Xornaes de Gaita en Cantabria

Xornaes dedicaes a la gaita pa entamar l'añu en Cabezón de la Sal los díes 2 y 3 de xineru. A naide se-y escapa'l creciente interés pol instrumentu nel país vecín, asina que, nun mos sorprende que s'entamen esta mena de minicursos intensivos como'l que nos ocupa entamáu pol Centro Cántabro de Estudios Tradicionales, con una matrícula de 35€. Nel cursu amás de meses redondes dedicaes a la presencia de la gaita nel norte peninsular, tamién ufierta una iniciación al repertoriu cántabru de gaita interpretáu con gaita asturiana o gallega. Los gaiteros encargaos d'impartir el cursu son el cántabru David López, el gallegu David Coya y l'asturianu Jorge Suárez.
Más info en http://estudioscantabros.blogspot.com/

Tejedor y amigos

Esti prósimu sábadu, 20 d'avientu, los Hermanos Tejedor, xueguen en casa, nel Auditoriu la Casa la Cultura d'Avilés, rodeaos de collacios como Niall Vallely, Gaudía Gallego... Un bon conciertu pa despedir l'añu folki n'Asturies.
Les entraes van costar 18€ en taquilla y puen mercase por adelantáu a 15€ en dellos locales d'Avilés, Xixón y Uviéu, amás de na red de caxeros de Cajastur al traviés del serviciu Tiquexpress.

Llangres: Entá

Yá ta na cai'l tercer trabayu discográficu de Llangres embaxo'l títulu Entá. El discu ta compuestu por 12 cortes onde rescampla'l llabor d'ún de los miembros de la banda, Viriu Fernández, como compositor de lletres y música, el protagonismu del bouzoukista y percusionista ye talu que tamién ye l'autor de les illustraciones del cartafueyu del CD.
El discu prosigue col camín entamáu nel so anterior trabayu y cola incorporación d'Esther Fonseca como vocalista de la banda, una tendencia que podríemos denomar pop d'autor con raigaños que dexase ver n'especial nos temes cantaos d'Entá. Hai que solliñar el perfeutu y elegante trabayu desendolcáu por Pablo Lato como productor, al que della xente-y achaca esi venceyamientu de la banda col pop, pero pesie a la mocedá de los miembros de Llangres cuido que son abondo maduros y yá lleven munchos años na música pa qu'esa tresformación estética nun seya daqué buscáu por ellos mesmos.
Tengo que reconocer qu'Entá ye un discu que gana con cada nueva escucha.

Morrió'l caberu bardu celta

Esta entrada nun tien que ver cola música tradicional, pero parezme que, dar anuncia de la muerte d'ún de los escritores que más fixo pol celtismu nos caberos años, nun ye una tema que seya ayena al espíritu d'esti blogue.
Morrió en Morbihan a los 80 años d'edá Jacques Bertrand, al que toos conocemos pol nomatu de Jean Markale, col que firmó más d'un centenar d'obres dedicaes a la cultura celta en toles estayes imaxinables, n'especial el de la mitoloxía artúrica y les sos manifestaciones na so querida Bretaña.
Valgan estes llinies como cenciellu homenax qu'habremos de completar relleendo dalgún de los sos llibros.

Chris Stout, el vigulín qu'aportó del Norte

Continuen los conciertos entamaos por Cajastur, el prósimu invitáu sedrá Chris Stout, vigulineru de les Shetlands qu'actuará'l día 4 d'avientu enXixón.

Esti graduáu pola Royal Scottish Academy of Music and Drama en vigulín clásicu tien yá tres de sí una importante carrera na música tradicional, asina, foi elexíu en Escocia meyor músicu mozu nel añu 1990 y lo que d'aquella yera una promesa agora yá ta confirmáu como d'un de los meyores vigulineros salíos d'aquelles nortiegues isles, lo que ye muncho si chamos una güeyada a los músicos salíos de les Shetlands.
Nel conciertu de Xixón tará respaldáu por Ian Stevenson a la guitarra y Neil Harland al contrabaxu.

VIII Festival Folk El Joyu (Cantabria)

Esta fin de selmana la música folk fairános visitar el país vecín, Cantabria, sedrá en Coo de Buelna onde podremos disfrutar de la octava edición del festival folk d'El Joyu. La nueche no musical abrirála'l gran gaiteru gallegu Pepe Vaamonde, al que siguirán los nuestros paisanos de Llan de Cubel caleciendo motores pa'l viaxe a Escocia y, dempués, los cántabros Naheba a los que va poco pudimos ver tocando per tierres astures.
Amás de música folk habrá amagüestu y otres delicies culinaries de la tierruca. Un plan bien guapu pa'l sábadu día 15.

Nuevu discu de Gatos del Fornu

Parez ser que, dientru de poques selmanes, tará disponible'l nuevu trabayu discográficu de Los Gatos del Fornu, discu que foi grabáu va dellos meses en Piedrasblancas pol productor y músicu escocés Jim Sutherland. El llanzamientu del discu fixose esperar, pero agora parez que va la vencida y parez que tará disponible enantes de les Navidaes.
Los Gatos foron una de les bandes asturianes más actives esti añu, no que a conciertos se refier, en mayu actuaron en México y agora tan acabantes de llegar d'Aranda de Duero. De xuru que col nuevu discu por presentar volverán a xubir a munchos escenarios nel prósimu 2009.

