lunes, 21 de diciembre de 2009

Ö-3-3 de La Tarrancha yá tá na cai


Yá tá na cai'l discu Ö-3-3 (Otres tres) de La Tarrancha. Anque ya teníen asoleyaos dellos trabayos como la maqueta Qlt? (culete?) y la participación en dellos compilatorios y tributos, ésti ye’l primer discu de llarga duración de la banda. Autoproducíu pol grupu y el sellu Algamar Producciones, el discu foi grabáu en Tutu Estudiu por Sergio Rodríguez nel pasáu mes d’ochobre. Trátase d’un discu orixinal, con un soníu personal dafechu, propiu, pero totalmente eclépticu. La base del soníu de La Tarrancha ye’l Ska y el Reggae, pero dando-y pincelaes que van dende’l funk al swing, dende’l ragga al folk, de la pachanga a la música tradicional de… Eso sí, too ello con un carcterísticu sonío llimpiu, enllenu de pequeños matices pero alloñáu de distorsiones y dureces acústiques. Too ésto ye lo qu’ellos autodefinen al so propiu estilu como Mecigayu Ska. La temática de les lletres ye variada; diendo dende l’amor, a la reivindicación; de la crítica, al cachondeo; de la muerte, a la vida y del mundu, al chigre. Tolos cantares son n’asturianu, menos ún d’ellos que ta en gallegoasturianu.
Dempues d’estos años d’esistencia y de munchos cambios na formación, La Tarrancha amuesa n’esti discu'l resultáu final y esperemos qu’estable de lo que va ser el so soníu dende esti intre. El protagonismu que tuvieren los metales pasa, agora, a l’acurdión diatonioca, el trombón y les flautes, acompañando a les guitarres, baxu, percusiones llatines y africanes, batería y voz. El discu cuenta con delles colaboraciones, pero eses meyor descubriles escuchándolu Anque tienen previstos dellos conciertos pa dientro poco, nun tienen entamáu dengún conciertu esclusivu pa presentar el discu, pero afirmen tar trabayando n’ello.
Pa poder escuchar un adelantu, tienen tres temes de Ö-3-3 nel so myspace. El grupu nun comparte l’actual política de la SGAE, a la que consideren meramente recaudatoria, abusiva y que va a la escontra de los pequeños grupos y de la xente que realmente vive la música como daqué mas que mercantil, si non cultural, dándose casos d’entamar pleitos y torgar conciertos autoxestionáos por coleutivos, sociedaes de festeyos o pequeñes sales, creando un estáu de miéu nel que cada vez s’entamen menos conciertos pequeños onde los grupos puean desendolcar la so creatividá. Y ye por ello que dende un entamu apuesten por otra mena de llicencies, Ö-3-3 tien llicencia Creative Commons y dientro poco va tar disponible na rede, pa que tol mundu puea descargalu llibremente ensin qu’eso conlleve dengún delitu.

domingo, 20 de diciembre de 2009

Feliz Nadal y prósperu Añu Nuevu

Llegaos a estes feches, nun me queda más que deseyar unes felices Pascues a toos y un Añu Nuevu un poco meyor qu'esti murniu 2009... Y, como esti ye un blogue de folk, la música navidiega qu'acompaña esta entrada tamién ta interpretada por músicos tradicionales del Arcu Atlánticu. Pasáilo bien y dexar el coche nel garax.


viernes, 11 de diciembre de 2009

Duerna presenta la so primera maqueta



El grupu Duerna, procedente de la cuenca’l Nalón, ta acabante de sacar la so primer maqueta titulada Dende’l chigre. Duerna ñaz a finales del añu 2008, con una formación na que l’armónica y les composiciones propies garren especial importancia. El so repertoriu ta basáu en pieces pa baillar (muñeires, tangos, llixeros, sones d’arriba, rumbes, xotes...etc).
La maqueta grabóse a lo llargo la seronda nos estudios Luna Music de Llugo (Llanera). Ta compuesta de cuatro temes, instrumentales y cantaos, nos que podemos sentir tanto composiciones propies como igües de pieces tradicionales. Nel myspace del grupu pue vese un videu promocional y oyir dalgún tema.

Xuacu Amieva en La Felguera



El Nuevu Teatru La Felguera va acoyer, mañana sábadu 12 d’avientu, un conciertu del músicu asturianu Xuacu Amieva. Amás de pol so grupu (Paula Alonso al violín, Emilio Hidalgo a la guitarra, Luis Rodríguez al baxu y Rubén “Mol” Rodríguez a la batería) Xuacu Amieva va tar tamién acompangáu de dellos artistas convidaos como Daniel Pando a la trompa y la Banda Gaites Naranco.

Xuacu Amieva ye una de les figures más reconocies del panorama de la música tradicional asturiana. La so llarga carrera como gaiteru, maestru de gaiteros y multiinstrumentista en delles formaciones folk, dio-y un gran prestixu dientro y fuera d´Asturies. Nel so repertoriu alcuentrase una amplia esbilla de cantares y sones de la tradición asturiana, non solo del repertoriu de gaita, sinon tamién de bandurria asturiana, zanfona, flauta o canciu.

Xuacu Amieva ye cofundador de los grupos folk Beleño (1983) y Ubiña (1985), del que formó parte hasta la so disolución en 1989. Con estos grupos y como solista tien participao en munchos festivales y alcuentros de música tradicional, tanto n´Asturies como nel restu España y Europa. Primero en solitariu y, dende 1990, col grupu folk que lleva’l so nome tien grabaos 11 discos: Método de gaita, Onde l´agua ñaz, Ubiña (col grupu Ubiña), Xostrando, Las cornamusas de Europa (con dellos artistes.), Lluna caldeá, La gaita asturiana, El Besu nel discu Santiago del grupu The Chieftains, Tiempo de Mitos, Al son del fueu, y 6.

