El Beltaine preséntase énte los medios

Ayeri presentóse énte los medios la tercer edición del festival Beltaine Intercéltico d'Avilés, otru añu La Villa va disfrutar de dos eventos rellacionaos cola música tradicional escasos de presupuestu. Munchos taréis pensando: ¿Por qué nun entamen unu curiosu envede dos faltos de perres? Pues porque tamos n'Avilés y Avilés ye diferente. El casu ye que sigún Xuntanza, el coleutivu qu'entama'l Beltaine, el presupuestu d'esti añu ye la mitá del de la cabera edición, una décima parte del presupuestu del primer Beltaine si nun me fallen les matemátiques.

Pesie al recorte, y visto sobre'l papel, la parte musical parezme abondo más interesante que la del añu pasáu, con un cartelu encabezáu pol vigués Carlos Núñez, que yá tocó nel Intercélticu orixinal hai años, y nel que tamién tan Anabel Santiago y les irlandeses Sharon Shannon y Niamh Ní Charra,a les que la prensa nun especializada nun debe conocer porque nómenles de pasada.

Na parte non musical, la organización rescata'l festival gastronómicu de la primer edición asitiándolu esta vuelta nel Parque'l Muelle y nun pudo algamar los permisos p'acompañar los puestos de xinta y bébora con un mercadín artesanal.

Última hora: La Shannon cayó del cartelu, parez ser que por problemes presupuestarios, los Tejes van ser los encargaos de tapar el gran furacu que dexa na programación la curdionera irlandesa :-(

... y yo más celta que tú

Dempués del estrés de la selmana pasada, con dos festivales d'una selmana de duración na mió ciudá pa cubrir, amás de falar de la ufierta folki del restu d'Asturies en plena temporada alta, tomé dellos díes llibres enantes de retomar l'actividá del blogue, dellos díes p'analizar, reposar y pa intentar dar una opinión intelixible de lo que pasó n'Avilés al rodiu de los sos dos festivales intercélticos.
La xente que sigui esti blogue pue camentar que nun pueo ser oxetivu a la hora de valorar estos dos festivales, l'añu pasáu per estes mesmes feches yá dixí lo que diba pasar col Intercélticu d'Avilés (d'equí p'alantre FIA, p'abreviar) y lo que camentaba del abordaxe de d. Román Antonio Álvarez a esti eventu, nun voi aburrivos repitiendo lo mesmo, si hai xente interesao en lleer lo qu'escribí l'añu pasáu nun tien más que consultar l'archivu del blogue. Güei namás diré que, énte l'ausencia d'ética, los ciudadanos d'un país presuntamente democrático como ésti debemos d'esixir dalgo d'estética a los nuesos representantes. Na Casa Conceyu d'Avilés entrambes cualidaes tán escosaes dende cuantayá. Dicho esto, pueo confesavos qu'intenté disfrutar del Festival de Román (d'equí p'alantre Beltaine) ensin prexuicios, como fadría cualisquier aficionáu que llegará a Avilés ensin conocer los antecedentes que nós sí conocemos. Darréu vienen les mios impresiones personales, que voi separar per estayes pa da-ys daqué de coherencia:

