Videos d'El Carmucu (Cantabria)

Bono, estos díes tuvimos perocupaos colo qu'había en casa y nun pudimos comentar otres cites interesantes na vecina Cantabria. Gracies a dios hai munchos aficionaos con cámara en man que xuben a youtube amueses de los conciertos de los que disfruten, asina, fexo'l nuesu collaciu Fingal que xubió estos videos del festival d'Helguera de Iguña, El Carmucu.
Gracies a él güei podemos disfrutar tamién, un poco, d'estos prestosos conciertos.
Oskorri

Naheba

Kasir

La fin de selmana más folki del añu

Lo mesmo que l'añu pasáu esta fin de selmana vuelve a axuntar una ufierta descomanada de conciertos folk que, cuido, nun ye proporcional a la demanda esistente, esto fae que munchos eventos de calidá nun tengan un númberu d'asistentes abultable y nin asemeyáu al que tendríen de cellebrase unos díes enantes o dempués.
N'Avilés sigui'l Beltaine con Os Gaiteiros de Lisboa y Pepe Vaamonde esta nueche, pa mañana tenemos a Taran y Pennoù Skoulm de Bretaña y a los Tejedor.
En Candás, Festival de Bandes de Gaites cola banda local, L'Alborcer de Piedrasblancas, Vilar de Barrios-Sarreaus de Galicia, Badenoch & Strahspey d'Escocia y Roseñd-Mor de Bretaña, amás de la bandina La Curuxa d'Asturies.
En Navelgas, nuna edición de luxu del concursu folk Cuartu los Val.les, van tar na modalidá de pequeñu formatu Héctor Braga (Asturies), Milo Ke Mandarini (Toledo) y (Barcelona), mientres qu'en gran formatu los concursantes van ser OndaraAmanida Folk (Barcelona), Els Berros de la Cort (Girona), Toques do Caramulo (Portugal) y La Bruja Gata (Madrid). Amás na nueche de güei van tocar tres bandes ganaores del concursu Llangres (Asturies), Korrontzi (País Vascu) y Cambera'l Cierzu (Cantabria).

Xuacu Amieva, güei nel Intercélticu d'Avilés

Esta nueche ye una de les más prometeores del Beltaine d'Avilés, tan programaos conciertos de los escoceses LAU y de La Bandina a les 23 hores, pero delles hores enantes, a les 19:45, nel guapu marcu d'una ilesia románica'l sieglu XIII, la de Santu Tomás, va actuar ensin amplificación denguna'l mayestru de mayestros, Xuacu Amieva.
Esta actuación de Xuacu nun tien dala cosa que ver col Beltaine, ye una sorpresa de fuera de programa del Festival Intercélticu d'Avilés, l'orixinal, que ta ufriendo petisos conciertos desenchufaos na ilesia de Santu Tomás de Cantorbery gracies a la collaboración desinteresada de músicos tradicionales qu'actuaren notres ediciones del Intercélticu. Asina'l martes pudimos sintir a la gran Mari Luz Cristóbal Caunedo, güei a Xuacu Amieva y mañana al gaiteru escocés John Stewart.
Los que teis interesaos n'acudir, dir con tiempu la ilesia nun ye mui grande.

Tejedor protagonista na Carballeira de Zas

Los Hermanos Tejedor van ser proganistes, el prosimu 1 d'agostu, d'un de los festivales más prestosos de Galicia, el de la Carballeira de Zas. Xunto colos d'Avilés van tar los escoceses Capercaillie, una banda que yá nun aveza a dar conciertos por mor de la apretada axenda de toos y cada ún de los sos miembros, y los gallegos Mutenrohi y O Sonoro Maxín, una banda que prestaríame abondo ver per Asturies.
El de la Carballeira llega esti añu a lo so XXVIª edición, tou un récord nesta mena d'eventos musicales, y tien una perbona y orixinal organización, ufriendo daqué más qu'un escenariu y un prau al público asistente. L'asociación Castromeda ye la qu'entama la Festa y, amás de tener el bon aquel d'invitar de xemes en cuando a grupos asturianos (daqué nun mui común nos festivales gallegos), cobra una entrada de 5€ por acudir a la Carballeira, un preciu que cuido resulta simbólico porque cola entrada l'aficionáu recibe un CD promocional del festival con dos temes de cada grupu invitáu. La tema de cobrar polos conciertos de folk ye abegosu, tamos avezaos a que mos lo den too gratis, pero esti tipu d'iniciatives tienen de mirar por xenerar recursos propios y por nun depender al 100% del dinero les sovenciones, otru datu interesante ye que pagar una entrada establez un filtru que va dexar fuera a toa esa xente que pulula pelos festivales de baldre faciendo cualisquier otra cosa que disfrutar de la música. Igual yera bono que los organizadores de festivales asturianos se dieren una vuelta pela Carballeira y tomaren delles notes, nun digo que lu tengan que facer igual, pero hai detalles como'l de la entrada, el cuidáu nel diseñu'l cartelu (que podéis ver enriba)... qu'hai que tener en cuenta.
Podéis alcontrar tola información del festival na so páxina web. Y como'l meyor escribanu echa un borrón dicir que tracamundiaron el nome de Mutenrohi por Muthenroi na cartelería y na web.

