El Beltaine preséntase énte los medios

Ayeri presentóse énte los medios la tercer edición del festival Beltaine Intercéltico d'Avilés, otru añu La Villa va disfrutar de dos eventos rellacionaos cola música tradicional escasos de presupuestu. Munchos taréis pensando: ¿Por qué nun entamen unu curiosu envede dos faltos de perres? Pues porque tamos n'Avilés y Avilés ye diferente. El casu ye que sigún Xuntanza, el coleutivu qu'entama'l Beltaine, el presupuestu d'esti añu ye la mitá del de la cabera edición, una décima parte del presupuestu del primer Beltaine si nun me fallen les matemátiques.

Pesie al recorte, y visto sobre'l papel, la parte musical parezme abondo más interesante que la del añu pasáu, con un cartelu encabezáu pol vigués Carlos Núñez, que yá tocó nel Intercélticu orixinal hai años, y nel que tamién tan Anabel Santiago y les irlandeses Sharon Shannon y Niamh Ní Charra,a les que la prensa nun especializada nun debe conocer porque nómenles de pasada.

Na parte non musical, la organización rescata'l festival gastronómicu de la primer edición asitiándolu esta vuelta nel Parque'l Muelle y nun pudo algamar los permisos p'acompañar los puestos de xinta y bébora con un mercadín artesanal.

Última hora: La Shannon cayó del cartelu, parez ser que por problemes presupuestarios, los Tejes van ser los encargaos de tapar el gran furacu que dexa na programación la curdionera irlandesa :-(

VII Folkomillas con tastu asturianu

El festival cántabru Folkomillas llega a la so sétima edición, colo que yá podemos falar d'un eventu consolidáu gracies al llabor de l'asociación cultural L'Escanillu. La presente edición tien una importante presencia asturiana, lo que siempre ye d'agradecer, que va materializase nes actuaciones de Corquiéu, P'Amusquis y Duerna que tan acabantes d'algamar el prestixosu concursu de folk Escenariu Prau.

Nós, como nun podía ser d'otra forma, ponemos l'acentu na presencia asturiana pero'l Folkomillas ufierta munches más coses, concursu folk, teatru, mercáu medieval y una montonera d'actividaes culturales que se desendolquen paralelamente al festival folk. Llenar tres díes d'actividaes nun ye una xera que permita improvisaciones y siempre hai qu'agradecer qu'haiga xente que s'enfote en sacar alantre eventos d'esta mena.

La parte musical va tar protagonizada por Muyayos de Raíz, Metal Cambra, qu'actuarán la nueche'l sábadu 18 de xunu xunto con Corquiéu; los cántabros Jorge & David acompañarán a Duerna y P'Amusquis enriba l'escenariu'l domingu 19; la nueche del vienres 17 de xunu cellebrase la final del concursu folk Proyeutu Bígaru, con Keympa, Celtic Maze y Taray comu finalistes.

Más info en www.lescanillu.org

Güei entama'l Xixón 5º40'

Güei entama la segunda edición del Xixón 5º40', festival que sigui la tendencia cafiante d'esti branu que consiste en nun arriesgar res a la hora d'ufrir una programación musical a los aficionaos del país. Nun m'atalantéis mal, el 5º40' presenta un bon cartelu, bandes internacionales incontestables y una bona esbilla de folk llariegu, perfeutu... pero'l casu ye qu'ente los munchos grupos internacionales que podríen parar esti branu n'Asturies, namás paren bandes que yá tan más vistes que'l TBO, perbonos músicos pero camiento que ver siempre los mesmos lleva a l'aburrición.
Güei, polo menos, podremos sintir a Comas, que nun aveza a dexase ver perequí, con ellos Corquiéu, que sigui presentando'l so nuevu discu. Mañana'l protagonismu va ser pa dos bandes asturianes d'estilos mestizos, el folk ellectrónicu de Xera y el folk-rock de Skanda, que tamién presenta discu nuevu. Pa'l vienres ta previstu'l conciertu de Lúnasa, a los que pudimos ver n'Avilés hai un par de selmanes y en Santander (que ta ehí, al llau) el día 2 d'esti mes ¿nun se pudo contratar a naide que nun tuviera n'Avilés hai 15 díes? Y pa'l sábadu Wolfstone, otros qu'esti añu nun vimos perequí pero que tamién conocemos perbién y que tan lloñe de los sos meyores años... Igual sobren perres y falta imaxinación o los qu'entamen eventos d'esta mena namás conocen sota, caballu y rei.

