutu educativu multidisciplinar, Celtic Roots, que ñaz de la collaboración ente tres colexos de primaria de Galiza, Eire y Reinu Xuníu alredor de los raigaños celtes que comparten. Esa collaboración plasmase agora nun CD y DVD que recueye cantares tradicionales de los países que participen nel proyeutu interpretaos polos neños y neñes de los colexos Humberto Juanes de Nigrán (Galiza), St Croonan's School de Bray (Eire) y St John's Catholic Primary School de Manchester (Reinu Xuníu). Aidando y asesorando na parte musical del proyeutu alcontramos a tres grandes del folk célticu internacional Xosé Manuel Budiño, Dónal Lunny y Michael McGoldrick, amás d'una llarga riestra de músicos tradicionales de los tres países que collaboren na ellaboración del discu (Rodrigo Romaní, Ed Boyd, Pancho Álvarez, Graham Henderson, Emma Sweeney, Antón Seoane, Angela Durkin...) .
El proyeutu materializáu en un CD-DVD sal a la venta'l prósimu 11 d'avientu asoleyáu por Pai Música.

DRD llega a Xixón con convidaos

2010-11-30T09:32:00.001-08:00

DRD aporten a Xixón esti xueves, de la man del ciclu de conciertos Músicas del Siglo XX entamáu por Cajastur. La cita, yá vos digo, ye nel pabellón Luis Adaro na Feria Muestres pero, como la cita ye especial, lleguen con un convidáu perimportante llegáu de la Bretaña: el flauteru Sylvain Barou.
El bretón vuelve a Asturies depués de la so presencia nel mes d'agostu nel Xixón 5.40º con Comas, esta vegada p'andechar colos sos collacios de DRD. Prestosu plan de xueves, si la ñeve mos dexa salir de casa...

Les VPipes fáense n'Asturies

2010-11-21T06:37:00.000-08:00

Güei, el periódicu La Nueva España, asoleya un artículu sobre la participación de la empresa xixonesa Prodintec nel desendolcu de la gaita ellectrónica Vpipes. Pa los que nun ten familiarizaos con esti instrumentu dicir que, la VPipe, ye un proyeutu nel que se vien trabayando dende va tiempu y que ta teniendo un importante siguimientu nel mundiu de la uilleann pipe, lo que yá ye una novedá porque ési ye un ámbitu abondo refractariu a tolo que se salga de lo tradicional. Les VPipes tienen algamáu esi interés gracies a la calidá del so soníu y a la versatilidá del instrumentu ellectrónicu a la hora d'emular la espresividá de la uilleann (popping, portamento, vibratto) con un realismu nun algamáu n'instrumentos ellectrónicos precedentes.
La empresa creadora de la VPipe, desendolcada d'entamu como clon cibernéticu de la gaita irlandesa, ta preparando versiones ellectróniques d'otres gaites (gallega, asturiana, escocesa) y de whistle. Vistes les prestaciones del so primer proyeutu (yá disponible por 1290€), los nuevos nun tendríen que ser mui abegosos al ser instrumentos muncho más cenciellos que la uilleann.

Conciertu n'Avilés del tríu bretón Latira

2010-11-09T23:15:00.000-08:00

El vienres día 12 de payares, a eso de les 22:30 va cellebrase otru conciertu n'El Cafetón (Cai El Sol, Avilés). Nesta ocasión los protagonistes van ser un grupu bretón nomáu Latira, embaxo d'esi nome axúntense trés músicos mozos de la Bretaña con muncha esperiencia al llombu y que, tres conocese en Nueva York, formaron esta bandina qu'aporta agora a Asturies. Asina, anque los nomes nun vos digan muncho d'entrada, Morgane, la curdionera, tien ganao'l premiu de Meyor Curdionera del Festival de Lorient; François, el percusionista, tien ganaodos campeonatos de Bretaña cola Bagad de Auray (Kevrenn Arle); y Nicolas, foi Penn Sonneur de la Bagad Lann Bihoué. Mozos sí, pero con un bon curriculum.
A priori, un plan interesante pa esti vienres de seronda. Tais convidaos.

Viaxe musical con Luis Delgado

2010-11-04T00:28:00.001-07:00

Mañana vienres el músicu madrileñu Luis Delgado va dar un alderique-conciertu nel Muséu Alfercam d'Avilés. La tema propuestu pa esta cita ye la de facer un viaxe al traviés de la intrahestoria d'una esbilla d'instrumentos tradicionales de dixebraes partes del mundiu.

Músicu d'impresionate curriculum, miembru de bandes cimeres del folk del estáu español como La Musgaña, Cálamus, Finis Africae o Babia y con más de vente discos asoleyaos como solista. Luis Delgado caltién amás una de les meyores coleiciones europees d'instrumentos tradicionales con más de 1200 referencies, 600 de les cuales tan espuestes nel so muséu d'Uruñea (Valladolid). N'Avilés axunta entrambes actividaes, músicu y coleicionista, pa interpretar música con dellos de los instrumentos de la so coleición y pa falanos de les lleendes y tradiciones venceyaes con cada ún d'esos instrumentos, un plantegamientu orixinal pa acercanos a otres cultures y a otres músiques. La cita sedrá mañana vienres, 5 de payares, a les 20.00 hores nel Muséu Alfercam d'Avilés.

Promoción de conciertos

2010-10-28T15:01:00.000-07:00

Estos caberos díes tuvimos dalgo revueltos por mor de les reflexones del promotor Béznar Arias publicaes na prensa rexonal (podéis lleer l'artículu completu na cabera entrada de Másquegaites). Nel artículu'l promotor avilesín fala un sobredimensionamientu de la escena folk n'Asturies, que sigún él tien una repercusión mediático que nun se correspuende cola realidá oxetiva y cuantificable de, por exemplu, les cifres d'asistencia a conciertos. Estes reflexones tuvieron abonda repercusión ente músicos y aficionaos asturianos, poco avezaos a escuchar verdaes que resulten incómodes.
Ente la xente cola que yo falé hubo disparidá d'opiniones, pero en xeneral pueo dicir qu'esti escritu mancó. Munchos entendieron que yera un cabréu del promotor por nun algamar los resultaos esperaos cola actuación de Milladoiro n'Avilés, y retrucaron en base a esi conciertu. El preciu la entrada y el grupu gallegu, que ye un grupu que nun tien el tirón d'otres bandes y que nos caberos años tocó bien de vegaes n'Uviéu, fueron les razones más esgrimíes pa esplicar la baxa asistencia de públicu.
Personalmente camiento que quedar ehí ye quedase namás n'anécdota, pienso que Béznar aprovechó la oportunidá que-y dio'l conciertu de Milladoiro pa dar un repasu más xeneral a la promoción de conciertos folk n'Asturies y que, anque nos manque, fae unes reflexones bien interesantes de les que podemos sacar provechu. L'asistencia a conciertos de pagu ye bien probe, munches vegaes vas a conciertos nos que cuides que nun vas poder entrar y hai cuatro gatos, nun pasa namás nos entamaos por Béznar Arias ye más corriente de lo que mos prestaría ¿Tienen les sovenciones y los conciertos de baldre la culpa? En bona parte camiento que sí, nos caberos años tamos acostumaos a que mos visite una bona montonera de grupos importantes a lo llargo l'añu, les más de les vegaes p'actuar nos ciclos de música entamaos por Cajastur, conciertos que son siempre de baldre; nel branu son les arques municipales les que s'encarguen de surtinos de más música que tamién ye de baldre.
¿Y que problema hai en tener munchos conciertos de grupos interesantes y de baldre taréis pensando? A priori nun hai dengún problema, pero toa esa ufierta de música, a coste cero, afuega a los promotores privaos qu'arriesguen el so dinero n'entamar conciertos de folk ¿quién va pagar por daqué que me regala la Caja o l'Ayuntamientu? Naide. El problema vien cuando esi dinero público escosase, yá nun hai promotores públicos y los privaos dedíquense a traer a Bisbales y Oreyesdevangogh, que son los que dan perres y el folk déxenlo pa los entendíos, porque tan cansaos de perder perres con él. Podemos decatanos de que esti branu, por exemplu, la calidá y la cantidá de los conciertos baxo y muncho. El recorte de gastu públicu foi brutal y, de xuru, l'añu qu'entra va ser igual o pior, ehí ta'l Beltaine que pasó de 350.000€ a 60.000€ esti añu. Nun ye que les sovenciones me parezan mal o bien ye que tienen fecha de caducidá, va reducise dafechu'l númberu de conciertos y el númberu de grupos locales que viven única y esclusivamente de les perres de los ayuntamientos, sinon al tiempu.

Naguo por que siga habiendo xente qu'arriesgue les sos perres en traer grupos de folk a tocar a Asturies, de xuru que nun van ser los que yo traería, pero polo menos vendrá daquién. Pa finar, unos videos de xente que vieno a tocar a esti país de repunantes de la man de Béznar Arias, anque igual munchos nun s'enteraron...

¿Milladoiro?

2010-10-26T10:19:00.000-07:00

Güei reproducimos equí la columna qu'escribió Béznar Arias en la edición avilesina de La Nueva España, nella espón les sos impresiones del conciertu de Milladoiro del pasáu vienres. Nun les comparto al 100% pero alcuéntroles bien interesantes:

El pasado viernes se celebró un concierto de magnitud en el auditorio de la Casa de Cultura de Avilés, dentro del ciclo Avilés Arte Sonoro. Los protagonistas eran la banda gallega «Milladoiro», una leyenda del folk gallego, nacional e internacional. Nada menos que 28 años después de estar en Avilés, en la programación del Día de Asturias. Los que allí estuvieron parece que se lo pasaron muy bien, a juzgar por los interminables aplausos canción tras canción. Y los que les vimos desde su llegada hasta su marcha podemos dar fe de que estuvieron a gusto en el concierto y disfrutaron de su estancia en Avilés. El auditorio registró una entrada discutible -medio aforo-, que para un novel grupo estaría más que bien, pero no así para una banda del nivel internacional que tiene «Milladoiro».
El que suscribe no suele a posteriori de los conciertos analizar el porqué de la mucha o poca afluencia, entre otras cosas porque lleva por bandera el respeto total a aquello de la «soberanía popular» a la hora de ir o no a un concierto. El que nos ocupa tiene otro justificable, otro análisis profundo que creo merece la pena desarrollar aquí. Bien es verdad que estas cosas no me cogen por sorpresa, lo reconozco, porque ya he vivido, y en algunos casos -conciertos de Kathryn Tickell, Tejedor, Phil Cunningham & Aly Bain...- sufrido la indolencia de un público enormemente entendido, que dispara con toda su energía en los chigres, pero que no acude como debiera a los conciertos; bien porque su economía no se lo permite, o porque tiene miedo a que yo me haga más rico aún de lo que soy. Pero con gran sapiencia folkera estos elementos analizan, y dan lecciones casi metodológicas de éste u otro grupo, músico, festival, etcétera, etcétera...
En nuestra ciudad todos sabemos del arraigo tremendo que tiene la música folk; no es necesario que yo recuerde aquí las citas musicales que año tras año desbordan de concurrencia las calles de Avilés. Todo un peregrinar de músicos venidos de los llamados países celtas, hoteles a rebosar, críticos musicales entendidos en la materia, managers con enormes agendas de importantes artistas, músicos asturianos de primerísimo orden mundial y prestigio y, cómo no, las decenas y decenas de amantes, patriotas y defensores a ultranza de lo denominado como «... lo nuestro»; bla, bla, bla... Pues miren ustedes, justo cuando aterriza en Avilés una banda de la categoría internacional de «Milladoiro», todo lo anterior se queda en «ná». Uno se pregunta dónde están todos esos entendidos de barra fija... «llámese chigre», esos críticos especializados que saben más que nadie, esos músicos de primera... esos defensores a ultranza de «lo nuestro». Pues eso, «ná de ná».
Quizás ese boom folkero, que a mi entender es más bien un bluf dependiente por castigo de la subvención, hace años para bien y ahora para mal, ha estado alimentado por suerte para ellos por la prensa en general, de una manera un tanto sorpresiva... yo diría que desmesurada. Estoy seguro de que con el tiempo serán muchos los que confiesen... «yo sí estuve en ese concierto de "Milladoiro"...». Pues sí, claro, aunque eso me haga recordar aquel concierto de 1999 en el Don Floro de unos desconocidos «Amaral», del que sólo logré vender 37 entradas, y ahora, con el paso del tiempo, sean más de 500 los que presumen en voz alta de haber estado allí.
En fin, cosines de Avilés que merez la pena contar.

