Felpeyu cumple 20 años y estrena páxina web

Depués de la lloriada d'ayeri tornamos a l'actividá normal del blogue: a falar de música, de músicos. Y qué meyor qu'entamar esti 2011 falando del aniversariu de Felpeyu, ún de los grandes nomes del folk asturianu que cumple 20 años enriba los escenarios y que, de xuru, tien preparáu un balagáu de sorpreses pa festexar esta prestosa efeméride.
La primer sorpresa d'esta conmemoración ye'l remocicamientu de la so imaxe na rede, asina, na direición www.felpeyu.com yá podéis alcontrar el nuevu diseñu de la páxina web oficial de la banda (nesti intre namás ta disponible n'asturianu, pero bien ceo tamién podrá consultase en castellán y inglés). Perinteresante resulta'l trabayu de recopilación de semeyes que ta faciendo la banda, pa resumir los sos 20 años d'hestoria, y pa la que pidi la collaboración de tolos aficionaos que-ys puean apurrir semeyes d'actuaciones y conciertos.
Amás del remocique de la web, Felpeyu, ta tamién acabante d'estrenar blogue nel qu'informarán de les noticies más inmediates de la banda. Entá nun hai muncha información, pero habrála nel futuru. Tamién la so presencia nes redes sociales va medrar cola apertura d'una páxina oficial en Facebook, amás de caltener el so MySpace qu'hasta agora yera la canal de comunicación principal de Felpeyu n'internet.

Intentaremos caltenevos informaos de toles novedaes referíes col 20º aniversariu de Felpeyu de les que vayamos teniendo noticia.

Mein Kampf 2011

Tres del parón nadaliegu tornamos tresformaos polos nuesos democráticos representantes en militantes d'estrema derecha ¡Qué-ys vamos facer! Resulta qu'agora, pa la FSA-PSOE, el sentise arguyosu de ser asturianu ye sinónimu de ser ultraderechista, por ende, esti blogue, enfotáu n'esparder la música de raigón asturiana y el trabayu de los músicos asturianos, debe ser un mediu de la propaganda nazi...
Nun dexen de ser unes declaraciones absurdes feches por un bobu (el que diz bobaes ye eso, un bobu), el problema ye qu'esi bobu ta rodeáu de munchos más bobos y bobes como él y qu'esa reciella de borregos y borregues tienen secuestráu esti país dende hai 30 años. Décades de desanicíu'l texíu industrial d'Asturies, llustros d'esterminiu cultural, años de sindicalismu vertical y mediocridá intelectual antroxada de socialdemocracia... Igual hai que sentise arguyosu d'eso pa ser d'izquierdes, nós, illetraos facistes nun somos quién a atalantalo.
Nun quiero finar esta entrada del blogue ensin entrugar que, si somos un país d'ultraderechistes y nazis (porque cuasi toos -toos menos Lastra- tamos más o menos arguyosos de ser asturianos) y el partíu políticu que gana toles elleiciones n'Asturies ye'l PSOE... Entós, ellos, tamién son ultraderechistes y nazis ¿non?

Raigaños Celtes

Asina se llama'l proyeutu educativu multidisciplinar, Celtic Roots, que ñaz de la collaboración ente tres colexos de primaria de Galiza, Eire y Reinu Xuníu alredor de los raigaños celtes que comparten. Esa collaboración plasmase agora nun CD y DVD que recueye cantares tradicionales de los países que participen nel proyeutu interpretaos polos neños y neñes de los colexos Humberto Juanes de Nigrán (Galiza), St Croonan's School de Bray (Eire) y St John's Catholic Primary School de Manchester (Reinu Xuníu). Aidando y asesorando na parte musical del proyeutu alcontramos a tres grandes del folk célticu internacional Xosé Manuel Budiño, Dónal Lunny y Michael McGoldrick, amás d'una llarga riestra de músicos tradicionales de los tres países que collaboren na ellaboración del discu (Rodrigo Romaní, Ed Boyd, Pancho Álvarez, Graham Henderson, Emma Sweeney, Antón Seoane, Angela Durkin...) .
El proyeutu materializáu en un CD-DVD sal a la venta'l prósimu 11 d'avientu asoleyáu por Pai Música.

DRD llega a Xixón con convidaos

DRD aporten a Xixón esti xueves, de la man del ciclu de conciertos Músicas del Siglo XX entamáu por Cajastur. La cita, yá vos digo, ye nel pabellón Luis Adaro na Feria Muestres pero, como la cita ye especial, lleguen con un convidáu perimportante llegáu de la Bretaña: el flauteru Sylvain Barou.
El bretón vuelve a Asturies depués de la so presencia nel mes d'agostu nel Xixón 5.40º con Comas, esta vegada p'andechar colos sos collacios de DRD. Prestosu plan de xueves, si la ñeve mos dexa salir de casa...

Les VPipes fáense n'Asturies

Güei, el periódicu La Nueva España, asoleya un artículu sobre la participación de la empresa xixonesa Prodintec nel desendolcu de la gaita ellectrónica Vpipes. Pa los que nun ten familiarizaos con esti instrumentu dicir que, la VPipe, ye un proyeutu nel que se vien trabayando dende va tiempu y que ta teniendo un importante siguimientu nel mundiu de la uilleann pipe, lo que yá ye una novedá porque ési ye un ámbitu abondo refractariu a tolo que se salga de lo tradicional. Les VPipes tienen algamáu esi interés gracies a la calidá del so soníu y a la versatilidá del instrumentu ellectrónicu a la hora d'emular la espresividá de la uilleann (popping, portamento, vibratto) con un realismu nun algamáu n'instrumentos ellectrónicos precedentes.
La empresa creadora de la VPipe, desendolcada d'entamu como clon cibernéticu de la gaita irlandesa, ta preparando versiones ellectróniques d'otres gaites (gallega, asturiana, escocesa) y de whistle. Vistes les prestaciones del so primer proyeutu (yá disponible por 1290€), los nuevos nun tendríen que ser mui abegosos al ser instrumentos muncho más cenciellos que la uilleann.

Conciertu n'Avilés del tríu bretón Latira

El vienres día 12 de payares, a eso de les 22:30 va cellebrase otru conciertu n'El Cafetón (Cai El Sol, Avilés). Nesta ocasión los protagonistes van ser un grupu bretón nomáu Latira, embaxo d'esi nome axúntense trés músicos mozos de la Bretaña con muncha esperiencia al llombu y que, tres conocese en Nueva York, formaron esta bandina qu'aporta agora a Asturies. Asina, anque los nomes nun vos digan muncho d'entrada, Morgane, la curdionera, tien ganao'l premiu de Meyor Curdionera del Festival de Lorient; François, el percusionista, tien ganaodos campeonatos de Bretaña cola Bagad de Auray (Kevrenn Arle); y Nicolas, foi Penn Sonneur de la Bagad Lann Bihoué. Mozos sí, pero con un bon curriculum.
A priori, un plan interesante pa esti vienres de seronda. Tais convidaos.

Viaxe musical con Luis Delgado

Mañana vienres el músicu madrileñu Luis Delgado va dar un alderique-conciertu nel Muséu Alfercam d'Avilés. La tema propuestu pa esta cita ye la de facer un viaxe al traviés de la intrahestoria d'una esbilla d'instrumentos tradicionales de dixebraes partes del mundiu.

Músicu d'impresionate curriculum, miembru de bandes cimeres del folk del estáu español como La Musgaña, Cálamus, Finis Africae o Babia y con más de vente discos asoleyaos como solista. Luis Delgado caltién amás una de les meyores coleiciones europees d'instrumentos tradicionales con más de 1200 referencies, 600 de les cuales tan espuestes nel so muséu d'Uruñea (Valladolid). N'Avilés axunta entrambes actividaes, músicu y coleicionista, pa interpretar música con dellos de los instrumentos de la so coleición y pa falanos de les lleendes y tradiciones venceyaes con cada ún d'esos instrumentos, un plantegamientu orixinal pa acercanos a otres cultures y a otres músiques. La cita sedrá mañana vienres, 5 de payares, a les 20.00 hores nel Muséu Alfercam d'Avilés.