Tejedor y Falanoncaduca nel Mendebala de Sopuerta

El folk de Tejedor y el ska-fusión de Falanoncaduca van tar presentes nuna nueva edición del festival vascu Mendebala Jaialdia. Los prósimos díes 2 y 3 de xunetu va tener llugar na llocalidá de Sopuerta (Bizkaia) esti eventu qu’axunta una bona esbilla del folk y rock de raigañu de la Cordalera Cantábrica. Con una entrada y zona d’acampada llibre, les bandes asturianes va actuar el sábadu 3 de xuneto xunto colos grupos vascos Xabi Aburruzaga y Sokaide.

Dende va dellos años la llocalidá vizcaína de Sopuerta acueye anualmente’l festival Mendebala Jaialdia, un eventu que tien por oxetivu puxar pola música en vivo de bandes vasques, cántabres, asturianes y gallegues que desendolquen un soníu marcáu pola música de raigañu d’eses tierres. Artistes asturianos como Hevia y Skama la Rede yá participaron nel festival y nesta nueva edición tóca-yos el turnu a Tejedor y Falanoncaduca.

El 3 de xunetu ye’l día nel qu’estes dos formaciones asturianes van llevar el so soníu a Sopuerta. Mientres que Tejedor va poner enriba les tables el so cuidáu folk, Falanoncaduca van encargase de pesllar la nueche a ritmu de mecigayu son o lo que ye lo mesmo: una fusión de soníos como’l ska, rock, folk, surf, reggae y metal.

El Mendebala Jaialdia caracterízase tamién por celebrase nun enclave natural perguapo na llende de Bizkaia y Cantabria. Ehí ye onde s’asitia una zona d’acampada llibre pa tolos asistentes a esti festival. L'eventu arranca’l vienres día 2 coles actuaciones de los vascos Adarrots, Bizardunak y los gallegos Luar Na Lubre.

La revista francesa Keltia entrevista a Lisardo Lombardía

La revista francesa de temes celtiegos Keltia entrevista nel so numberu caberu a Lisardo Lombardía. El motivu principal d'este alderique col asturianu ye la cuadraxésima edición del Festival Interceltique de Lorient que va cellebrase baxo la so direición.
Lisardo Lombardía fala na entrevista del deber de remembrar lo fecho hasta agora, pero ensin señardá. El FIL va entamar esti añu una esposición pa rendir tributu al trabayu d'organizaores y voluntarios nestos 40 años de festival y va ufrir una bona riestra d'espectáculos de baldre. Ente los planes del asturianu ta'l d'abrir el FIL a la lliterartura de los páises celtes y, n'especial, al teatru.
La 40ª edición del FIL ta dedicada a Bretaña y pelos sos escenarios van pasar grandes bandes del folk célticu y tamién del rock: The Cranberries, Luz Casal, Llan de Cubel, La Bottine Souriante, Capercaillie & Friends, Breizh Balkanik, N'Diale & Jacky Molard...
Los que teis interesaos en algamar esta revista podéis empobinavos a la so web Keltia-Magazine.

IV Feria'l Branu n'Illas

La Caizuela vuelve agospiar una nueva edición de la Feria del Branu esta fin de selmana, l'apertura de la feria sedrá mañana día 19 a les 11:30 con amuesa d'oficios artesanales (vidriu enllastráu, goxeru facedor de preseos, malla de Luanco...) y cola inauguración del mercáu tradicional.
La música d'esta edición van ponela Zapica, el sábadu a les 21:00 hores; El Koku la Manzana, el domingu en sesión vermú y el Tríu Santos, Caleya y Varela yá pela tarde a les 19:00.
Tolos actos d'esta feria faense na pista polideportiva de La Caizuela, polo que nun deberíen notase muncho los efeutos del temporal d'esta selmana que tamién se dexó sintir n'Illas.

Paddy Keenan nel Ca'Beleño

Ún de los mitos vivos de la música tradicional irlandesa va dar un conciertu nel chigre Ca'Beleño d'Uviéu esti xueves 17 de xunu, toi falando del gaiteru Paddy Keenan,ún de los miembros fundaores de la Bothy Band.
Fíu y nietu de gaiteros, entamó cola uilleann pipe a los 10 años d'edá, a los 14 yá dio'l soprimer conciertu nel teatru Gaiety de Dublín. A los 17 años marchó d'Irlanda namoráu del blues y anduvo tocando per Inglaterra y Europa. Cuando volvió pa la so Irlanda ñatal entamó a tocar colos hermanos Triona y Michael O Dhomhnaill a los que se foron xuntando Paddy Glackin, Matt Molloy, Tony MacMahon y Donal Lunny, los siete que tocaben embaxo'l nome de Seachtar que sedría'l xermen de la llexendaria Bothy Band.

