Anuncies curties

Lo primero deyeavos un bon añu nuevu. Lo segundo reseñar delles noticies: La primera la presentación del discu Faciendo l'Indio, primer trabayu discográficu de los Ciquitrinos, grupu inclasificlable pol que nun mos vamos esmolecer porque talantamos que yá ye conocíu abondo. Igual pa la xente de fuera d'Asturies son más desconocíos pero siendo esti un blogue n'asturianu paezmeque nun ye necesaria una presentación formal d'estos gamberrros que representaron a Asturies en Lorient na edición pasada.
Los Ciquis presentaron discu nel RIDEA esti pasáu vienres, a les 12 del mediudía, pa los non asturianos dicir que'l RIDEA ye un sitiu de la ostia y que nun aveza abrir les sos puertes pa presentaciones d'esta mena. Anque raxen de los borbones nes sos cantares son xente con posibles y contautos onde los hai que tener.
El mesmu día na mesma ciudá, 8 hores más tarde, presentó la Bandina el so tercer trabayu discográficu, entituláu 13. Dempués de cuasi 6 meses nel mercáu, esti gran trabayu recibe una presentación oficial. Nun vamos bilordiar nin char la llingua a pacer pero presentar un discu mediu añu dempués de la so puesta a la venta ye daqué que nos ruempe los esquemes y que mos vuelve amosar la precariedá na que se mueve la música folk asturiana.
Dos grandes trabayos presentaos, unu a destiempu.

13. Nuevu discu de La Bandina

Yá ta na cai, y yá lo merqué, el nuevu trabayu discográficu de La Bandina asoleyáu embaxo'l títulu 13, lo qu'amuesa qu'estos rapazos nun son nada supersticiosos. Alcontramos nesti discu una continuación estética del so anterior De Romandela y un afondamientu nel so apueste poles músiques de baille y pola conexón de les músiques asturianes y bretones. Asina, bona parte de los músicos qu'andechen con La Bandina nesti trabayu son d'aquel país y el propiu discu foi grabáu parte n'Asturies y parte en Bretaña. La riestra de collacios bretones que collaboren ye bien llarga xente de les bagadou Kevren Arlé y Roseñd Mor, el gran Alain Pennec y Frédéric Bougouin-Krame, d'Asturies participen Alicia Álvarez y Xosé Ambás a les voces y Sergio Rodríguez al baxu. De les collaboraciones resultáronme especialmente prestose la d'Alicia en Valse coxu y la de Frédéric Bougouin-Krame al arpa celta en Pel Puirtu.
Una diferencia de 13 ye la mayor presencia y protagonismu de la seición de vientu del grupu, lo que-y da una sonoridá bien dixebrada de lo que ye'l folk asturianu que tamos avezaos a sentir. La variedá siempre vien bien, nun van ser too vigulinos y bouzukis.
En resume, un discu bien prestosu.