Esti sábadu, 29 de mayu, a les 23.00 hores entama la 6ª edición de la Nueche Folk de Soto Rei, que va tener como protagonistes musicales a los Hermanos Tejedor y a los franceses Doolin'. La organización pon chigre y carpa, por si-y da por apaecer a Ñuberu per Soto. Pa los que nun conozan a Doolin', al ser esti el so primer conciertu n'Asturies, dicir que ye una banda fundada nel añu 2005 por dellos músicos franceses aficionaos a la música irlandesa. Dende la so formación vien siendo una de les referencies de la música celta nel país vecín. Equí vos dexo delles amueses del so trabayu pa que los vayais conociendo meyor.
Mañana entama, en Noreña, una serie de xornaes dedicaes a la música tradicional organizaes pol ayuntamientu en collaboración cola Escuela de Música Tradicional de Noreña. Estes xornaes van cellebrase los sábados y, cada una, va tar dedicada a una estaya de la música tradicional asturiana. Asina, mañana 23 de mayu, L'Asturianada va ser la gran protagonista, a les 11,30 Anabel Santiago va dirixir d'un alderique alredor d'esti xéneru tan nuestro na Casa Cultura, dos hores más tarde habrá un festival nel quioscu de música per onde pasarán la mencionada Anabel, Jorge Tuya, Mariluz Cristobal Caunedo y Francisco Martín Holgado, acompañaos por Valentín Fuente a la Gaita. El 30 de mayu la protagonista sedrá la gaita, siendo los escolinos de la Escuela de Música tradicional de Noreña y los sos profesores los qu'amuesen la versatilidá d'esti instrumentu, con Chus Solís como direutor. El 6 de xunu sedrá la xornada dedicada a los cantares narrativos asturianos, de los que falará Héctor Braga na Casa Cultura y lluéu dará bon exemplu nel quioscu de música, acompañáu nel escenariu por Carlos AlbaCellero, ún de los másimos esponentes de la modernización del monologuismu asturianu. Finarán les xornaes el 13 de xunu, cola flauta travesera como protagonista nun conciertu a cargu de Diego Pangua y Pepín de Muñalén acompañaos d'Alberto Ablanedo al bouzouki.
Dempués d'una selmana bien murnia, que llevó con ella la vida de dos familiares bien cercanos hai que buscar un enfotu pa siguir alantre, viviendo... Cantares con voz de muyer pa entamar la selmana con gracia, si somos quien a ello.
Sábadu 9 de mayu a les 20:15 hores. Preciu: 4 €. Nuevu Teatru La Felguera
El próximu 9 de mayu, dientro de la programación d’Encuentrautores09, Alfredo González va actuar en Llangréu. El Nuevu Teatru La Felguera va acoyer un conciertu d’esti cantautor turonés que nel añu 2008, cola publicación del so primer trabayu n’asturianu “La Nada y tú”, tien ganao una montonera premios (Premiu al meyor cantar en llingua asturiana08 por el cantar “La nada y tu;Premiu de la Crítica de la RPA al Meyor Discu d´Autor, por La nada y tu; Premiu Amas al Meyor Lletrista; Premiu AMAS al Meyor Videoclip, por “El último taxi” de Sr. Paraguas).
Alfredo González tien grabaos hasta la fecha dos discos en castellán: “La vida de alquiler” (autoedición, 2003) y “Dudas y precipicios” (DFX Records, 2003). “La nada y tú” (Ámbitu/L’Aguañaz, 2008) ye’l so primer trabayu n’asturianu. “La nada y tú” ye un discu ente’l pop y la música de cantautor nel que’l cantautor de Turón indaga n’asturianu nos territorios del amor y de la muerte. Nesti trabayu Alfredo trabaya con testos propios y otros d’autores asturianos, poniendo música a poemes d’Antón García, Pablo Texón y Xandru Fernández y otros.
“La nada y tú”, canción que da títulu al últimu discu d’Alfredo González ye un tema que’l turonés compunxo sobre un poema d’Antón García. “La nada y tu” ganó’l Premiu al Meyor Cantar en Llingua Asturiana 2008 y con esti tema Alfredo González va representar a la música asturiana na próxima edición del festival Liet Ynternasjionaal qu’esti añu va tener llugar na ciudá frisia de Ljouwert/ Leewarden (Países Baxos).
Si nun teníes plan pa esta fin de selmana... yá lo tienes, mercáu tradicional en Sienra entamáu pol Grupu Folklóricu de Blimea. Comida, bebida, música tradicional y folixa asturiana al 100%. Equí vos dexo un video promocional del Mercáu Tradicional que colgó en YouTube'l collaciu Texois, que vos preste
El prósimu miércoles preséntase oficialmente'l programa d'actividaes de la III Muestra Cultural Tolo d'Asturies, a lo que bien se pue añadir y de parte del estranxeru, porque esti festival cunta con una importante nómina d'invitaos dótros países. El programa entama'l xueves 14 de mayu, cola presentación del festival y un conciertu coles curdiones diatóniques como grandes proganistes, asina los escolinos d'esti instrumentu de la Escuela de Música Tradicional Reija de Llangréu van compartir escenariu con Xuan Nel Exposito, Filippo Gambeta y Ignacio Alfayate. El vienres los conciertos vienen de la man de Gatos del Fornu, Los Ciquitrinos y los italianos I Liguriani. Na xornada'l sábadu podremos disfrutar del espectáculu Xideces, protagonizáu pola Banda de Gaites Llacín, les pandereteres Herbamora y la banda del irlandés Dave Munnelly, que yá tuvo l'añu pasáu per tierres cántabres. Pa pesllar el festival, el domingu, podremos asistir a un conciertu d'Héctor Braga y, darréu, un homenax al músicu tradicional de La Güeria d'Urbiés Tomás Zapico, onde van tar presentes los meyores curdioneros del país interpretando pieces del homenaxeáu. Amás de conciertos el programa de Tolo d'Asturies complétase con muestres d'artesanía y gastronomía, xuegos tradicionales y una feria del discu y llibru n'asturianu. En resume, una cita pa nun perdese, reservái eses feches na axenda pa pasar pela Estación d'Autobuses de Llangréu.
L'Asiciación valenciana d'Amics de la Gaita entama una nueva edición del Festival 2 Mares, onde se funden les músiques tradicionales del Mediterráneo y les del Atlánticu. Dos fines de selmana, esti qu'entama y el que vien, cargaos de conciertos y d'interesantes cursinos d'instrumentos tradicionales. Asina los que ten per Valencia neses feches podrán disfrutar cola música de bandes como Celtúria, The Last Pint, Thirty Silver Coins, O Son do Avrego o los Dolçainers de L'Horta Nord. Na parte didáutica del festival habrá cursos de whistle, gaita y uillean pipe, bouzouki, flauta irlandesa... En poques palabres, un interesante y completu programa fechu con ilusión y gustu poles músiques de raigañu.
Esti sábadu, 29 de mayu, a les 23.00 hores entama la 6ª edición de la Nueche Folk de Soto Rei, que va tener como protagonistes musicales a los Hermanos Tejedor y a los franceses Doolin'. La organización pon chigre y carpa, por si-y da por apaecer a Ñuberu per Soto.