Ente los premios llograos por esti gran músicu cabe la pena destacar: 1986 Troféu Macallan del Festival Intercélticu de Lorient, 1988 “Urogallo” del Centru Asturianu de Madrid, 1990 Dos Ventolines (Unu como meyor multiinstrumentista y otru como músicu con raíces n´Asturies), 1997 Grammy pol tema El Besu nel discu Santiago del grupu irlandés The Chieftains, 2006 Premiu honoríficu AMAS. El sábadu 12 d’avientu vamos poder disfrutar del potente directu d’esti gran músicu y la so banda, el conciertu va ponese nel Nuevu Teatru La Felguera y la hora empiezu ye la de les 20:15 hores.

jueves, 10 de diciembre de 2009

Asturianos nominaos a los premios de la Música

Yá se conocen les candidatures a la XIVª edición de los Premios de la Música, lo que sigue ye la nómina de músicos asturianos nominaos nes dixebraes estayes: Fíos d'Esta Tierra de Spanta la Xente y Montes Cantábricos de Vicente Diaz tan nominaos na categoría de meyor discu de música tradicional. El Sonar de les Semeyes de Mapi Quintana na categoría de meyor discu de fusión, qu'amás repite na de meyor canción n'asturianu con 11 de Mayu, xunto con ella compiten Dixebra con Cantar de la Redención, Alfredo González con La Nada y Tú, Spanta la Xente con El Canciu'l Mineru, Lafu&Rebeca con El Mio Sitiu, Misiva con La Casa'l Miéu, Laura Diaz con Palombina Blanca, Bacotexo con Queimar el Cielu, Fe de Ratas con Una de Gallus y Músicos Pola Oficialidá con Ye Lo Que Nos Pasa.
Nun dexen de llamar l'atención dellos nomes inesperaos, pero la hestoria d'estos premios yá nos tien avezaos a resultaos pintorescos. Suerte pa toos y toes.


jueves, 3 de diciembre de 2009

Primeros pasos del XIV Festival Intercélticu d'Avilés



Mientres la federación qu'entama'l Beltaine anda metida en mediu d'una guerra política a cuentu de 66000€ ensin xustificar sigún el PP d'Avilés, Esbardu da los primeros pasos de la XIVª edición del Festival Intercélticu d'Avilés. Asina, yá tien confirmada la asistencia al festival avilesín d'una montonera de grupos del Arcu Atlánticu dispuestos a venir a Asturies renunciando al so caché, condición impuesta poles dificultaes económiques qu'atraviesa'l FIA.
Ta confirmada la presencia n'Avilés de delegaciones de Galicia, Gales, Irlanda y Escocia. Los grupos que yá dieron el preste podéis conocelos na web oficial del FIA


sábado, 28 de noviembre de 2009

Emily Smith presenta Too Long Away n'Asturies

Promo2
La cantautora ya virtuosa del curdión pianu de Dumfriesshire presenta n'Asturies el so tercer discu, Too Long Away, de la man de Caxastur y los sos conciertos de Músiques del Sieglu XX.
Aclamada pola crítica dende que nel 2002 ganó'l prestixosu premiu BBC Young Traditional Musician of the Year, Emily Smith pasará per Uviéu y Xixón, el 9 y 10 d'avientu, p'amosanos el so talentu como autora ya intérprete de la música tradicional del sudoeste d'Escocia amás de dexanos delles pingarates de la poesía de Robert Burns. Equí vos dexo unes muestres de lo que mos espera


domingo, 22 de noviembre de 2009

La Tarrancha fina la grabación d'Ö-3-3


La Tarrancha ta acabante de grabar el so primer discu de llarga duración El discu (editáu pol sellu Algamar Producciones) grabáu en Tutu Estudiu por Sergio Rodriguez ta entituláu Ö-3-3 (Otres tres) y nagua por salir a la cai pa l'entamu del mes d’avientu, mentantu, podéis escuchar dellos temes d’adelantu nel so myspace
Sigún cunten los miembros de la banda'l so nuevu trabayu "Va ser un discu eclécticu, onde la banda amuesa'l so peculiar y personal estilu en doce temes de lo más variao."

viernes, 20 de noviembre de 2009

Carlos Núñez o Indiana Jones?


Toi acabante de lleer una entrevista al gaiteru gallegu nel diariu arxentín Crítica y, la verdá, dexame ablucáu. Toos persabemos que ye un músicu coyonudu, qu'amás de la gaita domina'l marketing (sabe vendese como naide, neso parez más italianu que gallegu) pero, delles vegaes, esi discursu de realismu máxicu made in Galicia qu'emplega pa falar del so trabayu pasase de rosca y la so prosa poética queda en caricatura. Repuna de melgueru y rebuscáu.
Podéis lleer la dichosa entrevista equí y sacar les vuestres propies conclusiones, agora dio-y por buscar música gallega en Xapón depués d'atopala en Brasil, a esti pasu va alcontrala perdayures menos na propia Galicia...

lunes, 16 de noviembre de 2009

Duncan Chisholm da cursu de vigulín en Galicia

Duncan Chisholm ya Iain MacFarlane van dan dar un cursín de vigulín escocés en Santiago de Compostela. ün de los vigulineros más renomaos del folk célticu d'anguaño, fundaor del míticu grupu de folk-rock Wolfstone. Banda cola qu'asoleyó 9 discos y cola que percorrió'l mundiu. Nel 97 entamó la so carrera en solitariu col discu Redpoint, al que siguió nel 2001 The Door Of Saints, onde ta mui presente la so querencia polos sones de la nuesa música tradicional. Pa 2010 cunta con publicar el so tercer album en solitariu.
Pa más info sobre'l cursín podéis dirixivos a esta web http://www.masterclassdemusicatradicional.info/

martes, 3 de noviembre de 2009

Phil Cunningham & Aly Bain nel Filarmónica d'Uviéu

La discográfica avilesina Norte-Sur Records trainos un regalu de Nadal adelantáu, a los xeniales Phil Cunnigham y Aly Bain al Teatru Filarmónica d'Uviéu el prósimu 20 de payares. El duu escocés va cuntar cola collaboración de dos vieyos collacios asturianos nesta velada, Jose Tejedor y Chus Pedro, que yá trabayaren a les órdenes de Phil na grabación del primer discu de los Hermanos Tejedor.
Norte-Sur Records ta más centrada notros estilos musicales ayenos al folk, pero va tiempu yá truxo a actuar a Avilés a la gaitera Kathryn Tickell, nun conciertu onde la afición nun respondió como yera d'esperar. Si nun m'enquivoco tamién tuvo daqué que ver cola visita de Maddy Prior a Piedrasblancas. Agora vuelven a apostar por pesos pesaos del folk célticu y nesta ocasión nun teatru capitolinu, nun vaya ser que pase como cola Tickell que munchos nun fueron ver porque Avilés quedába-ys a desmano.
Presta ver xente tan profesional y serio como Béznar Arias trabayando nun mundiu tan amateur como ye'l del folk asturianu, un aplausu pa él.