Anxo Lorenzo. 7 de payares en Mieres

El de Moaña ye ún de los meyores gaiteros gallegos contemporáneos y ye conocíu de sobra n'Asturies. Mañana podremos volver a velu tocar en Mieres gracies Cajastur tres pasar per Uviéu va pocos meses, onde tocó nel conciertu de los Meyores Gaiteros del Mundu. A los amantes de lo mui tradicional igual nun yos gustará, pola so tendencia pola fusión con otros estilos y pola so querencia pola música irlandesa... pero eso nun quita pa que seya un gran músicu y y una cita pa nun perdese.

Xarnege. 5 de payares n'Uviéu

Entamamos con Xarnege una serie d'entraes nel blogue dedicaes a los protagonistes de los conciertos de folk del ciclu Músiques del Sieglu XX.
Xarnege ye una banda formada por músicos tradicionales gascones y vascos, la so propuesta musical ñaz enfotada en convertise nuna zona d'alcuentru pa dos tradiciones musicales con un mesmu raigón, pues entrambos países, Gascuña y Euskal Herria comparten raigaños bascones.
Los miembros de la banda aclarien, nel so sitiu web, que la pallabra sharnèga val pa referise a los fíos de matrimonios mistos y, tamién, a les zones llimítrofes ente los dos países, onde les diferencies culturales faense difuses y fúndense nuna sola onde ye imposible saber onde entama lo vasco y fina lo gascón.

Breizh Positive

Unes píldores de pura enerxía bretona pa finar el mes d'ochobre que mos metió la ivernada en casa.

Nueche de folk asturianu en Glasgow

El prósimu 22 de xineru de 2009 va cellebrase una Nueche Asturiana nel festival Celtic Connections de Glasgow, nel escenariu del Old Fruitmarket y con una entrada de 16 llibres. Los encargaos de representar a les músiques de raigón asturianu nel prestixosu festival escocés van ser Llan de Cubel y Anabel Santiago.
Ye una gran allegría pa nós el que la música d'Asturies vuelva tar presente nuna de les cites más importantes de la escena folki mundial y que seya Llan de Cubel una de les bandes invitaes, tres d'un branu ensin actividá aparente, igual esta invitación val pa que retomen el trabayu d'un discu pol que naguamos yá dende va años, un trabayu discográficu que valga pa cellebrar el 25 aniversariu del grupu, como bien remembra la promoción del festival escocés nel testu que da anuncia de la Asturian Night y que vos dexo darréu:

The mountainous northern Spanish region of Asturias, a close cultural cousin to neighbouring Galicia, nonetheless nurtures its own distinct traditions, strongly informed by the Celtic heritage of Europe’s Atlantic seaboard. Those age-old connections with Scotland, in particular, have been vibrantly rekindled in recent decades, not least by the pioneering band Llan de Cubel, without whom no Asturian gathering at Celtic Connections would be complete. Celebrating their 25th anniversary in 2009, the group are justly regarded as godfathers of the current Asturian folk revival, combining carefully-researched traditional material and instrumentation with deft contemporary touches.

Tonight’s other acts include rising star Anabel Santiago, a dazzling young singer in the ancient Asturian style of tonado, a distant relative to flamenco characterised by its intense, powerful delivery. Her most recent album, 2007’s stunning Desnuda, allies her mesmerising voice with specially written songs by her close collaborator Ismael Arias, amidst a bold mesh of influences from tango to country.

Folk nel ciclu Músiques del Sieglu XX de Cajastur

Nel ciclu de conciertos qu'acostuma a entamar Cajastur dedicaos a la música popular del sieglu XX, volvemos a atopar una abultable presencia de folk, asina esta seronda podremos disfrutar de los conciertos de:
- La Bandina. El 31 d'ochobre en Mieres.
- Xarnege. El 5 de payares n'Uviéu.
- Anxo Lorenzo. El 7 de payares en Mieres.
- Arto Tunçboyaciyan. El 12 de payares n'Uviéu.
- Chris Stout. El 4 d'avientu en Xixón.
- Vincenzo Zitello. El 17 d'avientu n'Uviéu y 18 d'avientu en Xixón.