Tejedor y Falanoncaduca nel Mendebala de Sopuerta

El folk de Tejedor y el ska-fusión de Falanoncaduca van tar presentes nuna nueva edición del festival vascu Mendebala Jaialdia. Los prósimos díes 2 y 3 de xunetu va tener llugar na llocalidá de Sopuerta (Bizkaia) esti eventu qu’axunta una bona esbilla del folk y rock de raigañu de la Cordalera Cantábrica. Con una entrada y zona d’acampada llibre, les bandes asturianes va actuar el sábadu 3 de xuneto xunto colos grupos vascos Xabi Aburruzaga y Sokaide.

Dende va dellos años la llocalidá vizcaína de Sopuerta acueye anualmente’l festival Mendebala Jaialdia, un eventu que tien por oxetivu puxar pola música en vivo de bandes vasques, cántabres, asturianes y gallegues que desendolquen un soníu marcáu pola música de raigañu d’eses tierres. Artistes asturianos como Hevia y Skama la Rede yá participaron nel festival y nesta nueva edición tóca-yos el turnu a Tejedor y Falanoncaduca.

El 3 de xunetu ye’l día nel qu’estes dos formaciones asturianes van llevar el so soníu a Sopuerta. Mientres que Tejedor va poner enriba les tables el so cuidáu folk, Falanoncaduca van encargase de pesllar la nueche a ritmu de mecigayu son o lo que ye lo mesmo: una fusión de soníos como’l ska, rock, folk, surf, reggae y metal.

El Mendebala Jaialdia caracterízase tamién por celebrase nun enclave natural perguapo na llende de Bizkaia y Cantabria. Ehí ye onde s’asitia una zona d’acampada llibre pa tolos asistentes a esti festival. L'eventu arranca’l vienres día 2 coles actuaciones de los vascos Adarrots, Bizardunak y los gallegos Luar Na Lubre.

Guerres Céltiques d'Avilés

L'otru día comenté equí que l'Asociación Esbardu, organizadores del Festival Intercélticu d'Avilés, y l'ayuntamientu d'Avilés, organizador del Festival Beltaine, entamaren conversaciones pa salir de l'abegosa situación na que se metieren el branu pasáu. Pasaos dellos díes pueo decivos que les coses siguen igual que taben, por muncha crisis qu'haiga, n'Avilés van volver cellebrase dos festivales de música celta.
L'añu pasáu, l'Ayuntamientu d'Avilés punxo en marcha'l Beltaine col envís de dar continuidá a una cellebración yá tradicional nos branos de la Villa, la razón esgrimía pa llanzar esa opa hostil sobre l'Intercélticu yeren la supuesta imposibilidá llegal d'Esbardu d'organizalu al deber unes cantidaes a la SGAE a cuenta de los drechos d'autor. El casu ye que foi quien a entamar una nueva edición del Intercélticu, con permisu de la SGAE y gracies a la participación gratuita de músicos y grupos de dellos países que qixeron char un gabitu a un festival que-ys abrió les puertes d'Asturies n'otres ocasiones. Mientres el Beltaine gastaba 360000€ nun festival que mos ufrió una riestra de conciertos memorables y un desastre organizativu nel beltaine gastronómicu, onde empresarios hosteleros y asociaciones perdieron tiempu y dinero.
Esti añu, cola deuda de la SGAE saldada y yá ensin trabes xudiciales, lo normal sedría axuntar enfotos na marca con 14 años d'historia y cola distinción de fiesta d'interés turísticu rexonal, aportando los aciertos qu'hubiere nel Beltaine del añu pasáu, trabayar en facer un festival grande que ponga la Villa nel mapa y seya un motor que dinamice la industria turística d'Avilés. Eso sedría lo normal, pero habiendo xestores culturales pel mediu la normalidá faise difuso, asina que, vamos tener dos festivales de siguío, ún acaba'l 23 y l'otru entama'l 24, que van duplicar el gastu y que van facer durar 15 díes lo que debíen ser 7. Yo, la verdá, nun sé si tan les coses pa dar esta imaxe, invertir en fiestes y música tradicional ta bien pero facer lo mesmo dos vegaes y gastar el doble pola cabezonería d'un par de conceyales ye daqué qu'acabará pasando factura y que pue tener víctimes collaterales.

Tolo d'Asturies 2010 Cartelu

Esti ye'l cartelu oficial del festival Tolo d'Asturies 2010, y equí embaxo'l trípticu d'información asoleyáu pola organización.