martes, 27 de octubre de 2009

De gaites y subvenciones

Munches vegaes nun somos ver les estreches rellaciones que tien la cultura tradicional colos periódicos cambeos de gobiernu, pero habeles hailes. Na vecina Galicia, qu'emponderamos va poco por incluir el folk contemporáneu na programación cultural del nuevu Añu Xacobéu y qu' en seguida un collaciu gallegu féxonos ver que nun yera tan guapo como talantábamos (qué queréis, la yerba'l vecín siempre parez más verde), esti añu tuvo a piques de nun cellebrase'l principal concursu de gaita del país vecín por una d0estes inesplicables vendettes polítiques.
El Concursu Internacional de Gaita Galega Constantino Vellón, con 19 ediciones a xocostrines parez bien afitáu nel panorama de la música tradicional gallega, pero esti añu la Xunta de Galicia, al traviés de la Secretaría Xeral de Emigración, nun dio'l preste pa subvencionar el viaxe de los cuatro gaiteros de la Galicia Exterior que taben invitaos a participar nel concursu, polo que tuvo que suspendese. Agora va cellebrase'l 8 y el 9 de Payares, envede'l 31 d'agostu de costume, gracies al sofitu del Concello de Ferrol y a la Diputación d'A Coruña.
L'Atenéu Ferrolán, la entidá qu'entama'l concursu, yá ta a la gueta de patrocinaores privaos pa garantizar la cellebración de la vixésima edición y pa qu'ésta nun dependa del humor d'un burócrata con ganes medrar na so carrera política.

Lo meyor d'Irlanda visitarános n'Avientu


De xuru que, los veceros de Caxastur, tais fartucos de que vos cobren comisiones por facer cualisquier operación col vuestro dinero. Bono, la entidá bancaria tien a bien devolvenos parte d'eses comisiones colos ciclos de conciertos Música del Siglo XX y, el prósimu mes d'Avientu va facenos un regalu mui especial: un doble conciertu n'Asturies de Guidewires.
Asina, una de les bandes más fresques y orixinales del panorama folk irlandés d'anguañu va presentar en Xixón (17 d'Avientu) y Mieres (18 d'Avientu) el so discu Live, del que yá vos falamos equí va tiempu.
Amás de Guidewires, esti Avientu Caxastur tamién nos va a traer a la escocesa Emily Smith y Tim Edey nel mesmu ciclu de conciertos.

domingo, 25 de octubre de 2009

Homenax a The Bothy Band


Dellos de los más afamaos músicos irlandeses d'anguañu andechen pa rendir tributu a The Bothy Band. Asina, va poco más d'un mes, esta esbilla de mayestros, fixo'l so debú en direutu nel Open House Festival col nomatu d'After Hours, otru homenax a ún de los albums señeros de la Bothy. Esti tributu ñaz d'una iniciativa de Kane O'Rourke, que va cuntar dende l'entamu col sofitu d'Alan Burke, a la que van dir sumándose John McSherry, Caoimhin Vallely, Mike McGoldrick, Karan Kasey y Michael McCague, toos ellos músicos que reconocen tener a la música de la Bothy Band ente les sos principales influencies.
Y nun hai meyor homenax pa una banda que reinterpretar el so repertoriu.


Y, yá de pasu, desempolvar los vieyos vinilos pa sentir a los clásicos

jueves, 22 de octubre de 2009

Xacobeo Raíces


El prósimu añu vuelve a ser añu santu xacobeu y, ente los actos culturales entamaos dende la Xunta de Galicia pa cellebralu, el folk gallegu contemporáneu va tar mui presente. Delles de les bandes más importantes del país vecín van participar nuna serie de conciertos per toa Galicia, agrupaos embaxo'l nome de Xacobeo Raíces.
Ente les bandes confirmaes nesti cilu de conciertos ta xente tan prestosa como Faltriqueira, Berrogüetto, Luar na Lubre, Susana Seivane, Uxía... La Xunta vuelve remanar la música tradicional gallega como imaxe de marca identitaria como yá fixo otres vegaes y qu'otres comunidaes vecines, como Cantabria, tamién tan entamando a usar pa dinamizar la so industria turística. Dende esti blogue yá tamos fartos de penar, a la gueta de dalguna mente despierta a la que se-y ocurra daqué asemeyáu n'Asturies cola nuestra música de raigañu, pero ¡qué vamos esperar de los que marafundien 300000€ en LAB y conserven (sic) el Prerrománicu con 90000! La consigna ye acabar con tolo que seya asturiano.


miércoles, 21 de octubre de 2009

Bob Dylan n'asturianu


El cantautor Toli Morilla va presentar, esti vienres a les 20.15, el so nuevu trabayu discográficu nel Nuevu Teatru de La Felguera. Esti discu tituláu Diez cantares de Bob Dylan n'asturianu fai honor al so títulu con diez magnífques versiones n'asturianu autorizaes personalmente por Bob Dylan. Contién canciones mítiques como Hurricane, Knockin' On Heaven's Door o Don't Think Twice It's All Right y ayalgues escondíes como The Man In Me o Sara, arropaes por una gran variedá de músicos y instrumentos. Un discu pa tolos públicos, que nos permite acercanos a esa parte de la obra de Dylan que siempre resultó más inaccesible: les sos lletres.
Bon plan pa la fin de selmana na que parez qu'a la fin va entrar la seronda, un folk distintu.

lunes, 12 de octubre de 2009

La Folixa del Tardíu

La Folixa del Tardíu, ta enfotada en facer honor al so nome y sigui ensin confirmar las bandes participantes na nueva edición de Llanes Al Cubo. A 15 díes del eventu la web ta cerrada y namás conocemos dellos datos del festival que pieslla la temporada n'Asturies. Lo poco que sé ye lo que vien darréu:
-Va cellebrase'l 31 d'ochobre y l'1 de payares.
-Va facese un homenax al gaiteru tradicional Ignacio Noriega, nel que va participar Hevia.
-Bandes confirmaes pa'l festival: Dixebra, que va presentar los temes del so nuevu discu Amor Incendiariu; el grupu noruegu-finés Frigg, del que vos dexo un videu embaxo'l post; Toumani Diabaté, cantautor de Mali que va actuar el día 1.
-Bandes ensin confirmar: Oysterband, na so web nun menciona Llanes y tien les feches bastante cargaes de conciertos pa presentar el so nuevu discu, parezme que va ser que non.
Yá sé que ye ranciar pero ¿enxamás vamos ser quién a entamar un festival en condiciones nesti país? Nun pido muncho, con que la web te fecha enantes del festival y les bandes ten confirmaes con un mes d'antelación yá me conformo. Ye razonable ¿non?