Folixa de Seronda

Tres los Alcuentros de Trebolgu y Llanes al Cubo aporta al calendariu una de les caberes fiestes rellacionaes cola música tradicional n'Asturies, tamos falando de la Folixa de Seronda, qu'entama'l grupu Escontra'l Raigañu n'Avilés.
Esti añu la cellebración va concentrase na fin de selmana del 7 al 9 de payares, anque les actividaes yá entamaron esti pasáu vienres cola inaguración de la esposición Instrumentos Musicales n'Asturies Tradicional, que va poder vese nel Palaciu de Valdecarzana hasta'l 10 de payares. El vienres 7 abriráse la carpa de la fiesta nel Parque Les Meanes onde podrá disfrutase d'un amagüestu con música en vivu, un taller de baille y d'una actuación del grupu Verdasca pa rematar la xornada. El sábadu día 8 habrá xinta popular a base de pote de berces con fariñón, arroz con llechi y café de pota, eshibición de deportes tradicionales, esfoyaza amenizada pola Banda de Gaites Villa d'Avilés, Esbardu, Na Señardá y Escontra'l Raigañu, pa rematar conciertu de Tuenda. Pa la cabera xornada reservase la tonada cola actuación d'Horacio Huerta y Mª Luz Cristóbal Caunedo, acompañaos a la gaita por Fonsu Fernández y la monologuista Luz Mari del Sol.
Un guapu plan pa da-y la bienvenida a la seronda.

Yérase una vez.. PLANXTY

Delles vegaes chando una güeyada en YouTube alcuéntranse coses interesantes, anque tardes n'atopales porque la cantidá de la información audiovisual ye inabarcable, la calidá de la información disponible ya ye otru cantar...
El casu ye que güei tuvimos suerte y fuimos quien a atopar esti prestosu documental de la RTE dedicáu a una de les primeres bandes de folk contemporánees, una de les más grandes, PLANXTY.
El documental ñarra la hestoria de la banda al traviés d'entrevistes a los sos componentes, sofitaes por cortes de vieyos videos del míticu grupu irlandés. Naguo por que vos preste lo mesmo que me prestó a min.

Llanes al Cubo 2008

A la fin yá sabemos la programación de Llanes al Cubo d'esti añu, cuando malapenes falten 15 díes pa dichu festival.

Como vien faciéndose davezu nesti eventu entamáu pol conceyu de Llanes vuelve apostase pol axuntamientu de música tradicional más-menos celta con otros xéneros de la world music y de la música comercial pura y dura, carne de radiofórmula. N'otres ediciones les actuaciones separtábense por xéneros pero na presente nun se va facer asina.

El vienres 31 d'ochobre nel escenariu de pagu actuarán la Banda de Gaites Llacín presentando'l so espectáculu Xideces que yá se pudo ver en Porrúa y nel Festival folk de Getxo, la Orquesta Baobab de Senegal, Canteca de Macao y Lam. Na carpa'l Muelle actuarán el cantautor Alfredo González y'l grupu Rush.

El sábadu 1 de payares pel escenariu de pagu pasarán los televisivos Pignoise, Lila Downs, Peret y los irlandeses Kila. Gratuitamente nel Muelle podremos disfrutar de los asturianos DRD y Felpeyu.

Nun sé si ye que colos años voi faciéndome más repunante pero nun me parez bien esta propuesta, nun ye que te mal tolo que nun seya folk célticu, pero cuido que mezclar xéneros por mezclar nun tien xeitu, asina va facese pagar a la xente pa ver una o dos bandes que-y presten y otres dos de les que va pasar dafechu. Por exemplu, el sábadu, personalmente pagaríe con gustu por sintir a la norteamericana Lila Downs o a Kila, pero por ver a Pignoise o a Peret nun doi un duru la verdá, y de xuru qu'hai xente que-y va pasar lo contrario.

Per otru llau nun me parez interesante, a nivel promocional, el nun cuntar con denguna banda asturiana nel escenariu grande'l sábadu y nun cuntar con denguna banda cántabra en tol festival, cuando sabemos que Llanes al Cubo ye un festival al que vien muncha xente del país vecín.

BBC ALBA

La radio y televisión pública británica va llanzar un nuevu canal en gaélicu escocés, igual que nel estáu de les autonomíes vamos... El nuevu canal nomase BBC Alba y pa promocionalu ta circulando pela rede un guapu videu per onde s'asomen cares y voces bien conocíes pa los aficionaos al folk escocés. Equí vos lo dexo, de xuru que conocéis a más d'ún.

John McSherry protagoniza'l Festival de Liencres

John McSherry y la so banda van ser les estrelles del festival folk "A que no llueve" de Liencres, na vecina Cantabria, el prósimu 11 d'ochobre.
Pesie al nome del festival l'actuación del gran gaiteru norirlandés va facese baxo techu, nel polideportivu de Liencres, poro, los más miedosos nun tienen dala cosa que temer. Bona ocasión de ver a un vieyu collaciu.

13. Nuevu discu de La Bandina

Yá ta na cai, y yá lo merqué, el nuevu trabayu discográficu de La Bandina asoleyáu embaxo'l títulu 13, lo qu'amuesa qu'estos rapazos nun son nada supersticiosos. Alcontramos nesti discu una continuación estética del so anterior De Romandela y un afondamientu nel so apueste poles músiques de baille y pola conexón de les músiques asturianes y bretones. Asina, bona parte de los músicos qu'andechen con La Bandina nesti trabayu son d'aquel país y el propiu discu foi grabáu parte n'Asturies y parte en Bretaña. La riestra de collacios bretones que collaboren ye bien llarga xente de les bagadou Kevren Arlé y Roseñd Mor, el gran Alain Pennec y Frédéric Bougouin-Krame, d'Asturies participen Alicia Álvarez y Xosé Ambás a les voces y Sergio Rodríguez al baxu. De les collaboraciones resultáronme especialmente prestose la d'Alicia en Valse coxu y la de Frédéric Bougouin-Krame al arpa celta en Pel Puirtu.
Una diferencia de 13 ye la mayor presencia y protagonismu de la seición de vientu del grupu, lo que-y da una sonoridá bien dixebrada de lo que ye'l folk asturianu que tamos avezaos a sentir. La variedá siempre vien bien, nun van ser too vigulinos y bouzukis.
En resume, un discu bien prestosu.

