Stolen Notes: de ganar n'Ortigueira a Tapia

La banda andaluza de folk célticu Stolen Notes alzóse col primer premiu del concursu folk Runas nel Festival d'Ortigueira, eso fai que seya'l primer grupu confirmáu pa'l festival del añu que vien. Esti trunfu de xuru que-ys supón una gran inyeición de moral cuando tan a piques d'entrar a grabar el so segundo trabayu discográficu. El xuráu del concursu folk, patrocináu por Estrella de Galicia (yá que gasten perres en patrocinar música folk habrá que nomar a la cervecera gallega), destacó la so calidá musical y la seleición de pieces interpretaes polos andaluces.

Pa los que nun los conozáis dicir que, Stolen Notes, ye una banda de folk acústicu, especialmente efeutiva nel direutu, y el so repertoriu ye na so mayoría d'orixe irlandés anque atopamos nél melodíes de tolos países del Arcu Atlánticu. Amás, los aficionaos asturianos vamos tener la oportunidá de conocer la so música en direutu nel prósimu Festival Intercéltico d'Occidente, porque yá tienen confirmada una actuación en Tapia'l 21 d'agostu.

Yá sabéis, tenéis una cita en Tapia col folk célticu que mos vien del sur, dir abriendo boca:

Duerna presenta 'Manca La Maera' en Sama

Duerna va presentar esti prósimu 24 de xunetu'l so primer discu grande, Manca La Maera, nel marcu de les fiestes de Santiagu de Sama, bien acompañaos por más de 100 músicos enriba l'escenariu. Los llangreanos vienen de ganar el cocursu folk Escenariu Prau en Cantabria y, va poco, presentaron el so videoclip Fiestes de Prau, esta prósima fin de selmana toca presentar el so primer trabayu discográficu tres d'asoleyar hai un par de temporaes la maqueta Dende'l Chigre.

Ente los collacios que van acompañar a Duerna nesta presentación de les fiestes de Sama tanLos Berrones, Dani Álvarez, Melanie Moers, Marisa Valle Roso, la Banda de Gaites Noega, la del Conceyu de Siero y la del Conceyu de Llangréu amás de dellos grupos de baille. De xuru que va entamase una buena folixa en Sama alredor d'esta presentación.

Pa abrir boca Fiestes de Prau

Presentóse'l XV Festival Intercélticu d'Avilés

Ayeri presentóse nel Centru Cultural Niemeyer la XV edición del Festival Intercélticu d'Avilés, edición dedicada a Irlanda y ta sofitada pola Embaxada n'España de la República, pesie al sofitu del país vecín el presupuestu d'esta edición ye'l segundo más baxo de tola historia del festival. El gobiernu municipal avilesín aporta 11500€ de sovención al eventu que tien la distinción de ser fiesta de interés turístico regional, nun dexa de llamar l'atención la cuantía d'esa aportación cuando tan perdiendo'l culu por taer a Avilés la Semana Negra lo que-ys supondría a les arques avilesines una inversión añal d'unos 200000€. Tamién ye bien llamativo que, na presentación del eventu, la representación institucional municipal cuerra a cargu de los conceyales de la oposición (PP, FAC, IU), el conceyal de Cultura pesie a cobrar 43000€ añales vuelve a nun tar al altor ético que tien que tener un representante de tolos avilesinos.

Gracies a la collaboración desinteresada de grupos y bandes collacies, la organización, vuelve a presentar una programación de 10 díes.No qu'a folk se refier nun vamos alcontrar nomes de grandes bandes internacionales, pero sí un garrapieyu de grupos que nun avecen a tocar per Asturies: la primer fin de selmana va tar n'Avilés el dúo formáu pol gaiteru irlandés Fiachra O'Regan y la vigulinera quebecuá Sophie Lavoie; a lo llargo'l restu'l festival tamién pasarán pel escenariu d'El Carbayedo'l multiinstrumentista llionés Fran Allegre, los salmantinos Folk On Crest, el gaiteru gallegu Fernando Mosquera y so banda (que tienen previstu grabar el conciertu d'Avilés p'asoleyar un DVD), la banda portuguesa Velha Gaiteira y el grupu de folk-rock madrilán Xtramonio.