jueves, 8 de octubre de 2009

Lo meyor de Kíla

La banda irlandesa Kíla, protagonista dafechu del folk irlandés del cambiu de sieglu ta acabante d'asoleyar un doble CD embaxo'l títulu de Lo Meyor de Kíla, nesti trabayu faen un repasu a so estensa carrera carauterizada por entusiasmar en direutu a audiencies de mediu mundiu.
El recopilatoriu, amás d'atropar los meyores temes de la so discografía como banda, tamién escueye temes sacaos del discu grabáu en collaboración col xaponés Oki y de les sos dos bandes sonores, Monkey Soundtrack y la compuesta pala tamién reciente película d'animación francesa The Secret Of Kells.
Pa los que nun siguieran mui de cerca la carrera d'estos irlandeses, esti doble discu, ye una bona oportunidá de facese con un bon resume d'ella.

lunes, 5 de octubre de 2009

La Tarrancha, conciertu y discu

La banda asturiana de Ska-fusión La Tarrancha va dar el so postrer conciertu esti sábado 10 d’ochobre xusto enantes d’entrar a grabar lo que va ser el so primer discu de llarga duración.

La oportunidá pa gociar del so directu va ser esti sábado día 10 en “Les feries” de L.lena, onde van compartir escenariu con Los Berrones. Esta va ser la ultima oportunidá pa velos a unos díes de qu’entren en TuTu Estudidiu a grabar el discu qu’agora mesmo tan cocinando nel llar d’ensayu. El discu, asoleyau por Algamar Producciones, va tener por nome “Ó-3-3” (Otrestres) conocida frase coreada pol publico nos conciertos pa pidir mas canciones a los músicos. Siguen con esti nome cliptográficu el xuegu qu’empecipiaran va tiempu col so single “Exit-encia” y la so maqueta “Qlt” (Culete). Nel discu vamos poder disfrutar del mecigayu de sonios que van dir dende los sones del funk, el swing, o’l ragga, a tintes folk, tradicional o pachanga, siempre embaxo la clara llinia del Ska y el Reggae que caracteriza el so personal estilu. Esi estilu ta marcau pola llimpieza nel soniu, pol afalagu al baille, pola bona mezcla de ritmu y melodia y pola busqueda de complicidá col públicu. La banda, que durante munchu tiempu furruló con doce y trece músicos, anque agora ye un grupu d’ocho miembros nel que conviven guitarres, baxu, percusiones llatines y africanes, batería, curdión diatónica, trombón, flautes y voz.

La Tarrancha nun tubo nunca fácil la so xera, y a lo llargo d’estos 7 años d’esistencia tubo los sos problemes debío al gran númberu de músicos que yeren y la dificultá de mantenelos establemente nel tiempu, siendo la mayor causa d’éllo la emigración llaboral por gran parte de los sos miembros. Poro, ta claro qu’esto ye un enantes y un dempues, esti discu ye una forma de pagar una delda col so públicu y con éllos mesmos, ye una apueste pa dir p’alantre y dexar una etapa de dires y venires pa intentar estabilizar el grupu y dir trabayando ca vez mas nun soniu propiu. Nel conciertu d’esti sabado vamos poder disfrutar de temes vieyos y conocios de la banda, otros mas nuevos que vienen mostrando nes actuaciones d’esti branu y dalgún qu’otru estrenu.


jueves, 1 de octubre de 2009

I Alcuentru de Pandereteres de Llaviana

Pandereteres d'Asturies, Cantabria y Lleón van aconceyar esta fin de selmana en Llaviana, nun alcuentru entamáu pola asociación cultural El Molín d'Entrialgo. Tovía hai places disponibles nel Albergue de Tiraña p'asistir al alcuentru, pa apuntavos o recibir más info podéis escribir a molindentrialgo@gmail.com

jueves, 17 de septiembre de 2009

Acabóse Trebolgu, una cita menos nel calendariu


El pasáu llunes cellebróse la cabera edición de los Alcuentros Tradicionales de Trebolgu nel marcu de les fiestes de San Mateo. El presidente de l'asociación, Guillermo Pérez, dio anuncia de que cola décima edición dabase por peslláu'l ciclu vital d'esta cellebración ufriendo, eso sí, la posibilidá al Conceyu d'Uviéu de convertise n'organizadores del eventu. Si l'eventu pasara a ser d'organización municipal, l'asociciación Trebolgu taría encantada de collaborar pa caltener esta cita de la música tradicional nel calendariu de nueches folk.
Podéis ver les declaraciones de Guillermo n'Asturies.com siguiendo esti enllace.

miércoles, 16 de septiembre de 2009

La música irlandesa meyor que Madonna

Igual tais pescanciando que-y debió petar la cabera neurona al puntu qu'escribe esti blogue, porque ¿qué faen Madonna y Guy Ritchie nun bloque de folk? El casu ye que, va poco, supimos que l'ex de la Reinona'l Pop prestá-y más la música irlandesa que los hit parades de la so ex-muyer.
Eso foi lo que declaró nuna entrevista Guy Ritchie, ex de Madonna y direutor de películes onde espeya los baxos fondos británicos. El realizador de Lock&Stock o Rockanrolla acostuma a tocar la guitarra nuna jam session periódica, de música tradicional irlandesa, nel so pub llondinense, The Punch Bowl, xunto con dellos collacios, sigún el bonu de Guy la música que faen nel so pub ye meyor que cualisquier hit de la estrellona americana. Podéis lleer la noticia siguiendo esti enllace

lunes, 14 de septiembre de 2009

Sokaide gana'l Folkez Blai d'Ermua

La banda alavesa Sokaide ganó, esta fin de selmana, la cuarta edición del concursu de folk Folkez Blai d'Ermua. Asina los 3000 € del premiu fueron pa ellos y los 1500 € del segundo premiu fueron pal dúu hispanu-irlandés Nua formáu por dos vieyos conocíos, el uilleann piper César Pastor (ún de los fundaores de la Banda de Gaites La Tayuela de Mecer) y a'l vigulineru irlandés Eogahn Neff. Entrambes bandes llegaron a la final xunto con Quamblibet y Lochlainn de Valencia y Zambaruja de Valladolid.


sábado, 12 de septiembre de 2009

Esbilla de nueves bandes que pasaron per Lorient

  • Skeeal. Banda de la Isla de Man, xunta dos flautes traveseres y una guitarra con cantares nos tres dialeutos gaélicos (irlandés, escocés y manés). Lleven xuntos 5 años y tan acabantes d'asoleyar el so segundo CD Slipway, que presentaron hai delles selmanes en Lorient.