VI Festival Folkomillas

La organización del Festival FolKomillas yá me fixo llegar la programación y el cartelu de la que va ser la sesta edición d'esti festival cántabru, a dos meses entá de la cellebración del eventu, otros festivales de más pretensiones podíen tomar exemplu del ciñu y profesionalidá con que trabayen los organizaores del FolKomillas, debe ser ún de los pocos festivales folk del estáu que tien peslláu'l cartelu con dos meses d'antelación.
La programación ufierta munches más actividaes más alló del folk (mercáu medieval, amueses d'artesanía...) polo que vos convido a char una güeyada pa conocela dafechu na web de la organización http://www.lescanillu.org
Na estaya musical los protagonistes van ser les bandes que vienen darréu: el vienres 18 de xunu, Blanca Altable & Chuci Alcuadrado y Bruma Folk; el sábadu día 19 de xunu, los daneses Kasir, Lurte y la gran banda cántabra Cahórnega; el festival fina'l domingu cola actuación El Tinglau y los Hermanos Cossío.

La Folixa del Tardíu

La Folixa del Tardíu, ta enfotada en facer honor al so nome y sigui ensin confirmar las bandes participantes na nueva edición de Llanes Al Cubo. A 15 díes del eventu la web ta cerrada y namás conocemos dellos datos del festival que pieslla la temporada n'Asturies. Lo poco que sé ye lo que vien darréu:
-Va cellebrase'l 31 d'ochobre y l'1 de payares.
-Va facese un homenax al gaiteru tradicional Ignacio Noriega, nel que va participar Hevia.
-Bandes confirmaes pa'l festival: Dixebra, que va presentar los temes del so nuevu discu Amor Incendiariu; el grupu noruegu-finés Frigg, del que vos dexo un videu embaxo'l post; Toumani Diabaté, cantautor de Mali que va actuar el día 1.
-Bandes ensin confirmar: Oysterband, na so web nun menciona Llanes y tien les feches bastante cargaes de conciertos pa presentar el so nuevu discu, parezme que va ser que non.
Yá sé que ye ranciar pero ¿enxamás vamos ser quién a entamar un festival en condiciones nesti país? Nun pido muncho, con que la web te fecha enantes del festival y les bandes ten confirmaes con un mes d'antelación yá me conformo. Ye razonable ¿non?

Sauga: el meyor festival del añu

Títulu polémicu, yá lo sé, suxetivu enforma pero, na mio humilde opinión el de Colindres ye por nómina de participantes y tamién por trayeutoria, que yá van 15 ediciones, ye'l meyor festival de música celta de los munchos que se cellebren nes comunidaes del cantábricu a lo llargu'l branu. El que diga esto yo, un asturianu, espero que valga pa que escaezamos toos un poco esi localismu fatu, esi chovinismo de caleya al que parez que tamos abonaos d'un tiempu a esta parte.
Voi dexar les disquisiciones filosófiques a un llau pa comentavos lo que vamos poder ver y escuchar nesta XV edición del Sauga Folk:

• El xueves 20 d'agostu va entamar la folixa con una actuación del grupu Mailla nel chigre irlandés Lloyd Nolan.
• El vienres 21, Bagad Landerne de Bretaña, los locales Gatu Malu, los nuesos paisanos Tejedor, Michael McGoldrick Band y los gallegos Coanhadeira.
• El sábadu 22 d'agostu, Liam O'Flynn & The Piper's Call Band, los quebecoises Le Vent du Nord y los cántabros Cambera'l Cierzu.
• El domingu 23 fina'l festival con un conciertu de Rumantela Folk nel Café Pereda d'Ampuero.

Podéis alcontrar más info na web del festival Sauga Folk.

I Xornaes Céltiques del Oriente d'Asturies

Ñaz un nuevu festival célticu nel Oriente'l país pa pesllar el mes d'agostu. Nesti nuevu eventu cuatro conceyos de la fastera oriental (Llanes, Ribesella, Cangues d'Onís y Parres) andechen pa sacar alantre esti proyeutu venceyáu cola música tradicional.
Los grupos que van protagonizar el festival son la Banda de Gaites Ciudá de Cangues d'Onís, Esbardu d'Avilés, el grupu de baille gallegu Inquedanzas y la Bagad Gwemgamp de Bretaña. Les actuaciones van desendolcase consecutivamente nos cuatro conceyos: el 27 d'agostu a les 20.30 na Plaza Santa Ana de Llanes; el vienres 28 d'agostu, na Plaza de Llames de Parres, a la mesma hora; el sábadu 29 toca-y a Ribesella disfrutar del arte d'estes bandes, que van actuar esta vuelta a les 20.00 na Plaza Camila Beceña; y el festival fina'l 30 d'agostu, domingu, con una sesión doble a les 12.15 y a les 13.30 nes places del Ayuntamientu y Nueva de Cangues d'Onís.