Como ye costume nel festival, hai una estensa ufierta de música y baille tradicional con agrupaciones de Bretaña, Escocia, Irlanda, Galicia y Asturies. Na programación cultural paralela destaca l'homenax al premiu nobel de lliteratura irlandés Seamus Heaney, que nun va tar n'Avilés por problemes de salú, pero sí la so poesía en voz de la so cuñada, Anne Devlin.

Más info en www.intercelticu.com

Énte la detención de Teddy...

Nun me queda más que dicir que, si podéis, disfrutái compartiendo bona música colos collacios. Sacái un vieyu discu que nun escucharais dende fai tiempu y redescúbrelu en bona compaña tomando unes cerveces o unos cafés. Fai una copia, pa que t'acompañe nel coche nel trayeutu al trabayu o cuando marches de vacaciones...

Y nun escaezas que, los pirates, son otros.

Finalistes del Concursu Cuartu Los Val.les

L'asociación cultural El Arbedeiro yá tien selecionaos a los seis grupos finalistes del concursu folk Cuartu Los Val.les, bandes qu'actuarán en Navelgas (Tinéu) los díes 29 y 30 de xunetu. Nesta edición presentáronse 90 formaciones musicales al concursu y foron selecionaes éstes que vienen darréu: John Bolduan, Tarna y Ojos Negros serán los grupos de pequeñu formatu finalistes; Caliu, Lokolé y Yone Rodríguez son los finalistes de gran formatu.

Bandes y músicos de toles partes del estáu, del Congo y Estaos Xuníos van tar presentes na competición musical d'esti añu, quedando nes manes y nel criteriu d'un xuráu formáu por prensa especializada decidir quien son les dos bandes ganadores d'un de los más prestixosos concursos de música folk de los que se cellebren nel estáu español.

El Beltaine preséntase énte los medios

Ayeri presentóse énte los medios la tercer edición del festival Beltaine Intercéltico d'Avilés, otru añu La Villa va disfrutar de dos eventos rellacionaos cola música tradicional escasos de presupuestu. Munchos taréis pensando: ¿Por qué nun entamen unu curiosu envede dos faltos de perres? Pues porque tamos n'Avilés y Avilés ye diferente. El casu ye que sigún Xuntanza, el coleutivu qu'entama'l Beltaine, el presupuestu d'esti añu ye la mitá del de la cabera edición, una décima parte del presupuestu del primer Beltaine si nun me fallen les matemátiques.

Pesie al recorte, y visto sobre'l papel, la parte musical parezme abondo más interesante que la del añu pasáu, con un cartelu encabezáu pol vigués Carlos Núñez, que yá tocó nel Intercélticu orixinal hai años, y nel que tamién tan Anabel Santiago y les irlandeses Sharon Shannon y Niamh Ní Charra,a les que la prensa nun especializada nun debe conocer porque nómenles de pasada.

Na parte non musical, la organización rescata'l festival gastronómicu de la primer edición asitiándolu esta vuelta nel Parque'l Muelle y nun pudo algamar los permisos p'acompañar los puestos de xinta y bébora con un mercadín artesanal.

Última hora: La Shannon cayó del cartelu, parez ser que por problemes presupuestarios, los Tejes van ser los encargaos de tapar el gran furacu que dexa na programación la curdionera irlandesa :-(

VII Folkomillas con tastu asturianu

El festival cántabru Folkomillas llega a la so sétima edición, colo que yá podemos falar d'un eventu consolidáu gracies al llabor de l'asociación cultural L'Escanillu. La presente edición tien una importante presencia asturiana, lo que siempre ye d'agradecer, que va materializase nes actuaciones de Corquiéu, P'Amusquis y Duerna que tan acabantes d'algamar el prestixosu concursu de folk Escenariu Prau.