• Música folk. Del Beltaine prestáronme pola vida los conciertos de Lau, Fraser Fifield, Pennoù Skoulm y el de los Maestros Gaiteros, tamién me reí abondo colos bretones Taran, por desgracia pa min nun pude ver nin a Pepe Vaamonde nin a DRD y poques vegaes pasé tanta vergoña de ser asturianu como nel conciertu de Liam O'Flynn. L'escenariu escoyíu pa los conciertos tamién foi un aciertu, la plaza'l mercáu de Les Aceñes recién acabante de remocicar ye un sitiu ampliu y a techu, lo que n'Asturies ye una necesidá anque temos en branu, yá digo que foi un aciertu dempués de que mos metieran el miéu enl cuerpu cola anuncia de que los conciertos diben facese na pista La Esposición. La calidá del soníu nos conciertos, francamente meyorable, foron afinando col pasu los díes. El FIA esti añu nun tuvo música folk, nun había presupuestu, pero pudo ufrinos delles perles en forma de petisos conciertos desenchufaos, asina, na Ilesia vieya de Santo Tomás pudimos disfrutar de la voz de Mari Luz Cristóbal Caunedo y del talentu de Xuacu Amieva, dos grandes figures de la música tradicional asturiana que participaron desinteresadamente nel FIA.
• Grupos Folklóricos. Reconozo que nun sé dala cosa sobre esta tema, otros podrán dar una opinión con más fundamentu que la de mió de la calidá de los grupos participantes. Namás pueo dicir que tengo la sensación de que n'anteriores ediciones del FIA había más presencia de grupos na cai, lo que-y daba a la ciudá ciertu ambiente de festival que nesta primera edición del Beltaine nun se palpó. Ye una cosa que me llamó bien l'atención, tando entamáu por una federación de grupos de baille y bandes de gaites, nun foron a da-y l'ambiente a la ciudá que otros años conseguía un únicu grupu. Solliñar tamién qu'en 13 años foi la primer vegada qu'un de los grupos invitaos salió na prensa pa quexase del agospamientu ufríu, nesti casu, pola organización del Beltaine, fechos como esti contrasten colos comentarios habituales d'otros años, onde los invitaos siempre destacaben la hospitalidá y el ciñu colos que yeren trataos pola organización del FIA.
• Chiringuitos. Caros, cutres, improvisaos... prescindibles. Lo de poner 24 puestos de comida y bebida alredor del escenariu principal dexó un tastu agrín a tolos implicaos: los hosteleros d'Avilés viéronlos como un ataque del Ayuntamientu en plena crisis; lo que diben ser puestos xestionaos por asociaciones tuvieron que completase con hosteleros d'otros conceyos, porque ¿qué asociación dispón de 2500€ pa poner un chigre y pa pagar camareros 10 díes?; lo que diba ser l'intercélticu gastronómicu acabó siendo la más cutre de les Semanas Negras, 3000€ de pérdides estimaes por puestu a ritmu de David Bisbal... De xuru que los hosteleros que participaron de bona fe, prestaría-ys saber si ye verdá que l'ayuntamientu va condonar la deuda de les asociaciones que s'instalaron en Les Aceñes, porque esi rumor yá percorría la plaza'l xueves del Beltaine.
• Esposiciones. Equí notóse la mán de Jorge Iván Argiz y el so venceyamientu al mundiu'l cómic. Grandes esposiciones de debuxos de la vasca Raquel Alzate y Cris Ortega, personalmete camiento que la temática del trabayu de Raquel encartia perbién nun eventu d'esta mena; el de Cris Ortega ensin tener menor calidá artística tien una rellación cola cultura celta más bien difusa. Les semeyes de Vicente Ansola hai que asitiales tamién ente los aciertos de la organización del Beltaine. El FIA conformóse con dos esposiciones más muncho más modestes, una colos cartelos anteriores del festival pintaos pol artista local Luis Taboada y otra d'illustraciones d'Arte Celta feches por min polo que nesta tema soi suxetivu dafechu, los mios debuxos son muncho peores que los de Raquel Alzate, habéis de creeme.
• Otres actividaes culturales. Ente'l restu d'actividaes amestaes a la programación del Beltaine sin ton nin son, cenciellamente por engordala, hai delles que lleven faciéndose na ciudá va tiempu como l'hípicu, l'axedrez na cai o la Danza de Santa Ana, tienen una entidá propia en sí mesmes, meteles a calzador nel programa d'un festival nuevu nun ayuda a naide nin les fae meyores. Ente lo positivu solliñar la cellebración del I Congresu de Periodismu Cultural Beltaine dirixíu pol periodista asturianu Próspero Morán, que tuve'l placer de siguir y tamién destacar el llabor de Próspero cubriendo'l Beltaine en tiempu real, dafechu la so web del festival yera muncho meyor en tolos sentíos que la web oficial del Beltaine.
• Lo peor de lo peor. Lo que nun debiera pasar d'una pequeña discusión nuna sidrería y que taría solucionada dempués de la tercer botella, si los protagonistes fueren persones normales, acabó convirtiéndose en campu d'operaciones de 4 politicuchos, estrategues de salón con ego pa esportar, acabó convirtiéndose nun cáncanu infestáu de xente que nun s'interesó pola cultura tradicional en so puñetera vida. Váyase señor Álvarez, váyase señor Rañón, váyase señora Maniega nun los queremos na música tradicional.
  