XXV Noite Celta de Porcía

Yá conocemos el cartelu de la XXVª edición de la nueche celta decana d'Asturies, la Noite Celta de Porcía. El prósimu sábadu 30 d'agostu van pasar pela guapa localidá del Occidente los grupos que vienen darréu:

• La Banda de Gaitas El Trasno d'El Franco.
• El Cabazo d'El Franco.
• Cádaba.
• Skanda.
• The Tannahill Weavers.

Cita folk bien interesante pa finar el mes d'agostu, con Cádaba presentando'l so segundo trabayu discográficu, con Skanda que nun pudimos ver en tol branu nos escenarios asturianos y colos Tannies que vuelven a actuar n'Asturies tres pasar pel Intercélticu d'Avilés hai poco más d'un mes, naguamos por que los escoceses traigan dalgún cd más porque n'Avilés escosaron tolos que truxeren y hubo muncha xente que quedo coles ganes de mercalu.

Esbilla de nueva música bretona

Munches vegaes los aficionaos al folk dexamos de llau al folk bretón, non por falta de ganes sinon porque la música d'esti país nun aporta a Asturies cola facilidá de la irlandesa o la escocesa, los discos bretones son difíciles d'atopar, les nueches folk asturianes nun avecen a incluir bandes d'aquel país... Ye una pena, porque en Bretaña hai una montonera de grupos mozos faciendo coses perinteresantes y que güei tan a la nuestra disposición gracies a internet. Equí va una petisa esbilla de la nueva fornada de grupos bretones... y hai munchos más.

Skirienn

Hamon-Martin Quintet

Hamon-Martin Quintet de sobremesa n'Asturies

Bivoac

Startijenn

¿Interceltique d'Avilés?

Siguimos col culebrón del branu... Nun tamos aldericando de música folk, sinon del qu'hasta esti intre ye'l mayor festival asturianu de música tradicional y folk, poro, parezme que ye bon sitiu pa bilordiar sobre ello.
Sigui la engarradiella na prensa ente'l conceyal de Cultura d'Avilés, Román Antonio Álvarez, y la conceyala popular Carmen Vega. El debate etnomusicolóxicu ye de gran altor científicu, agora centráu en si tocar un tangu con gaita ye música celta o non. Pa los que cuiden qu'esto ye un homenax a Valle-Inclán y non un debate de verdá, remitolos a La Nueva España (na so edición avilesina) del día d'ayeri. Nes manes d'esa xente ta'l futuru del Intercélticu d'Avilés (y d'otres munches coses qu'igual son más importantes).
El casu ye que D. Román, al que nun se-y conoz denguna afición poles gaites nin pola música tradicional, camudó les cais d'Avilés poles de Lorient y pela villa bretona anda acompañáu pol so sociu nel equipu de gobiernu avilesín D. Fernando Diaz Rañón, conceyal d'IU y gaiteru aficionáu. Igual fueron entruga-y a Lisardo Lombardía si un tango tocáu con gaita ye música celta o non ¿quién sabe?
El conceyal d'IU yá propunxo hai unos díes el tratar de firmar un conveniu col Festival Interceltique de Lorient pa qu'entamara o andechara col ayuntamientu d'Avilés na organización del prósimu Intercélticu. L'atopalu en Bretaña, al poco de facer eses declaraciones, y acompañáu pol conceyal de Cultura ye bien llamativu ¿tan documentándose nel mayor festival celta del mundu?¿Tan viendo que posibilidaes hai de firmar el conveniu propuestu pol portavoz d'IU?¿Tan faciendo turismu? Albidro que nun tardaremos n'alcontrar respueta a estes entrugues.
Finamos equí un nuevu capítulu d'esti culebrón braniegu.
PD: A ver si hai suerte y se dan cuenta que la música celta pue ser un motor pa la promoción turística d'Avilés y d'Asturies en xeneral.

Pa los que nun vayan a Lorient...

Los que nun vayan a Lorient y quieran siguir disfrutando de la música folk tienen una interesante propuesta na vecina Galiza, nel conceyu de Moaña, que cellebra la vixésimo cuarta edición del so Festival Intercéltico. Nel so cartelu rescamplen los nomes de grandes bandes y solistes del folk atlánticu como Shooglenifty, Four Men & A Dog, Susana Seivane, Julio Pereira, Luétiga... Amás tamién van ufiertar una bona esbilla de música tradicional en combinación colos grupos de folk contemporáneo, ente los nomes d'estos músicos tradicionales, qu'igual nun llamen tanto l'atención a los aficionaos folkis, prestame destacar la presencia de Juanjo Fernández gaiteru abanderáu de la recuperación de la dixitación cerrada na gaita gallega.
Una prestosa escusa pa visitar el país vecín.