  • Beaton Sisters. Estes dos hermanes roxes son el nuevu productu de la bayurosa escuela de vigulín de Cape Breton. Tienen un CD publicáu col títulu de Taste of Gaelic.

  • Saltfishforty. Brian Cromarty y Douglas Montgomery formen esti duu procedente de les Islles Orcades onde'l vigulín vuelve ser el protagonista de la so música. Yá tienen asoleyaos dos discos, Goose Music y Orkney Sister, y percorríos Europa, USA y Canadá en poco más de 5 años d'esistencia.

  • Merzhin Moon Orchestra. Evolución o reinvención del grupu Merzhin que pasó per Avilés nel 2008. Fusión de rock, música bretona, world music y rock latino, col curdión diatónicu como instrumentu melódicu principal.

viernes, 28 de agosto de 2009

XXVI Noite Celta de Porcía

Nuevu cartelu de luxu pa la XXVIª edición de la nueche folk decana d'Asturies, la Noite Celta de Porcía. Mañana, el caberu sábadu del mes d'agostu, vamos poder disfrutar de les actividaes, yá tradicionales, entamaes pola Asociación La Alameda dende l'añu 1983, yá llovió. Música celta, sardinada popular y tou nun marcu natural perguapu como ye esti requexu'l conceyu'l Franco.
No qu'a música se refier, esti añu van pasar pel míticu escenariu la Banda e Gaites Reina del Truébano, Mezá, Llan de Cubel, los irlandeses At First Light Band y la banda asturiana d'ska-punk-folk Skama La Rede.
Un plan mui guapu pa dispidir el mes d'agostu con bona música folk y bones sardines del Cantábricu.

miércoles, 19 de agosto de 2009

Ópera folk: Ana de Bretaña

Nos años 70 tuvo bastante sonadía un xéneru dramáticu-musical al que denomó ópera rock, onde les más de les veces les estrelles del rock del momentu convertiense n'actores. N'España el casu pardigmáticu foi Camilo Sesto antroxáu de Xesucristu hippy. Como la mayoría d'estes modes absurdes pasó rápido y ensin apurrir grandes coses a la hestoria de la música, sacante Quadrophenia.
El xéneru tien tamién los sos cultivaores na música tradicional y nun país como Bretaña, onde les superproduciones alrodiu de la música de raigañu nun son infrecuentes, nun pasen munchos años ente la estrena d'obres d'esta mena. Ún de los especialistes nel xéneru ye Alan Simon, que yá tien nel so curriculum una triloxía entitulada Excalibur, y agora ta acabante d'estrenar nel Castillu de los Duques de Nantes Ana de Bretaña. Nesta produción andechen grandes nomes de la música bretona y dellos invitaos británicos, Fairport Convention, Tri Yann, el zanfonista Laurent Tixier, Pat O'May, Didier Squiban y la gran Cécile Corbel nel papel de la duquesa Ana.
Amás de les representaciones en direutu, qu'entamaron a finales del mes de xunu, el proyeutu completase col asoleyamientu d'un discu cola obra completa.

domingo, 16 de agosto de 2009

Sauga: el meyor festival del añu

Títulu polémicu, yá lo sé, suxetivu enforma pero, na mio humilde opinión el de Colindres ye por nómina de participantes y tamién por trayeutoria, que yá van 15 ediciones, ye'l meyor festival de música celta de los munchos que se cellebren nes comunidaes del cantábricu a lo llargu'l branu. El que diga esto yo, un asturianu, espero que valga pa que escaezamos toos un poco esi localismu fatu, esi chovinismo de caleya al que parez que tamos abonaos d'un tiempu a esta parte.
Voi dexar les disquisiciones filosófiques a un llau pa comentavos lo que vamos poder ver y escuchar nesta XV edición del Sauga Folk:
  • El xueves 20 d'agostu va entamar la folixa con una actuación del grupu Mailla nel chigre irlandés Lloyd Nolan.
  • El vienres 21, Bagad Landerne de Bretaña, los locales Gatu Malu, los nuesos paisanos Tejedor, Michael McGoldrick Band y los gallegos Coanhadeira.
  • El sábadu 22 d'agostu, Liam O'Flynn & The Piper's Call Band, los quebecoises Le Vent du Nord y los cántabros Cambera'l Cierzu.
  • El domingu 23 fina'l festival con un conciertu de Rumantela Folk nel Café Pereda d'Ampuero.
Podéis alcontrar más info na web del festival Sauga Folk.




sábado, 15 de agosto de 2009

I Xornaes Céltiques del Oriente d'Asturies


Ñaz un nuevu festival célticu nel Oriente'l país pa pesllar el mes d'agostu. Nesti nuevu eventu cuatro conceyos de la fastera oriental (Llanes, Ribesella, Cangues d'Onís y Parres) andechen pa sacar alantre esti proyeutu venceyáu cola música tradicional.
Los grupos que van protagonizar el festival son la Banda de Gaites Ciudá de Cangues d'Onís, Esbardu d'Avilés, el grupu de baille gallegu Inquedanzas y la Bagad Gwemgamp de Bretaña. Les actuaciones van desendolcase consecutivamente nos cuatro conceyos: el 27 d'agostu a les 20.30 na Plaza Santa Ana de Llanes; el vienres 28 d'agostu, na Plaza de Llames de Parres, a la mesma hora; el sábadu 29 toca-y a Ribesella disfrutar del arte d'estes bandes, que van actuar esta vuelta a les 20.00 na Plaza Camila Beceña; y el festival fina'l 30 d'agostu, domingu, con una sesión doble a les 12.15 y a les 13.30 nes places del Ayuntamientu y Nueva de Cangues d'Onís.