XIII Festival Intercéltico d'Occidente

Esta mesma selmana entama a celebrase'l Festival Intercéltico d'Occidente, qu'aveza a inundar Tapia colos sones de la música celta. Esti añu'l festival medra en díes, doblando la programación d'anteriores ediciones, agora van ser 10 los díes en que la villa tapiega seya la capital celta d'Asturies.

Nun dexa de ser un fechu bien llamativu que, pasando de 5 a 10 díes de festival, la programación de conciertos de folk nun medre al tenor del restu d'actividaes. El casu ye que los conciertos de folk van ser menos, abondo menos que notros años, sedrán coses de la crisis. Podéis alcontrar la programación completa'l festival na so web, los conciertos de folk sedrán los que vienen darréu:

Xueves 20 d'agostu: El Koku La Manzana
Vienres 21 d'agostu: Le Vent Du Nord y Maneg Tort
Domingo 23 d'agostu: Tuenda y Michael McGoldrick Trio

Dellos videos de Lorient

Pa los que nun pudisteis dir a Lorient esti añu, como un servidor, dexo una seleición de videos atropada n'internet de la presente edición del Interceltique de Lorient. Yá sé que nun ye lo mesmo que tar ellí pero ¡qué vamos facer!

Yá ta confirmáu'l cartelu del Festival Folk de Plasencia

Güei preséntovos una propuesta un poco allonxada de la música celta qu'aveza portagonizar los posts d'esti bloque. Yá ta confirmada la programación de la décimo cuarta edición del Festival Internacional Folk Plasencia, na que vais alcontrar vieyos conocíos como los Red Hot Chilli Pipers o Carlos Núñez pero tamién otres músiques de raigañu d'otres partes del mundiu, lo que vais alcontrar en Plasencia ye lo que vien darréu:

19 Agostu 2009

20,00h Teatru Alkázar
Final I Certame "Amigos del Folk Plasencia"
THE URBAN FOLK QUARTET (Reinu Xuníu)
KÉLTIBER (Valladolid)
LA CONJURA (Sevilla)

20 Agosto 2009

22,00h Escenariu Torre Lucía
NINO SÁNCHEZ (Salamanca)
CARLOS NÚÑEZ (Galicia)
FADOMORSE (Portugal)

21 Agosto 2009

17,00h.Taller de percusión tradicional ibérica. Las Claras.
ELISEO PARRA
19,30h.Taller de zanfoña. Las Claras.
PATRICK BOUFFARD (Francia)
22,00h Escenariu Torre Lucía
AULAGA FOLK (Extremadura)
EVENING STAR (Europa)
RED HOT CHILLI PIPERS (Escocia)

22 Agosto 2009

11,00h Taller de percusión tradicional ibérica. Las Claras.
ELISEO PARRA
13,00h y 19,00h. Pasucais
PANDA DE VERDIALES ARROYO CONCA (Comares, Málaga)
13,30 Conciertu pa neños. Las Claras.
ELISEO PARRA & XAVI LOZANO
17,00h Taller de percusión tradicional ibérica. Las Claras.
ELISEO PARRA
19,30h Instrumentos raros. Las Claras.
XAVI LOZANO
22,00h Escenariu Torre Lucía
VALLARNA (Castilla/Cantabria)
TERRAFOLK (Eslovenia)
DISSIDENTEN (Alemania)

L'ayuntamientu de Plasencia pon zona d'acampada de baldre, con servicios y duches nel recintu d'El Berrocal, que ta 10 minutos del llugar onde se celebren los conciertos.