Nós, como nun podía ser d'otra forma, ponemos l'acentu na presencia asturiana pero'l Folkomillas ufierta munches más coses, concursu folk, teatru, mercáu medieval y una montonera d'actividaes culturales que se desendolquen paralelamente al festival folk. Llenar tres díes d'actividaes nun ye una xera que permita improvisaciones y siempre hai qu'agradecer qu'haiga xente que s'enfote en sacar alantre eventos d'esta mena.

La parte musical va tar protagonizada por Muyayos de Raíz, Metal Cambra, qu'actuarán la nueche'l sábadu 18 de xunu xunto con Corquiéu; los cántabros Jorge & David acompañarán a Duerna y P'Amusquis enriba l'escenariu'l domingu 19; la nueche del vienres 17 de xunu cellebrase la final del concursu folk Proyeutu Bígaru, con Keympa, Celtic Maze y Taray comu finalistes.

Más info en www.lescanillu.org

El Xixón 5º40' ta preparando una edición de luxu

Sigún mos vamos acercando'l branu, vamos conociendo detalles de la programación de los festivales folk que tan por venir. Asina, dende Xixón siguin apostando pol 5º40', una apuesta estratéxica na promoción turística de la ciudá qu'echamos de menos notres ciudaes asturianes con más tradición a la hora d'entamar festivales celtes. El casu ye que Xixón ta faciendo los deberes y cola antelación que requier cualisquier bona planificación, dende equí la nuesa norabona a tolos implicaos na organización d'esi eventu.

El casu ye que yá conocemos 3 nomes, de restallu, de los que van poner la música nel Xixón 5º40', ensin conocer entá la programación d'otros festivales albidramos que va ser mui abegoso que seyan quién a superar al Jacky Molard Acoustic Quartet, a la Mairtin O'Connor Band y a los escoceses LAU. Tres bandes que faen que pague la pena dir hasta Xixón cualisquier nueche d'agostu y que, de xuru, nun van ser les úniques que podamos disfrutar na presente edición del 5º40'.

Y pa dir abriendo boca:

L’Ayuntamientu de Llangréu y l’Agrupación d’Etnografía y Folclor Reija organicen esta quinta muestra cultural Tolo d’Asturies que va tener llugar los díes 7 y 8 de mayu. Tolo d’Asturies 2011 presenta una montonera actos que, dende primer hora de la mañana’l sábadu, van poner folixa y cultura tradicional nel recintu ferial de la estación central d’autobuses de Llangréu. Demientres los dos díes va desenvolvese’l yá clásicu mercáu tradicional d’artesanía y gastronomía y los talleres pa neñes y neños (animación, xuegos y deportes tradicionales, artesanía…) xunto cola Feria del discu y el llibru n’asturianu y de l’actuación de bandines tradicionales y grupos de baille.

A les 12:00h del sábadu 7 de mayu va tener llugar la inauguración oficial de Tolo d’Asturies cola intervención d’autoridaes y l’actuación de la Banda Gaites Conceyu Llangréu. Darréu d’esti actu inaugural va empezar la venta nel mercáu y l’actuación del gran Jerónimo Granda. A les 22:00 hores va tener llugar el gran conciertu de la feria cultural d’esti añu, l’escenariu de la carpa del recintu ferial va acoyer la música d’Héctor Braga, N’Arba y Los Berrones. Un gran conciertu pa la noche d’esti sábadu con xente de la Cuenca, del valle y la vuelta a los escenarios d’un grupu yá míticu de la música asturiana.

El domingu va siguir l’animación de bandines y grupos de bailles y l’actividá del mercáu dende les 11:00 hores hasta la clausura la feria. A les 13:00 va actuar la Banda Música de Llangréu. N’acabando esta guapa actuación va tener llugar la sesión vermú d’Asturianada con escenariu llibre y la participación de Marisa Valle Roso, . Yá de tarde, a les 18:00 va facese l’homenaxe a la tradición de la pandereta con un conciertu a cargu de Pandereteres de Fitoria y Les Filanderes. Como remate, el gran Xuacu Amieva va dar un conciertu pa pone-y el ramu a esta quinta edición de Tolo d’Asturies que va clausurase a les 21:00 hores del domingu 8 de mayu.