Acabóse l'Intercélticu d'Avilés... ¿pa siempre?

Acaba d'echase'l telón de la XIIª edición del Festival Intercélticu d'Avilés, una edición que bien pue ser la cabera, polo menos d'un festival como'l que conocemos. No musical y a nivel festivu, el FIA podemos dicir que volvió a algamar una nota alta. Como siempre hubo munchos actos y cuasi toos cuntaron cola participación d'un público entusiasta. Rescampló, nel sen contrariu, l'escasu seguimientu del últimu conciertu grande del FIA, abultóme poca xente la que se xuntó pa ver a Beoga y los Tannies.
Pero esti añu nun se faló d'un festival qu'algamó la reconocencia de Fiesta de Interés Turístico Regional; nin de la presencia na Villa de bandes mítiques dientru de la música tradicional como los Tannies, Fred Morrison o la Bagad Lann Bihoué; nin de les decenes d'actos entamaos pol FIA na Comarca d'Avilés. Esti añu, dende la presentación del festival la polémica fizose protagonista esclusiva del mesmu, cartelos, deudes cola SGAE y sovenciones ensin xustificar son los recuerdos que queden d'esta edición na mente de los avilesinos ¿Hubo una mala xestión del FIA dende la Asociación Cultural Esbardu? ¿Marafundióse dinero público en coses ayenes al festival n'ediciones pasaes? Munches entrugues y poques respuestes ye'l resume que se pue facer de la cuestión, anque, hai que dicir qu'hai meses que n'Avilés se falaba sobre'l futuru desembarcu del Ayuntamientu na organización del FIA. Casualidaes de la vida, durante la recién pasada edición del FIA, Juan Luis Casas vese obligáu a firmar un documentu nel que "renuncia a l'actividá".
¿Qué queréis que vos diga? Yo nun creo en casualidaes. Va tiempu yá dixi públicamente que Román Antonio Álvarez, conceyal de Cultura d'Avilés, diba facese col FIA o acabar con él. Nun ye que seya un gran aldovín, ye que les zunes de dellos políticos locales son mui previsibles y el currículum d'esti personax ta atacáu de desembarcos perasemeyaos. Lo único que m'abluca ye que tolos acontecimientos pasaren tan de sutrucu.
Naguo por que la declaración de fiesta d'interés turísticu valga pa da-y continuidá al FIA, anque albidró que tien un futuru bien prieto.

La fin de selmana más folki del añu

Coses del branu pero tamos énte la fin de selmana más folki del añu, los conciertos y actuaciones queden unos tapecíos por otros y tres díes nun dan pa programar tanta música ensin pisar les propuestes del vecín. Ye una pena, porque igual nun hai demanda pa tanta ufierta y dalgún actu pue quedar un poco murniu ensin público.
L'Intercélticu prosigue colos espectáculos más importnates del so programa: la Lluna Celta, esta nueche, xuntará a tolos grupos participantes y un garrapieyu de músicos solistes nel Complexu Deportivu del Quirinal; mañana, nel Parche, podremos disfrutar colos irlandeses Beoga y los Tannies.
Esta nueche tamién se cellebra la final del concursu folk Cuartu los Val.les en Navelgas, amás de los grupos finalistas tamién tocarán los estremeños Los Niños de los Ojos Rojos.
Pa los que seyan más aficionaos a les gaites la Banda de Gaites de Candás cellebra los sos tradicionales alcuentros de bandes de gaites na guapa villa mariñana, güei y mañana, pasarán per Candás los gaiteros de Xinzo de Limia, La Reina'l Truébano, los bretones de les bagadou Han Anternoz y Kevrenn Arvorig, amás de los de la banda organizadora.
Pal domingu un clásicu, la Nueche Celta de Granda en Xixón, colos irlandeses Beoga, La Curuxa, la Banda de Gaites de Villaviciosa y Skama La Rede. Tamién na villa de Xovellanos, esta vuelta, na plaza Mayor y a les 10 de la nueche Felpeyu volverá ufrir el repertoriu de Canteros.
Muncha música.

Los Meyores Gaiteros na TPA

L'espectáculu, qu'ayeri pudimos disfrutar n'Uviéu, con un puñáu de los meyores gaiteros del mundu va ser retresmitíu pola TPA'l prósimu domingu a les 10 de la mañana.
Bona oportunidá pa los que taben lloñe de la capital de ver esti prestosu conciertu... o de volver velu pa los que tuvieron ellí. Habrá que tar sollertes porque cola puntualidá ya'l procuro que tien la TPA pa cola música tradicional igual entamen a chalo a les 6 de la mañana o a les 12 o igual pasen ya nun lo echen... El casu ye que ta anunciáu pa esi día ya a esa hora, tais avisaos.

