Finalistes del Concursu Cuartu Los Val.les

L'asociación cultural El Arbedeiro yá tien selecionaos a los seis grupos finalistes del concursu folk Cuartu Los Val.les, bandes qu'actuarán en Navelgas (Tinéu) los díes 29 y 30 de xunetu. Nesta edición presentáronse 90 formaciones musicales al concursu y foron selecionaes éstes que vienen darréu: John Bolduan, Tarna y Ojos Negros serán los grupos de pequeñu formatu finalistes; Caliu, Lokolé y Yone Rodríguez son los finalistes de gran formatu.

Bandes y músicos de toles partes del estáu, del Congo y Estaos Xuníos van tar presentes na competición musical d'esti añu, quedando nes manes y nel criteriu d'un xuráu formáu por prensa especializada decidir quien son les dos bandes ganadores d'un de los más prestixosos concursos de música folk de los que se cellebren nel estáu español.

El Beltaine preséntase énte los medios

Ayeri presentóse énte los medios la tercer edición del festival Beltaine Intercéltico d'Avilés, otru añu La Villa va disfrutar de dos eventos rellacionaos cola música tradicional escasos de presupuestu. Munchos taréis pensando: ¿Por qué nun entamen unu curiosu envede dos faltos de perres? Pues porque tamos n'Avilés y Avilés ye diferente. El casu ye que sigún Xuntanza, el coleutivu qu'entama'l Beltaine, el presupuestu d'esti añu ye la mitá del de la cabera edición, una décima parte del presupuestu del primer Beltaine si nun me fallen les matemátiques.

Pesie al recorte, y visto sobre'l papel, la parte musical parezme abondo más interesante que la del añu pasáu, con un cartelu encabezáu pol vigués Carlos Núñez, que yá tocó nel Intercélticu orixinal hai años, y nel que tamién tan Anabel Santiago y les irlandeses Sharon Shannon y Niamh Ní Charra,a les que la prensa nun especializada nun debe conocer porque nómenles de pasada.

Na parte non musical, la organización rescata'l festival gastronómicu de la primer edición asitiándolu esta vuelta nel Parque'l Muelle y nun pudo algamar los permisos p'acompañar los puestos de xinta y bébora con un mercadín artesanal.

Última hora: La Shannon cayó del cartelu, parez ser que por problemes presupuestarios, los Tejes van ser los encargaos de tapar el gran furacu que dexa na programación la curdionera irlandesa :-(

L’Ayuntamientu de Llangréu y l’Agrupación d’Etnografía y Folclor Reija organicen esta quinta muestra cultural Tolo d’Asturies que va tener llugar los díes 7 y 8 de mayu. Tolo d’Asturies 2011 presenta una montonera actos que, dende primer hora de la mañana’l sábadu, van poner folixa y cultura tradicional nel recintu ferial de la estación central d’autobuses de Llangréu. Demientres los dos díes va desenvolvese’l yá clásicu mercáu tradicional d’artesanía y gastronomía y los talleres pa neñes y neños (animación, xuegos y deportes tradicionales, artesanía…) xunto cola Feria del discu y el llibru n’asturianu y de l’actuación de bandines tradicionales y grupos de baille.

A les 12:00h del sábadu 7 de mayu va tener llugar la inauguración oficial de Tolo d’Asturies cola intervención d’autoridaes y l’actuación de la Banda Gaites Conceyu Llangréu. Darréu d’esti actu inaugural va empezar la venta nel mercáu y l’actuación del gran Jerónimo Granda. A les 22:00 hores va tener llugar el gran conciertu de la feria cultural d’esti añu, l’escenariu de la carpa del recintu ferial va acoyer la música d’Héctor Braga, N’Arba y Los Berrones. Un gran conciertu pa la noche d’esti sábadu con xente de la Cuenca, del valle y la vuelta a los escenarios d’un grupu yá míticu de la música asturiana.

El domingu va siguir l’animación de bandines y grupos de bailles y l’actividá del mercáu dende les 11:00 hores hasta la clausura la feria. A les 13:00 va actuar la Banda Música de Llangréu. N’acabando esta guapa actuación va tener llugar la sesión vermú d’Asturianada con escenariu llibre y la participación de Marisa Valle Roso, . Yá de tarde, a les 18:00 va facese l’homenaxe a la tradición de la pandereta con un conciertu a cargu de Pandereteres de Fitoria y Les Filanderes. Como remate, el gran Xuacu Amieva va dar un conciertu pa pone-y el ramu a esta quinta edición de Tolo d’Asturies que va clausurase a les 21:00 hores del domingu 8 de mayu.

