domingo, 19 de julio de 2009

Primer nueche grande del Beltaine

Esta pasada nueche pudimos asistir al primer platu fuerte'l Beltaine, primero col espectáculu Maestros Gaiteros y llueu cola Piper's Call Band comandada por Liam O'Flynn, una nueche cola gaita (nes sos diferentes tipoloxíes) como protagonista.
Pa min la primer sorpresa foi l'escenariu, l'interior de la plaza d'abastos Hermanos Orbón recién remocicada, mui guapa y con techu de maera que fizo que nun mos moyáramos na inestable nueche avilesina.
El conciertu entamó con dellos minutos de retrasu por problemes col soníu, problemes que nun fueron quién a iguase y torgaron lo que pudo ser un conciertu pa remembrar. L'espectáculu Maestros Gaiteros va medrando en complicidá ente los sos componentes y eso notase a la hora de tocar xuntos. Una pena que vaigamos remembrar los acoples del micru de Jose Tejedor que tuvieron a piques de dexanos sordos delles vegaes. El casu ye que con y ensin acoples un público qu'aborrotó'l recintu pasólo en grande con Morrison, Henderson, Lorenzo y Tejedor.
Dempués xubió a escena'l gran maestru Liam O'Flynn, anque enantes pasara un vixilante invitándonos a dexar el recintu porque diben pesllar (!?). Igual yera bono cerciorase qu'esta parte de los emplegaos de la organización nun probase l'alcohol, dan mala imaxe de la ciudá. Xubió'l señor O'Flynn al escenariu colos sos collacios y entamó a desgranar el so repertoriu, una música muncho más sele que la de los gaiteros qu'acababen de baxar, entós foi cuando mos decatamos de que munchos avilesinos nin yos gusta'l folk nin tienen muncho respetu pola xente que sí-y gusta nin polos músicos que la interpreten y que son los nuesos invitaos n'Avilés, que lleven una mala imaxe del festival y de los asturianos. Personalmente colé de la plaza por vergoña a la quinta o sesta educada invitación d'O'Flynn pa que la xente callase. Mui mal, quedamos cola gocha.
De los polémicos chiringos que punxo l'Ayuntamientu nel esterior de la Plaza dicir dos coses: van peder perres a mamplén, lleven dos díes y nun venden un pih.o; hai que cuidar la estética y nun ye nada estéticu poner a Bisbal y música d'esa triba nun festival de música celta...
Equí vos dexo dos videos del conciertu xubíos a Youtube pola organización del Beltaine



2 comentarios:

Diestru dijo...

You touve ehí ya paecéume una pasadísima conciertazu.

Ya coincido col ensiertu, cada vegada que O'Flyn pidía silenciu a min dábame pura vergoña de ser asturianu.

Paséi un pouco bochornu. Los gaiteiros xeniales, pena tamién el soníu... pero bono

Vítor González dijo...

Pa los gaiteros un 10, pa los téunicos un aprobáu raspáu y pa los van a los conciertos a falar de fútbol un 0