Fred Morrison+Red Hot Chilli Pipers

La primer nueche grande'l Festival Intercélticu pue resumise en poques pallabres: la xente sabía a lo que diba ver y escuchar, y taba entregada dende que salió la primer nota del punteru de la reel pipe de Fred Morrison.
La organización tuvo'l detalle de quitar les silles qu'acostuma a poner delantre l'escenariu, lo que permitió la entrada de más aficionaos na Plaza de Carlos Lobo que quedó pequeña pa la ocasión. El conciertu entamó con puntualidá y col enfotu de Fred por falar un amestu d'español y francés que foi bien recibío pol público. Los fulgurantes sets del escocés a la gaita irlandesa y a la reel pipe, bien secundáu a la guitarra por Mathew Watson, ficieron vibrar al público que siguió gran parte'l conciertu dando palmes. Dempués de baxar del escenariu, la gran presencia física de Fred dexose notar pelos chigres de la zona y fueron munchos los que saludaron y felicitaron al músicu pola actuación.
Pocos minutos dempués los Red Hot ficieron so aparición y desgranaron la mayor parte'l repertoriu del so reciente discu Bagrock to the Masses. Versiones de clásicos del rock por una banda folk d'escelentes músicos, con una estudiada presencia nel escenariu, cuasi podríemos falar de coreografía o representación de los temes versionaos. Nun son una banda del gustu de los aficionaos más tradicionalistes, pero nun hai dulda de que saben lo que faen y faenlo perbién. N'Avilés, como nel mediu mundu que lleven percorríu con esti espectáculu, volvieron metese al público nel bolsu y toos saltamos como llocos cola so música.

Merzhin

Merzhin (Merlín en bretón) ye una de les sopreses que nos ufre'l FIA d'esti añu. Nun ye corriente la presencia n'Asturies de grupos de la mena d'estos bretones de Landerneau, poro, el conciertu que van dar n'Avilés colos asturianos Falanoncaduca, ye una d'eses velaes pa nun perdese a poco que nos preste'l rock con aires célticos.
El grupu formose nel 96 y tien asoleyaos 4 discos en solitariu, del primero Premiére Lune llegaron a vender 40000 copies en Francia, polo que nun tamos falando d'unos aficionaos o d'unos recién llegaos.
Pa facer boca, y pa aldovinar per onde dirán los tiros el prósimu llunes 21, equí van d'ellos videos de Merzhin

Yá ta equí'l Festival Intercélticu d'Avilés

Esta selmana presentóse oficialmente'l programa de la presente edición del Festival Intercélticu d'Avilés y Comarca. Una edición que vien refrendada pola declaración de Fiesta de interés turístico y que presentase como la más ambiciosa hasta la fecha.
La presentación tuvo atapecida pola absurda polémica sobro'l cartelu oficial del festival (tolos años ye obra d'un artista local, Taboada, y esti añu l'ayuntamientu encargó-ylo a otru artista local, Miguel Solís, ensin pautar primero cola asociación qu'entama'l festival, Esbardu. Asina qu'asociación y ayuntamientu presentáronse na rueda de prensa con dos cartelos distintos, hubo amenaza de plante, etc. Mui profesional too vamos.
Pasando de la polémica'l cartelu, que namás-y interesa a quien la creo -esto ye Román-, pasamos a lo que ye interesante de verdá, a los grupos participantes nel festival ente los qu'hai delles sorpreses y falten tamién dalgunos esperaos. Asina, vemos que nun van pasar pela Villa los quebecoises de la Bottiné que veníen sonando nos mentideros folkis del país como posible cabeza de cartelu del festival dende va meses. Confirmase la esperada presencia de los Red Hot Chilli Pipers, trunfadores de la pasada edición y de la banda de gaites de la Marina Francesa Bagad Lann Bihoué. Amás, van tar presentes n'Avilés Fred Morrison, los Tannahill Weavers y los irlandeses Beoga.
Muncha presencia escocesa que davezu tien bona acoyida nel festival avilesín. Equí tenéis un adelantu'l programa que diremos completando pasín ente pasu:

Vienres 18 de xunetu

- LA BANDINA LA CURUXA (ASTURIES)
- “NUECHE EN DANZA”
* Plaza de Carlos Lobo

Sábadu 19 de xunetu

- RED HOT CHILLI PIPERS (ESCOCIA)
- FRED MORRISON (ESCOCIA)
* Plaza de Carlos Lobo

Domingu 20 de xunetu

- STUART CASSELS (ESCOCIA)
- BAGAD LANN BIHOUÉ (BRETAÑA)
* Plaza de Carlos Lobo

Llunes 21 de xunetu

- MERZHIN (BRETAÑA)
- FALANUNCADUCA (ASTURIES)
* Plaza de Carlos Lobo

Martes 22 de xunetu

- BAGAD LANN BIHOUÉ (BRETAÑA)
- ANABEL SANTIAGO & M. LEE WOOLF (ASTURIES)
* Plaza de Carlos Lobo

Miércoles 23 de xunetu

23′00h) BARDOS DEL MUNDU CELTA
(NUECHE DE GAITES DE LOS PAISES CELTAS)
* Plaza de Carlos Lobo