domingo, 9 de agosto de 2009

XIII Festival Intercéltico d'Occidente

Esta mesma selmana entama a celebrase'l Festival Intercéltico d'Occidente, qu'aveza a inundar Tapia colos sones de la música celta. Esti añu'l festival medra en díes, doblando la programación d'anteriores ediciones, agora van ser 10 los díes en que la villa tapiega seya la capital celta d'Asturies.
Nun dexa de ser un fechu bien llamativu que, pasando de 5 a 10 díes de festival, la programación de conciertos de folk nun medre al tenor del restu d'actividaes. El casu ye que los conciertos de folk van ser menos, abondo menos que notros años, sedrán coses de la crisis. Podéis alcontrar la programación completa'l festival na so web, los conciertos de folk sedrán los que vienen darréu:
Xueves 20 d'agostu: El Koku La Manzana
Vienres 21 d'agostu: Le Vent Du Nord y Maneg Tort
Domingo 23 d'agostu: Tuenda y Michael McGoldrick Trio

sábado, 8 de agosto de 2009

Dellos videos de Lorient

Pa los que nun pudisteis dir a Lorient esti añu, como un servidor, dexo una seleición de videos atropada n'internet de la presente edición del Interceltique de Lorient. Yá sé que nun ye lo mesmo que tar ellí pero ¡qué vamos facer!




jueves, 6 de agosto de 2009

Conciertos de seronda nel Fruitmarket de Glasgow


Cola llegada la seronda aporta tamién una nueva temorada de conciertos a un escenariu míticu de Glasgow, el del Old Fruitmarket. La esbilla de bandes que van participar nesta serie de conciertos ye de luxu.
El 1 de setiembre van entamar con John Munro & Eric Bogle, el 5 del mesmu mes Eliza Carthy Band, el 11 Fiddler's Bid, el 16 Alasdair Fraser & Natalie Haas, el 19 Aly Bain & Phil Cunningham, l'1 d'ochobre Karine Polwart & Emma Pollock, el 20 d'ochobre Crooked Still & Emily Smith, la temporada fina con un conciertu especial de Shooglenifty l'11 de payares con invitaos.
Una seleición bien curiosa de música folk pa recibir la estación más guapa l'añu, la seronda. Si vos queden díes de vacaciones y la crisis nun vos caltién ataos yá sabéis onde podéis dir.

martes, 4 de agosto de 2009

Gaiteres gallegues portada de revista en Francia



Como tolos años per estes feches, la revista francesa Keltia Magazine dedica un númberu cuasi-monográficu al país que protagoniza la edición del Festival Intercélticu de Lorient. Esti añu, como yá persabéis, el país que tien esi honor ye Galicia. Asina, el númberu 13 d'esti cartafueyu celtista, dirixíu por Fabien Régnier, abrese coles dos gaiteres gallegues más conocíes a nivel internacional, Susana Seivane y Cristina Pato, que tamién son oxetu de dos estenses entrevistes nel interior de la revista.
Amás d'estes entrevistes Keltia Magazine ufre una montonera d'artículos enfotaos en dixebraos aspeutos de la cultura gallega (protohistoria, lliteratura, Castelao, música...). Ente toos ellos prestame solliñar ún dedicáu al cuentu Ponthus et la belle Sidoine, una de tantes histories enraigonaes na Materia de Bretaña pero esta vuelta'l protagonista ye Ponthus, un caballeru de Galicia qu'afuxe de los moros y alcuentra abellugu en Bretaña.
Los que teis interesaos en mercar la revista podéis dirixivos a Keltia Magazine

domingo, 2 de agosto de 2009

Yá ta confirmáu'l cartelu del Festival Folk de Plasencia

Güei preséntovos una propuesta un poco allonxada de la música celta qu'aveza portagonizar los posts d'esti bloque. Yá ta confirmada la programación de la décimo cuarta edición del Festival Internacional Folk Plasencia, na que vais alcontrar vieyos conocíos como los Red Hot Chilli Pipers o Carlos Núñez pero tamién otres músiques de raigañu d'otres partes del mundiu, lo que vais alcontrar en Plasencia ye lo que vien darréu:

19 Agostu 2009

20,00h Teatru Alkázar

Final I Certame "Amigos del Folk Plasencia"
THE URBAN FOLK QUARTET (Reinu Xuníu)
KÉLTIBER (Valladolid)
LA CONJURA (Sevilla)

20 Agosto 2009

22,00h Escenariu Torre Lucía
NINO SÁNCHEZ (Salamanca)
CARLOS NÚÑEZ (Galicia)
FADOMORSE (Portugal)

21 Agosto 2009

17,00h.Taller de percusión tradicional ibérica. Las Claras.
ELISEO PARRA
19,30h.Taller de zanfoña. Las Claras.
PATRICK BOUFFARD (Francia)
22,00h Escenariu Torre Lucía
AULAGA FOLK (Extremadura)
EVENING STAR (Europa)
RED HOT CHILLI PIPERS (Escocia)

22 Agosto 2009

11,00h Taller de percusión tradicional ibérica. Las Claras.
ELISEO PARRA
13,00h y 19,00h. Pasucais
PANDA DE VERDIALES ARROYO CONCA (Comares, Málaga)
13,30 Conciertu pa neños. Las Claras.
ELISEO PARRA & XAVI LOZANO
17,00h Taller de percusión tradicional ibérica. Las Claras.
ELISEO PARRA
19,30h Instrumentos raros. Las Claras.
XAVI LOZANO
22,00h Escenariu Torre Lucía
VALLARNA (Castilla/Cantabria)
TERRAFOLK (Eslovenia)
DISSIDENTEN (Alemania)

L'ayuntamientu de Plasencia pon zona d'acampada de baldre, con servicios y duches nel recintu d'El Berrocal, que ta 10 minutos del llugar onde se celebren los conciertos.