II Romería Tradicional de Primavera en Ciañu

L’Ayuntamientu de Llangréu, en collaboración cola Asociación de vecinos San Antonio de Ciañu y la Escuela de Música Tradicional del AMPA del Conservatoriu Valle del Nalón organicen esta segunda fiesta de primavera que va tener llugar en Ciañu’l próximu domingu 1 de mayu.

La Romería presenta una montonera actos que, dende primer hora de la mañana’l domingu, van llevar folixa y cultura tradicional per tol distritu llangreanu de Ciañu. A les 11:00h va haber Diana floriada con gaita y tambor, desfile de Xigantes y Cabezudos y disparu de morteros. A les 12:00h va acompañase de música tradicional la misa los domingos. Dempués, a les 12:30 van ponese talleres de baille a lo suelto y de xuegos tradicionales pa neños y neñes nos xardinos del parque Rosario Felgueroso de Ciañu. A les 12:50, y dempués de repartir unes llambionaes ente la xente que participe nos xuegos y talleres, va empezar la Sesión Vermú amenizada polos escolinos de la Escuela de Música Tradicional "Llangréu" amás de Carlos Ronderos, Justino González, Xuan Nel Expósito y l’agrupación coral José León Delestal "El Carmen". N’acabando la sesión, a les 13:30 va tener llugar la segunda edición de Cantando pelos chigres, cola entrega llibros de cantares y ronda pelos chigres de Ciañu. Yá de tarde, a les 18:00h, el parque de Ciañu va acoyer la II ROMERIA DE PRIMAVERA amenizada polos alumnos y alumnes de la Escuela de Música Tradicional "Llangréu" y los sos profesores Anabel Santiago, Chema Fombona, Chus Solis, Hector Braga, Pelayo Fernandez, Pepín de Muñalen y Xose Ramon Navia. Too esto con escenariu llibre y pipa de sidra.

XII Concursu Folk Cuartu Los Val.les

Yá ta abiertu'l plazu del clásicu concursu folk de Navelgas, qu'esti añu algama la so XII edición. Los grupos interesaos en participar nun de los más prestixosos concursos de música tradicional del estáu pueden unviar les sos maquetes hasta'l 8 de xunu, a:

XII Concursu Folk Internacional Cuartu Los Val.les

Museo del Oro de Asturias

33873 Navelgas

Conceyu de Tinéu

Asturies

Les maquetes tienen qu'incluir cuatro temes y diben dir acompañaes d'un dossier informativu de la trayeutoria del grupu, amás, de los sos datos de contautu. Esti añu, el concursu, vuelve tar dividíu en dos categoríes: grupos de pequeñu formatu (hasta tres componentes) y de gran formatu (con más de tres componentes. Los premios van ser de 1000€, troféu y emisión de conciertu en Radio 3, pa'l grupu de gran formatu ganador (los finalistes tienen un premiu de 600€); na categoría de pequeñu formatu, el ganador, va llevar 500€, troféu y emisión de conciertu en Radio 3 (los finalistes tienen un premiu de 300€).

El 20 de xunu daránse a conocer los tres finalistes de cada categoría y mediránse sobre les tables l'escenariu los díes 29,30 y 31 de xunetu en Navelgas.

Xuacu Amieva presentó'l documental Onde L'Agua Ñaz

Esti pasáu llunes, 11 d'abril, presentóse nel Cine Felgueroso de Sama de Llangréu'l documental Xuacu Amieva: Onde l'Agua Ñaz, un repasu a la vida musical del multistrumentista d'El Mazucu, figura cimera de la música tradicional asturiana.El documental descúbrenos paisaxes y cantares de la man de xente como Carlos Núñez, Fred Morrison, Tejedor, Lisardo Lombardía, los L.lumerinos de L.lumes o Alberto Fernández Velasco. Grabóse nos conceyos de Casu, Llangréu, Xixón, Cabrales y Llanes, encargándose de la parte téunica Tumismocine y los escolinos de CISLAN.

Senimos nun poder dar anuncia d'esta estrena la selmana pasada, pero nós nun recibimos la nota de prensa hasta esta mesma selmana, polo que nun fuimos quien a asistir a la proyeición del documental nin anuncialu en tiempu y forma. Naguamos por que dempués d'esta premier podamos ver el documental n'otres sales del país.

Tuenda presenta 3

Esta tarde a les 20.00h Tuenda va presentar el so nuevu trabayu discográficu n'Uviéu, nel Auditoriu'l Maizón. El discu lleva'l títulu de 3 y sigui la filosofía que yá quedó bien nidia nos otros dos discos que yá conocemos, reinterpretación contemporania pero respetuosa de les fontes de la tradición asturiana dando-y un valir añadío al trabayu de campu de los miembros del grupu, n'especial al d'Ambás y el so Archivu de la Tradición Oral. Como diz un collaciu galego, tan nuna operación de rescate y recostrucción de la música asturiana qu'agora algama'l tercer episodiu.

Podéis sintir dellos cortes d'esti nuevu trabayu nel MySpace de Tuenda y, de xuru, qu'esta tarde yá podéis entamar a mercar el discu.

Delles propuestes musicales pa la fin de selmana

El xueves, como anticipu de la fin de selmana, nel Café Trisquel de Xixón vamos poder ver y oyir a Acuei? un cuartetu formáu por Dolfu R. Fernández, Borja Baragaño, Alberto Ablanedo y Alberto Abad. Como ye vezu nesi local l'actuación entamará sobre les 22:00.

N'El Cafetón d'Avilés la sesión-folk de costume de los vienres va tomar esteroides pa medrar hasta ocupar la nueche'l vienres y la del sábadu. Corzobeyu va ser el grupu encargáu d'abrir esta fin de selmana folk nel chigre avilesín, quedando la música de los rapazos de Verdasca p'amenizar la nueche'l sábadu.

Y en Mieres la Folixa Na Primavera, con Corquiéu y Macadamia'l vienres y La Col.lá Propinde y Blima'l sábadu.

Duerna a la gueta de figurantes

Duerna anda a la gueta de figurantes pa la grabación del so primer videoclip. La grabación va facese'l prósimu 17 d'abril a les 20:00h nel que foi campu fúbol L'Atarillu, en Formiguera (La Felguera), el rodax va simular un conciertu'l grupu y necesita gran númberu de figurantes, poro, Duerna quier invitavos a toos a que vos paséis per Formiguera a pasar una tarde de folixa con sidra, xinta y la so música.

El cantar que va grabase ye'l tituláu Fiestes de Prau, polo que pal video buscase criar un ambiente de típica romería asturiana. Si queréis collaborar nesta grabación yá sabéis onde tenéis que dir y cuando, los rapazos de Duerna esperen por vosostros.

Conciertos, conciertos, conciertos

Cola entrada la primavera vamos conociendo nomes y feches de les bandes que van pasar per Asturies nos prósimos meses, diremos dando cumplida noticia de tolos que podamos sigún se van acercando los conciertos, pero nun podemos dexar pasar la ocasión de dir solliñando dalguna fecha pa que vaigáis iguando un calendariu afayaízu:

• El 14 d'abril nel Auditoriu Príncipe Felipe d'Uviéu, Tuenda presenta'l so tercer discu, 3.
• El 16 d'abril, na Feria Muestres de Xixón, el XXIII Conciertu Pola Oficialidá de la Llingua.
• El 28 d'abril nel Teatru Xovellanos, en Xixón, Luar Na Lubre presenta n'Asturies el so caberu discu, Solsticio.
• L'11 de xunu nel teatru La Laboral, en Xixón, va cellebrase l'acontecimientu la temporada, 4 hores de la meyor música l'Arcu Atlánticu cola presentación del nuevu discu de Chus Pedro y l'actuación d'Altan y Capercaillie.
• El 23 de xunu, na Playa Poniente de Xixón, conciertu Blima & Amigos.

Primeres actuaciones confirmaes del Intercélticu d'Avilés

Yá va confirmándose la presencia nel Festival Intercélticu d'Aviles de delles bandes y grupos, asina, hai unos díes la organización confirmó que la Bagad bretona de Kevrenn Brest St. Mark diba tar tar presente nel festival avilesín, qu'esti añu algama la so XVª edición.
Na estaya folk del festival tamién s'adelantó dalguna novedá, la presencia del duo irlando-quebecuá formáu pola vigulinera de Lac-St-Jean (Quebec) Sophie Lavoie y pol gaiteru de Connemara Fiachra O'Regan. Xente mozo que yá tien una llarga trayeutoria a xocostrines, asina Fiachra ye All Ireland Champion na categoría senior de gaita y xiblates y, va poco, asoleyó'l so primer discu en solitariu tituláu Aisling Gheal. Pela so parte Sophie tien formáu parte del grupu quebecuá L'Attisée, col que tocó n'Irlanda y Francia nos caberos años. N'Avilés presentarán el so primer discu como Sophie&Fiachra, nel que predomina la música baillable d'entrambos países.
Equí vos dexo una de les sos actuaciones pa la televisión irlandesa

Nuala Kennedy en Xixón

La flautera irlandesa aporta a Xixón esti xueves, 3 de marzu, pa participar nos conciertos de Músiques del Sieglu XX entamaos por Cajastur. Nesta ocasión la Kennedy visita Asturies acompañada por Myke Bryan a la guitarra y Iain MacLeod a la mandolina, pa otres ocasiones venideres quedará'l disfrutar de la so banda'l completu. Anque cuido qu'aprovechará la visita pa promocionar el so segundo discu Tune In, asoleyáu en 2010 por Compass Records, naguo por que disfrutemos tamién de delles de les pieces, de xeitu más tradicional, que formaron parte del so discu de debú The New Shoes.
El conciertu va cellebrase nel pabellón Luis Adaro del recintu la Feria Muestres a les 20:00 y, como ye vezu, la entrada ye de baldre.

Shaun Davey vuelve a xuntar músiques irlandesa y balcániques

El compositor irlandés Shaun Davey vuelve fusionar la música irlandesa con músiques de los Balcanes nel so caberu trabayu Voices From The Merry Cemetery, un camín que yá percorrieron otros grandes del folk irlandés nos años 80 y que valió pa fabricar el gran ésitu que punxo la música gaélica nes llistes de superventes, Riverdance.
Shaun Davey, acompañáu polos solistes irlandeses qu'avecen a andechar con él (Rita Connolly, Liam O'Flynn, Gerry O'Beirne...), esplora la música coral rumana coles colloristes cruces del campusantu de Sapinta (el Merry Cemetery del títulu del discu) venceyáu a les ilesies de madera de la rexón de Maramures.
Igual esti trabayu ta un poco alloñáu de la música de la solemos falar equí, pero'l trabayu de Davey siempre caltién una calidá musical enforma alta y, polo menos, interesante.

Corquiéu cuelga la so discografía en YouTube

La banda de Ribeseya ta acabante d'abrir una canal oficial en Youtube onde punxeron, a disposición de tol mundiu, los sos dos primeros discos (La Barquera y Salia). Nesti intre d'engafentáu alderique sobre los drechos d'autor, iniciatives d'esta mena, ponen enriba la mesa puntos de vista bien alloñaos de los oyimos en boca de los presuntos representantes de los autores y d'otros músicos.
Cuido qu'esti alderique aportó cuánta yá a un puntu absurdu, con señores que lleven años ensin vender un discu cobrando 300000€ al añu a costa de la recaudación de drechos d'autor, mientres músicos de verdá (de los que componen, de los qu'interpreten) malviven trabayando nunes condiciones tercermundistes, tocando en llugares que nun pasaríen denguna inspeición de prevención de riesgos por cuatro perres (dacuando poles consumiciones...). ¿Nun ye hora de poner unes pingarates de sentíu común nesta agarrada? Yo toi fartu de que me cobren una tasa cuando compró un cd virxe por si copió daqué n'él ¿y si nun lo copio? ¿Va devolveme Teddy 15 céntimos?
Pa mi idega la solución yera que los autores, los socios de la SGAE dexaren d'antroxase d'avestruces y dixeren al altu la lleva lo qu'opinen. La creación intelectual tien que tener un beneficiu económicu, ta ñidio, pero esi beneficiu nun pue venir de tratar a tola población como presuntos lladrones. Naguo por que iniciatives como les de Corquiéu o les d'otres bandes qu'editen la so música baxo la llicencia creative commons como La Tarrancha o Xera, tengan continuidá y sirvan d'exemplu de qu'hai otres voces nel coleutivu d'autores estremaes de les de Teddy y otros zombies asemeyaos.

La Tarrancha prepara los conciertos de 2011

La banda de fusión La Tarrancha, anuncia que tien abiertu el periodu de contratación de cara a esta primavera y branu. La Tarrancha arranca así l’añu pa dir afitando les feches nes que llantará enriba l’escenariu el so particular son, lo qu’ellos va tiempu nomaron “Mecigayu Ska”, una mecigaya d’influyencies sonores que partiendo del los ritmos hamaiquinos del Ska y el reggae van pasándolo pela musica tradicional asturiana a la bretona o sonios mas folkis, a aires llatinos, ensi escaecer otros estilos. Esi son particular y la so puesta n’escena convidando a la folixa, faen que ya sea nun festival grande a un conciertu pequeñu, ya seya n’Asturies o nos otros sitos onde tienen tocáo, como Andalucia, Galicia, Llión, Cantabria, Burgos… el publicu disfrute del primer minutu hasta l’ultimu.

La Tarrancha cunta con delles publicaciones, ente élles el single Exit-Encia, la maketa Qlt? Y el discu Ö-3-3 (otrestres) aparte de la participación nel discu compartíu Rock’n’Lingua y dellos discos compilatorios mas..

Una constante na vida de La Tarrancha ye’l dir y venir de los sos comonentes, y ye que les circustancies llaborales fain que too sea mas abegoso. La ultima ausencia del grupu ye la del baterista Ojeda (tamien bateria del grupu heavy Darksun) que tebo qu’emigrar a Suiza. Esti contratiempu ye lo qu’impide qu’el grupu grabe lo que diba ser el prosimu discu de La Tarrancha y que tenien intención de materializar en primavera. La so ausencia ta sustituyía por Simón, percusionista y luthier bien conocíu nel mundu de la música tradicional y les bandes de gaites, que tendrá la posivilidá de debutar cola banda el día 30 d’esti mesmu mes nel teatru Xovellanos de Xixón.

Una de les peculiaridáes de La Tarrancha ye que les sos composiciones tienen llicencia Creative Commons, y éllos nun pertenecen a la S.G.A.E., ya que nun comparten la so politica recaudatoria na xestión de drechos. Polo que amuesen como reclamu que les entidaes que los contraten tan esentes del pagar dichosu tantu por cinetu a la S.G.A.E. N’esi aspeutu, tola so música ta disponible llibremente y de baldre na rede.

Pa mas información: www.myspace.com/latarrancha

Blima presenta Express

Blima entama l'añu con discu nuevu, Express (Tierra Discos). Nel nuevu trabayu discográficu afonden nel conceutu musical nel que vienen trabayando de 2006, folk acústicu, elegante y ensin estridencies que fadien la pureza d'arranchos. Igual, nesti Express, garra más protagonismu na parte instrumental el curdión de Marcos Alonso pero, yá vos digo que ye una evolución natural dientro del propiu soníu'l grupu. La sustitución de vocalista, Mapi Quintana por Silvia Quesada, aporta versatilidá nos cantares y delles querencies pol jazz a les que nun tábamos avezaos nel folk asturianu.
Ente los collaboradores de luxu, colos que cunta Blima nel so nuevu discu, destaquen Xurde Fernández a les flautes y l'escocés Martin O'Neill al bodhrán (ganó'l Scots Trad Music Award como meyor instrumentista nel añu 2010).
La presentación oficial d'Express va facese la selmana qu'entra nel Teatru Vital Aza de la Pola L.lena, el día 29 a les 20:30 (la entrada ye de baldre asina que la crisis nun ye escusa pa nun dir). Equí vos dexo un adelantu d'Express, la versión que fai Blima del vieyu cantar de Balandrán "Onde la Mar"