Xueves 24 de xunetu

23′00h) DRUIDES DEL MUNDU CELTA.
(NUECHE DE DANCES DE LOS PAISES CELTES)
* Plaza de Carlos Lobo

Vienres 25 de xunetu

23′00h) SESTAFERIA. MARCHA CELTA
Camín: Parche - C/ Cámara - C/ Doctor Graíño - Pza. Vaticano - C/ Juan XXIII - Complexu Deportivu Avilés.
23′30h) LLUNA CELTA. LA GRAN NUECHE DE LOS CELTAS.
-MARISA VALLE ROSSO (Tonada)
-RUBEN ALBA (Gaita)
-MARCOS GARCIA (Curdión)
-GRUPOS DE MUSICA Y BANDAS DE GAITAS DE LOS PAISES CELTES
-GRUPOS DE DANZA Y BAILLE TRADICIONAL DE LOS PAISES CELTES
*Complexu Deportivu Avilés (El Quirinal)

Sábadu 26 de xunetu

- TANNAHILL WEAVERS (ESCOCIA)
- BEOGA (IRLANDA)
*El Parche

"Folkesí" ye agora "Más que Gaites"

Depués de 6 meses asoleyando noticies y bilordios del folk asturianu, del cantábricu y del folk celta en xeneral baxo la cabecera Folkesí, Músiques con Raigañu veome obligáu a camudar el nome del blog pol nuevu Más que Gaites.
Está fin de selmana recibí un email de Luís Martín, portavoz de la empresa Folkesí S.L., onde m'esplicaba que dende va años está entidá vien trabayando alrodiu de la música tradicional en Segovia. Asina, entamen el prestixosu festival folk de Segovia, representen a dellos grupos y asoleyen la revista Folkesí. La esistencia d'un blog tamién col mesmu nome y tamién dedicáu a la música tradicional podía provocar confusiones. Cuando entame a publicar esti blog nun tenía más interés qu'echar la llingua a pacer y da-y continuidá a una actividá que venía faciendo tamién dende tiempu atrás na web asturcelta.com, un hobby como cualisquier otru, nun se me pasó pel maxín intentar sacar dengún beneficiu comercial d'esta xera nin perxudicar a denguna empresa que trabaye en y pola música tradicional.
El siguiente pasu a dar taba ñidio y nun ye otru que migrar el blog a una nueva cuenta que va tener por títulu Más que Gaites y que vais poder atopar na URL http://masquegaites.blogspot.com
Gracies
Vítor González

www.festivalfolkcantabriainfinita.es

Yá ta disponible la web del festival Cantabria Infinita. Una bona alternativa folki pa los que nun queráis dir hasta Ortigueira. La web ye más bien ramplona y la info qu'apurren ye bien escaso, pero ye lo qu'hai. Dicir que nun van tar los AfroCelt Sound System sinon un grupu cántabru nomáu Afro Sound System, disculpái la confusión.

Yá ta prósima la nueva edición del Festival d'Ortigueira y a tres selmanes del mesmo conocemos los grupos que van protagonizar el que se diz, o dicía, festival do mundo celta. Y digo que se dicía porque si hai daqué que rescampla nel cartelu d'esti añu ye la presencia de bandes que nun tienen dala cosa que ver col mundo celta, asina, na nueche del vienres, 11 de xunetu, van pasar pel escenariu principal los grandísimos Sondeseu y otres dos bandes tamién grandísimes pero ayenes a la música celta como son les fineses Värttinä y la orquesta folk berlinesa 17 Hippies.
Na nueche'l sábadu abrirán boca la National Youth Pipe Band of Scotland y el grupu de percusiones Odaiko, pa rematar coles dos mítiques bandes Moving Hearts (que tamién tarán en San Vicente de la Barquera peles mesmes feches) y Boys of the Lough.
Pa rematar la fin de selmana'l domingu podremos ver a la galega Uxía, a Eliseo Parra y a otro grupu irlandés sacáu del xeriátricu pa la ocasión, The Dubliners.
Un añu más nun hai presencia asturiana nel escenariu grande, ta por ver si Blima pasa'l corte y actúa nel escenariu Runas.
¿Edición de transición? Talanto, ye una opinión personal, que la organización d'Ortigueira lleva delles ediciones tratando d'escaecer o tapecer la etiqueta celta del so festival, faciendo medrar la presencia d'otres músiques del mundu na localidá gallega. Esti añu ye bien nidio cola actuación de Värttinä, 17 Hippies y Eliseo Parra. Anque igual ye qu'anguañu nun hai grupos de música celta cola calidá suficiente pa programar un festival de tres díes al completu, porque sinon nun s'esplica la pléyade de grupos qu'esnalen ente la señardá y la senectú que nos ufre'l cartelu d'Ortigueira d'esti añu. Moving Hearts ye un grupazu, lo mesmo que los Boys, y los Dubs son eso, los Dubs; pero si en tol mundo celta nun hai una propuesta más mozo y más fresco qu'ellos, si tenemos que andar a la gueta de bandes de la primer metá de los 80, o más vieyos entá, pa facer un festival arregladín podemos dar por muertu esti inventu.

