Hestoria d'un fracasu

Falaba de pasada n'anterior entrada'l blogue de la incapacidá que tenemos n'Asturies pa comercializar los nuesos productos de calidá, como ye la nuesa música tradicional y folk. Ye curioso qu'haiga nel esterior (toi falando del restu l'estáu y del estranxeru en xeneral) un interés por conocer lo d'equí y nós nun faigamos res por dalo a conocer. Voi cuntar dos anécdotes personales, que yá sé nun tienen dengún valor estadísticu pero que pa min son significatives abondo.
La primera ye d'un chaval d'otra comunidá autónoma col que topé nun foru d'internet, andaba'l probe entrugando cómo podía mercar el discu nuevu de DRD. Fuera a pidilu al Corte Inglés de la so ciudá y diz que la mocina de la seición de discos, dempués de buscar nel ordenador, dio-y un CD de RBD, qu'al parecer ye nunsequé d'una serie la tele. La otra vía qu'intentó l'infortunáu aficionáu foi la web del grupu, onde namái alcontró una semeya de los asturianos.
La segunda anécdota vien de los Estaos Xuníos, ellí hai un paisanu que tien por hobby les gaites de cualisquier mena y, va tiempu, montó una tienda na rede dedicada a vender CDs que tienen esti instrumentu como protagonista (podéis visitar la tienda en http://bagpipediscs.com). Col pasu'l tiempu va teniendo un fondu de catálogu bien curiosu, los discos que vendía nel entamu yeren na so mayoría escoceses y irlandeses, pero bien ceo foi añadiendo discos franceses, gallegos, italianos... al so stock. Más d'una persona entrugó-y por discos de gaita asturiana, pero nun pudo satisfacer l'interés de los sos clientes. La razón ye que ta cansáu de mandar emails a les discográfiques asturianes qu'alcuentra n'internet, ensin tener denguna rempuesta.
La industria discográfica ta en crisis y les ventes de CDs baxaron enforma nos cabaeros años, pero mientres s'igüen otros caminos pa comercializar música nun se pue dar la espalda a la venta de discos. Les webs de los grupos asturianos nun tan preparaes pa la venta on-line de discos nin merchandising, les discográfiques parez que tienen abondo con cobrar la sovención y nun faen dala cosa por atopar canales de distribución pa los sos productos, cosa que yá sé que ye abegosa, que yá nun hai tiendes de discos y que nos centros comerciales namái hai sitiu pa les novedaes de les multinacionales y les chorraes tipu OT pero ¿tan abegosu ye poner a furrular una e-shop? Parezme que non, visto lo que faen el restu de bandes y discográfiques de música folk y/o tradicional de los países del nuesu entornu.