lunes, 28 de julio de 2008

Acabóse l'Intercélticu d'Avilés... ¿pa siempre?


Acaba d'echase'l telón de la XIIª edición del Festival Intercélticu d'Avilés, una edición que bien pue ser la cabera, polo menos d'un festival como'l que conocemos. No musical y a nivel festivu, el FIA podemos dicir que volvió a algamar una nota alta. Como siempre hubo munchos actos y cuasi toos cuntaron cola participación d'un público entusiasta. Rescampló, nel sen contrariu, l'escasu seguimientu del últimu conciertu grande del FIA, abultóme poca xente la que se xuntó pa ver a Beoga y los Tannies.
Pero esti añu nun se faló d'un festival qu'algamó la reconocencia de Fiesta de Interés Turístico Regional; nin de la presencia na Villa de bandes mítiques dientru de la música tradicional como los Tannies, Fred Morrison o la Bagad Lann Bihoué; nin de les decenes d'actos entamaos pol FIA na Comarca d'Avilés. Esti añu, dende la presentación del festival la polémica fizose protagonista esclusiva del mesmu, cartelos, deudes cola SGAE y sovenciones ensin xustificar son los recuerdos que queden d'esta edición na mente de los avilesinos ¿Hubo una mala xestión del FIA dende la Asociación Cultural Esbardu? ¿Marafundióse dinero público en coses ayenes al festival n'ediciones pasaes? Munches entrugues y poques respuestes ye'l resume que se pue facer de la cuestión, anque, hai que dicir qu'hai meses que n'Avilés se falaba sobre'l futuru desembarcu del Ayuntamientu na organización del FIA. Casualidaes de la vida, durante la recién pasada edición del FIA, Juan Luis Casas vese obligáu a firmar un documentu nel que "renuncia a l'actividá".
¿Qué queréis que vos diga? Yo nun creo en casualidaes. Va tiempu yá dixi públicamente que Román Antonio Álvarez, conceyal de Cultura d'Avilés, diba facese col FIA o acabar con él. Nun ye que seya un gran aldovín, ye que les zunes de dellos políticos locales son mui previsibles y el currículum d'esti personax ta atacáu de desembarcos perasemeyaos. Lo único que m'abluca ye que tolos acontecimientos pasaren tan de sutrucu.
Naguo por que la declaración de fiesta d'interés turísticu valga pa da-y continuidá al FIA, anque albidró que tien un futuru bien prieto.

1 comentario:

Vítor González dijo...

Güei la prensa local vuelve a ufrir más pistes d'esti culebrón braniegu, agora la propuesta del conceyal ye llevar el Festival a la Pista de la Exposición. Igual eso nun diz muncho a la xente de fuera d'Avilés, pa ellos hai que dicir que la Exposición ye un oceánu de cementu y formigón al lláu del campu fútbol. Un asitamientu nada afayaízu, lloñe de too y bien murnio. Dos de les pieces claves nel ésitu del festival tienen bien pocu que ver con Esbardu o l'Ayuntamientu, eses claves son: el cascu históricu de la Villa que-y da un escenariu monumental al festival, que dexa cola boca abierta a tolos foriatos que camienten n'Avilés como una ciudá industrial y percontaminada; la otra clave ye'l numberoso público que sigui tolos actos del festival na Plaza de Carlos Lobo y que nun va dir hasta la Exposición un martes a les 11 la nueche...
Prestábame pola vida saber qu'opinen los hosteleros del cascu históricu.