Guidewires: Live. Discu irlandés con tastu asturianu

Ta acabante d'asoleyase'l discu Live de la banda irlandesa Guidewires, anque igual yera más correutu falar de superbanda si tenemos en consideración el nome y la trayeutoria de los sos componentes: Pádraig Rynne, Sylvain Barou, Tóla Custy, Paul McSherry y Karol Lynch. Igual necesitábemos dos o tres blogues como esti pa falar de lo que lleven tocáu estos grandes músicos, pero lo qu'agora toca ye presentavos esti trabayu discográficu grabáu en direutu y ensin retocar llueu nel estudiu, estos 12 cortes espeyen dafechu la música que se pue sentir nun de los sos conciertos. Ye prestosu alcontrar discos d'esta mena, grabaos en direutu porque, pa mio gustu, son los qu'ufren les sensaciones más braeres y auténtiques de la música tradicional. Nel mio casu, el discu lleva sonando dende que lo truxo'l carteru esta mañana, ensin parar, cuido que nun pueo dar meyor recomendación.
El títulu del post vien de que, siendo un discu asoleyáu n'Irlanda y siendo los miembros del gurpu mayoritariamente irlandeses, la nuesa música tamién alcontró un furaquín nos cortes del album, asina l'octavo lleva por títulu Cariáu Llaniscu y ye un set onde s'axunten The Monday Morning Reel de Phil Cunningham, The Torrid Romance de Leslie Harris y el mentáu Cariáu. Otru corte del discu venceyáu a Asturies ye'l décimo, Marga's Moment, que fai referencia al tema qu'abre'l set, una composición que Brian Finnegan dedicó va tiempu a una conocida música asturiana.
Equí vos dexo un par de videos de la grabación del discu:

Primer nueche grande del Beltaine

Esta pasada nueche pudimos asistir al primer platu fuerte'l Beltaine, primero col espectáculu Maestros Gaiteros y llueu cola Piper's Call Band comandada por Liam O'Flynn, una nueche cola gaita (nes sos diferentes tipoloxíes) como protagonista.
Pa min la primer sorpresa foi l'escenariu, l'interior de la plaza d'abastos Hermanos Orbón recién remocicada, mui guapa y con techu de maera que fizo que nun mos moyáramos na inestable nueche avilesina.
El conciertu entamó con dellos minutos de retrasu por problemes col soníu, problemes que nun fueron quién a iguase y torgaron lo que pudo ser un conciertu pa remembrar. L'espectáculu Maestros Gaiteros va medrando en complicidá ente los sos componentes y eso notase a la hora de tocar xuntos. Una pena que vaigamos remembrar los acoples del micru de Jose Tejedor que tuvieron a piques de dexanos sordos delles vegaes. El casu ye que con y ensin acoples un público qu'aborrotó'l recintu pasólo en grande con Morrison, Henderson, Lorenzo y Tejedor.
Dempués xubió a escena'l gran maestru Liam O'Flynn, anque enantes pasara un vixilante invitándonos a dexar el recintu porque diben pesllar (!?). Igual yera bono cerciorase qu'esta parte de los emplegaos de la organización nun probase l'alcohol, dan mala imaxe de la ciudá. Xubió'l señor O'Flynn al escenariu colos sos collacios y entamó a desgranar el so repertoriu, una música muncho más sele que la de los gaiteros qu'acababen de baxar, entós foi cuando mos decatamos de que munchos avilesinos nin yos gusta'l folk nin tienen muncho respetu pola xente que sí-y gusta nin polos músicos que la interpreten y que son los nuesos invitaos n'Avilés, que lleven una mala imaxe del festival y de los asturianos. Personalmente colé de la plaza por vergoña a la quinta o sesta educada invitación d'O'Flynn pa que la xente callase. Mui mal, quedamos cola gocha.
De los polémicos chiringos que punxo l'Ayuntamientu nel esterior de la Plaza dicir dos coses: van peder perres a mamplén, lleven dos díes y nun venden un pih.o; hai que cuidar la estética y nun ye nada estéticu poner a Bisbal y música d'esa triba nun festival de música celta...
Equí vos dexo dos videos del conciertu xubíos a Youtube pola organización del Beltaine