Tejedor protagonista na Carballeira de Zas

Los Hermanos Tejedor van ser proganistes, el prosimu 1 d'agostu, d'un de los festivales más prestosos de Galicia, el de la Carballeira de Zas. Xunto colos d'Avilés van tar los escoceses Capercaillie, una banda que yá nun aveza a dar conciertos por mor de la apretada axenda de toos y cada ún de los sos miembros, y los gallegos Mutenrohi y O Sonoro Maxín, una banda que prestaríame abondo ver per Asturies.
El de la Carballeira llega esti añu a lo so XXVIª edición, tou un récord nesta mena d'eventos musicales, y tien una perbona y orixinal organización, ufriendo daqué más qu'un escenariu y un prau al público asistente. L'asociación Castromeda ye la qu'entama la Festa y, amás de tener el bon aquel d'invitar de xemes en cuando a grupos asturianos (daqué nun mui común nos festivales gallegos), cobra una entrada de 5€ por acudir a la Carballeira, un preciu que cuido resulta simbólico porque cola entrada l'aficionáu recibe un CD promocional del festival con dos temes de cada grupu invitáu. La tema de cobrar polos conciertos de folk ye abegosu, tamos avezaos a que mos lo den too gratis, pero esti tipu d'iniciatives tienen de mirar por xenerar recursos propios y por nun depender al 100% del dinero les sovenciones, otru datu interesante ye que pagar una entrada establez un filtru que va dexar fuera a toa esa xente que pulula pelos festivales de baldre faciendo cualisquier otra cosa que disfrutar de la música. Igual yera bono que los organizadores de festivales asturianos se dieren una vuelta pela Carballeira y tomaren delles notes, nun digo que lu tengan que facer igual, pero hai detalles como'l de la entrada, el cuidáu nel diseñu'l cartelu (que podéis ver enriba)... qu'hai que tener en cuenta.
Podéis alcontrar tola información del festival na so páxina web. Y como'l meyor escribanu echa un borrón dicir que tracamundiaron el nome de Mutenrohi por Muthenroi na cartelería y na web.

Mendebala con tastu asturianu

El festival folk Mendebala de Sopuerta (Bizkaia) va tar protagonizáu en gran parte pola música asturiana. El de Sopuerta ye un festival especializáu na música folk y averada a la tradición fecha a orielles del Cantábricu, sones de Galicia, Asturies, Cantabria y Euskal Herria tan presentes en toles ediciones. Na d'esti añu, la música asturiana va tar doblemente representada pol grupu folk Llan de Cubel y pola banda d'ska/punk/folk Skama La Rede, entrambes van subir al escenariu'l 4 de xunetu, acompañando a la cántabra Aura Kuby y a los ganadores de la cuarta edición del concursu de maquetes entamáu por Mendebala Diskak, los vascos Adarrots.
Un día enantes, el 3 de xunetu, la música van ponela los vascos Korrontzi, la gaitera gallega Cristina Pato y la banda d'El Bierzo Aira da Pedra.
Un prestosu plan pa la fin de selmana qu'entra, si nun sabéis ónde dir en Sopuerta va haber bona música.

III Festival Celta Reinu de Llión

Más propuestes folkis alrodiu de la nueche de San Xuan, si nel casu de Penagos ye pa la fin de selmana siguiente nesti de Lleón ye pa les vísperes de la máxica nueche. Festival que cellebra la so tercer edición con una programación bien interesante, anque prollongar el festival 5 díes con un grupu per nueche parezme estirar la goma un poco muncho, igual yera más efeutivu concentralu nuna fin de selmana con dos bandes per nueche... Ye una opinión personal y cada ún gasta los euros como quier.
El festival abrelu'l miércoles 17 de xunu, mañana mesmo, Awen Magic Land, la banda de Carlos Soto multinstrumentista conocíu pel so pasu pelos Celtas Cortos, embarcáu va tiempu nesti proyeutu personal a metá de camín ente Valladolid y Bretaña. A min nun me dicen gran cosa y barrunto qu'un conciertu d'esta xente tien de ser bien aburríu...
El xueves 18 toquen los locales Gandalf, banda de folk-rock creada nel añu 2000 n'Astorga que tien asoleyáu un discu tituláu Con_Fusión.
El vienres toca-ys pasar pel escenariu de la Plaza Don Gutierre a los nuesos collacios de Los Gatos de Fornu, que siguin presentando'l so estupendu discu Na Cai. El primer platu fuerte del Festival.
Beoga y su animáu direutu sedrán los reponsables d'animar Lleón la nueche del sábadu.
El domingu, pa rematar con un broche d'oru, Fred Morrison, qu'escapa per un día de la so estensa xira asturiana pa tocar na comunidá vecina.

