Tolo d'Asturies

El prósimu miércoles preséntase oficialmente'l programa d'actividaes de la III Muestra Cultural Tolo d'Asturies, a lo que bien se pue añadir y de parte del estranxeru, porque esti festival cunta con una importante nómina d'invitaos dótros países.
El programa entama'l xueves 14 de mayu, cola presentación del festival y un conciertu coles curdiones diatóniques como grandes proganistes, asina los escolinos d'esti instrumentu de la Escuela de Música Tradicional Reija de Llangréu van compartir escenariu con Xuan Nel Exposito, Filippo Gambeta y Ignacio Alfayate.
El vienres los conciertos vienen de la man de Gatos del Fornu, Los Ciquitrinos y los italianos I Liguriani. Na xornada'l sábadu podremos disfrutar del espectáculu Xideces, protagonizáu pola Banda de Gaites Llacín, les pandereteres Herbamora y la banda del irlandés Dave Munnelly, que yá tuvo l'añu pasáu per tierres cántabres.
Pa pesllar el festival, el domingu, podremos asistir a un conciertu d'Héctor Braga y, darréu, un homenax al músicu tradicional de La Güeria d'Urbiés Tomás Zapico, onde van tar presentes los meyores curdioneros del país interpretando pieces del homenaxeáu.
Amás de conciertos el programa de Tolo d'Asturies complétase con muestres d'artesanía y gastronomía, xuegos tradicionales y una feria del discu y llibru n'asturianu. En resume, una cita pa nun perdese, reservái eses feches na axenda pa pasar pela Estación d'Autobuses de Llangréu.

Nueva edición del Festival 2 Mares

L'Asiciación valenciana d'Amics de la Gaita entama una nueva edición del Festival 2 Mares, onde se funden les músiques tradicionales del Mediterráneo y les del Atlánticu. Dos fines de selmana, esti qu'entama y el que vien, cargaos de conciertos y d'interesantes cursinos d'instrumentos tradicionales. Asina los que ten per Valencia neses feches podrán disfrutar cola música de bandes como Celtúria, The Last Pint, Thirty Silver Coins, O Son do Avrego o los Dolçainers de L'Horta Nord.
Na parte didáutica del festival habrá cursos de whistle, gaita y uillean pipe, bouzouki, flauta irlandesa... En poques palabres, un interesante y completu programa fechu con ilusión y gustu poles músiques de raigañu.

Cursu d'acompañamientu de gaita n'Asturianá

Pa los meses de Mayu y Xunu la EMT de Llangréu ta preparando'll Cursu d'acompañamientu de gaita n'Asturianá, tará repartíu en 10 clases teóriques y práutiques con cantadores d'Asturianá.
Impartiránse tolos sábados de Mayu y Xunu ente les 16 y les 19h. nel Conservatoriu Profesional de Música "Valle del Nalón", más tres clases estra de selmana pa la práutica con cantadores.
El requisitu mínimu ye un nivel mediu-altu de gaita con bon repertoriu de floreos.
Les clases sedrán impartíes por Valentín Fuente de cálter personalizáu con un másimu de 2 alumnos por sesión.
El preciu del cursu completu ye de 100 euros que s'abonaran en dos mensualidaes de 50 euros.
Les plazes son llimitaes por rigurosu orde d'inscripción que se pue formalizar dende'l corréu ellectrónicu llangreumusicatradicional@hotmail.com o nel númberu de teléfonu 985677113. El plazu fina'l 30 d'Abril.

Hestoria d'un fracasu

Falaba de pasada n'anterior entrada'l blogue de la incapacidá que tenemos n'Asturies pa comercializar los nuesos productos de calidá, como ye la nuesa música tradicional y folk. Ye curioso qu'haiga nel esterior (toi falando del restu l'estáu y del estranxeru en xeneral) un interés por conocer lo d'equí y nós nun faigamos res por dalo a conocer. Voi cuntar dos anécdotes personales, que yá sé nun tienen dengún valor estadísticu pero que pa min son significatives abondo.
La primera ye d'un chaval d'otra comunidá autónoma col que topé nun foru d'internet, andaba'l probe entrugando cómo podía mercar el discu nuevu de DRD. Fuera a pidilu al Corte Inglés de la so ciudá y diz que la mocina de la seición de discos, dempués de buscar nel ordenador, dio-y un CD de RBD, qu'al parecer ye nunsequé d'una serie la tele. La otra vía qu'intentó l'infortunáu aficionáu foi la web del grupu, onde namái alcontró una semeya de los asturianos.
La segunda anécdota vien de los Estaos Xuníos, ellí hai un paisanu que tien por hobby les gaites de cualisquier mena y, va tiempu, montó una tienda na rede dedicada a vender CDs que tienen esti instrumentu como protagonista (podéis visitar la tienda en http://bagpipediscs.com). Col pasu'l tiempu va teniendo un fondu de catálogu bien curiosu, los discos que vendía nel entamu yeren na so mayoría escoceses y irlandeses, pero bien ceo foi añadiendo discos franceses, gallegos, italianos... al so stock. Más d'una persona entrugó-y por discos de gaita asturiana, pero nun pudo satisfacer l'interés de los sos clientes. La razón ye que ta cansáu de mandar emails a les discográfiques asturianes qu'alcuentra n'internet, ensin tener denguna rempuesta.
La industria discográfica ta en crisis y les ventes de CDs baxaron enforma nos cabaeros años, pero mientres s'igüen otros caminos pa comercializar música nun se pue dar la espalda a la venta de discos. Les webs de los grupos asturianos nun tan preparaes pa la venta on-line de discos nin merchandising, les discográfiques parez que tienen abondo con cobrar la sovención y nun faen dala cosa por atopar canales de distribución pa los sos productos, cosa que yá sé que ye abegosa, que yá nun hai tiendes de discos y que nos centros comerciales namái hai sitiu pa les novedaes de les multinacionales y les chorraes tipu OT pero ¿tan abegosu ye poner a furrular una e-shop? Parezme que non, visto lo que faen el restu de bandes y discográfiques de música folk y/o tradicional de los países del nuesu entornu.

gaitaforum.com

Ta acabante de ñacer un interesante proyeutu alredor de la gaita asturiana y del restu de gaites de la Península, un foru n'inglés destináu a recopilar información y servir de llugar d'alcuentru pa tola xente interesada nes gaites hispanes, A place to discuss any and all aspects of Spanish bagpipes (gaitas), piping, and Spanish music en pallabres del so fundador y moderador, un aficionáu de Kansas City que tamén ye'l fundador de http://www.uilleannforum.com
Esti foru vien a enllenar un furacu estructural de la música tradicional del estáu español, la incapacidá pa ufrir un productu de mercáu en condiciones. Hai xente espardida pel mundu interesada nes nuestres gaites y na nuestra música tradicional pero nós nun facemos res por vendela, la tema ye peliaguda y da pa otra entrada, dexemos ésta pa da-y les gracies a Jeff por abrir http://www.gaitaforum.com
Desde equí invitámosvos a andechar nesti prestosu proyeutu aportando tola información que vos pete de la nuesa gaita.