L'estilu de Keenan ye'l de los travelling pipers, gaiteros que diben tocando de pueblu en pueblu por dinero, onde prima la improvisación, Lunny comparalu con Hendrix, otros faen comparanza col xeniu'l jazz John Coltrane. El casu ye que la del xueves va ser un conciertu de los que nun se ven tolos díes.

Folk nel 5º aniversariu la Casa Posafuelles

Mañana, vienres 11 de xunu, el chigre de la Xunta Pola Defensa de la Llingua, La Casa Posafuelles, cumple 5 años y pa festexar esta data va entamar una folixa a les 23:00 hores onde vamos poder escuchar muncha y mui bona música tradicional asturiana. Los encargaos de da-y vida a la folixa col so arte van ser la Bandina La Curuxa y los rapazos de Mezá.
Un bon plan pa entamar un fin de selmana de primavera antroxáu d'iviernu.

Planes pa la Nueche más curtia l'añu

Como yá ye vezu la Nueche San Xuan y les cercanes a esa fecha son propicies pa que s'acumulen les cites col folk, delles de les posibilidaes que tenéis pa disfrutar del cambiu d'estación cola música de raigañu son éstes que vos dexo equí:

• Tresona (Corvera), al llau'l pántanu la mesma nueche de San Xuan vamos poder ver a Spanta La Xente, Rarefolk y Llangres.
• La Espasa (Caravia), esta vegada'l sábadu 26 de xunu tarán Corquiéu, Skama La Rede, Mala Reputación y Mala Comunicación (estos nun sé quién son y por eso nun hai enllaz).
• Penagos (Cantabria), una propuesta pa los más viaxeros que puedan tirar hasta Cantabria tamién el 26 de xunu, nel Arenal vamos poder ver a Alegría Cántabra, Maílla, Landeral, a los nuesos paisanos de Duerna y a los daneses Kasir.

Guerres Céltiques d'Avilés

L'otru día comenté equí que l'Asociación Esbardu, organizadores del Festival Intercélticu d'Avilés, y l'ayuntamientu d'Avilés, organizador del Festival Beltaine, entamaren conversaciones pa salir de l'abegosa situación na que se metieren el branu pasáu. Pasaos dellos díes pueo decivos que les coses siguen igual que taben, por muncha crisis qu'haiga, n'Avilés van volver cellebrase dos festivales de música celta.
L'añu pasáu, l'Ayuntamientu d'Avilés punxo en marcha'l Beltaine col envís de dar continuidá a una cellebración yá tradicional nos branos de la Villa, la razón esgrimía pa llanzar esa opa hostil sobre l'Intercélticu yeren la supuesta imposibilidá llegal d'Esbardu d'organizalu al deber unes cantidaes a la SGAE a cuenta de los drechos d'autor. El casu ye que foi quien a entamar una nueva edición del Intercélticu, con permisu de la SGAE y gracies a la participación gratuita de músicos y grupos de dellos países que qixeron char un gabitu a un festival que-ys abrió les puertes d'Asturies n'otres ocasiones. Mientres el Beltaine gastaba 360000€ nun festival que mos ufrió una riestra de conciertos memorables y un desastre organizativu nel beltaine gastronómicu, onde empresarios hosteleros y asociaciones perdieron tiempu y dinero.
Esti añu, cola deuda de la SGAE saldada y yá ensin trabes xudiciales, lo normal sedría axuntar enfotos na marca con 14 años d'historia y cola distinción de fiesta d'interés turísticu rexonal, aportando los aciertos qu'hubiere nel Beltaine del añu pasáu, trabayar en facer un festival grande que ponga la Villa nel mapa y seya un motor que dinamice la industria turística d'Avilés. Eso sedría lo normal, pero habiendo xestores culturales pel mediu la normalidá faise difuso, asina que, vamos tener dos festivales de siguío, ún acaba'l 23 y l'otru entama'l 24, que van duplicar el gastu y que van facer durar 15 díes lo que debíen ser 7. Yo, la verdá, nun sé si tan les coses pa dar esta imaxe, invertir en fiestes y música tradicional ta bien pero facer lo mesmo dos vegaes y gastar el doble pola cabezonería d'un par de conceyales ye daqué qu'acabará pasando factura y que pue tener víctimes collaterales.