Premios AMAS

Yá ta abiertu'l plazu pa votar les estremaes candidatures de los premios AMAS, la votación faise dende la web de los premios http://www.premiosamas.com/ y nun requier un rexistru pa emitir el votu, namás tenéis que rellenar el formulariu de votu y depués confirmalu retrucando un email.
Como cualisquier otru premiu hai que dicir que los criterios a la hora de facer les candidatures ye suxetivu, polo menos pa los que nun tamos involucraos na organización y que, na nuesa opinión, nun reflexa esautamente la escena musical d'anguaño n'Asturies y la estaya de música folk o tradicional nun se correspuende col pesu qu'ésta tien, por modesta que seya, nel mercáu musical asturianu.
El casu ye qu'éstos son los qu'hai y los que podéis votar dende yá.

Felpeyu cumple 20 años y estrena páxina web

Depués de la lloriada d'ayeri tornamos a l'actividá normal del blogue: a falar de música, de músicos. Y qué meyor qu'entamar esti 2011 falando del aniversariu de Felpeyu, ún de los grandes nomes del folk asturianu que cumple 20 años enriba los escenarios y que, de xuru, tien preparáu un balagáu de sorpreses pa festexar esta prestosa efeméride.
La primer sorpresa d'esta conmemoración ye'l remocicamientu de la so imaxe na rede, asina, na direición www.felpeyu.com yá podéis alcontrar el nuevu diseñu de la páxina web oficial de la banda (nesti intre namás ta disponible n'asturianu, pero bien ceo tamién podrá consultase en castellán y inglés). Perinteresante resulta'l trabayu de recopilación de semeyes que ta faciendo la banda, pa resumir los sos 20 años d'hestoria, y pa la que pidi la collaboración de tolos aficionaos que-ys puean apurrir semeyes d'actuaciones y conciertos.
Amás del remocique de la web, Felpeyu, ta tamién acabante d'estrenar blogue nel qu'informarán de les noticies más inmediates de la banda. Entá nun hai muncha información, pero habrála nel futuru. Tamién la so presencia nes redes sociales va medrar cola apertura d'una páxina oficial en Facebook, amás de caltener el so MySpace qu'hasta agora yera la canal de comunicación principal de Felpeyu n'internet.

Intentaremos caltenevos informaos de toles novedaes referíes col 20º aniversariu de Felpeyu de les que vayamos teniendo noticia.

Mein Kampf 2011

Tres del parón nadaliegu tornamos tresformaos polos nuesos democráticos representantes en militantes d'estrema derecha ¡Qué-ys vamos facer! Resulta qu'agora, pa la FSA-PSOE, el sentise arguyosu de ser asturianu ye sinónimu de ser ultraderechista, por ende, esti blogue, enfotáu n'esparder la música de raigón asturiana y el trabayu de los músicos asturianos, debe ser un mediu de la propaganda nazi...
Nun dexen de ser unes declaraciones absurdes feches por un bobu (el que diz bobaes ye eso, un bobu), el problema ye qu'esi bobu ta rodeáu de munchos más bobos y bobes como él y qu'esa reciella de borregos y borregues tienen secuestráu esti país dende hai 30 años. Décades de desanicíu'l texíu industrial d'Asturies, llustros d'esterminiu cultural, años de sindicalismu vertical y mediocridá intelectual antroxada de socialdemocracia... Igual hai que sentise arguyosu d'eso pa ser d'izquierdes, nós, illetraos facistes nun somos quién a atalantalo.
Nun quiero finar esta entrada del blogue ensin entrugar que, si somos un país d'ultraderechistes y nazis (porque cuasi toos -toos menos Lastra- tamos más o menos arguyosos de ser asturianos) y el partíu políticu que gana toles elleiciones n'Asturies ye'l PSOE... Entós, ellos, tamién son ultraderechistes y nazis ¿non?