XIII Festival Intercélticu d'Avilés

L'asociación Esbardu entama la XIII edición del Festival Intercélticu d'Avilés que, por motivos conocíos por toos, va a ser una versión mini de lo qu'aveza a ser el FIA. Pesie a nun cuntar con denguna subvención el festival, que na cabera edición algamó la distinción de Fiesta de Interés Turístico Regional, va llevase alantre anque con dellos cambios. El más llamativu d'esos cambios ye'l treslladu de la sede a la Plaza'l Carbayo, nel barriu mariñán de Sabugo, d'esti mou Esbardu nagua por nun interferir colos actos del Beltaine; el festival va durar namás 5 díes y la presencia de grupos d'otros países amenorgase tamién pola falta de presupuestu.
A lo llargo d'esta selmana va dir presentándose pasu ente pasu la programación completa'l festival dende la so web http://fia.esbardu.org/ Ente los actos más llamativos podemos solliñar las clases maxistrales de gaita gallega y gaita escocesa que van dar Serafín Rodríguez de la Banda de Gaitas Charamuscas y l'escocés John Stewart.

Música ¿irlandesa?

Una de les coses más ablucantes de la música tradicional irlandesa ye la cantidá de bandes non irlandeses que la interpreten. Nun llego a atalantar mui bien cómo se pue esportar un bien intanxible como la tradición musical pero'l casu ye que la música irlandesa espórtase, bandes de la isla percorren el mundiu interpretando la so música, pero amás hai munchos músicos d'un talentu mediu-altu que nun tienen denguna rellación cola isla que tamién la toquen. Habrá xente que-y pareza que bandes d'esta mena, les qu'interpreten una música ayena a los sos raigaños, son meres copies dexeneraes d'un orixinal, carentes d'espíritu propiu, pero'l casu ye que les hai y equí tenéis una esbilla de les que más me presten:
Cara d'Alemaña

Doolin' de Francia

Whisht! d'Alemaña


Massimo Giuntini d'Italia

Dùn de Francia
http://www.myspace.com/dunspace
Mercedes O'Keefe de Bretaña
http://www.myspace.com/mercedesokeeffe

Finalistes del Concursu Amigos del Folk Plasencia

La XIV edición del Folk Plasencia entama'l 19 d'agostu esti añu cola final del concursu Amigos del Folk Plasencia, una de les novedaes d'esta edición. Los finalistes van ser Urban Folk Quartet, Kéltiber y La Conjura, estes bandes fueron elexíos por votu popular y xuráu compuestu por 5 miembros de l'asociación Amigos del Folk (el xuráu daba 5 puntos y los votos dende la web del festival otru puntu más). Agora un xuráu compuestu por especialistes en música folk y tradicional va ser l'encargáu de decidir el ganador.

De Londres vien The Urban Folk Quartet, compuestu por una gallega y tres británicos, colos vigulinos como instrumentu principal. Kéltiber ye un sestetu de Valladolid qu'ufre una necesaria renovación del folklore castellanu-lleonés. La Conjura ye un grupu sevillanu d'Osuna qu'amiesta elementos de dixebraes músiques tradicionales del mundu cola rica tradición andaluza, personalmente'l mio favoritu pa la final.