Conciertos, conciertos, conciertos

Cola entrada la primavera vamos conociendo nomes y feches de les bandes que van pasar per Asturies nos prósimos meses, diremos dando cumplida noticia de tolos que podamos sigún se van acercando los conciertos, pero nun podemos dexar pasar la ocasión de dir solliñando dalguna fecha pa que vaigáis iguando un calendariu afayaízu:

• El 14 d'abril nel Auditoriu Príncipe Felipe d'Uviéu, Tuenda presenta'l so tercer discu, 3.
• El 16 d'abril, na Feria Muestres de Xixón, el XXIII Conciertu Pola Oficialidá de la Llingua.
• El 28 d'abril nel Teatru Xovellanos, en Xixón, Luar Na Lubre presenta n'Asturies el so caberu discu, Solsticio.
• L'11 de xunu nel teatru La Laboral, en Xixón, va cellebrase l'acontecimientu la temporada, 4 hores de la meyor música l'Arcu Atlánticu cola presentación del nuevu discu de Chus Pedro y l'actuación d'Altan y Capercaillie.
• El 23 de xunu, na Playa Poniente de Xixón, conciertu Blima & Amigos.

Blima presenta Express

Blima entama l'añu con discu nuevu, Express (Tierra Discos). Nel nuevu trabayu discográficu afonden nel conceutu musical nel que vienen trabayando de 2006, folk acústicu, elegante y ensin estridencies que fadien la pureza d'arranchos. Igual, nesti Express, garra más protagonismu na parte instrumental el curdión de Marcos Alonso pero, yá vos digo que ye una evolución natural dientro del propiu soníu'l grupu. La sustitución de vocalista, Mapi Quintana por Silvia Quesada, aporta versatilidá nos cantares y delles querencies pol jazz a les que nun tábamos avezaos nel folk asturianu.
Ente los collaboradores de luxu, colos que cunta Blima nel so nuevu discu, destaquen Xurde Fernández a les flautes y l'escocés Martin O'Neill al bodhrán (ganó'l Scots Trad Music Award como meyor instrumentista nel añu 2010).
La presentación oficial d'Express va facese la selmana qu'entra nel Teatru Vital Aza de la Pola L.lena, el día 29 a les 20:30 (la entrada ye de baldre asina que la crisis nun ye escusa pa nun dir). Equí vos dexo un adelantu d'Express, la versión que fai Blima del vieyu cantar de Balandrán "Onde la Mar"

Felpeyu cumple 20 años y estrena páxina web

Depués de la lloriada d'ayeri tornamos a l'actividá normal del blogue: a falar de música, de músicos. Y qué meyor qu'entamar esti 2011 falando del aniversariu de Felpeyu, ún de los grandes nomes del folk asturianu que cumple 20 años enriba los escenarios y que, de xuru, tien preparáu un balagáu de sorpreses pa festexar esta prestosa efeméride.
La primer sorpresa d'esta conmemoración ye'l remocicamientu de la so imaxe na rede, asina, na direición www.felpeyu.com yá podéis alcontrar el nuevu diseñu de la páxina web oficial de la banda (nesti intre namás ta disponible n'asturianu, pero bien ceo tamién podrá consultase en castellán y inglés). Perinteresante resulta'l trabayu de recopilación de semeyes que ta faciendo la banda, pa resumir los sos 20 años d'hestoria, y pa la que pidi la collaboración de tolos aficionaos que-ys puean apurrir semeyes d'actuaciones y conciertos.
Amás del remocique de la web, Felpeyu, ta tamién acabante d'estrenar blogue nel qu'informarán de les noticies más inmediates de la banda. Entá nun hai muncha información, pero habrála nel futuru. Tamién la so presencia nes redes sociales va medrar cola apertura d'una páxina oficial en Facebook, amás de caltener el so MySpace qu'hasta agora yera la canal de comunicación principal de Felpeyu n'internet.

Intentaremos caltenevos informaos de toles novedaes referíes col 20º aniversariu de Felpeyu de les que vayamos teniendo noticia.