Gúei viaxamos a Canadá

Darréu vien una petisa esbilla de música tradicional canadiense, naguo por que vos preste lo mesmo qu'a mín.
Beolach:

Ashley MacIsaac:

Le Vent du Nord:

La Bottine Souriante:

Enter The Haggis:

Anna & Kate McGarrigle:

Festival n'Auvernia dedicáu a la música tradicional cantábrica

Pa la fin d'esti mes de xunu va celebrase, en Saint-Flour (Auvernia), el festival Hautes Terres, que na presente edición va tar dedicáu a la música tradicional del noroeste de la Penísula Ibérica. Como estrella del festival alcontramos a la gaitera gallega Susana Seivane, a la que la organización del festival denoma la petite princesse de la cornemuse galicienne, que tará bien secundada por Kepa Junkera, Paco Díez, Alba Gutiérrez y una representante asturiana bien exótica, Equidad Bares.
Depués de googlear a la gueta d'información sobro esta cantante pueo dicir que nu ye mui conocida, lo más nidio qu'alcontre foi una reseña en rootsworld.com del so discu Mes Espagnes del que saco les lliníes qu'apurro darréu: Bares sings songs from the many cultures that are Spanish, from Judeo-Spanish, Gypsy and Asturian traditions she derives songs and inspiration. She seems to live these songs, such is the depth of her performance here. This would be enough, but the band that backs her is a phenomenon. Reeling hurdy-gurdies scream in ecstasy (Marc Anthony is a master), frame drums buzz and rumble, reeds and bagpipes shriek and moan. While she is based in France these days, she paints an ancient picture of a Europe with different borders.

Conciertu de la Oysterband en Miranda de Ebro

Esta cabera selmana tuve pasando unos díes de vacación, anduve per tierres d'Euskal Herria y de La Rioxa y, el 17 de mayu, aprovechando que nun taba mui lloñe, fuí hasta Miranda de Ebro pa ver a esta banda mítica del folk británico.
Había polo menos 15 años que nun los vía en conciertu, dende que tocaren n'Uviéu na Plaza la Catedral xunto con June Tabor, yá llovió.
Los años nun pasen en baldre pa naide, músicos y los más de los escasos 80 espeutadores que s'acercaron al Centru Cultural CajaBurgos yá peñamos canes.
Sorprendióme alcontrar un grupu menos folixeru y más seriu de lo que yo remembraba, más maduru. El conciertu yera parte d'una minixira española de presentación del so últimu discu Meet You There, yá pasaren per Aranda de Duero y quedaban-ys dos cites per delantre en Calaf y en San Vicente de la Barquera. Amás de presentar los nuevos cantares fixeron repasu de dellos de los temes más conocíos de la so llarga discografía y dexaron dos perles d'ese que namái se puen dar en escenarios pequeños ya íntimos: una perguapa versión a tres voces d'Oxford Girl col únicu acompañamientu instrumental de la guitarra d'Allan Prosser y, pa rematar los bises, el quintetu baxó colos instrumentos desenchufaos al patiu de butaques pa interpretar ente los ellí presentes Put Out The Lights.

Whistles of Wood

Tommy Dion ye un artesán de Santa Fé, nel estáu norteamericán de Texas. Dende va poco fae whistles de dixebraes maeres embaxo'l nome comercial de Whistles of Wood.
Los sos instrumentos van anillaos en llatón, son afinables y tienen un volume medianu, perfechos pa tocar al llau d'otros instrumentos.
Si daquién ta interesáu dicir que anden a partir d'ochenta € y qu'hai n'Asturies dellos disponibles pa probar fechos de cardinal wood (los de la semeya) y de cocobolo (que son un poquín más caros) y que podéis recibir más info escribiendo a vitor-gonzalez(arroba)hotmail.com

Cantabria Infinita

Depués de falar del FIA y de la necesidá de que les alministraciones públiques s'impliquen más allá de la concesión de premios, chamos la vista a Cantabria que lleva apostando dellos años polos festivales de folk como forma promoción turística.
L'exemplu paradigmáticu d'esi apueste ye'l festival Cantabria Infinita (el mesmu lema de la promoción turística cántabra), que vien cellebrándose dende hai un par d'años en San Vicente, nel qu'axunten nun mesu escenariu a bandes de la tierruca con grupos con nomes de rellumbrón (Chieftains, Dervish, Sharon Shannon, Carlos Núñez...). Na edición d'esti añu van tar presentes los nuesos paisanos Corquiéu, delles bandes cántabres onde rescampla la nueva formación Braña y como cabeces de cartelu Kepa Junkera, la Oyster Band y Moving Hearts que tres de tocar en Santiago va poco va dar un segundo conciertu nel estáu español, cuasi dexuru'l caberu, ufriendo una oportunidá d'oro a los que nun pudimos desplazanos a Santiago.
Igual el cartelu del añu pasáu yera más espectacular y atractivu pa los aficionaos asturianos, porque a Kepa yá lo conocemos perbién y la Oyster ye un bon grupu de direutu pero igual nun ye de los que mueve muncha xente, pero la presencia de Moving Hearts xustifica ella sola el pasar una fin de selmana en San Vicente.