Primer nueche grande del Beltaine

Esta pasada nueche pudimos asistir al primer platu fuerte'l Beltaine, primero col espectáculu Maestros Gaiteros y llueu cola Piper's Call Band comandada por Liam O'Flynn, una nueche cola gaita (nes sos diferentes tipoloxíes) como protagonista.
Pa min la primer sorpresa foi l'escenariu, l'interior de la plaza d'abastos Hermanos Orbón recién remocicada, mui guapa y con techu de maera que fizo que nun mos moyáramos na inestable nueche avilesina.
El conciertu entamó con dellos minutos de retrasu por problemes col soníu, problemes que nun fueron quién a iguase y torgaron lo que pudo ser un conciertu pa remembrar. L'espectáculu Maestros Gaiteros va medrando en complicidá ente los sos componentes y eso notase a la hora de tocar xuntos. Una pena que vaigamos remembrar los acoples del micru de Jose Tejedor que tuvieron a piques de dexanos sordos delles vegaes. El casu ye que con y ensin acoples un público qu'aborrotó'l recintu pasólo en grande con Morrison, Henderson, Lorenzo y Tejedor.
Dempués xubió a escena'l gran maestru Liam O'Flynn, anque enantes pasara un vixilante invitándonos a dexar el recintu porque diben pesllar (!?). Igual yera bono cerciorase qu'esta parte de los emplegaos de la organización nun probase l'alcohol, dan mala imaxe de la ciudá. Xubió'l señor O'Flynn al escenariu colos sos collacios y entamó a desgranar el so repertoriu, una música muncho más sele que la de los gaiteros qu'acababen de baxar, entós foi cuando mos decatamos de que munchos avilesinos nin yos gusta'l folk nin tienen muncho respetu pola xente que sí-y gusta nin polos músicos que la interpreten y que son los nuesos invitaos n'Avilés, que lleven una mala imaxe del festival y de los asturianos. Personalmente colé de la plaza por vergoña a la quinta o sesta educada invitación d'O'Flynn pa que la xente callase. Mui mal, quedamos cola gocha.
De los polémicos chiringos que punxo l'Ayuntamientu nel esterior de la Plaza dicir dos coses: van peder perres a mamplén, lleven dos díes y nun venden un pih.o; hai que cuidar la estética y nun ye nada estéticu poner a Bisbal y música d'esa triba nun festival de música celta...
Equí vos dexo dos videos del conciertu xubíos a Youtube pola organización del Beltaine

Intercélticu Bis (aka Beltaine): web oficial

El nuevu festival avilesín estrena web oficial www.beltaine.es onde podéis consultar tola programación del eventu, la musical y la cultural (esposiciones, alderiques, un congresu de periodismu y cultura tradicional...).
La web, como'l restu del festival, ta fecha a la carrera, devaluando un eventu qu'a tenor de les cifres y de los nomes implicaos tendría de mirar más pola imaxe y la promoción.
La web namás ta disponible en castellán y nun parez que nun futuru vaya haber versiones n'asturianu, inglés o francés (esto digolo porque nun hai enllaces que faigan albidrar que vaya a publicase nestes llingües). Les semeyes de les bandes participantes tan tracamundiaes (el pie de fotu d'una semeya de Fred Morrison diz que ye Liam O'Flynn, na de La Bandina aparez DRD...) y, na mayoría de los casos, esa semeya tracamundiada ye la única información qu'ufre la organización de los grupos (nun hai información disponible de Tejedor, Carreg Lafar, Pepe Vaamonde, Os Gaiteiros de Lisboa.... yo, tengo interés personal en saber quién son los bretones Torm porque dempués de googlear y percorrer el myspace, la única banda qu'alcuentro con esi nome ye un grupu de música ellectrónica tirando a pachanguera...). Nel calendariu onde deberíen tar conseñaes les actividaes diaries nun aparez dala cosa... Fallos subsanables si la web tuviera fecha hai tres meses, pero qu'a 8 díes del entamu del festival dan una imaxe probetaya y desorganizada d'un eventu con 350000 € de presupuestu.