DRD llega a Xixón con convidaos

DRD aporten a Xixón esti xueves, de la man del ciclu de conciertos Músicas del Siglo XX entamáu por Cajastur. La cita, yá vos digo, ye nel pabellón Luis Adaro na Feria Muestres pero, como la cita ye especial, lleguen con un convidáu perimportante llegáu de la Bretaña: el flauteru Sylvain Barou.
El bretón vuelve a Asturies depués de la so presencia nel mes d'agostu nel Xixón 5.40º con Comas, esta vegada p'andechar colos sos collacios de DRD. Prestosu plan de xueves, si la ñeve mos dexa salir de casa...

Promoción de conciertos

Estos caberos díes tuvimos dalgo revueltos por mor de les reflexones del promotor Béznar Arias publicaes na prensa rexonal (podéis lleer l'artículu completu na cabera entrada de Másquegaites). Nel artículu'l promotor avilesín fala un sobredimensionamientu de la escena folk n'Asturies, que sigún él tien una repercusión mediático que nun se correspuende cola realidá oxetiva y cuantificable de, por exemplu, les cifres d'asistencia a conciertos. Estes reflexones tuvieron abonda repercusión ente músicos y aficionaos asturianos, poco avezaos a escuchar verdaes que resulten incómodes.
Ente la xente cola que yo falé hubo disparidá d'opiniones, pero en xeneral pueo dicir qu'esti escritu mancó. Munchos entendieron que yera un cabréu del promotor por nun algamar los resultaos esperaos cola actuación de Milladoiro n'Avilés, y retrucaron en base a esi conciertu. El preciu la entrada y el grupu gallegu, que ye un grupu que nun tien el tirón d'otres bandes y que nos caberos años tocó bien de vegaes n'Uviéu, fueron les razones más esgrimíes pa esplicar la baxa asistencia de públicu.
Personalmente camiento que quedar ehí ye quedase namás n'anécdota, pienso que Béznar aprovechó la oportunidá que-y dio'l conciertu de Milladoiro pa dar un repasu más xeneral a la promoción de conciertos folk n'Asturies y que, anque nos manque, fae unes reflexones bien interesantes de les que podemos sacar provechu. L'asistencia a conciertos de pagu ye bien probe, munches vegaes vas a conciertos nos que cuides que nun vas poder entrar y hai cuatro gatos, nun pasa namás nos entamaos por Béznar Arias ye más corriente de lo que mos prestaría ¿Tienen les sovenciones y los conciertos de baldre la culpa? En bona parte camiento que sí, nos caberos años tamos acostumaos a que mos visite una bona montonera de grupos importantes a lo llargo l'añu, les más de les vegaes p'actuar nos ciclos de música entamaos por Cajastur, conciertos que son siempre de baldre; nel branu son les arques municipales les que s'encarguen de surtinos de más música que tamién ye de baldre.
¿Y que problema hai en tener munchos conciertos de grupos interesantes y de baldre taréis pensando? A priori nun hai dengún problema, pero toa esa ufierta de música, a coste cero, afuega a los promotores privaos qu'arriesguen el so dinero n'entamar conciertos de folk ¿quién va pagar por daqué que me regala la Caja o l'Ayuntamientu? Naide. El problema vien cuando esi dinero público escosase, yá nun hai promotores públicos y los privaos dedíquense a traer a Bisbales y Oreyesdevangogh, que son los que dan perres y el folk déxenlo pa los entendíos, porque tan cansaos de perder perres con él. Podemos decatanos de que esti branu, por exemplu, la calidá y la cantidá de los conciertos baxo y muncho. El recorte de gastu públicu foi brutal y, de xuru, l'añu qu'entra va ser igual o pior, ehí ta'l Beltaine que pasó de 350.000€ a 60.000€ esti añu. Nun ye que les sovenciones me parezan mal o bien ye que tienen fecha de caducidá, va reducise dafechu'l númberu de conciertos y el númberu de grupos locales que viven única y esclusivamente de les perres de los ayuntamientos, sinon al tiempu.

Naguo por que siga habiendo xente qu'arriesgue les sos perres en traer grupos de folk a tocar a Asturies, de xuru que nun van ser los que yo traería, pero polo menos vendrá daquién. Pa finar, unos videos de xente que vieno a tocar a esti país de repunantes de la man de Béznar Arias, anque igual munchos nun s'enteraron...