Intercélticu Bis (aka Beltaine): web oficial

El nuevu festival avilesín estrena web oficial www.beltaine.es onde podéis consultar tola programación del eventu, la musical y la cultural (esposiciones, alderiques, un congresu de periodismu y cultura tradicional...).
La web, como'l restu del festival, ta fecha a la carrera, devaluando un eventu qu'a tenor de les cifres y de los nomes implicaos tendría de mirar más pola imaxe y la promoción.
La web namás ta disponible en castellán y nun parez que nun futuru vaya haber versiones n'asturianu, inglés o francés (esto digolo porque nun hai enllaces que faigan albidrar que vaya a publicase nestes llingües). Les semeyes de les bandes participantes tan tracamundiaes (el pie de fotu d'una semeya de Fred Morrison diz que ye Liam O'Flynn, na de La Bandina aparez DRD...) y, na mayoría de los casos, esa semeya tracamundiada ye la única información qu'ufre la organización de los grupos (nun hai información disponible de Tejedor, Carreg Lafar, Pepe Vaamonde, Os Gaiteiros de Lisboa.... yo, tengo interés personal en saber quién son los bretones Torm porque dempués de googlear y percorrer el myspace, la única banda qu'alcuentro con esi nome ye un grupu de música ellectrónica tirando a pachanguera...). Nel calendariu onde deberíen tar conseñaes les actividaes diaries nun aparez dala cosa... Fallos subsanables si la web tuviera fecha hai tres meses, pero qu'a 8 díes del entamu del festival dan una imaxe probetaya y desorganizada d'un eventu con 350000 € de presupuestu.

Intercélticu Bis (aka Beltaine): programación oficial

Nun hai munches novedaes respeutu a los conciertos qu'anunciamos hai dellos díes, pero güei publicase na prensa serio la programación oficial y tien delles novedaes qu'añadir al nuesu vaticiniu asina qu'equí vos la dexo pa los que nun gastáis perres en mercar el periódicu:

• Vienres, 17 de xunetu. Banda de Gaites El Llacín presenta'l so espectáculu Xideces con dellos músicos invitaos.
• Sábadu, 18 de xunetu. "Trío de jazz escocés", eso ye lo que diz la programación oficial, too mui profesional, nós yá diximos va tiempu que ye'l Fraser Fifield Trio, l'espectáculu Maestros Gaiteros con Fred Morrison, Anxo Lorenzo, Jose Manuel Tejedor y Jarlath Henderson y, pa finar la nueche, Liam O'Flynn y The Piper's Call Band.
• Domingu, 19 de xunetu. Los galeses de Carreg Lafar y Galandum Galandaina de Portugal.
• Llunes, 20 de xunetu. Héctor Braga, y DRD con Jarlath Henderson.
• Martes, 21 de xunetu. Nueche dedicada al rock n'asturianu con Dixebra y Fala Non Caduca.
• Miércoles, 22 de xunetu. Pandereteres de Fitoria y Cádava.
• Xueves, 23 de xunetu. El tríu escocés LAU y La Bandina.
• Vienres, 24 de xunetu. Pepe Vaamonde y Os Gaiteiros de Lisboa.
• Sábadu, 25 de xunetu. Hermanos Tejedor y Pennoù Skoulm.
• Domingu, 26 de xunetu. Nueche Máxica n'El Quirinal.

Escoyer grupos pa un festival ye una cuestión abegosa que siempre va recibir crítiques, toos esborraríemos dalgún nome y apurriríamos tres o cuatro, polo que nun vamos gastar tiempu en daqué tan suxetivo. Solliñar namái la presencia de dos bandes portugueses y volver char en falta la presencia de dalgún grupu cántabru, que los hai y non peores qu'estos. y dicir, eso sí, que nun hai un saltu de calidá apreciable respeutu a otres ediciones del festival.
Del restu de programación (esposiciones, alderiques, deporte...) dizse qu'habrá pero nun se diz el qué, yá veremos. Eso sí chigres y bocateríes habrá a mamplén, 24 puestos de comida y bebida van instalase na Plaza Hermanos Orbón camudada nun remedu avilesín de la Semana Negra.
Carreg Lafar

Pepe Vaamonde Grupo

Gaiteiros de Lisboa

LAU

Pennoù Skoulm

Mendebala con tastu asturianu

El festival folk Mendebala de Sopuerta (Bizkaia) va tar protagonizáu en gran parte pola música asturiana. El de Sopuerta ye un festival especializáu na música folk y averada a la tradición fecha a orielles del Cantábricu, sones de Galicia, Asturies, Cantabria y Euskal Herria tan presentes en toles ediciones. Na d'esti añu, la música asturiana va tar doblemente representada pol grupu folk Llan de Cubel y pola banda d'ska/punk/folk Skama La Rede, entrambes van subir al escenariu'l 4 de xunetu, acompañando a la cántabra Aura Kuby y a los ganadores de la cuarta edición del concursu de maquetes entamáu por Mendebala Diskak, los vascos Adarrots.
Un día enantes, el 3 de xunetu, la música van ponela los vascos Korrontzi, la gaitera gallega Cristina Pato y la banda d'El Bierzo Aira da Pedra.
Un prestosu plan pa la fin de selmana qu'entra, si nun sabéis ónde dir en Sopuerta va haber bona música.