sábado, 1 de agosto de 2009

... y yo más celta que tú



Dempués del estrés de la selmana pasada, con dos festivales d'una selmana de duración na mió ciudá pa cubrir, amás de falar de la ufierta folki del restu d'Asturies en plena temporada alta, tomé dellos díes llibres enantes de retomar l'actividá del blogue, dellos díes p'analizar, reposar y pa intentar dar una opinión intelixible de lo que pasó n'Avilés al rodiu de los sos dos festivales intercélticos.
La xente que sigui esti blogue pue camentar que nun pueo ser oxetivu a la hora de valorar estos dos festivales, l'añu pasáu per estes mesmes feches yá dixí lo que diba pasar col Intercélticu d'Avilés (d'equí p'alantre FIA, p'abreviar) y lo que camentaba del abordaxe de d. Román Antonio Álvarez a esti eventu, nun voi aburrivos repitiendo lo mesmo, si hai xente interesao en lleer lo qu'escribí l'añu pasáu nun tien más que consultar l'archivu del blogue. Güei namás diré que, énte l'ausencia d'ética, los ciudadanos d'un país presuntamente democrático como ésti debemos d'esixir dalgo d'estética a los nuesos representantes. Na Casa Conceyu d'Avilés entrambes cualidaes tán escosaes dende cuantayá. Dicho esto, pueo confesavos qu'intenté disfrutar del Festival de Román (d'equí p'alantre Beltaine) ensin prexuicios, como fadría cualisquier aficionáu que llegará a Avilés ensin conocer los antecedentes que nós sí conocemos. Darréu vienen les mios impresiones personales, que voi separar per estayes pa da-ys daqué de coherencia:
  • Música folk. Del Beltaine prestáronme pola vida los conciertos de Lau, Fraser Fifield, Pennoù Skoulm y el de los Maestros Gaiteros, tamién me reí abondo colos bretones Taran, por desgracia pa min nun pude ver nin a Pepe Vaamonde nin a DRD y poques vegaes pasé tanta vergoña de ser asturianu como nel conciertu de Liam O'Flynn. L'escenariu escoyíu pa los conciertos tamién foi un aciertu, la plaza'l mercáu de Les Aceñes recién acabante de remocicar ye un sitiu ampliu y a techu, lo que n'Asturies ye una necesidá anque temos en branu, yá digo que foi un aciertu dempués de que mos metieran el miéu enl cuerpu cola anuncia de que los conciertos diben facese na pista La Esposición. La calidá del soníu nos conciertos, francamente meyorable, foron afinando col pasu los díes. El FIA esti añu nun tuvo música folk, nun había presupuestu, pero pudo ufrinos delles perles en forma de petisos conciertos desenchufaos, asina, na Ilesia vieya de Santo Tomás pudimos disfrutar de la voz de Mari Luz Cristóbal Caunedo y del talentu de Xuacu Amieva, dos grandes figures de la música tradicional asturiana que participaron desinteresadamente nel FIA.
  • Grupos Folklóricos. Reconozo que nun sé dala cosa sobre esta tema, otros podrán dar una opinión con más fundamentu que la de mió de la calidá de los grupos participantes. Namás pueo dicir que tengo la sensación de que n'anteriores ediciones del FIA había más presencia de grupos na cai, lo que-y daba a la ciudá ciertu ambiente de festival que nesta primera edición del Beltaine nun se palpó. Ye una cosa que me llamó bien l'atención, tando entamáu por una federación de grupos de baille y bandes de gaites, nun foron a da-y l'ambiente a la ciudá que otros años conseguía un únicu grupu. Solliñar tamién qu'en 13 años foi la primer vegada qu'un de los grupos invitaos salió na prensa pa quexase del agospamientu ufríu, nesti casu, pola organización del Beltaine, fechos como esti contrasten colos comentarios habituales d'otros años, onde los invitaos siempre destacaben la hospitalidá y el ciñu colos que yeren trataos pola organización del FIA.
  • Chiringuitos. Caros, cutres, improvisaos... prescindibles. Lo de poner 24 puestos de comida y bebida alredor del escenariu principal dexó un tastu agrín a tolos implicaos: los hosteleros d'Avilés viéronlos como un ataque del Ayuntamientu en plena crisis; lo que diben ser puestos xestionaos por asociaciones tuvieron que completase con hosteleros d'otros conceyos, porque ¿qué asociación dispón de 2500€ pa poner un chigre y pa pagar camareros 10 díes?; lo que diba ser l'intercélticu gastronómicu acabó siendo la más cutre de les Semanas Negras, 3000€ de pérdides estimaes por puestu a ritmu de David Bisbal... De xuru que los hosteleros que participaron de bona fe, prestaría-ys saber si ye verdá que l'ayuntamientu va condonar la deuda de les asociaciones que s'instalaron en Les Aceñes, porque esi rumor yá percorría la plaza'l xueves del Beltaine.
  • Esposiciones. Equí notóse la mán de Jorge Iván Argiz y el so venceyamientu al mundiu'l cómic. Grandes esposiciones de debuxos de la vasca Raquel Alzate y Cris Ortega, personalmete camiento que la temática del trabayu de Raquel encartia perbién nun eventu d'esta mena; el de Cris Ortega ensin tener menor calidá artística tien una rellación cola cultura celta más bien difusa. Les semeyes de Vicente Ansola hai que asitiales tamién ente los aciertos de la organización del Beltaine. El FIA conformóse con dos esposiciones más muncho más modestes, una colos cartelos anteriores del festival pintaos pol artista local Luis Taboada y otra d'illustraciones d'Arte Celta feches por min polo que nesta tema soi suxetivu dafechu, los mios debuxos son muncho peores que los de Raquel Alzate, habéis de creeme.
  • Otres actividaes culturales. Ente'l restu d'actividaes amestaes a la programación del Beltaine sin ton nin son, cenciellamente por engordala, hai delles que lleven faciéndose na ciudá va tiempu como l'hípicu, l'axedrez na cai o la Danza de Santa Ana, tienen una entidá propia en sí mesmes, meteles a calzador nel programa d'un festival nuevu nun ayuda a naide nin les fae meyores. Ente lo positivu solliñar la cellebración del I Congresu de Periodismu Cultural Beltaine dirixíu pol periodista asturianu Próspero Morán, que tuve'l placer de siguir y tamién destacar el llabor de Próspero cubriendo'l Beltaine en tiempu real, dafechu la so web del festival yera muncho meyor en tolos sentíos que la web oficial del Beltaine.
  • Lo peor de lo peor. Lo que nun debiera pasar d'una pequeña discusión nuna sidrería y que taría solucionada dempués de la tercer botella, si los protagonistes fueren persones normales, acabó convirtiéndose en campu d'operaciones de 4 politicuchos, estrategues de salón con ego pa esportar, acabó convirtiéndose nun cáncanu infestáu de xente que nun s'interesó pola cultura tradicional en so puñetera vida. Váyase señor Álvarez, váyase señor Rañón, váyase señora Maniega nun los queremos na música tradicional.

domingo, 26 de julio de 2009

Videos d'El Carmucu (Cantabria)

Bono, estos díes tuvimos perocupaos colo qu'había en casa y nun pudimos comentar otres cites interesantes na vecina Cantabria. Gracies a dios hai munchos aficionaos con cámara en man que xuben a youtube amueses de los conciertos de los que disfruten, asina, fexo'l nuesu collaciu Fingal que xubió estos videos del festival d'Helguera de Iguña, El Carmucu.
Gracies a él güei podemos disfrutar tamién, un poco, d'estos prestosos conciertos.
Oskorri