VI Festival San Juan d'El Arenal de Penagos

Entamen a publicitase los festivales folk rellacionaos cola nueche de San Xuan y, dende Cantabria, el collaciu Pablo de la Torriente de Radio Rabel fainos llegar el cartelu del VI Festival San Juan d'El Arenal de Penagos.
Esti festival celebrase la fin de selmana siguiente a la máxica nueche, en concretu'l día 27 de xunu y dende les 8 de la tarde pasucais con Atalaya Soria de Castilla y Lleón; Cote, Almudena López, Saray García y Alfonso Ahumada al rabel; Aura Kuby; los nuesos paisanos de La Bandina La Curuxa, que tan arrasando nel país vecín; y pa finar con Vallarna, ún de los más prestosos grupos de la última fornada salida en Cantabria, anque estos anden a mitá de camín ente Valladolid y Cantabria.
Un guapu plan d'escapada de fin de selmana.

IV Festival Folk Cantabria Infinita

Yá tan los vecinos del oriente poniéndonos los dientes llargos y enriba de facer un festival d'acoyonar faenlo en San Vicente, al llau de casa, cagüenrós!!!
Bromes aparte, los díes 10, 11 y 12 de xunetu, na guapa villa cántabra de San Vicente de La Barquera va celebrase la IV edición d'un festival que convirtióse de sutrucu nuno de los más importantes del estáu, tamos falando del Cantabria Infinita. Los más espabilaos yá tais al tanto, la conseyería de turismu cántabra apuesta pol folk como reclamu p'atraer visitantes a la comunidá vecina. Esti añu, col cuentu la crisis, de xuru qu'hubo recortes n'otros festivales cántabros pero, nel de San Vicente, que ye'l buque insignia vuelven char otru órdagu.
Asina, el día 10 actuarán Aura Kuby, Rumantela Folk, A Doble Camba, Milladoiro y The Balkan Beat Box. Al otru día, los protagonistes van ser Chema Puente, Mailla, Vallarna, La Bottine Souriante, Celtas Cortos y Red Hot Chilli Pipers. Podemos pone-y tolos peros que queramos pero nos tan comiendo la tostada no que a festivales se refier, nós andamos h.odiendo lo poco digno qu'había n'Avilés y asina mos va...
Falando d'Avilés, a poco más d'un mes de la inauguración del festival anteriormente conocíu como festival Intercélticu d'Avilés, ni conocemos cartelu, ni organizadores, ni programa, ni web... res de res. El xerente de festexos dio dos nomes n'abril y ehí finó too. Un exemplu de lo que ye xestionar un festival declaráu d'interés turístico regional, a ver qu'aficionáu va reservar hotel n'Avilés cuando nun sabe qué va poder escuchar, ni dónde, ni cuándo... Rubenín tas cagándola.
En defensa del xerente de festexos d'Avilés hai que dicir que la web cántabra nun ta actualizada, pero polo menos tienen web...

http://www.festivalfolkcantabriainfinita.es/

Nueva edición del Festival 2 Mares

L'Asiciación valenciana d'Amics de la Gaita entama una nueva edición del Festival 2 Mares, onde se funden les músiques tradicionales del Mediterráneo y les del Atlánticu. Dos fines de selmana, esti qu'entama y el que vien, cargaos de conciertos y d'interesantes cursinos d'instrumentos tradicionales. Asina los que ten per Valencia neses feches podrán disfrutar cola música de bandes como Celtúria, The Last Pint, Thirty Silver Coins, O Son do Avrego o los Dolçainers de L'Horta Nord.
Na parte didáutica del festival habrá cursos de whistle, gaita y uillean pipe, bouzouki, flauta irlandesa... En poques palabres, un interesante y completu programa fechu con ilusión y gustu poles músiques de raigañu.

La Folixa Na Primavera tira de clásicos

El festival de Mieres, qu'aveza dar entamu a la temporada folki n'Asturies, xuega seguro nesta edición na que nos ufierta la música d'unes bandes que lleven más de 20 años dando caña en bien d'escenarios internacionales.
El vienres día 3 d'abril abren los asturianos Llan de Cubel, acabantes de llegar de Glasgow como quien diz y parez ser que yá enfrascaos nel trabayu del so prósimu y naguáu discu,;van tar acompañaos esa nueche per The Battlefield Band, hestoria viva del folk escocés que s'estrena nel nuesu país (anque va poco actuaron na vecina Cantabria) y que vien acompañada pola fama de tener un direutu brutal -ganaron el premiu al meyor direutu nel añu 2003 nos premios escoceses de música tradicional-.
Pa la nueche del sábadu, Dixebra, nun fae falta preséntalos; como nun fae falta presentar a Altan, ún de los grupos irlandeses con mayor prestixu internacional y con una decena de discos asoleyaos.
Los vieyos folkis nunca muerren, y la Folixa esti añu apuesta por ello. Equí vos dexo dellos videos p'abrir boca.