II Romería Tradicional de Primavera en Ciañu

L’Ayuntamientu de Llangréu, en collaboración cola Asociación de vecinos San Antonio de Ciañu y la Escuela de Música Tradicional del AMPA del Conservatoriu Valle del Nalón organicen esta segunda fiesta de primavera que va tener llugar en Ciañu’l próximu domingu 1 de mayu.

La Romería presenta una montonera actos que, dende primer hora de la mañana’l domingu, van llevar folixa y cultura tradicional per tol distritu llangreanu de Ciañu. A les 11:00h va haber Diana floriada con gaita y tambor, desfile de Xigantes y Cabezudos y disparu de morteros. A les 12:00h va acompañase de música tradicional la misa los domingos. Dempués, a les 12:30 van ponese talleres de baille a lo suelto y de xuegos tradicionales pa neños y neñes nos xardinos del parque Rosario Felgueroso de Ciañu. A les 12:50, y dempués de repartir unes llambionaes ente la xente que participe nos xuegos y talleres, va empezar la Sesión Vermú amenizada polos escolinos de la Escuela de Música Tradicional "Llangréu" amás de Carlos Ronderos, Justino González, Xuan Nel Expósito y l’agrupación coral José León Delestal "El Carmen". N’acabando la sesión, a les 13:30 va tener llugar la segunda edición de Cantando pelos chigres, cola entrega llibros de cantares y ronda pelos chigres de Ciañu. Yá de tarde, a les 18:00h, el parque de Ciañu va acoyer la II ROMERIA DE PRIMAVERA amenizada polos alumnos y alumnes de la Escuela de Música Tradicional "Llangréu" y los sos profesores Anabel Santiago, Chema Fombona, Chus Solis, Hector Braga, Pelayo Fernandez, Pepín de Muñalen y Xose Ramon Navia. Too esto con escenariu llibre y pipa de sidra.

Anuncies breves

La Tarrancha úfrenos un llistáu de los llocales onde podéis alcontrar y mercar el so nuevu discu Ö33, son los que vienen darréu:

• Xixón: Centru Social Sestaferia, Alborá Llibros, Piraña Discos, Cafe Trisquel, El Baruco.
• Uviéu: Llibrería Paraxuga, Casa Posafuelles, L'Arcu la Vieya, Llibrería Trabe.
• Avilés: El Cafetón
• Mieres: Café Habana, Musical Miller
• Candás: Chigre La Gueta
• La Pola (Siero): El Cuévano, El Diañu.
• L'Entregu: Cafe La Yenda.
• Nunos díes tará disponible na FNAC de Paredes.
• Pa mercarlu n'internet: fnast.net, algamarproducciones.com

Pa los que queráis sentir el discu completu enantes de mercalu, la xente de La Tarrancha ufre la posibilidá de descargalu de baldre dende equí. Y pa los que queráis sentilu en direutu la cita va ser el xueves 4 nuna espicha-conciertu nel Tierra Astur de Cualloto.

El sábadu 27 de febreru va dar un conciertu, nel Teatro Nuevo de La Felguera, el xenial gaiteru gallegu Anxo Lorenzo acompañáu pola so banda al completu. La hora d'entamu anunciada son les 20:15, anguañu nun tenemos confirmación de si ye de baldre o non.

Otru gaiteru xenial, pero ésti de casa, Xuacu Amieva, va dar una riestra de conciertos didáuticos entamaos por Cajastur, onde amás de la gaita van tar presentes la flauta, el rabel, la gaita rabil... Les feches son les que vienen darréu:

• Uviéu. Centru Cultural Cajastur San Francisco 4. Martes 26 de xineru a les 20 h.
• Xixón. Pabellón Cajastur. Recintu Ferial Luis Adaro. Vienres 29 de xineru a les 20 h.
• Mieres. Centru Cultural Cajastur Jerónimo Ibrán 10. Sábadu 30 de xineru a les 20 h.
• Avilés. Casa Municipal de Cultura. Martes 2 de febreru a les 20.15 h.
• Grau. Sala Polivalente de la Casa de Cultura. Sábadu 6 de febreru a les 20 h.
• Llangréu. Nuevo Teatro de La Felguera. Vienres 12 de febreru a les 20 h.
  

Cursu d'acompañamientu de gaita n'Asturianá

Pa los meses de Mayu y Xunu la EMT de Llangréu ta preparando'll Cursu d'acompañamientu de gaita n'Asturianá, tará repartíu en 10 clases teóriques y práutiques con cantadores d'Asturianá.
Impartiránse tolos sábados de Mayu y Xunu ente les 16 y les 19h. nel Conservatoriu Profesional de Música "Valle del Nalón", más tres clases estra de selmana pa la práutica con cantadores.
El requisitu mínimu ye un nivel mediu-altu de gaita con bon repertoriu de floreos.
Les clases sedrán impartíes por Valentín Fuente de cálter personalizáu con un másimu de 2 alumnos por sesión.
El preciu del cursu completu ye de 100 euros que s'abonaran en dos mensualidaes de 50 euros.
Les plazes son llimitaes por rigurosu orde d'inscripción que se pue formalizar dende'l corréu ellectrónicu llangreumusicatradicional@hotmail.com o nel númberu de teléfonu 985677113. El plazu fina'l 30 d'Abril.