Gracies a Béznar por dame'l preste pa reproduciles en Másquegaites.

Pequeños grandes conciertos

2010-10-23T04:48:00.000-07:00

D'un tiempu p'acá tan popularizándose n'Asturies los conciertos de pequeñu formatu, cuasi que domésticu. Un par de músicos tocando, les más de les vegaes ensin amplificar, nun chigre ablucando a munchos veceros qu'entraren a tomar daqué y alcuéntranse con un inesperáu conciertu. Ye un formatu más venceyáu cola tradicional jam session llibre, na que cada cual toca lo que quier o sabe, que colos conciertos n'auditorios o n'escenarios al aire llibre del branu. Los protagonistes tan a ras de suelu, sentaos al llau del públicu que los foi ver tocar (a los que yá tienen ganaos enantes d'entamar) y tamién al llau d'esa xente qu'aporta'l chigre a tomar una cerveza y a aldericar colos collacios. Los músicos sienten el veredictu'l públicu nel mesmu intre, darréu, col silenciu respetuosu de los parroquianos énte la so música o col burbúx arrogante de les falucaes de los qu'inoren la so interpretación.
Nun sé, a min ye un formatu de conciertu que me presta enforma, una bona alternativa a otros onde la interaición ente públicu y músicos ye más abegosa. N'Asturies lleven faciéndose conciertos d'esta mena munchu tiempu nel Ca'Beleño o nel Trisquel, pero anguaño más chigres tan animándose a entamar estes velaes de música tradicional (El Cafetón n'Avilés, El Corquiéu en Ribeseya, El Cuévano en La Pola...) lo que quier dicir que ye interesante pa los chigreros y pa los músicos, amás de prestosu pa los aficionaos al folk como nós.
Nos caberos meses pudimos ver n'Asturies tocando en conciertinos d'esta mena a xente como Pat Kilbride, Paddy Keenan, Sylvain Barou, Chick McAuley, Jean-Michel Veillon... grandes nomes del folk célticu internacional a los qu'habría qu'axuntar los de dellos grupos del país. Nun sé, perdayures sientes falar de la crisis nel mundiu de la música por mor del puxu la piratería y, al mesmu tiempu, podemos ver tocar a estos grandes músicos nun espaciu tan ñatural pa la música tradicional como los chigres. Abultame melgueramente paradóxico.

Fonte Fuécara presenta nuevu trabayu discográficu

2010-10-21T09:52:00.000-07:00

La banda de gaites Fonte Fuécara presenta esti sábadu, 23 d'ochobre, el so nuevu trabayu discográficu entituláu Caltener, na Escuela de Música Tradicional de Llanera a les 19:30. Nesti eventu van tar acompañaos nel escenariu pol flauteru bretón Jean-Michel Veillon y Xel Pereda. El miembru de Kornog participó, amás, na grabación del propiu discu Caltener tocando la bombarda en dalgún corte.
Amás de Veillon, nos créditos del discu Caltener, vamos atopar una bona montonera de nomes perconocíos del folk asturianu qu'andecharon na grabación y charon el so gabitu pa qu'esta grabación nun fuera'l típicu CD de banda de gaites sinon dalgo más venceyáu al folk. Ehí vais atopar a xente como Lisardo Prieto (que ye tamién el productor d'esti discu), Héctor Braga, Sergio Rodríguez, Chus Pedro, Rubén Bada y dalgún más.
Esti Caltener ye'l cuarto trabayu discográficu d'esta formación que ñaciera nel añu 1979, trés los anteriores Faciendo Estaya (1997), Remanecer (1994) y la que fuera la primer grabación asoleyada por una banda de gaites asturiana, una cinta publicada pola compañía Dial en 1990. Si nun toi mui enquivocáu debe ser la banda de gaites más prolifica d'Asturies no que se refier a trabayos publicaos, naguo por que la presentación seya un ésitu y por nun tardar muncho en poder sintir esti nuevu discu.

Fnast.net retoma l'actividá

2010-10-19T13:13:00.000-07:00

Vuelve a l’actividá la publicación dixital sobre’l panorama musical fechu n’Asturies, Fnast.net. Tres d’un parón de cuatro meses, esti proyectu informativu afirma que regresa “porque ye necesariu que Fnast.net exista”.

Esti portal web, que tien por oxetivu puxar pola música fecha n’Asturies y convertise nun puntu d’alcuentru pa los músicos y públicu asturianos, anunció que setiembre diba ser el mes pa volver a l’actividá; pero dellos problemes técnicos fixeron qu’hasta’l llunes 18 d’ochobre nun arrancara otra vuelta. “Foi un descansu pa garrar fuerces, pa facer cambios y, sobre too, pa reafirmanos na opinión de que ye necesariu que Fnast.net exista”, declara Xicu Ariza, coordinador d’esti proyectu que regresa con cambiu de diseñu y d’estilu. Amás, xunto a estayes tradicionales como “noticies”, “opinión”, “cróniques”, “actualidá social” o “descargues” van presentase más novedaes y collaboraciones a lo llargo d’esti 2010.

Dende Fnast.net camienten que n'Asturies “tenemos una escena musical con capacidaes pero, por desgracia, sufrimos d’unes instituciones públiques y unos medios mayoritarios que tapen los oyíos cuando suena’l son fechu n’Asturies”, a la par qu’esponen que “ye necesaria la creación d’espacios, d’iniciatives, de puntos d’alcuentru, onde la música fecha n’Asturies calténgase viva y garre’l puxu necesariu p’algamar la dignidá que se merez”.

Pa trabayar nesa dinamización y dignificación del panorama musical fechu n’Asturies regresa Fnast.net. Dende’l día 18, la información de l’actualidá sonora asturiana n’estremaos ámbitos (rock, folk, hiphop, metal, hardcore…) tien otra vuelta’l so abellugu na rede.

Izhpenn12. Erik Marchand & Kreiz Breizh Akademi

2010-10-17T13:24:00.000-07:00

Izhpenn12 ye una banda formada na Kreiz Breizh Akademi. La segunda formación que sal d'esti proyeutu de formación profesional musical ñacíu nel añu 2003, baxo la direición pedagóxica d'Erik Marchand, na Kreiz Breizh Akademi (KBA) alcuentren abellugu músicos de 20 a 30 años, a los que formen a lo llargu de 36 meses nes regles d'interpretación de la música modal y la música tradicional bretona.
Izhpenn12 debuta discográficamente con esti CD homónimu asoleyáu en 2010, y failo esplora ndo les conexones ente la música tradicional de la Baxa Bretaña y les del Mediterráneu y el Oriente Prósimu, rescamplando'l protagonismu de los istrumentos de cuerda. Un camín que yá tienen caleyáu otros músicos bretones pero que nun dexa de ser interesante y que, equí, ta executáu con gran perfeición téunica y elegancia. Personalmente lo que más me presta d'esti discu ye la voz de Klervi Riviére y Faustine Audebert.
Equí tenéis una amuesa de la música d'Izhppenn12

Milladoiro d'aniversariu n'Avilés

2010-10-13T07:26:00.000-07:00

Va ser el prósimu vienres, 22 d'ochobre, cuando la llexendaria banda gallega Milladoiro s'acerque hasta Avilés pa facenos partícipes de la xira que cellebra los sos 30 años enriba los escenarios. Trés décades, vente trabayos discográficos asoleyaos y parez que foi ayeri cuando entamara too nel Colexu Salesianos d'A Coruña, onde dieran el so primer conciertu nel añu 1979. Nestos 30 años Milladoiro percorrió'l mundiu amosando la bayura de la música tradicional gallega y abriendo oreyes a la música celta fecha na Península Ibérica. Aporten agora a Asturies, onde tienen tocao munches vegaes, na so xira Desde Maeloc, que m'abulta tien un tastu a despedía o polo menos puntu y a parte na llarga carrera del grupu.

La cita ye nel Auditoriu de la Casa la Cultura avilesina y ta enxerta nel ciclu Avilés, Arte Sonoro qu'entama NorteSur Records de la man de Béznar Arias. El preciu la entrada son 15€ y éstes tan disponibles nel Don Floro n'Avilés, Discos Piraña en Xixón y El Último Mono n'Uviéu, amás de na rede de caxeros de Caxastur al traviés de Tiquexpress, el día del conciertu tarán disponibles nel propiu Auditoriu por 18€.

Fernando Largo déxanos a los 50 años

2010-10-11T08:50:00.000-07:00

Con 50 años cumplíos dexó esti mundiu Fernando Largo, músicu, dibuxante, chigreru y qué sé yo cuántes coses más. Güei la música asturiana ta de llutu por ún de los fundaores de la mítica banda de folk Beleño, que ye equivalente a dicir fundaor del folk asturianu contemporaniu.
Facer un repasu a la so obra ye una xera que-y bien grande, mui grande al qu'esto escribe y qu'entamó a sintir la música de la que vos falo n'esti blogue de la mano d'esti home y el so programa de radio Gaitas, Arpas y Zanfonas. Sintamos la música que mos dexó n'herencia como homenax a la so vida, que mos abultó bien corta...

Jean-Michel Veillon visita Asturies n'Ochobre

2010-09-22T09:29:00.000-07:00

Sigún podemos lleer na so web, el xenial flauteru bretón, visitará'l nuesu país del 17 al 23 d'Ochobre, díes nos qu'ufrirá polo menos tres conciertos en llugares entá por confirmar, anque'l del día 17 parez que va ser n'Uviéu y podría tar acompañáu nel escenariu por Xel Pereda, yá fadremos por tenevos informaos d'estes cites.
El músicu de Frehel cuasi que nun necesita presentación, una braera institución na música tradicional de Bretaña que tien tocao en bandes mítiques como Pennou Skoulm, Kornog, Barzaz...
Nagüemos por que se confirmen les feches de los conciertos y podamos sintir la música de la flauta de Jean-Michel bien ceo.

Presencia comercial del folk asturianu na rede: Grupos

2010-09-14T10:56:00.000-07:00

Pasamos agora a char una güeyada al llabor desendolcáu polos propios músicos a la hora de comercializar los sos discos n'internet. Los grupos tendrán abondo con ensayar, componer y tocar bona música dirán dalgunos, el trabayu de vender discos nun se-ys puede enxaretar tamién. Ye verdá, los músicos nun tienene porque saber vender CDs, pero visto na cabera entrada'l blogue'l llabor que faen les discográfiques nesi sen, nun-ys queda otra. Si una banda invierte perres, tiempu y trabayu en grabar un discu, cuido que tendría qu'implicase tamién na so comercialización y más nel casu d'un estilu de música minoritariu como'l folk y nun país tan pequeñu como Asturies. Una xestión personalizada de les grabaciones, amestada con una axeitada presencia na rede puede xenerar l'interés de programadores de festivales europeos por enxertar música asturiana nos sos eventos, el naguar por algamar esi oxetivu per un camín tradicional nun ye imposible, pero ye muncho más abegoso.
Camiento que na dómina que tamos poner estes coses por escritu podría resultar fatu, pero la güeyada que chamos a les discográfiques yá mos dio una mocada de rialidá que barrunto va volver repetise. Tar presente en MySpace ta bien, pero camentar que eso ye tolo que tengo que facer pa considerame músicu profesional ye un pocu probetayu. Na mio opinión cualisquier músicu o banda que, polo menos, quiera dar una imaxe de profesionalidá y seriedá tenía que facer por caltener un sitiu propiu internet, actualizáu y con un diseñu afayaízu, complementáu con una activa presencia en redes sociales como MySpace, Facebook o Twitter.
Paso agora repasar la presencia na rede de los principales grupos de folk asturianos:

Tejedor. Los hermanos Tejedor pasen por ser anguañu una de les bandes asturianes más importantes y con un gráu de profesionalidá más altu, esto traduzse n'internet nuna web propia de diseñu profesional inmeyorable, anque'l nome de dominiu nun ye mui guapu, qu'apurre información de la banda, discografía, muestres d'audio, videos... Pero nun dispón de tienda ellectrónica nin apurre información de como mercar los sos discos. Los Tejes tan tamién en MySpace.
Felpeyu. Anque tien dominiu propiu puntucom, podemos dicir que la web nun esiste porque tola información que mos apurre ye l'anucia de la publicación de Canteros y el rider. Tienen MySpace.
Llan de Cubel. Tien páxina web propia, ensin actualizar dende febreru d'esti añu, apurre información del grupu pero'l diseñu ta un poco anticuáu. Nun hai módulu de comerciu ellectrónicu. Los Cubeles deben ser l'únicu grupu d'Asturies ensin MySpace.
La Bandina. Tienen páxina web propia con un diseñu mui guapu basáu nel del so discu caberu, 13, pero tien dellos fallos formales (el fondu salta cada vez que siguimos un enllaz, el color de la tipografía fae que seya abegosu lleer los testos y lleva más d'un añu ensin actualizar -los conciertos anunciaos son de 2009-). Amás, esta web tien delles coses estrañes, namás ta disponible en castellán, anque parte del menú ta n'asturianu y propón unos enllaces pintorescos. Nun dispón de módulu de comerciu ellectrónicu, nin apurre información de como mercar los sos discos. La Bandina ta presente en MySpace y Facebook.
Tuenda. Otru grupu que tien páxina web pero que ta ensin actualizar dende sabe dios cuándo, nun hai denguna referencia al so segundo discu. Namás ta disponible n'asturianu y nun dispón de módulu de comerciu ellectrónicu. Tuenda ta presente en MySpace.

Güei voi parar equí, nos prósimos díes seguiré con esta xera, pel momentu equí tenemos 5 bandes de les más conocíes del país, con dellos trabayos discográficos a xocostrines y con un merecíu prestixu ¿la so presencia na rede ta al altor de la so calidá musical?

Presencia comercial del folk asturianu na rede: Discográfiques

2010-09-10T09:01:00.000-07:00

Siguiendo l'argumentu desendolcáu na cabera entrada'l blogue, prestaríame analizar cuala ye la presencia comercial de la música folk asturiana nesi gran mercáu mundial que ye internet. Ayeri dixi que yera nula o tercermundista, camiento que foi una afirmación inxusta nel sen de que nun punxe apellíos a tala afirmación y anque, la visión de conxuntu sigui dándome esa impresión probetaya, entiendo qu'hai xente que ta faciendo más qu'otra y, d'ehí, que la mio afirmación seya inxusta. N'esta nueva entrada naguo por ser quien a dar una visión más axustada de la rialidá y, depués, que cada ún saque les sos conclusiones.

Discográfiques:

Fonoastur. Tien páxina web propia, d'aspeutu bien poco atractivu y arcaicu, ta disponible n'asturianu, castellán y inglés. Nun cunta con muestres d'audio, nin serviciu de descarga d'archivos, nin con tienda ellectrónica propia, nin ufre la posibilidá de mercar contra-reembolsu. Tolo más, los discos tan enllazaos a Asturshop, onde pueden mercase. Nun tien presencia en redes sociales.
L'Aguañaz. Tien páxina web, pero ensin dominiu propiu y, el catálogu qu'ufre, ta ensin actualizar dende hai munchos años. Si'l diseñu de la web de Fonoastur yera poco atractivu'l d'ésta nun tien perdón de dios, la única información qu'ufierta a los veceros ye la carátula'l discu. Nun ta disponible descarga, ni tienda ellectrónica propia, nin serviciu de venta por corréu. Los discos vuelven tar enllazaos a Asturshop. Dende hai unos años esta discográfica pertenez a Ediciones Ámbitu, empresa editorial qu'asoleya'l periódicu Les Noticies, fixe la prueba dende la so web y L'Aguañaz dispón d'una seición na tienda ellectrónica d'Ámbitu pero al nun tener un dominiu propiu queda tapecía ente'l restu de productos de la editorial. Nun hai muestres d'audio de los discos, nun se puen descargar pero, polo menos, puen mercase. La tienda ellectrónica d'Ámbitu namás ta disponible n'asturianu, un castellanufalante pue tener dalgún problema pa buscar y mercar los discos de L'Aguañaz, si'l veceru namás fala inglés sedrá imposible que lo faiga. L'Aguañaz nun tien presencia en redes sociales
Tierra Discos. N'internet nun esiste, por nun tener nun tienen nin un murniu MySpace.
Grabaciones Pola. Anque nun ta especializada en folk tien asoleyaos dellos discos d'esti estilu y otros venceyaos cola música tradicional. Tien páxina web, con tienda ellectrónica (namás almite'l pagu vía Paypal) y ésta tien una seición de folk. N'esta sigui ensin haber muestres d'audio nin posibilidá de descarga. Nun tien presencia en redes sociales.
Algamar Producciones. Otra empresa promotora de conciertos y management musical, nun sé hasta que puntu la podemos denomar discográfica, pero tien asoleyáu dalgún discu de folk, como los caberos de La Col.lá Propinde o Skanda. Tien web propia, n'asturianu y en castellán, pero nun hai tienda de denguna mena. Tien presencia activa en redes sociales como Facebook o Twitter.

Eso ye lo qu'hai, nin más nin menos. Dende'l cero absoluto de Tierra Discos a tiendes onde los veceros non asturianos vense obligaos a deprender la nuesa llingua si quieren mercar un discu, pasando per empreses que publiquen discos pero nun nos dicen onde mercalos. Nin una sola posibilidá de sintir el discu enantes de mercalu, nin de descargalu ¿Tan estes empreses asturianes al altor de los tiempos nos que vivimos? Dexovos la entruga abierta, retrucáila vosotros.
Otru día miraremos lo que faen los grupos pa vender los discos.

Ventes de discos n'asturianu en picáu...

2010-09-09T06:41:00.000-07:00

La prensa serio del país fala del descensu de ventes de les discográfiques qu'asoleyen música n'asturianu, podéis lleer l'artículu d'El Comercio equí. Yo, depués de lleelu, quedé ablucáu dafechu. Toos persabemos que llevamos dos años de crisis y toos, más o menos, recortamos gastos nel consumu cultural y n'otres estayes, amás, hai que tener en cuenta l'usu d'internet pa descargar y compartir música, ye normal un descensu de ventes comparáu coles ventes de los años 90 del sieglu pasáu.
Agora bien, prestaríame facer delles entrugues ¿tan preparaos los responsables de los sellos discoráficos asturianos p'afrontar esa tresformación del mercáu? ¿Cuántes d'estes discográfiques ufierten descargues de pagu n'internet? ¿Cuántes tienen una tienda ellectrónica pa vender discos físicos? ¿Cuántes tienen una triste páxina web onde d'en anuncia de los sos llanzamientos? Nun voi responder estes entrugues porque, la respuesta que tienen, ye tan murnia y vergoñosa que nun me da pola gana ponela equí.
La presencia comercial de la música n'asturianu na rede ye TERCERMUNDISTA y l'analfabetismu teunolóxicu d'estes empreses ye, polo menos, ablucante. Hai 15 años valía vender discos pelos chigres, güei caltener eso como única canal de distribución ye de tontos. Una web de comerciu electrónicu cuesta 300-500€, igual un grupu non-profesional nun se pue permitir o nun quier facer esa inversión, pero una discográfica... home, por dios!

Cantares con hestoria: The Cruel Sister

2010-09-07T09:46:00.000-07:00

Entamo equí una esbilla de cantares que, pa min, resulten fundamentales o, polo menos, mui importantes nos caberos 50 años de la música folk. Nun fai falta dicir que los criterios a la hora de facer esta escoyeta son personales y suxetivos dafechu.
Prestame pola vida entamar con una vieya balada inglesa, la primer versión recoyida ta fechada en 1656, que fala d'una moza que muerre afogada pola hermana por tar namoraes del mesmu home. Col pasu'l tiempu, los restos de la moza afogada son remanaos pa facer un arpa, un vigulín notres versiones. L'instrumentu tien l'habilidá de cantar el crime de la hermana. El cantar ye vieyu y tien munches variantes interpretaes embaxo dixebraos títulos (The Cruel Sister, The Twa Sisters, The Bonnie Swans...). La tema del cantar, los güesos que cunten un crime pa qu'ésti nun quede ensin castigu, ye un llugar común atopable en munchos cuentos tradicionales europeos, los hermanos Grimm tienen recoyida una versión nomada El Güesu que Canta y un poema de Lord Tennyson, tituláu The Sisters, ta inspiráu nesta tradición.
El cantar tien abondes versiones nel folk contemporaniu, foi interpretáu ente otros por Clannad, Loreena MacKennitt, valió pa dar títulu'l discu más tradicional de la mítica banda de folk rock The Pentagle en 1970 y, en 1993, la formación orixinal d'Old Blind Dogs fixo una perguapa versión pa'l so discu Close to the Bone. Son estes dos caberes versiones del cantar les que valen pa illustrar esta entrada.

Folkezblai d'Ermua

2010-09-04T02:43:00.001-07:00

El concursu de música folk d'Ermua (Bizkaia) llega a la so quinta edición convertíu nuno de los más importantes del estáu. Los díes 10, 11 y 12 de setiembre los grupos finalistes d'esta edición (Lafra, Stolen Notes, Zamburiel, Keympa, La Camerata Cervantina y Olga y Los Ministriles) van presentar una bona esbilla de la música de raigañu que se ta faciendo anguaño nel estáu español, del folk pancélticu d'Stolen Notes al folk aragonés d'Olga y Los Ministriles, del folk balcánicu de Lafra al pop de tastu celta de Zamburiel. Toos ellos bien sofitaos nel escenariu por delles bandes invitaes, los incombustibles Acetre, los ganadores del añu pasáu Sokaide y la banda ermuatarra de folk-rock Seafóid.
Esti añu nun hai presencia asturiana, anque los sevillanos d'Stolen Notes tienen pieces asturianes nel so repertoriu, pero'l Folkezblai nun dexa de ser un plan bien interesante pa la prósima fin de selmana, tais convidaos.
ÚLTIMA HORA: El grupu asturianu Duerna, primer finalista reserva, entra na final del concursu al renunciar una de les bandes que tenía qu'actuar el vienres.

The Mahones nel Savoy de Xixón

2010-09-01T10:32:00.000-07:00

La banda de punk folk irlandés The Mahones va tar esta nueche na sala Savoy de Xixón, nuna velada entamada por Algamar Producciones y na que tamién van tar presentes los asturianos Sambre y Mezá.
The Mahones ye una banda canadiense que nesta xira cellebra 20 años penriba los escenarios de mediu mundu, espardiendo un punk etílicu de raigañu irlandés heriede de la propuesta musical de The Pogues y Shane MacGowan. Pa desgracia de tolos amantes de la música y de tolos chigreros del mundiu Shane MacGowan namás hai ún. De toes formes esta banda canadiense ye una representante bien digna d'esti estilu mui popular en Norteamérica y n'Alemaña.

II Xornaes Céltiques del Oriente d'Asturies

2010-08-26T08:52:00.001-07:00

Festival que parez consolidase na so segunda edición, frutu de la collaboración de 5 conceyos del Oriente d'Asturies (Llanes, Parres, Cangués d'Onís, Ribeseya y Onís). Otra vuelta van ser les bandes de gaites les grandes protagonistes d'estes xornaes, ta prevista l'actuación de les Bandes de Gaites de Ribeseya y Cangues d'Onís, Esbardu, la Bagad de Gwengamp de Bretaña y los Ballochleam Dancers d'Escocia.

Al cellebrase en 5 conceyos les actuaciones van rotando per ellos, cada día de la fin de selmana un conceyu va concentrar los conciertos y pasacais.

Sylvain Barou n'Avilés

2010-08-21T01:57:00.000-07:00

Aprovechando'l conciertu de Comas en Xixón nel 5º40', el so flauteru Sylvain Barou va a dar un conciertín n'Avilés xunto col so collaciu Rubén Bada. La cita ye mañana, el domingu 22 d'agostu nel chigre El Cafetón, a les 21:30.
Pa los que nun lo conocéis El Cafetón dicir que ta na cai El Sol, xunto a la Casa Conceyu. Equí vos dexo un video con daqué asemeyáu a lo que vamos sintir mañana, nesti casu ye Ronan Pellen el qu'acompaña a Sylvain.

Güei entama'l Xixón 5º40'

2010-08-17T09:46:00.000-07:00

Güei entama la segunda edición del Xixón 5º40', festival que sigui la tendencia cafiante d'esti branu que consiste en nun arriesgar res a la hora d'ufrir una programación musical a los aficionaos del país. Nun m'atalantéis mal, el 5º40' presenta un bon cartelu, bandes internacionales incontestables y una bona esbilla de folk llariegu, perfeutu... pero'l casu ye qu'ente los munchos grupos internacionales que podríen parar esti branu n'Asturies, namás paren bandes que yá tan más vistes que'l TBO, perbonos músicos pero camiento que ver siempre los mesmos lleva a l'aburrición.
Güei, polo menos, podremos sintir a Comas, que nun aveza a dexase ver perequí, con ellos Corquiéu, que sigui presentando'l so nuevu discu. Mañana'l protagonismu va ser pa dos bandes asturianes d'estilos mestizos, el folk ellectrónicu de Xera y el folk-rock de Skanda, que tamién presenta discu nuevu. Pa'l vienres ta previstu'l conciertu de Lúnasa, a los que pudimos ver n'Avilés hai un par de selmanes y en Santander (que ta ehí, al llau) el día 2 d'esti mes ¿nun se pudo contratar a naide que nun tuviera n'Avilés hai 15 díes? Y pa'l sábadu Wolfstone, otros qu'esti añu nun vimos perequí pero que tamién conocemos perbién y que tan lloñe de los sos meyores años... Igual sobren perres y falta imaxinación o los qu'entamen eventos d'esta mena namás conocen sota, caballu y rei.

Falanoncaduca entra a grabar Tiempu de Povisa

2010-08-17T00:27:00.000-07:00

La banda de rock n’asturianu Falanoncaduca ta acabantes d’entrar nos estudios ACME d’Avilés pa grabar “Tiempu de povisa”, el so debú discográficu. Baxo la producción de Miguel Herrero y la edición d’Algamar Producciones, esti trabayu va tar formáu por un total de trece cantares nos que la moza formación afita’l “Mecigayu son”, etiqueta qu’autodefine’l so eclécticu estilu musical.

Rock, Ska, Surf, Reggae, Folk… son dalgunos de los soníos presentes en “Tiempu de povisa”, discu que va ser una carta de presentación de llarga duración y, a la par, una muestra de la evolución de Falanoncaduca a lo llargo de los sos tres años de trayectoria. No cincante a les lletres, con abondes esbilles d’estremaes obres lliteraries asturianes, la banda caltién el tonu reivindicativu; sicasí hai tamién testos con temes y tonos más desenfadaos y irónicos.

Esti trabayu entamó a grabase’l llunes 16 d’agostu nos estudios ACME con Miguel Herrero como productor musical y, anque nun hai fecha nidia, asoleyará hacia mediaos de setiembre. Algamar Producciones ye’l sellu discográficu que va editar el discu, mientres que’l diseñu cuerre a manes del artista gráficu Lezink. Señalar tamién que “Tiempu de povisa” va salir a la cai con llicencia llibre Creative Commons, daqué polo que puxen cada vez más grupos asturianos al non compartir la política de la SGAE.

XIV Festival Intercéltico d'Occidente

2010-08-14T05:46:00.000-07:00

La selmana qu'entra va cellebrase la XIV edición del Festival Intercéltico d'Occidente, otra de les cites grandes del branu folki n'Asturies que nagua por capiar la turbonada económica pela que pasa'l nuesu país. Esa crisis que ta afogando la ufierta de música folk esti añu tamién se dexa notar nos festivales grandes, como esti de Tapia, que ve'l so programa recortáu cuasi a la metá de lo que yera n'ediciones anteriores.
Pesie a los obligaos recortes el FIDO sigui alantre y vuelve a convidanos a dellos de los conciertos más interesantes de los que van dase n'Asturies esta temporada, asina, el vienres 20 d'agostu Brian Finnegan va presentar nel nuesu país el so nuevu discu en solitariu asoleyáu hai pocos meses y del que yá vos falamos equí. El domingu 22, vamos poder ver otro grupu británicu que s'estrena per estes llatitúes The Urban Folk Quartet.
Yá vos digo, na mio opinión, de lo más interesante que vamos ver esti añu de recortes xenerales nel que los organizaores d'eventos folkis apostaron polo seguru y por bandes que yá tenemos mui vistes.
Equí vos dexo una petisa esbilla'l talentu de The Urban Folk Quartet, qu'igual acaba convirtiéndose nel ésitu la temporada.

8 de Setiembre: el Día d'Extremadura

2010-08-09T11:05:00.000-07:00

L'8 setiembre cellébranse les fiestes istitucionales de dos comunidaes autónomes, l'asturiana y la estremeña, entrambes cellebraciones coinciden nel calendariu pero estrémense en tolo demás. Equí, n'Asturies, el presidente Areces y l'alcalde la villa qu'acueye esti eventu declararon a la prensa que los actos del Diá d'Asturies van ayudar a "convertir a Asturias en un polo artístico y musical". Asturies ye una comunidá autónoma onde la produción musical ta penriba de la del restu l'estáu, equí falamos de folk namás pero hai tamién una decatable produción nel mundiu'l rock y el pop, nel hip-hop y na música elleutrónica. De xuru que les guapes pallabres d'Areces falen d'esa importante produción musical asturiana y, l'8 setiembre, les cellebraciones del Día d'Asturies van incluir una esbilla de la meyor música que se ta faciendo anguañu nel nuesu país. Eso ye alministrar un país con xeitu y bon tinu.
Unos cientos de kilómetros al sur d'equí nun tienen tan bona suerte, el Día d'Extremadura tien una programación musical probetaya y falta d'imaxinación, parez una gala televisiva de José Luis Moreno. Los extremeños van tener que tragar una esbilla de triunfinos L'únicu que me presta'l Día d'Extremadura ye qu'esti añu faenlu en Ribeseya, que ye una villa bien guapa., munchos d'ellos yá caducaos namás colar de l'academia d'OT, y una tonadillera, lloñe de los sos meyores años, qu'amás ta imputada en casos de corrución. Nun queráis saber la que s'armó cuando anunciaron que la contrataben colos impuestos de tolos extremeños, a ella, a una presunta delincuente. ¡Yá quixeren tener los extremeños un presidente como Areces!

N'Ocidente Noites Folk a pares

2010-08-05T11:12:00.001-07:00

Delles vegaes dicimos qu'hai falta de conciertos y otres, los pocos qu'hai, coinciden na mesma fecha. El 7 d'agostu Navia va cellebrar la so VI Noite Folk cola banda de gaites Agarimo de Catabois, Milenta 3 y Corquiéu como grupu estrella. El mesmu día y camiento qu'a la mesma hora en Pormenande, nel conceyu vecín d'El Franco, podemos dir a la IX Noite Folk d'A Caridá, onde van tocar Brisas del Navia, Darbukka, Cádaba y los cántabros Cahórnega.
Resulta ablucante que se fagan dos nueches folk, en dos conceyos de la mesma zona d'Asturies y que la xente qu'entama estos conciertos escueya la mesma fecha'l calendariu pa cellebralos ¿Da pa tanto la afición del Ocidente? Igual sí, nun sé, pero esta contraprogramación folki parezme peligrosa pa la continuidá d'entrambes noites folk. Nun digo qu'haiga que cordinar tolos eventos de folk de tol país, anque la idega parezme interesante, pero cuido que con una migaya de bona voluntá lo de Navia y A Caridá podía cordinase meyor, de xuru que diben ganar n'asistencia de público.

Avilés: ¿Qué vendrá tres de la batalla?

2010-08-03T11:03:00.000-07:00

Igual ye ceo pa facer una valoración oxetiva -y yo nun voi ser quien a facela- de lo que pasó esti mes de xunetu n'Avilés, pero nun tengo dubies de qu'hai que facer por que nun vuelva repetise l'añu que vien, cuido que nun diba ser bona cosa pa naide y menos pa la música tradicional asturiana volver dar una imaxe tan murnia.
Estos caberos díes tamos viendo como se venden resultaos y se cunten baxes nel bandu contrariu, imaxes pa depués d'una batalla, onde la primera víctima collateral foi la imaxe d'Avilés nel esterior por mor del tratu descortés pa coles delegaciones d'Escocia, Irlanda y Gales participantes nel Intercélticu. Podemos busca-y toles esplicaciones que queramos, nun hai escusa pa tratar asina a xente que tenemos convidaos na ciudá, entrúgome yo si la Policía Municipal d'Avilés nun tien nada meyor que facer qu'andar persiguiendo músicos. Podemos tener razón o non pero nun podemos ser faltosos y arrogantes colos nuesos invitaos.
Ente les valoraciones que se tan faciendo prestaríame destacar la que fexo Alberto Ablanedo nel so blogue Folk en la Red, onde aporta la visión d'un aficionáu de fuera d'Avilés y, poro, alloñáu de les engarradielles locales. Alberto centrase na presencia del folk na programación d'entrambos festivales y nel poco interés que-y despertó esti añu. Anque nun comparto al 100% la so visión d'esti asuntu, cuido que da cola cuestión fundamental: quitando la xente implicao na llucha de los dos festivales, provocaron desinterés nuna gran parte de los aficionaos al folk y a la música tradicional. La llucha ta más que xustificada pa tolos implicaos, pero pa'l resto ye daqué abegoso d'atalantar y cansino.
Entamé diciendo que yo nun voi ser quien a dar una visión oxetiva, yo impliquéme, tomé bandu, tolos que pasáis perequí dacuando sabéislo por demás. L'añu pasáu dexé escrito que'l Beltaine foi un abordaxe diseñáu dende la Conceyalía de Cultura d'Avilés, una operación política p'apropiase del Intercélticu y camiento que nun m'enquivoqué res. Román fexo un festival al altor de la so megalomanía, con 400 mil € de presupuestu, munchos s'alcordaron de les bandes contrataes l'añu pasáu y naguaron por daqué asemeyáu pa esta edición, pero esi presupuestu y per ende contratar ésos o grupos asemeyaos ye inalgamable anguaño y nun va ser posible volver ver dalgo asina en munchos años, el qu'opine lo contrariu ta fuera la realidá y el que faiga comparances tomando la primer edición del Beltaine como referencia terxiversa cualisquier análisis posible.
Barrunto que nun hai futuru si nun s'acaba cola confrontación, dos festivales son inviables pala ciudá y ta demostráu que nun aporten dala cosa.

XXVII Noite Celta de Porcía

2010-08-03T10:38:00.000-07:00

Como cada mes d'agostu, dende l'añu 1983, la Noite Celta de Porcía aporta puntual a lo so cita colos aficionaos al folk d'Asturies y Galicia, yá van 27 ediciones cola d'esti añu. Y, como ye vezu, esti eventu va tar protagonizáu pola música celta, sardinada popular y por un marcu natural perguapu como ye esti requexu'l conceyu'l Franco.
No qu'a música se refier, esti añu van pasar pel míticu escenariu la Banda e Gaites Reina del Truébano, DRD, Felpeyu, Cádaba y la David Munnelly Band.
Un plan mui guapu pa dispidir el mes d'agostu con bona música folk y bones sardines del Cantábricu.

Susana Seivane n'Avilés

2010-07-30T09:45:00.001-07:00

La xenial gaitera gallega llega, a la fin, a Avilés pa presentar con cuasi un añu de retrasu'l so discu Os Soños que Volven. La cita ye na Plaza'l Parche nel marcu del festival Beltaine que va finar con daqué de lo que nun foi mui abundante esta edición, un bon conciertu de folk con un nome de talla internacional que faiga por caltener el nivel musical algamáu l'añu pasáu, sedrá la crisis.
El casu ye que vamos poder disfrutar cola música d'esta gaitera del país vecín, que va dexase acompañar enriba l'escenariu polos hermanos Tejedor que-y van facer d'anfitriones nesti primer alcuentru de Seivane cola afición avilesina a la que, de xuru, va ufrir el repertoriu l'últimu discu y una esbilla de lo meyor de los sos más de diez años de carrera discográfica.
Yá qu'esti añu'l Beltaine foi un poco fiascu (el recote de presupuestu esplica delles coses, pero la falta d'imaxinación al programar non) y esti conciertu ye una de les escases golosines que nos ufre, nun ye cuestión dexalu pasar de llargu.

Rock Astur na Playa Poniente

2010-07-23T06:11:00.000-07:00

Mañana va cellebrase un conciertu na Playa de Poniente, en Xixón, con motivu de la sexta edición de la Fiesta de las Asociaciones. Dos grandes bandes del Rock Astur van garantizar la folixa y la bona música nesti eventu xixonés, toi falando de La Tarrancha y los incombustibles Dixebra.
La ufierta musical multiplicase cada fin de selmana, porque esta interesante nueche de rock na playa va competir col folk irlandés de Lúnasa, que tarán na Plaza'l Parche d'Avilés, y col concursu de Navelgas del que vos falé va poco. Vamos tener que multiplicanos.

Finalistes del concursu folk Cuartu los Val.les

2010-07-18T03:58:00.000-07:00

Los díes 23 y 24 de xunetu va cellebrase en Navelgas la XIª edición del concursu folk Cuartu Los Val.les. Esti añu los finalistes d'esti prestixosu concursu, que gana puxu pasu ente pasu, na final de bandes de pequeñu formatu que se cellebra'l vienres 23 van ser: Marcela Ferrari, d'Arxentina; Barrunto Bellota Band, d'Estremadura; y Iñaki Plaza & Ion Garmendia, d'Euskal Herria.
Pa la final del sábadu 24, la de bandes de gran formatu, ta prevista la participación de: Pé de Boi, de Galicia; La Banda del Pepo, de Murcia; y, dende Cataluña, Tazzuf. Podéis alcontrar más info d'esti concursu na web www.navelgasfolk.com

Barrunto que la non presencia de bandes asturianes nes finales igual resta dalgo de público, pero camiento que viendo la calidá de los grupos finalistes paga la pena dir hasta Navelgas.

Nueche Celta de Ribeseya

2010-07-15T09:00:00.000-07:00

Esti sábadu, 17 de xunetu, va cellebrase la Nueche Celta de Ribeseya, cola participación del grupu cántabru-vallisoletanu Vallarna y cola de los locales Corquiéu, que van aprovechar la ocasión pa presentar énte los sos paisanos el so nuevu discu Suaña.
Les actuaciones d'entrambes bandes van tener llugar na Plaza L'Ayuntamientu dende les 23:00 hores. Esti eventu musical, que vien cellebrándose dende va años, ta convirtiéndose nuna de les cites clásiques del branu na fastera oriental del país y, esti añu, vulve puntual a la cita pesie a la crisis.

XIV Festival Intercélticu d'Avilés

2010-07-08T08:06:00.001-07:00

El 16 d'esti mes entama la décimocuarta edición del Festival Intercélticu d'Avilés, una edición que va tar centrada na Plaza'l Carbayeo y que ta llamada a ser la cabera de travesía del desiertu tres iguar los problemes cola SGAE y col conflictu col conceyal de cultura d'Avilés en víes de solución, entá nun hai collaboración plena col ayuntamientu pero yá nun hai enfrentamientu.
Eses circunstancies faen que vuelva ser una edición curtia de presupuestu pero yá allonxada de la precariedá del añu pasáu. Asina, esti añu vamos poder disfrutar con dellos conciertos de música folk, que foi un de les estayes del festival qu'hubo que suprimir nel 2009. El vienres 16 van tar presentes n'Avilés una de les bandes clásiques del rock celta estatal, Triquel. El sábadu, 17 de xunetu, va xubir al escenariu d'El Carbayeo un grupu escocés tamién venceyáu al rock celta o folk-rock que debuta per estes tierres, Skerryvore, al que la prensa escocesa-y colgó la etiqueta de ser los Runrig del sieglu XXI. El domingu 18 sedrá Gwennyn, una de les voces moces que ta dando muncho que falar na Bretaña, la encargada d'animar el festival. Y, pa'l pieslle'l festival na nueche'l vienres 23 de xunetu, un grupu enllenapraos, los Red Hot Chili Pipers.
Naguamos por qu'esta edición valga pa finar colos problemes y torgues que-y punxeron al Intercélticu y que la XVª edición del añu que vien seya yá lo qu'avezaba a ser.
Na web del festival yá podéis alcontrar un programa completu.

Probe programa pa'l Beltaine d'Avilés

2010-07-02T09:00:00.000-07:00

Güei publicase na prensa'l que va ser el programa de la segunda edición Beltaine d'Avilés, nun dexa de llamanos l'atención la probitú de la programación musical d'esti añu, más si mos alcordamos de los grandes conciertos qu'ufiertaren en 2009.
Esti festival de nome tan asturiano, que foi rebautizáu na Villa como Betadine, l'añu pasáu truxo a Avilés a xente como Pennou Skoulm, Fred Morrison, Jarlath Henderson, LAU, Fraser Fifield, Liam O'Flynn, Anxo Lorenzo... grandes nomes del folk célticu internacional que tuvieron respaldaos por bandes asturianes de primer nivel (Tejedor, La Bandina, DRD...). Depués del fracasu económicu na primer edición y, cuntando cola crisis que mos afuega, yera previsible un recorte nel presupuestu, qu'hai una añu rondó l'allorinate cifra de 400000€, pero cuido que naide se plantegara qu'una ciudá como Avilés ufiertara un festival tan ramplón y faltu d'idegues.
Los conciertos folk van ser un terciu de los programaos hai un añu y van tar protagonizaos, cuasi siempre, por bandes asturianes nun siendo la prestosa presencia de Susana Seivane pa zarrar el festival y los irlando-catalanes Stompers p'abrilo. De fuera l'estáu va vese más bien poca cosa, tan confirmaos los portugueses Galandum Galandaina, que yá tuvieren en 2009 y que parez son la única banda de folk qu'hai nel país vecín pa los organizaores d'esti eventu; l'acordeonista bretón Thomas Moisson al que nun veo con capacidá pa enllenar la Plaza'l Parche; y, nun dexa de llamar l'atención que l'únicu conciertu grande d'esta segunda edición, el de los irlandeses Lúnasa la nueche'l 24 de xunetu, nun aparez nel programa publicáu güei nos periódicos pesie a que hai un mes yá taba confirmáu. Y nun hai más compañeros, mui probe too y más comparándolu colo del 2009.
Lo más cafiante ye un ciclu de folk-rock (sic) per onde van pasar bandes llocales como Capitán Cavernícola, Crudo, The Paperbacks, Tronco... tan venceyaes al folk o el rock célticu como los percebes a los güevos d'un toru bravu.
En resume, de xuru que cualisquier asociación xuvenil, coles mesmes perres, sedría quién a entamar daqué más interesante. Pa finar equí vos dexo una esbilla de música celta de la que nos ufre'l Betadine esti añu

EL AVESTRUZ

Crudo | Vídeos musicales MySpace

Fiesta de la Oficialidá en Bimenes

2010-07-01T10:30:00.000-07:00

Esti sábadu, 3 de xunetu, Bimenes festexa la Oficialidá del Asturianu., fiesta que llega a la so XIVª edición. Na Casona de los Careaga, en Xenra, Xune va ser l'encargáu de lleer el pregón de la fiesta, que va cuntar con xinta popular, mercáu d'artesanía, actividaes pa nenos y, faltaría más, muncha música.
A les 18:30 va cellebrase el XI Concursu de Gaiteros Mozos y, más sero, van xubir al escenariu La Bandina La Curuxa, La Tarrancha y DJ-J15

Tejedor y Falanoncaduca nel Mendebala de Sopuerta

2010-06-29T06:54:00.001-07:00

El folk de Tejedor y el ska-fusión de Falanoncaduca van tar presentes nuna nueva edición del festival vascu Mendebala Jaialdia. Los prósimos díes 2 y 3 de xunetu va tener llugar na llocalidá de Sopuerta (Bizkaia) esti eventu qu’axunta una bona esbilla del folk y rock de raigañu de la Cordalera Cantábrica. Con una entrada y zona d’acampada llibre, les bandes asturianes va actuar el sábadu 3 de xuneto xunto colos grupos vascos Xabi Aburruzaga y Sokaide.

Dende va dellos años la llocalidá vizcaína de Sopuerta acueye anualmente’l festival Mendebala Jaialdia, un eventu que tien por oxetivu puxar pola música en vivo de bandes vasques, cántabres, asturianes y gallegues que desendolquen un soníu marcáu pola música de raigañu d’eses tierres. Artistes asturianos como Hevia y Skama la Rede yá participaron nel festival y nesta nueva edición tóca-yos el turnu a Tejedor y Falanoncaduca.

El 3 de xunetu ye’l día nel qu’estes dos formaciones asturianes van llevar el so soníu a Sopuerta. Mientres que Tejedor va poner enriba les tables el so cuidáu folk, Falanoncaduca van encargase de pesllar la nueche a ritmu de mecigayu son o lo que ye lo mesmo: una fusión de soníos como’l ska, rock, folk, surf, reggae y metal.

El Mendebala Jaialdia caracterízase tamién por celebrase nun enclave natural perguapo na llende de Bizkaia y Cantabria. Ehí ye onde s’asitia una zona d’acampada llibre pa tolos asistentes a esti festival. L'eventu arranca’l vienres día 2 coles actuaciones de los vascos Adarrots, Bizardunak y los gallegos Luar Na Lubre.

La revista francesa Keltia entrevista a Lisardo Lombardía

2010-06-28T07:15:00.001-07:00

La revista francesa de temes celtiegos Keltia entrevista nel so numberu caberu a Lisardo Lombardía. El motivu principal d'este alderique col asturianu ye la cuadraxésima edición del Festival Interceltique de Lorient que va cellebrase baxo la so direición.
Lisardo Lombardía fala na entrevista del deber de remembrar lo fecho hasta agora, pero ensin señardá. El FIL va entamar esti añu una esposición pa rendir tributu al trabayu d'organizaores y voluntarios nestos 40 años de festival y va ufrir una bona riestra d'espectáculos de baldre. Ente los planes del asturianu ta'l d'abrir el FIL a la lliterartura de los páises celtes y, n'especial, al teatru.
La 40ª edición del FIL ta dedicada a Bretaña y pelos sos escenarios van pasar grandes bandes del folk célticu y tamién del rock: The Cranberries, Luz Casal, Llan de Cubel, La Bottine Souriante, Capercaillie & Friends, Breizh Balkanik, N'Diale & Jacky Molard...
Los que teis interesaos en algamar esta revista podéis empobinavos a la so web Keltia-Magazine.

IV Feria'l Branu n'Illas

2010-06-18T04:49:00.000-07:00

La Caizuela vuelve agospiar una nueva edición de la Feria del Branu esta fin de selmana, l'apertura de la feria sedrá mañana día 19 a les 11:30 con amuesa d'oficios artesanales (vidriu enllastráu, goxeru facedor de preseos, malla de Luanco...) y cola inauguración del mercáu tradicional.
La música d'esta edición van ponela Zapica, el sábadu a les 21:00 hores; El Koku la Manzana, el domingu en sesión vermú y el Tríu Santos, Caleya y Varela yá pela tarde a les 19:00.
Tolos actos d'esta feria faense na pista polideportiva de La Caizuela, polo que nun deberíen notase muncho los efeutos del temporal d'esta selmana que tamién se dexó sintir n'Illas.

Paddy Keenan nel Ca'Beleño

2010-06-15T02:20:00.000-07:00

Ún de los mitos vivos de la música tradicional irlandesa va dar un conciertu nel chigre Ca'Beleño d'Uviéu esti xueves 17 de xunu, toi falando del gaiteru Paddy Keenan,ún de los miembros fundaores de la Bothy Band.
Fíu y nietu de gaiteros, entamó cola uilleann pipe a los 10 años d'edá, a los 14 yá dio'l soprimer conciertu nel teatru Gaiety de Dublín. A los 17 años marchó d'Irlanda namoráu del blues y anduvo tocando per Inglaterra y Europa. Cuando volvió pa la so Irlanda ñatal entamó a tocar colos hermanos Triona y Michael O Dhomhnaill a los que se foron xuntando Paddy Glackin, Matt Molloy, Tony MacMahon y Donal Lunny, los siete que tocaben embaxo'l nome de Seachtar que sedría'l xermen de la llexendaria Bothy Band.

L'estilu de Keenan ye'l de los travelling pipers, gaiteros que diben tocando de pueblu en pueblu por dinero, onde prima la improvisación, Lunny comparalu con Hendrix, otros faen comparanza col xeniu'l jazz John Coltrane. El casu ye que la del xueves va ser un conciertu de los que nun se ven tolos díes.

Folk nel 5º aniversariu la Casa Posafuelles

2010-06-10T03:51:00.000-07:00

Mañana, vienres 11 de xunu, el chigre de la Xunta Pola Defensa de la Llingua, La Casa Posafuelles, cumple 5 años y pa festexar esta data va entamar una folixa a les 23:00 hores onde vamos poder escuchar muncha y mui bona música tradicional asturiana. Los encargaos de da-y vida a la folixa col so arte van ser la Bandina La Curuxa y los rapazos de Mezá.
Un bon plan pa entamar un fin de selmana de primavera antroxáu d'iviernu.

Planes pa la Nueche más curtia l'añu

2010-06-06T22:54:00.000-07:00

Como yá ye vezu la Nueche San Xuan y les cercanes a esa fecha son propicies pa que s'acumulen les cites col folk, delles de les posibilidaes que tenéis pa disfrutar del cambiu d'estación cola música de raigañu son éstes que vos dexo equí:

Tresona (Corvera), al llau'l pántanu la mesma nueche de San Xuan vamos poder ver a Spanta La Xente, Rarefolk y Llangres.
La Espasa (Caravia), esta vegada'l sábadu 26 de xunu tarán Corquiéu, Skama La Rede, Mala Reputación y Mala Comunicación (estos nun sé quién son y por eso nun hai enllaz).
Penagos (Cantabria), una propuesta pa los más viaxeros que puedan tirar hasta Cantabria tamién el 26 de xunu, nel Arenal vamos poder ver a Alegría Cántabra, Maílla, Landeral, a los nuesos paisanos de Duerna y a los daneses Kasir.

Guerres Céltiques d'Avilés

2010-06-01T08:10:00.000-07:00

L'otru día comenté equí que l'Asociación Esbardu, organizadores del Festival Intercélticu d'Avilés, y l'ayuntamientu d'Avilés, organizador del Festival Beltaine, entamaren conversaciones pa salir de l'abegosa situación na que se metieren el branu pasáu. Pasaos dellos díes pueo decivos que les coses siguen igual que taben, por muncha crisis qu'haiga, n'Avilés van volver cellebrase dos festivales de música celta.
L'añu pasáu, l'Ayuntamientu d'Avilés punxo en marcha'l Beltaine col envís de dar continuidá a una cellebración yá tradicional nos branos de la Villa, la razón esgrimía pa llanzar esa opa hostil sobre l'Intercélticu yeren la supuesta imposibilidá llegal d'Esbardu d'organizalu al deber unes cantidaes a la SGAE a cuenta de los drechos d'autor. El casu ye que foi quien a entamar una nueva edición del Intercélticu, con permisu de la SGAE y gracies a la participación gratuita de músicos y grupos de dellos países que qixeron char un gabitu a un festival que-ys abrió les puertes d'Asturies n'otres ocasiones. Mientres el Beltaine gastaba 360000€ nun festival que mos ufrió una riestra de conciertos memorables y un desastre organizativu nel beltaine gastronómicu, onde empresarios hosteleros y asociaciones perdieron tiempu y dinero.
Esti añu, cola deuda de la SGAE saldada y yá ensin trabes xudiciales, lo normal sedría axuntar enfotos na marca con 14 años d'historia y cola distinción de fiesta d'interés turísticu rexonal, aportando los aciertos qu'hubiere nel Beltaine del añu pasáu, trabayar en facer un festival grande que ponga la Villa nel mapa y seya un motor que dinamice la industria turística d'Avilés. Eso sedría lo normal, pero habiendo xestores culturales pel mediu la normalidá faise difuso, asina que, vamos tener dos festivales de siguío, ún acaba'l 23 y l'otru entama'l 24, que van duplicar el gastu y que van facer durar 15 díes lo que debíen ser 7. Yo, la verdá, nun sé si tan les coses pa dar esta imaxe, invertir en fiestes y música tradicional ta bien pero facer lo mesmo dos vegaes y gastar el doble pola cabezonería d'un par de conceyales ye daqué qu'acabará pasando factura y que pue tener víctimes collaterales.

Skerryvore: los Runrig del sieglu XXI?

2010-05-28T04:32:00.001-07:00

Asina definió'l periódicu escocés The Herald a esti grupu formáu nel añu 2004 na islla de Tiree, un afalagu que pon el llistón bien alto pa una banda que ta entamando a dar los sos primeros pasos nos circuitos internacionales de folk y, si tenemos un poco de suerte, vamos poder ver esti branu n'Asturies.
Skerryvore partió de los raigaños musicales de les sos natives islles Hébrides que, pasu ente pasu, foi fusionando con rock y funk hasta llegar a la so consolidación musical cola publicación del so segundo discu On The Road, asoleyáu en 2007 que pasó de les 10000 copies vendíes. un récord falando de músiques d'esta mena. Agora van presentar el so tercer trabayu discográficu en xunetu, presentación qu'igual-ys val pa llegar hasta nós si se confirmen los rumores que tengo sintíos perehí.
Pero lo meyor pa conocelos va ser escuchar la so música y naguar por que se confirmen los rumores

Acaben les guerres céltiques n'Avilés?

2010-05-21T09:35:00.000-07:00

Sigún lleímos esta selmana na prensa local, los dos festivales de música folk d'Avilés (L'Intercélticu y el Beltaine) anden en conversaciones de paz pa nun repetir la situación vergoñosa del añu pasáu. Nun sé si d'estes conversaciones va salir un únicu y gran festival de música celta (que sedría lo deseyable n'actual situación económica) que punxera a Avilés y a Asturies nel mapa de los grandes eventos d'esta mena, si namás traten de coordinar entrambos festivales o qué sé yo...
El casu ye que se sentaron a falar, ye un entamu.

Brian Finnegan saca discu en solitariu

2010-05-10T01:27:00.000-07:00

The Ravishing Genius of Bones ye'l títulu elexíu pa'l nuevu discu en solitariu del xenial miembru de Flook, una escoyeta de música na que bien trabayando dende finales del 2008 y que ve agora la lluz.
Nesti discu Brian Finnegan cunta cola ayuda de vieyos compañeros de viaxe como Ed Boyd, Mike McGoldrick o John Joe Kelly amás de los componentes de la so nueva banda KAN (Aidan O'Rourke, Jim Goodwin y Ian Stephenson), Justin Adams y Crooked Still. El discu componse de 10 cortes cuasi toos de composición orixinal y preséntose hai un mes nel Seamus Ennis Centre.
A ver si podemos velos per Asturies esti branu.

Güei nun mos podemos perder

2010-05-08T03:09:00.000-07:00

Güei nun mos podemos perder una oportunidá d'asistir a un conciertu que sedrá difícil volver a ver n'Asturies, dos bandes xuntes enriba l'escenariu, una d'Asturies y la otra de Noruega, dos tradiciones ¿separtaes? por miles de kilómetros aconceyen esta nueche nel festival Tolo d'Asturies 2010 ¿vas perdételu?

Soisín: nuevu discu d'estudiu de Kíla

2010-05-04T01:38:00.000-07:00

Soisín ye'l novenu discu d'estudiu de la banda irlandesa Kíla y, nesti caberu trabayu, preséntennos el so xeitu más suave, melgueru y instrumental dafechu, sí, los que vos preste la peculiar voz del so vocalista Ronan O'Snodaigh vais tener qu'esperar a una meyor ocasión porque equí nun canta.
Depués de sintilu un par de vegaes completu quédome cola impresión de que ye un discu incompletu, que-y falta un fervor o que ye una versión light d'un grupu qu'aveza a ser hipercalóricu, igual tengo qu'escuchalu con más calma pa que termine d'entrame pela oreya. Nun digo que careza de calidá, hai cortes que me resulten especialmente guapos como Cluainín (que podéis sintir nel so MySpace), pero nun ye lo qu'esperaba y, dende que lo eche a andar nel reproductor, nun soi a quitame de la cabeza la idega de que ye una actualización de conceutos musicales que yá sintiéramos con Nightnoise nos 80.

Tolo d'Asturies 2010 Cartelu

2010-05-04T00:49:00.001-07:00

Esti ye'l cartelu oficial del festival Tolo d'Asturies 2010, y equí embaxo'l trípticu d'información asoleyáu pola organización.

Tolo d'Asturies 2010

2010-04-27T01:48:00.000-07:00

Ún de los nuevos festivales que va garrando puxu pasu ente pasu ye'l Tolo d'Asturies, que se cellebra nel Conceyu de Llangréu, yá tenemos la programación de la edición de 2010, a la que vais poder asistir nunos 10 díes. Los actos programaos son los que vienen darréu

Xueves 6 mayu. Casa de los Alberti:

Inauguración oficial Tolo d’Asturies 2010 a les 19:30.
Conciertu de: Alfayé, Cyrille Brotto y Xuan Nel Expósito

Vienres 7 de mayu. Nuevu Teatru La Felguera:

Conciertu: Espido y Mapi Quintana, 20:30.

Sábadu 8 de mayu. Estación d'autobuses de Llangréu:

Feria d'artesanía y gastronomía dende les 12:00.
III Feria del Discu y el Llibru n'asturianu, dende les 12:00.
Conciertu Banda de Gaites Conceyu de Llangréu, a les 12:00.
Conciertu Banda de Música Conceyu de Llangréu, a les 12:30.
Conciertu Tina Gutiérrez, a les 13:15.
Conciertu Duerna, Felpeyu+Frigg (con espeutáculu esclusivu pa esti festival), Dixebra y IMG, dende les 21:00.

Domingu 9 de mayu. Estación d'Autobuses de Llangréu:

Conciertu Banda de Gaites La Salle y festival de tonada, dende les 12:30.
Conciertu de Jerónimo Granda, a les 17:30.
Conciertu homenax a la gaita con Ramón García Morán (teclaos), (guitarra), Rubén ÁlvarezHoracio García (baxu y contrabaxu), Chus Castro (batería), Andrés Fernández (gaita), Pablo Carrera (gaita), Chus Solís (gaita), Dani García Argüelles (gaita), Nacho Cuetos (gaita), Adrián Muñiz (gaita) y Andrea F. Joglar (gaita). Espeutáculu especialmente diseñáu pa'l festival y coordináu por Xuan Nel Expósito.

Corquiéu presenta'l so nuevu trabayu Suaña

2010-04-21T01:04:00.000-07:00

Esti sábadu, 24 d'abril a les 20:00 hores, la banda ribeseyana Corquiéu va presentar el so tercer trabayu discográficu, entituláu Suaña, nel Teatru Filarmónica d'Uviéu. Presentación que s'enmarca nel ciclu de conciertos Uviéu Tierra Folk, del que yá vos falé equí, que yá valió tamién comu escenariu pa la presentación del primer discu de Verdasca va poco.

Corquiéu fundóse nel añu 1997, parez que foi ayeri, y afonda nel estilu sonoru del folk acústicu, que marcaren bandes mítiques del folk astur, y que-ys valió pa xirar pelos festivales más prestixosos de toa Europa. Suañas aporta con dellos meses de retrasu, nel so MySpace podéis lleer que taba previstu asoleyalu a finales del 2008, de xuru qu'esos meses de retrasu valieron p'afinar más el resultáu final que naguamos por poder escuchar.

VI Festival Folkomillas

2010-04-19T01:57:00.000-07:00

La organización del Festival FolKomillas yá me fixo llegar la programación y el cartelu de la que va ser la sesta edición d'esti festival cántabru, a dos meses entá de la cellebración del eventu, otros festivales de más pretensiones podíen tomar exemplu del ciñu y profesionalidá con que trabayen los organizaores del FolKomillas, debe ser ún de los pocos festivales folk del estáu que tien peslláu'l cartelu con dos meses d'antelación.
La programación ufierta munches más actividaes más alló del folk (mercáu medieval, amueses d'artesanía...) polo que vos convido a char una güeyada pa conocela dafechu na web de la organización http://www.lescanillu.org
Na estaya musical los protagonistes van ser les bandes que vienen darréu: el vienres 18 de xunu, Blanca Altable & Chuci Alcuadrado y Bruma Folk; el sábadu día 19 de xunu, los daneses Kasir, Lurte y la gran banda cántabra Cahórnega; el festival fina'l domingu cola actuación El Tinglau y los Hermanos Cossío.

III Festival Rude Gaita en Xixón

2010-04-14T04:58:00.001-07:00

Esti sábadu, 17 d'abril, va cellébrase la tercer edición del festival Rude Gaita qu'entama Xunca Records y nel qu'esti añu van participar: el grupu asturianu de mecigayu-ska La Tarrancha; los vascos Betagarri , col so ska-reggae; y los italianos Talco, col so ska-patchanka.
El Conciertu va ser a les 20:00 hores nel Pabellón d'Asturies de la Fería de Muestres de Xixón. La entrada tien un preciu de 10 € anticipada y 12 € taquilla, anque hai una promoción especial d'Entrada + el CD de Betagarri Bizitzari Txistuka por 18 € anticipada y 20 € taquilla.
Les entraes anticipaes puen mercase en dellos puntos de venta de Xixón(Baruku, Xarana, Folixa, Llibrería Paradiso) y Uviéu (La Casa Posafuelles).

Música d'Escocia, Quebec y Asturies na Folixa de Mieres

2010-04-11T12:17:00.000-07:00

La XV edición de la Folixa Na Primavera de Mieres va tar protagonizada, el 15 y el 16 d'abril, pol supergrupu escocés Session A9 y pol nuevu proyeutu musical d'Yves Lambert, miembru fundador de La Bottiné Souriante, agora al frente de Le Bérbet Orchestra. La música'l país van encargase de ponela la Patriband Folc Orl.lestra y Spanta La Xente.

Cola Folixa inaugurase la temporada oficial de festivales folk n'Asturies que, yá'l mes que vien, va tener otra fecha importante col festival Tolo D'Asturies. Pa más alló queden los festivales d'Avilés, que si dios nun lo remedia van volver ser dos, y de Xixón y Tapia... pero tovía ye enforma ceo pa falar d'ellos, esta selmana toca Mieres.

Los Ciquitrinos actúen n'Uviéu

2010-04-07T07:12:00.000-07:00

La orquestina folk asturiana de cultu ocultu pa bodes, divorcios y bautizos, depués de más de diez años dende'l so ñacimientu como grupu musical, asoleyó'l so primer discu autoproducíu Faciendo l´indio, ónde alcontramos una variada seleición de temes d'estremaos estilos, dende una xota o un pasodoble, pasando peles mazurques o les muñeires, hasta un Rap. Variedá y originalidá pa tolos públicos recoyíu nún interesante trabayu, producíu pol músico xermanu Andreas Prittwitz, que lleva de regalu un cómic de 22 páxines, ónde una historieta de temática Hindú cunta la hestoria'l grupu entellazando lo real colo fantástico.
Esti sábadu, 10 d'abril, dientro del 1er Ciclu de Conciertos Uviéu Tierra Folk, Los Ciquitrinos van volver a repasar nel escenariu'l Teatru Flarmónica esi primer discu amás de presentar dalguna sorpresa de lo que va ser el so nuevu espectáculu.

Blima y Xera pieslen les fiestes del Bollu n'Avilés

2010-04-04T08:21:00.000-07:00

Como vien pasando los caberos años, les tradicionales fiestes del Bollu d'Avilés rematen la folixa con una nueche folk n'El Parche'l llunes de Pascua. Esti añu les bandes que van protagonizar l'eventu van ser dos grupos mozos, pero que yá tienen una llarga historia a xocostrines: Blima y Xera
Dos formes estremaes d'entender la música folk del nuesu país, dende lo acústico unos y dende lo elleutrónico otros, pero yá fogueaes en milenta escenarios dientro y fuera d'Asturies. En resume, una bona manera de finar estes melgueres fiestes.

Primer Sidre l'Añu

2010-03-31T06:49:00.001-07:00

El Muséu del Pueblu d’Asturies acoyerá los díes 2, 3 y 4 d’abril el festival ‘Primer sidre l’añu’, un evento entamáu pola Fundación Asturies XXI y la revista La Sidra , cola collaboración de la Conceyalía de Cultura Tradicional y Llingua Asturiana del Ayuntamientu Xixón.

Esti eventu ye un certame agroalimentariu nel que se trata de dar puxu y poner en valor la tradición de les espiches de Selmana Santa, entá mui vixentes en bona parte d’Asturies, nes que los llagares, yá seyan industriales o caseros, abríen los sos toneles cola sidre nuevo, la sidre l’añu, poniéndolos a dimposición del públicu.

Nesta primer edición del eventu van participar más de 60 llagares asturianos y ún de Cantabria lo que convierte a esti festival nel mayor fechu fasta’l momentu nel país, y probatiblemente a nivel internacional.

La entrada pa esfrutar de la sidre nuevo d’estos llagares y toles actividaes previstes va costar namás 5 euros.

L’horariu d’apertura del certame sedrá:

Vienres 2 d’abril: de 17 a 22 hores,
Sábadu 3 d’abril: de 11 a 22 hores
Domingu 4 d’abril: de 11 a 17 hores

La naguración tendrá llugar el vienres 2 d’abril a les 17 hores, colos tradicionales volaores (“tres volaores, espicha”), corriendo’l pregón a cargu los esportistes asturianos: Manuel Busto (pluscampión mundial de piragüismu), Roberto Canella (fubolista del Sporting) y Chechu Rubiera (ciclista, anguañu nel Team Radio Shack)

Les actividaes principales que van desendolcase nestes tres xornaes son les que vienen darréu:

Cursu d’escanciáu de sidre impartíu por Loreto García, ganadora del Campionatu d’Asturies d’Escanciaores del 2009. L’actividá tendrá llugar el sábadu pela tardi.
Tasties guiaes. El vienres la protagonista sedrá la sidre brut, el sábadu, la sidre de xelu, y el domingu, l’auguardiente de sidre.
Amuesa de tonada ‘I Asturianada y Sidre’, cola participación d’estrelles consagraes de la escena asturiana y les promeses nueves (alxunto archivu con tola información sobro esta amuesa)
Música y bailles de l’Andecha de Folklore Tradicional La Deva.
Gymkanes fotográfiques diaries a cargu del Grupu Semeyes de La Sidra.
Eshibiciones d’esportes autóctonos pola Asociación Cultural El Garrapiellu.
Partíes de bolos.
Esposición de la colleición récor Guinness de corchos de sidre.
Esposición de Semeyes III Concursu la sidra
Degustación de derivados de la sidre. Posibilidá de prebar a hores determinaes, y dientru’l certame de productos derivaos de la sidre comu augurardiente de sidre, llicores, sidre axampanao…
Esposición de les obres ganaores del I Concursu de Microrrelatos Sidreros.
Esposición de colleiciones d’etiquetes a cargu de l’asociación ‘Sidrastur’.

Lá Nua, nuevu discu de Lúnasa

2010-03-26T02:34:00.000-07:00

Lúnasa ta a piques de sacar el so nuevu discu, entituláu Lá Nua. Ta previsto que'l nuevu trabayu de los irlandeses salga'l mercáu'l prósimu mes de mayu, pero ufierten la posibilidá a los sos incondicionales de pre-mercalu dende la so páxina web, asina, los veceros qu'escueyan esta posibilidá podrán tener el discu un mes enantes de que llegue a les tiendes y, amás, aforrar los gastos d'unvío.

Si naguáis por tener ún d'esos discos n'abril nun tenéis más que pasar per www.lunasa.ie pa encargalu.

Los Chieftains en México

2010-03-21T18:35:00.000-07:00

Los Chieftains estrenen discu, tituláu San Patricio y dedicáu esta vegada esplorar les conesiones ente la música tradicional irlandesa y la mexicana. N'esti nuevu proyeutu cunten cola collaboración de Ry Cooder y bona parte de los meyores músicos tradicionales del México d'anguaño, como Linda Ronstadt o Los Tigres Del Norte.

La escusa pa entamar la ellaboración del discu ye la deserción d'unos 200 irlandeses del exércitu de los Estaos Xuníos durante la guerra contra México nos años 1846-48, los soldaos irlandeses refugaron disparar a los sos hermanos católicos y acabaron lluchando, y morriendo, del llau mexicanu nes files del Batallón San Patricio... pero meyor que yo desplicalo esti video

San Patriciu!!!!

2010-03-17T07:35:00.000-07:00

Feliz día de San Patriciu a toos los que paráis per equí dacuando.

Conciertu de DRD n'Avilés

2010-03-13T08:57:00.000-08:00

El prósimu xueves, 18 de marzu, el grupu de folk DRD va a dar un conciertín n'El Cafetón d'Avilés. Pa los que nun sois d'esta villa dicivos qu'esti chigre ta na cai El Sol, ente les de La Fruta y La Ferrería, tres de la Casa Conceyu.
Los componentes de DRD son habituales de les sesiones que se faen tolos vienres nesti chigre y, esti xueves a les 21:30, fairán un propuesta menos informal del so repertoriu comu banda. Si tais interesaos n'acudir a esta cita nun vos retraséis muncho, porque'l sitiu nun ye mui grande.

I Ciclu de Conciertos Uviéu Tierra Folk

2010-03-04T01:15:00.000-08:00

Frutu de la collaboración ente Tierra Discos y l'Ayuntamientu d'Uviéu, va cellebrase esti ciclu de conciertos nel Teatru Filarmónica de la capital. Asina, a lo llargo de marzu y abril, vamos poder ver a Verdasca, Vallarna, Los Ciquitrinos y Corquiéu.
Nel casu de Verdasca y Corquiéu los conciertos d'esti ciclu van valir como presentación de los nuevos discos d'entrambes bandes, polo que la cita ye doblemente interesante.
El preciu de la entrada pa un conciertu ye de 7€ y hai la posibilidá de mercar un abonu pa'l ciclu completu por 20€.

Duerna presenta la demo Dende'l Chigre

2010-03-02T11:47:00.000-08:00

El grupu Duerna, de la Cuenca'l Nalón, presentará nos prósimos díes la so maqueta Dende'l chigre, de la que yá vos falé hai delles selmanes. Asina los rapazos de Duerna van tar el día 4 na sidrería Tierra Astur de Cualloto, el día 20 nel Teatru del Entregu y el día 27 na Casa la Cultura de la Pola Llaviana.
Amás de presentar la so demo, esti mes van tener una cita perimportante'l día 13 en Laredo, onde van participar na semifinal del concursu folk Prau, naguamos por que tengan suerte y algamen el pasu a la final.

Anxo Lorenzo presenta Tirán en La Felguera

2010-02-23T22:56:00.000-08:00

El sábadu 27 de febreru a les 20:15 hores, el Nuevu Teatru La Felguera va acoyer la presentación del nuevu discu en solitariu d’Anxo Lorenzo. El músicu gallegu va tar acompangáu pa la ocasión pola so banda habitual, esto ye: Xosé Liz, al bouzuki y la guitarra; Begoña Riobó, al violín; Álvaro Iglesias, al contrabaxu y Roberto Milla, al bodhrán. La entrada son 5€. El so nuevu discu en solitariu ye una nidia amuesa del trabayu d’Anxo Lorenzo, un nuevu conceptu de músicu que nunca nun ve barreres cuando esperimenta cola música tradicional y cola contemporánea y que tamién tien l’habilidá d’amestales suavemente pa convertir esta xunión en nuevos ritmos y melodíes vibrantes y fresques.

Anxo Lorenzo, gaiteru, compositor y productor del Grupu SPIRITU (986), tien algamada la unánime alabanza de la crítica pola perfeuta fusión ente tradición y modernidá, xuntando’l soníu de la gaita cola más vanguardista produición musical. La so música suena davezu nes televisiones y radios nacionales más importantes y utilizóse como sintonía pal Xacobeo 99; asina como pa documentales, publicidá y les bandes sonores de películes como El Gran Marciano y El Tuno Negro.

Anxo Lorenzo tien percorrió los festivales más importantes del mundu atlánticu como Lorient, Celtic Connections, Piping Live!, Ortigueira, Cork Festival o’l William Kenndy International Festival. Anxo Lorenzo collaboró en trabayos discográficos de Skape, Kathryn Tickell, Dáimh, Mónica Molina, Diarmaid Moynihan, Jaula de Grillos y Poncho K.

Gran oportunidá la d’esti sábadu, 27 de febreru, en La Felguera, pa disfrutar de la música d’Anxo Lorenzo Band y conocer Tirán, el nuevu discu d’esti músicu gallegu del que’l críticu Geoff Wallis, de la publicación Irish Music Review, dixo: “...la incuestionable y destacada trayectoria d’Anxo Lorenzo ye un trabayu sorprendente sobre una serie melodíes creaes pol gaiteru gallegu, una asombrosa improvisación con una combinación d’una brillante rapidez y una imaxinación desenfrenada que, simplemente desafía toles creencies...”

Verdasca presenta discu

2010-02-22T14:54:00.001-08:00

El prósimu 20 de marzu va presentase del Teatru Filarmónica d'Uviéu'l primer Cd grande de Verdasca. El discu lleva por títulu D'Abéu y va espublizalu la discográfica Tierra, tres ser grabáu en Corvera, nos estudios Tutu.
Esta banda ta formada por xente mui mozo de la Escuela de Música Tradicional de Llanera, pero yá con una trayeutoria de dellos años nos escenarios algamando un bon númberu de premios y distinciones (segundo puestu nel Cidrerie du Terroir de Lorient en 2007, nel 2008 ganen el concursu Ciudá d'Uviéu na modalidá de bandes de folk, AMAS al grupu revelación del 2008...), polo que, esti D'Abéu ye un discu pol que vinimos naguando va tiempu tolos aficionaos al folk del país.

Anuariu Sonuru 2009

2010-02-18T01:32:00.001-08:00

Un total de 44 cantares y 17 vidioclips formen l’Anuariu Sonoru ’09, recopilatoriu editáu pol portal dixital d’información musical www.fnast.net y pola asociación Ensame Cultural Sonastur. Nel anuariu, que distribúyese de baldre al traviés d’Internet, recuéyese l’actividá de los grupos asturianos que grabaron discu, maqueta, temes sueltos y/o vidioclip durante l’añu 2009.

Rock, folk, metal, hiphop, pop… son dalgunos de los estilos musicales qu’apaecen nesti Anuariu Sonoru ’09, recopilatoriu caracterizáu pola pluralidá musical fecha n’Asturies. La xeografía d’esta comunidá tamién ta representada nel anuariu; grupos d’oriente a occidente y de norte a sur formen el llistáu de bandes, mentanto que llingües como l’asturiana, castellana, eonaviega o inglesa exprésense xunto a los estremaos soníos.

Basándose na defensa de los organizadores del llibre y másimu espardimientu de la cultura, esti Anuariu Sonoru ’09 distribúyese gratuitamente al traviés d’Internet. Puede descargase na páxina musical www.fnast.net y, xunto a los cantares y vidioclips, acompáñalo un llibretu en formatu pdf con información biográfica sobre los grupos participantes, el nuevu proyeutu d’anuariu y los sos promotores.

L’oxetivu cimeru del Anuariu Sonoru ’09 ye’l de da-y el másimu puxu a la música fecha n’Asturies; una escena musical viva qu’anque amuese bayura y calidá tien qu’enfrentase a numberoses torgues: falta d’infraestructures, carencies informatives xeneralizaes nos medios mayoritarios y apueste insuficiente de les instituciones públiques pa col son compuesto dientro d’estes llendes.

Preparación del Anuariu Sonoru ‘10

Dende los organizadores, Fnast.net y l’Ensame Cultural Sonastur, apuesten por esti nuevu proyeutu y nagüen por que s’afite dientro y fuera d’Asturies, siendo – xunto colos otros dos anuarios asturianos qu’existen yá - un referente pa los que se quieran averar a los ritmos fechos na Comunidá Autónoma. D’esti mou yá s’alcuentren trabayando con tiempu nel Anuariu Sonoru ’10 pa que medre en calidá y participación

Descarga: http://www.megaupload.com/?d=X6TD2OCW

John McSherry presenta Soma

2010-02-15T15:35:00.000-08:00

Yá hai fecha pa la presentación del primer discu en solitariu de John McSherry, va ser el prósimu 6 de marzu cuando presente n'An Droichead (Belfast) l'album tituláu Soma, onde s'amiesten reinterpretaciones de pieces tradicionales con delles composiciones del xenial gaiteru irlandés. Eventu que nun se pue peder naide que te na islla esmeralda nesa data y que, de xuru, nun va tardar en venir a presentar tamién perequí.
Nesti intre nun vos puedo ufrir dengún adelantu de Soma, valga esta amuesa del talentu de John xunto colos meyores de los meyores pa facer la espera más llevadera.

Música y chigres

2010-02-12T03:06:00.000-08:00

Queda un mes pa San Patriciu, una perbona escusa pa colgar equí estos videos atropaos de Youtube, onde s'entemez la guapura de la música tradicional col incomparable marcu del chigre, igual nun soi mui orixinal pero, si esti recursu facilón val pa enllenar programes enteros de televisión, tamién me valdrá a min pa nun forzar les neurones. Que vos preste.

Protagonismu Asturianu na Nueche de San Patriciu Parisina

2010-02-06T15:03:00.000-08:00

El gaiteru asturianu Hevia va compartir escenariu'l prósimu 20 de marzu con renomaos músicos irlandeses y bretones, na Nuit de la Saint Patrick parisina, un eventu entamáu cola collaboración del Festival Interceltique de Lorient.
Los irlandeses Lúnasa van ser los encargaos d'abrir la fiesta que ta previsto dure unes 5 hores; depués vendrá la Bagad de Lokoal-Mendon (4 vegaes campeona de Bretaña) que va presentar un espectáculu, especialmente preparáu pa esta nueche, onde va cuntar cola collaboración de xente como Giles Servat, Dom Duff, Pat O'May, etc; depués tocará-y al de Villaviciosa; tres el nuestru gaiteru sedrá protagonista'l folk-rock de Soldat Luis; y, pa rematar la folixa, un clásicu del fest-noz, Sonerien Du.

Xuacu Amieva n'Avilés

2010-02-02T23:59:00.001-08:00

Ayeri pudimos disfrutar d'un conciertu didáuticu de Xuacu Amieva n'Avilés, onde tuvo acompañáu por Paula Amieva a les percusiones y Iván Fidalgo a la guitarra. El mayestru d'El Mazucu fixo un percorríu per bona parte de los instrumentos tradicionales d'Asturies a lo llargo de casi 90 minutos, dende les percusiones a los instrumentos de vientu, pasando per dellos de cuerda como'l rabel de Casu o la zanfoña, interpretando melodíes y estilos de dixebraes fasteres del país.
Pa rematar la sesión entamada pola Obra Social de Cajastur, Xuacu, tocó delles pieces a les gaites grillera, redonda y tumbal. Esti conciertu va repetise en delles localidaes más a lo llargo de febreru, como yá vos adelantamos va poco.

Esbardu salda les deudes cola SGAE

2010-02-01T05:35:00.000-08:00

L'Asociación Cultural Esbardu, d'Avilés, dio anuncia ayeri de que saldará los 25000€ de deuda que tenía cola SGAE pola organización del Festival Intercélticu d'Avilés dende l'añu 2005. Esta deuda facía imposible a Esbardu recibir suvenciones públiques pa desendolcar les sos actividaes. La cabera aición de la SGAE foi anunciar, va pocos díes, la so intención de subastar la marca Festival Intercélticu d'Avilés propiedá de la asociación avilesina y embargada pola sociedá d'autores.
A lo llargo de güei Juan Casas, direutor del Festival, desplicará en rueda de prensa la forma de la se fadrá efeutivu'l pagu. Queda agora la dulda de qué va pasar colos dos festivales folk d'Avilés, que yá dieron anuncia de que diben cellebrase esti mes de xunetu, la lóxica diz que entrambes partes tendríen que sentase a negociar una cellebración conxunta embaxo'l paragües de la marca Festival Intercélticu d'Avilés, que ye la que tien la distinción de fiesta d'interés turístico... Pero conociendo l'ansia intervencionista y testerona de dellos conceyales albidró lo peor.