Esbilla de nueves bandes que pasaron per Lorient

• Skeeal. Banda de la Isla de Man, xunta dos flautes traveseres y una guitarra con cantares nos tres dialeutos gaélicos (irlandés, escocés y manés). Lleven xuntos 5 años y tan acabantes d'asoleyar el so segundo CD Slipway, que presentaron hai delles selmanes en Lorient.
  

• Beaton Sisters. Estes dos hermanes roxes son el nuevu productu de la bayurosa escuela de vigulín de Cape Breton. Tienen un CD publicáu col títulu de Taste of Gaelic.
  

• Saltfishforty. Brian Cromarty y Douglas Montgomery formen esti duu procedente de les Islles Orcades onde'l vigulín vuelve ser el protagonista de la so música. Yá tienen asoleyaos dos discos, Goose Music y Orkney Sister, y percorríos Europa, USA y Canadá en poco más de 5 años d'esistencia.
  

• Merzhin Moon Orchestra. Evolución o reinvención del grupu Merzhin que pasó per Avilés nel 2008. Fusión de rock, música bretona, world music y rock latino, col curdión diatónicu como instrumentu melódicu principal.
  

Dellos videos de Lorient

Pa los que nun pudisteis dir a Lorient esti añu, como un servidor, dexo una seleición de videos atropada n'internet de la presente edición del Interceltique de Lorient. Yá sé que nun ye lo mesmo que tar ellí pero ¡qué vamos facer!

¿Interceltique d'Avilés?

Siguimos col culebrón del branu... Nun tamos aldericando de música folk, sinon del qu'hasta esti intre ye'l mayor festival asturianu de música tradicional y folk, poro, parezme que ye bon sitiu pa bilordiar sobre ello.
Sigui la engarradiella na prensa ente'l conceyal de Cultura d'Avilés, Román Antonio Álvarez, y la conceyala popular Carmen Vega. El debate etnomusicolóxicu ye de gran altor científicu, agora centráu en si tocar un tangu con gaita ye música celta o non. Pa los que cuiden qu'esto ye un homenax a Valle-Inclán y non un debate de verdá, remitolos a La Nueva España (na so edición avilesina) del día d'ayeri. Nes manes d'esa xente ta'l futuru del Intercélticu d'Avilés (y d'otres munches coses qu'igual son más importantes).
El casu ye que D. Román, al que nun se-y conoz denguna afición poles gaites nin pola música tradicional, camudó les cais d'Avilés poles de Lorient y pela villa bretona anda acompañáu pol so sociu nel equipu de gobiernu avilesín D. Fernando Diaz Rañón, conceyal d'IU y gaiteru aficionáu. Igual fueron entruga-y a Lisardo Lombardía si un tango tocáu con gaita ye música celta o non ¿quién sabe?
El conceyal d'IU yá propunxo hai unos díes el tratar de firmar un conveniu col Festival Interceltique de Lorient pa qu'entamara o andechara col ayuntamientu d'Avilés na organización del prósimu Intercélticu. L'atopalu en Bretaña, al poco de facer eses declaraciones, y acompañáu pol conceyal de Cultura ye bien llamativu ¿tan documentándose nel mayor festival celta del mundu?¿Tan viendo que posibilidaes hai de firmar el conveniu propuestu pol portavoz d'IU?¿Tan faciendo turismu? Albidro que nun tardaremos n'alcontrar respueta a estes entrugues.
Finamos equí un nuevu capítulu d'esti culebrón braniegu.
PD: A ver si hai suerte y se dan cuenta que la música celta pue ser un motor pa la promoción turística d'Avilés y d'Asturies en xeneral.