Naheba

Kasir

viernes, 24 de julio de 2009

La fin de selmana más folki del añu

Lo mesmo que l'añu pasáu esta fin de selmana vuelve a axuntar una ufierta descomanada de conciertos folk que, cuido, nun ye proporcional a la demanda esistente, esto fae que munchos eventos de calidá nun tengan un númberu d'asistentes abultable y nin asemeyáu al que tendríen de cellebrase unos díes enantes o dempués.
N'Avilés sigui'l Beltaine con Os Gaiteiros de Lisboa y Pepe Vaamonde esta nueche, pa mañana tenemos a Taran y Pennoù Skoulm de Bretaña y a los Tejedor.
En Candás, Festival de Bandes de Gaites cola banda local, L'Alborcer de Piedrasblancas, Vilar de Barrios-Sarreaus de Galicia, Badenoch & Strahspey d'Escocia y Roseñd-Mor de Bretaña, amás de la bandina La Curuxa d'Asturies.
En Navelgas, nuna edición de luxu del concursu folk Cuartu los Val.les, van tar na modalidá de pequeñu formatu Héctor Braga (Asturies), Milo Ke Mandarini (Toledo) y (Barcelona), mientres qu'en gran formatu los concursantes van ser OndaraAmanida Folk (Barcelona), Els Berros de la Cort (Girona), Toques do Caramulo (Portugal) y La Bruja Gata (Madrid). Amás na nueche de güei van tocar tres bandes ganaores del concursu Llangres (Asturies), Korrontzi (País Vascu) y Cambera'l Cierzu (Cantabria).

jueves, 23 de julio de 2009

Xuacu Amieva, güei nel Intercélticu d'Avilés

Esta nueche ye una de les más prometeores del Beltaine d'Avilés, tan programaos conciertos de los escoceses LAU y de La Bandina a les 23 hores, pero delles hores enantes, a les 19:45, nel guapu marcu d'una ilesia románica'l sieglu XIII, la de Santu Tomás, va actuar ensin amplificación denguna'l mayestru de mayestros, Xuacu Amieva.
Esta actuación de Xuacu nun tien dala cosa que ver col Beltaine, ye una sorpresa de fuera de programa del Festival Intercélticu d'Avilés, l'orixinal, que ta ufriendo petisos conciertos desenchufaos na ilesia de Santu Tomás de Cantorbery gracies a la collaboración desinteresada de músicos tradicionales qu'actuaren notres ediciones del Intercélticu. Asina'l martes pudimos sintir a la gran Mari Luz Cristóbal Caunedo, güei a Xuacu Amieva y mañana al gaiteru escocés John Stewart.
Los que teis interesaos n'acudir, dir con tiempu la ilesia nun ye mui grande.

miércoles, 22 de julio de 2009

Tejedor protagonista na Carballeira de Zas

Los Hermanos Tejedor van ser proganistes, el prosimu 1 d'agostu, d'un de los festivales más prestosos de Galicia, el de la Carballeira de Zas. Xunto colos d'Avilés van tar los escoceses Capercaillie, una banda que yá nun aveza a dar conciertos por mor de la apretada axenda de toos y cada ún de los sos miembros, y los gallegos Mutenrohi y O Sonoro Maxín, una banda que prestaríame abondo ver per Asturies.
El de la Carballeira llega esti añu a lo so XXVIª edición, tou un récord nesta mena d'eventos musicales, y tien una perbona y orixinal organización, ufriendo daqué más qu'un escenariu y un prau al público asistente. L'asociación Castromeda ye la qu'entama la Festa y, amás de tener el bon aquel d'invitar de xemes en cuando a grupos asturianos (daqué nun mui común nos festivales gallegos), cobra una entrada de 5€ por acudir a la Carballeira, un preciu que cuido resulta simbólico porque cola entrada l'aficionáu recibe un CD promocional del festival con dos temes de cada grupu invitáu. La tema de cobrar polos conciertos de folk ye abegosu, tamos avezaos a que mos lo den too gratis, pero esti tipu d'iniciatives tienen de mirar por xenerar recursos propios y por nun depender al 100% del dinero les sovenciones, otru datu interesante ye que pagar una entrada establez un filtru que va dexar fuera a toa esa xente que pulula pelos festivales de baldre faciendo cualisquier otra cosa que disfrutar de la música. Igual yera bono que los organizadores de festivales asturianos se dieren una vuelta pela Carballeira y tomaren delles notes, nun digo que lu tengan que facer igual, pero hai detalles como'l de la entrada, el cuidáu nel diseñu'l cartelu (que podéis ver enriba)... qu'hai que tener en cuenta.
Podéis alcontrar tola información del festival na so páxina web. Y como'l meyor escribanu echa un borrón dicir que tracamundiaron el nome de Mutenrohi por Muthenroi na cartelería y na web.


lunes, 20 de julio de 2009

Guidewires: Live. Discu irlandés con tastu asturianu

Ta acabante d'asoleyase'l discu Live de la banda irlandesa Guidewires, anque igual yera más correutu falar de superbanda si tenemos en consideración el nome y la trayeutoria de los sos componentes: Pádraig Rynne, Sylvain Barou, Tóla Custy, Paul McSherry y Karol Lynch. Igual necesitábemos dos o tres blogues como esti pa falar de lo que lleven tocáu estos grandes músicos, pero lo qu'agora toca ye presentavos esti trabayu discográficu grabáu en direutu y ensin retocar llueu nel estudiu, estos 12 cortes espeyen dafechu la música que se pue sentir nun de los sos conciertos. Ye prestosu alcontrar discos d'esta mena, grabaos en direutu porque, pa mio gustu, son los qu'ufren les sensaciones más braeres y auténtiques de la música tradicional. Nel mio casu, el discu lleva sonando dende que lo truxo'l carteru esta mañana, ensin parar, cuido que nun pueo dar meyor recomendación.
El títulu del post vien de que, siendo un discu asoleyáu n'Irlanda y siendo los miembros del gurpu mayoritariamente irlandeses, la nuesa música tamién alcontró un furaquín nos cortes del album, asina l'octavo lleva por títulu Cariáu Llaniscu y ye un set onde s'axunten The Monday Morning Reel de Phil Cunningham, The Torrid Romance de Leslie Harris y el mentáu Cariáu. Otru corte del discu venceyáu a Asturies ye'l décimo, Marga's Moment, que fai referencia al tema qu'abre'l set, una composición que Brian Finnegan dedicó va tiempu a una conocida música asturiana.
Equí vos dexo un par de videos de la grabación del discu: