martes, 7 de septiembre de 2010

Cantares con hestoria: The Cruel Sister

Entamo equí una esbilla de cantares que, pa min, resulten fundamentales o, polo menos, mui importantes nos caberos 50 años de la música folk. Nun fai falta dicir que los criterios a la hora de facer esta escoyeta son personales y suxetivos dafechu.
Prestame pola vida entamar con una vieya balada inglesa, la primer versión recoyida ta fechada en 1656, que fala d'una moza que muerre afogada pola hermana por tar namoraes del mesmu home. Col pasu'l tiempu, los restos de la moza afogada son remanaos pa facer un arpa, un vigulín notres versiones. L'instrumentu tien l'habilidá de cantar el crime de la hermana. El cantar ye vieyu y tien munches variantes interpretaes embaxo dixebraos títulos (The Cruel Sister, The Twa Sisters, The Bonnie Swans...). La tema del cantar, los güesos que cunten un crime pa qu'ésti nun quede ensin castigu, ye un llugar común atopable en munchos cuentos tradicionales europeos, los hermanos Grimm tienen recoyida una versión nomada El Güesu que Canta y un poema de Lord Tennyson, tituláu The Sisters, ta inspiráu nesta tradición.
El cantar tien abondes versiones nel folk contemporaniu, foi interpretáu ente otros por Clannad, Loreena MacKennitt, valió pa dar títulu'l discu más tradicional de la mítica banda de folk rock The Pentagle en 1970 y, en 1993, la formación orixinal d'Old Blind Dogs fixo una perguapa versión pa'l so discu Close to the Bone. Son estes dos caberes versiones del cantar les que valen pa illustrar esta entrada.

2 comentarios:

Ulmo de Arxila dijo...

Se mal nom lembro, havia um grupo de música folque (creio que de Madrid) que se chamava "Hermana Cruel", cavilo eu que em referência a esta cançom.

Vítor dijo...

Cuido que yeren de Guadalajara, dalgún miembru agora ta na banda hispano-irlandesa Alalé.
http://www.alale.ie/