Intercélticu Bis (aka Beltaine): programación oficial

Nun hai munches novedaes respeutu a los conciertos qu'anunciamos hai dellos díes, pero güei publicase na prensa serio la programación oficial y tien delles novedaes qu'añadir al nuesu vaticiniu asina qu'equí vos la dexo pa los que nun gastáis perres en mercar el periódicu:

• Vienres, 17 de xunetu. Banda de Gaites El Llacín presenta'l so espectáculu Xideces con dellos músicos invitaos.
• Sábadu, 18 de xunetu. "Trío de jazz escocés", eso ye lo que diz la programación oficial, too mui profesional, nós yá diximos va tiempu que ye'l Fraser Fifield Trio, l'espectáculu Maestros Gaiteros con Fred Morrison, Anxo Lorenzo, Jose Manuel Tejedor y Jarlath Henderson y, pa finar la nueche, Liam O'Flynn y The Piper's Call Band.
• Domingu, 19 de xunetu. Los galeses de Carreg Lafar y Galandum Galandaina de Portugal.
• Llunes, 20 de xunetu. Héctor Braga, y DRD con Jarlath Henderson.
• Martes, 21 de xunetu. Nueche dedicada al rock n'asturianu con Dixebra y Fala Non Caduca.
• Miércoles, 22 de xunetu. Pandereteres de Fitoria y Cádava.
• Xueves, 23 de xunetu. El tríu escocés LAU y La Bandina.
• Vienres, 24 de xunetu. Pepe Vaamonde y Os Gaiteiros de Lisboa.
• Sábadu, 25 de xunetu. Hermanos Tejedor y Pennoù Skoulm.
• Domingu, 26 de xunetu. Nueche Máxica n'El Quirinal.

Escoyer grupos pa un festival ye una cuestión abegosa que siempre va recibir crítiques, toos esborraríemos dalgún nome y apurriríamos tres o cuatro, polo que nun vamos gastar tiempu en daqué tan suxetivo. Solliñar namái la presencia de dos bandes portugueses y volver char en falta la presencia de dalgún grupu cántabru, que los hai y non peores qu'estos. y dicir, eso sí, que nun hai un saltu de calidá apreciable respeutu a otres ediciones del festival.
Del restu de programación (esposiciones, alderiques, deporte...) dizse qu'habrá pero nun se diz el qué, yá veremos. Eso sí chigres y bocateríes habrá a mamplén, 24 puestos de comida y bebida van instalase na Plaza Hermanos Orbón camudada nun remedu avilesín de la Semana Negra.
Carreg Lafar

Pepe Vaamonde Grupo

Gaiteiros de Lisboa

LAU

Pennoù Skoulm

Beltaine Intercéltico

Lo qu'en su día foi'l Festival Intercélticu d'Avilés camuda d'organizaores y de nome, yá tenemos falao d'ello equí. El nuevu festival organizáu pol ayuntamientu d'Avilés, xunto con un garrapieyu d'asociaciones folklóriques llocales nomáu Xuntanza, pasa a denomase Beltaine Intercéltico. Igual ye que nun pudieron embarga-y'l nome rexistráu por Esbardu, igual ye por esborra-y cualaquier traza de llingua asturiana...
El nome elexío nun ye mui afayaízu, el 99% de los asturianos nun sabrán lo que significa y l'1% que sí lo sabe sabrá que Beltaine ye una de les grandes fiestes del calendariu celta, que nel xulianu actual coincide más menos col 1 de mayu, polo que la rellación col mes de xunetu ye improbable nel meyor de los casos...
No qu'a noticies musicales venceyaes col festival avilesín, pon tú'l nome que más te pete, dicir que yá podemos añadir otru grupu a los que yá confirmamos nel anterior post, LAU una de les grandes bandes del folk escocés d'anguaño, trunfadores na cabera edición de los BBC Folk Awards onde algamaron los tres premios a los que taben nominaos.