Pequeños grandes conciertos

D'un tiempu p'acá tan popularizándose n'Asturies los conciertos de pequeñu formatu, cuasi que domésticu. Un par de músicos tocando, les más de les vegaes ensin amplificar, nun chigre ablucando a munchos veceros qu'entraren a tomar daqué y alcuéntranse con un inesperáu conciertu. Ye un formatu más venceyáu cola tradicional jam session llibre, na que cada cual toca lo que quier o sabe, que colos conciertos n'auditorios o n'escenarios al aire llibre del branu. Los protagonistes tan a ras de suelu, sentaos al llau del públicu que los foi ver tocar (a los que yá tienen ganaos enantes d'entamar) y tamién al llau d'esa xente qu'aporta'l chigre a tomar una cerveza y a aldericar colos collacios. Los músicos sienten el veredictu'l públicu nel mesmu intre, darréu, col silenciu respetuosu de los parroquianos énte la so música o col burbúx arrogante de les falucaes de los qu'inoren la so interpretación.
Nun sé, a min ye un formatu de conciertu que me presta enforma, una bona alternativa a otros onde la interaición ente públicu y músicos ye más abegosa. N'Asturies lleven faciéndose conciertos d'esta mena munchu tiempu nel Ca'Beleño o nel Trisquel, pero anguaño más chigres tan animándose a entamar estes velaes de música tradicional (El Cafetón n'Avilés, El Corquiéu en Ribeseya, El Cuévano en La Pola...) lo que quier dicir que ye interesante pa los chigreros y pa los músicos, amás de prestosu pa los aficionaos al folk como nós.
Nos caberos meses pudimos ver n'Asturies tocando en conciertinos d'esta mena a xente como Pat Kilbride, Paddy Keenan, Sylvain Barou, Chick McAuley, Jean-Michel Veillon... grandes nomes del folk célticu internacional a los qu'habría qu'axuntar los de dellos grupos del país. Nun sé, perdayures sientes falar de la crisis nel mundiu de la música por mor del puxu la piratería y, al mesmu tiempu, podemos ver tocar a estos grandes músicos nun espaciu tan ñatural pa la música tradicional como los chigres. Abultame melgueramente paradóxico.

Fonte Fuécara presenta nuevu trabayu discográficu

La banda de gaites Fonte Fuécara presenta esti sábadu, 23 d'ochobre, el so nuevu trabayu discográficu entituláu Caltener, na Escuela de Música Tradicional de Llanera a les 19:30. Nesti eventu van tar acompañaos nel escenariu pol flauteru bretón Jean-Michel Veillon y Xel Pereda. El miembru de Kornog participó, amás, na grabación del propiu discu Caltener tocando la bombarda en dalgún corte.
Amás de Veillon, nos créditos del discu Caltener, vamos atopar una bona montonera de nomes perconocíos del folk asturianu qu'andecharon na grabación y charon el so gabitu pa qu'esta grabación nun fuera'l típicu CD de banda de gaites sinon dalgo más venceyáu al folk. Ehí vais atopar a xente como Lisardo Prieto (que ye tamién el productor d'esti discu), Héctor Braga, Sergio Rodríguez, Chus Pedro, Rubén Bada y dalgún más.
Esti Caltener ye'l cuarto trabayu discográficu d'esta formación que ñaciera nel añu 1979, trés los anteriores Faciendo Estaya (1997), Remanecer (1994) y la que fuera la primer grabación asoleyada por una banda de gaites asturiana, una cinta publicada pola compañía Dial en 1990. Si nun toi mui enquivocáu debe ser la banda de gaites más prolifica d'Asturies no que se refier a trabayos publicaos, naguo por que la presentación seya un ésitu y por nun tardar muncho en poder sintir esti nuevu discu.

Milladoiro d'aniversariu n'Avilés

Va ser el prósimu vienres, 22 d'ochobre, cuando la llexendaria banda gallega Milladoiro s'acerque hasta Avilés pa facenos partícipes de la xira que cellebra los sos 30 años enriba los escenarios. Trés décades, vente trabayos discográficos asoleyaos y parez que foi ayeri cuando entamara too nel Colexu Salesianos d'A Coruña, onde dieran el so primer conciertu nel añu 1979. Nestos 30 años Milladoiro percorrió'l mundiu amosando la bayura de la música tradicional gallega y abriendo oreyes a la música celta fecha na Península Ibérica. Aporten agora a Asturies, onde tienen tocao munches vegaes, na so xira Desde Maeloc, que m'abulta tien un tastu a despedía o polo menos puntu y a parte na llarga carrera del grupu.

La cita ye nel Auditoriu de la Casa la Cultura avilesina y ta enxerta nel ciclu Avilés, Arte Sonoro qu'entama NorteSur Records de la man de Béznar Arias. El preciu la entrada son 15€ y éstes tan disponibles nel Don Floro n'Avilés, Discos Piraña en Xixón y El Último Mono n'Uviéu, amás de na rede de caxeros de Caxastur al traviés de Tiquexpress, el día del conciertu tarán disponibles nel propiu Auditoriu por 18€.

Jean-Michel Veillon visita Asturies n'Ochobre

Sigún podemos lleer na so web, el xenial flauteru bretón, visitará'l nuesu país del 17 al 23 d'Ochobre, díes nos qu'ufrirá polo menos tres conciertos en llugares entá por confirmar, anque'l del día 17 parez que va ser n'Uviéu y podría tar acompañáu nel escenariu por Xel Pereda, yá fadremos por tenevos informaos d'estes cites.
El músicu de Frehel cuasi que nun necesita presentación, una braera institución na música tradicional de Bretaña que tien tocao en bandes mítiques como Pennou Skoulm, Kornog, Barzaz...
Nagüemos por que se confirmen les feches de los conciertos y podamos sintir la música de la flauta de Jean-Michel bien ceo.

Presencia comercial del folk asturianu na rede: Grupos

Pasamos agora a char una güeyada al llabor desendolcáu polos propios músicos a la hora de comercializar los sos discos n'internet. Los grupos tendrán abondo con ensayar, componer y tocar bona música dirán dalgunos, el trabayu de vender discos nun se-ys puede enxaretar tamién. Ye verdá, los músicos nun tienene porque saber vender CDs, pero visto na cabera entrada'l blogue'l llabor que faen les discográfiques nesi sen, nun-ys queda otra. Si una banda invierte perres, tiempu y trabayu en grabar un discu, cuido que tendría qu'implicase tamién na so comercialización y más nel casu d'un estilu de música minoritariu como'l folk y nun país tan pequeñu como Asturies. Una xestión personalizada de les grabaciones, amestada con una axeitada presencia na rede puede xenerar l'interés de programadores de festivales europeos por enxertar música asturiana nos sos eventos, el naguar por algamar esi oxetivu per un camín tradicional nun ye imposible, pero ye muncho más abegoso.
Camiento que na dómina que tamos poner estes coses por escritu podría resultar fatu, pero la güeyada que chamos a les discográfiques yá mos dio una mocada de rialidá que barrunto va volver repetise. Tar presente en MySpace ta bien, pero camentar que eso ye tolo que tengo que facer pa considerame músicu profesional ye un pocu probetayu. Na mio opinión cualisquier músicu o banda que, polo menos, quiera dar una imaxe de profesionalidá y seriedá tenía que facer por caltener un sitiu propiu internet, actualizáu y con un diseñu afayaízu, complementáu con una activa presencia en redes sociales como MySpace, Facebook o Twitter.
Paso agora repasar la presencia na rede de los principales grupos de folk asturianos:

• Tejedor. Los hermanos Tejedor pasen por ser anguañu una de les bandes asturianes más importantes y con un gráu de profesionalidá más altu, esto traduzse n'internet nuna web propia de diseñu profesional inmeyorable, anque'l nome de dominiu nun ye mui guapu, qu'apurre información de la banda, discografía, muestres d'audio, videos... Pero nun dispón de tienda ellectrónica nin apurre información de como mercar los sos discos. Los Tejes tan tamién en MySpace.
• Felpeyu. Anque tien dominiu propiu puntucom, podemos dicir que la web nun esiste porque tola información que mos apurre ye l'anucia de la publicación de Canteros y el rider. Tienen MySpace.
• Llan de Cubel. Tien páxina web propia, ensin actualizar dende febreru d'esti añu, apurre información del grupu pero'l diseñu ta un poco anticuáu. Nun hai módulu de comerciu ellectrónicu. Los Cubeles deben ser l'únicu grupu d'Asturies ensin MySpace.
• La Bandina. Tienen páxina web propia con un diseñu mui guapu basáu nel del so discu caberu, 13, pero tien dellos fallos formales (el fondu salta cada vez que siguimos un enllaz, el color de la tipografía fae que seya abegosu lleer los testos y lleva más d'un añu ensin actualizar -los conciertos anunciaos son de 2009-). Amás, esta web tien delles coses estrañes, namás ta disponible en castellán, anque parte del menú ta n'asturianu y propón unos enllaces pintorescos. Nun dispón de módulu de comerciu ellectrónicu, nin apurre información de como mercar los sos discos. La Bandina ta presente en MySpace y Facebook.
• Tuenda. Otru grupu que tien páxina web pero que ta ensin actualizar dende sabe dios cuándo, nun hai denguna referencia al so segundo discu. Namás ta disponible n'asturianu y nun dispón de módulu de comerciu ellectrónicu. Tuenda ta presente en MySpace.

Güei voi parar equí, nos prósimos díes seguiré con esta xera, pel momentu equí tenemos 5 bandes de les más conocíes del país, con dellos trabayos discográficos a xocostrines y con un merecíu prestixu ¿la so presencia na rede ta al altor de la so calidá musical?

The Mahones nel Savoy de Xixón

La banda de punk folk irlandés The Mahones va tar esta nueche na sala Savoy de Xixón, nuna velada entamada por Algamar Producciones y na que tamién van tar presentes los asturianos Sambre y Mezá.
The Mahones ye una banda canadiense que nesta xira cellebra 20 años penriba los escenarios de mediu mundu, espardiendo un punk etílicu de raigañu irlandés heriede de la propuesta musical de The Pogues y Shane MacGowan. Pa desgracia de tolos amantes de la música y de tolos chigreros del mundiu Shane MacGowan namás hai ún. De toes formes esta banda canadiense ye una representante bien digna d'esti estilu mui popular en Norteamérica y n'Alemaña.

Güei entama'l Xixón 5º40'

Güei entama la segunda edición del Xixón 5º40', festival que sigui la tendencia cafiante d'esti branu que consiste en nun arriesgar res a la hora d'ufrir una programación musical a los aficionaos del país. Nun m'atalantéis mal, el 5º40' presenta un bon cartelu, bandes internacionales incontestables y una bona esbilla de folk llariegu, perfeutu... pero'l casu ye qu'ente los munchos grupos internacionales que podríen parar esti branu n'Asturies, namás paren bandes que yá tan más vistes que'l TBO, perbonos músicos pero camiento que ver siempre los mesmos lleva a l'aburrición.
Güei, polo menos, podremos sintir a Comas, que nun aveza a dexase ver perequí, con ellos Corquiéu, que sigui presentando'l so nuevu discu. Mañana'l protagonismu va ser pa dos bandes asturianes d'estilos mestizos, el folk ellectrónicu de Xera y el folk-rock de Skanda, que tamién presenta discu nuevu. Pa'l vienres ta previstu'l conciertu de Lúnasa, a los que pudimos ver n'Avilés hai un par de selmanes y en Santander (que ta ehí, al llau) el día 2 d'esti mes ¿nun se pudo contratar a naide que nun tuviera n'Avilés hai 15 díes? Y pa'l sábadu Wolfstone, otros qu'esti añu nun vimos perequí pero que tamién conocemos perbién y que tan lloñe de los sos meyores años... Igual sobren perres y falta imaxinación o los qu'entamen eventos d'esta mena namás conocen sota, caballu y rei.

XIV Festival Intercéltico d'Occidente

La selmana qu'entra va cellebrase la XIV edición del Festival Intercéltico d'Occidente, otra de les cites grandes del branu folki n'Asturies que nagua por capiar la turbonada económica pela que pasa'l nuesu país. Esa crisis que ta afogando la ufierta de música folk esti añu tamién se dexa notar nos festivales grandes, como esti de Tapia, que ve'l so programa recortáu cuasi a la metá de lo que yera n'ediciones anteriores.
Pesie a los obligaos recortes el FIDO sigui alantre y vuelve a convidanos a dellos de los conciertos más interesantes de los que van dase n'Asturies esta temporada, asina, el vienres 20 d'agostu Brian Finnegan va presentar nel nuesu país el so nuevu discu en solitariu asoleyáu hai pocos meses y del que yá vos falamos equí. El domingu 22, vamos poder ver otro grupu británicu que s'estrena per estes llatitúes The Urban Folk Quartet.
Yá vos digo, na mio opinión, de lo más interesante que vamos ver esti añu de recortes xenerales nel que los organizaores d'eventos folkis apostaron polo seguru y por bandes que yá tenemos mui vistes.
Equí vos dexo una petisa esbilla'l talentu de The Urban Folk Quartet, qu'igual acaba convirtiéndose nel ésitu la temporada.

N'Ocidente Noites Folk a pares

Delles vegaes dicimos qu'hai falta de conciertos y otres, los pocos qu'hai, coinciden na mesma fecha. El 7 d'agostu Navia va cellebrar la so VI Noite Folk cola banda de gaites Agarimo de Catabois, Milenta 3 y Corquiéu como grupu estrella. El mesmu día y camiento qu'a la mesma hora en Pormenande, nel conceyu vecín d'El Franco, podemos dir a la IX Noite Folk d'A Caridá, onde van tocar Brisas del Navia, Darbukka, Cádaba y los cántabros Cahórnega.
Resulta ablucante que se fagan dos nueches folk, en dos conceyos de la mesma zona d'Asturies y que la xente qu'entama estos conciertos escueya la mesma fecha'l calendariu pa cellebralos ¿Da pa tanto la afición del Ocidente? Igual sí, nun sé, pero esta contraprogramación folki parezme peligrosa pa la continuidá d'entrambes noites folk. Nun digo qu'haiga que cordinar tolos eventos de folk de tol país, anque la idega parezme interesante, pero cuido que con una migaya de bona voluntá lo de Navia y A Caridá podía cordinase meyor, de xuru que diben ganar n'asistencia de público.

XXVII Noite Celta de Porcía

Como cada mes d'agostu, dende l'añu 1983, la Noite Celta de Porcía aporta puntual a lo so cita colos aficionaos al folk d'Asturies y Galicia, yá van 27 ediciones cola d'esti añu. Y, como ye vezu, esti eventu va tar protagonizáu pola música celta, sardinada popular y por un marcu natural perguapu como ye esti requexu'l conceyu'l Franco.
No qu'a música se refier, esti añu van pasar pel míticu escenariu la Banda e Gaites Reina del Truébano, DRD, Felpeyu, Cádaba y la David Munnelly Band.
Un plan mui guapu pa dispidir el mes d'agostu con bona música folk y bones sardines del Cantábricu.

Susana Seivane n'Avilés

La xenial gaitera gallega llega, a la fin, a Avilés pa presentar con cuasi un añu de retrasu'l so discu Os Soños que Volven. La cita ye na Plaza'l Parche nel marcu del festival Beltaine que va finar con daqué de lo que nun foi mui abundante esta edición, un bon conciertu de folk con un nome de talla internacional que faiga por caltener el nivel musical algamáu l'añu pasáu, sedrá la crisis.
El casu ye que vamos poder disfrutar cola música d'esta gaitera del país vecín, que va dexase acompañar enriba l'escenariu polos hermanos Tejedor que-y van facer d'anfitriones nesti primer alcuentru de Seivane cola afición avilesina a la que, de xuru, va ufrir el repertoriu l'últimu discu y una esbilla de lo meyor de los sos más de diez años de carrera discográfica.
Yá qu'esti añu'l Beltaine foi un poco fiascu (el recote de presupuestu esplica delles coses, pero la falta d'imaxinación al programar non) y esti conciertu ye una de les escases golosines que nos ufre, nun ye cuestión dexalu pasar de llargu.

Rock Astur na Playa Poniente

Mañana va cellebrase un conciertu na Playa de Poniente, en Xixón, con motivu de la sexta edición de la Fiesta de las Asociaciones. Dos grandes bandes del Rock Astur van garantizar la folixa y la bona música nesti eventu xixonés, toi falando de La Tarrancha y los incombustibles Dixebra.
La ufierta musical multiplicase cada fin de selmana, porque esta interesante nueche de rock na playa va competir col folk irlandés de Lúnasa, que tarán na Plaza'l Parche d'Avilés, y col concursu de Navelgas del que vos falé va poco. Vamos tener que multiplicanos.