Primeres actuaciones confirmaes del Intercélticu d'Avilés

Yá va confirmándose la presencia nel Festival Intercélticu d'Aviles de delles bandes y grupos, asina, hai unos díes la organización confirmó que la Bagad bretona de Kevrenn Brest St. Mark diba tar tar presente nel festival avilesín, qu'esti añu algama la so XVª edición.
Na estaya folk del festival tamién s'adelantó dalguna novedá, la presencia del duo irlando-quebecuá formáu pola vigulinera de Lac-St-Jean (Quebec) Sophie Lavoie y pol gaiteru de Connemara Fiachra O'Regan. Xente mozo que yá tien una llarga trayeutoria a xocostrines, asina Fiachra ye All Ireland Champion na categoría senior de gaita y xiblates y, va poco, asoleyó'l so primer discu en solitariu tituláu Aisling Gheal. Pela so parte Sophie tien formáu parte del grupu quebecuá L'Attisée, col que tocó n'Irlanda y Francia nos caberos años. N'Avilés presentarán el so primer discu como Sophie&Fiachra, nel que predomina la música baillable d'entrambos países.
Equí vos dexo una de les sos actuaciones pa la televisión irlandesa

Primeros pasos del XIV Festival Intercélticu d'Avilés

Mientres la federación qu'entama'l Beltaine anda metida en mediu d'una guerra política a cuentu de 66000€ ensin xustificar sigún el PP d'Avilés, Esbardu da los primeros pasos de la XIVª edición del Festival Intercélticu d'Avilés. Asina, yá tien confirmada la asistencia al festival avilesín d'una montonera de grupos del Arcu Atlánticu dispuestos a venir a Asturies renunciando al so caché, condición impuesta poles dificultaes económiques qu'atraviesa'l FIA.
Ta confirmada la presencia n'Avilés de delegaciones de Galicia, Gales, Irlanda y Escocia. Los grupos que yá dieron el preste podéis conocelos na web oficial del FIA

... y yo más celta que tú

Dempués del estrés de la selmana pasada, con dos festivales d'una selmana de duración na mió ciudá pa cubrir, amás de falar de la ufierta folki del restu d'Asturies en plena temporada alta, tomé dellos díes llibres enantes de retomar l'actividá del blogue, dellos díes p'analizar, reposar y pa intentar dar una opinión intelixible de lo que pasó n'Avilés al rodiu de los sos dos festivales intercélticos.
La xente que sigui esti blogue pue camentar que nun pueo ser oxetivu a la hora de valorar estos dos festivales, l'añu pasáu per estes mesmes feches yá dixí lo que diba pasar col Intercélticu d'Avilés (d'equí p'alantre FIA, p'abreviar) y lo que camentaba del abordaxe de d. Román Antonio Álvarez a esti eventu, nun voi aburrivos repitiendo lo mesmo, si hai xente interesao en lleer lo qu'escribí l'añu pasáu nun tien más que consultar l'archivu del blogue. Güei namás diré que, énte l'ausencia d'ética, los ciudadanos d'un país presuntamente democrático como ésti debemos d'esixir dalgo d'estética a los nuesos representantes. Na Casa Conceyu d'Avilés entrambes cualidaes tán escosaes dende cuantayá. Dicho esto, pueo confesavos qu'intenté disfrutar del Festival de Román (d'equí p'alantre Beltaine) ensin prexuicios, como fadría cualisquier aficionáu que llegará a Avilés ensin conocer los antecedentes que nós sí conocemos. Darréu vienen les mios impresiones personales, que voi separar per estayes pa da-ys daqué de coherencia:

• Música folk. Del Beltaine prestáronme pola vida los conciertos de Lau, Fraser Fifield, Pennoù Skoulm y el de los Maestros Gaiteros, tamién me reí abondo colos bretones Taran, por desgracia pa min nun pude ver nin a Pepe Vaamonde nin a DRD y poques vegaes pasé tanta vergoña de ser asturianu como nel conciertu de Liam O'Flynn. L'escenariu escoyíu pa los conciertos tamién foi un aciertu, la plaza'l mercáu de Les Aceñes recién acabante de remocicar ye un sitiu ampliu y a techu, lo que n'Asturies ye una necesidá anque temos en branu, yá digo que foi un aciertu dempués de que mos metieran el miéu enl cuerpu cola anuncia de que los conciertos diben facese na pista La Esposición. La calidá del soníu nos conciertos, francamente meyorable, foron afinando col pasu los díes. El FIA esti añu nun tuvo música folk, nun había presupuestu, pero pudo ufrinos delles perles en forma de petisos conciertos desenchufaos, asina, na Ilesia vieya de Santo Tomás pudimos disfrutar de la voz de Mari Luz Cristóbal Caunedo y del talentu de Xuacu Amieva, dos grandes figures de la música tradicional asturiana que participaron desinteresadamente nel FIA.
• Grupos Folklóricos. Reconozo que nun sé dala cosa sobre esta tema, otros podrán dar una opinión con más fundamentu que la de mió de la calidá de los grupos participantes. Namás pueo dicir que tengo la sensación de que n'anteriores ediciones del FIA había más presencia de grupos na cai, lo que-y daba a la ciudá ciertu ambiente de festival que nesta primera edición del Beltaine nun se palpó. Ye una cosa que me llamó bien l'atención, tando entamáu por una federación de grupos de baille y bandes de gaites, nun foron a da-y l'ambiente a la ciudá que otros años conseguía un únicu grupu. Solliñar tamién qu'en 13 años foi la primer vegada qu'un de los grupos invitaos salió na prensa pa quexase del agospamientu ufríu, nesti casu, pola organización del Beltaine, fechos como esti contrasten colos comentarios habituales d'otros años, onde los invitaos siempre destacaben la hospitalidá y el ciñu colos que yeren trataos pola organización del FIA.
• Chiringuitos. Caros, cutres, improvisaos... prescindibles. Lo de poner 24 puestos de comida y bebida alredor del escenariu principal dexó un tastu agrín a tolos implicaos: los hosteleros d'Avilés viéronlos como un ataque del Ayuntamientu en plena crisis; lo que diben ser puestos xestionaos por asociaciones tuvieron que completase con hosteleros d'otros conceyos, porque ¿qué asociación dispón de 2500€ pa poner un chigre y pa pagar camareros 10 díes?; lo que diba ser l'intercélticu gastronómicu acabó siendo la más cutre de les Semanas Negras, 3000€ de pérdides estimaes por puestu a ritmu de David Bisbal... De xuru que los hosteleros que participaron de bona fe, prestaría-ys saber si ye verdá que l'ayuntamientu va condonar la deuda de les asociaciones que s'instalaron en Les Aceñes, porque esi rumor yá percorría la plaza'l xueves del Beltaine.
• Esposiciones. Equí notóse la mán de Jorge Iván Argiz y el so venceyamientu al mundiu'l cómic. Grandes esposiciones de debuxos de la vasca Raquel Alzate y Cris Ortega, personalmete camiento que la temática del trabayu de Raquel encartia perbién nun eventu d'esta mena; el de Cris Ortega ensin tener menor calidá artística tien una rellación cola cultura celta más bien difusa. Les semeyes de Vicente Ansola hai que asitiales tamién ente los aciertos de la organización del Beltaine. El FIA conformóse con dos esposiciones más muncho más modestes, una colos cartelos anteriores del festival pintaos pol artista local Luis Taboada y otra d'illustraciones d'Arte Celta feches por min polo que nesta tema soi suxetivu dafechu, los mios debuxos son muncho peores que los de Raquel Alzate, habéis de creeme.
• Otres actividaes culturales. Ente'l restu d'actividaes amestaes a la programación del Beltaine sin ton nin son, cenciellamente por engordala, hai delles que lleven faciéndose na ciudá va tiempu como l'hípicu, l'axedrez na cai o la Danza de Santa Ana, tienen una entidá propia en sí mesmes, meteles a calzador nel programa d'un festival nuevu nun ayuda a naide nin les fae meyores. Ente lo positivu solliñar la cellebración del I Congresu de Periodismu Cultural Beltaine dirixíu pol periodista asturianu Próspero Morán, que tuve'l placer de siguir y tamién destacar el llabor de Próspero cubriendo'l Beltaine en tiempu real, dafechu la so web del festival yera muncho meyor en tolos sentíos que la web oficial del Beltaine.
• Lo peor de lo peor. Lo que nun debiera pasar d'una pequeña discusión nuna sidrería y que taría solucionada dempués de la tercer botella, si los protagonistes fueren persones normales, acabó convirtiéndose en campu d'operaciones de 4 politicuchos, estrategues de salón con ego pa esportar, acabó convirtiéndose nun cáncanu infestáu de xente que nun s'interesó pola cultura tradicional en so puñetera vida. Váyase señor Álvarez, váyase señor Rañón, váyase señora Maniega nun los queremos na música tradicional.
  

Fred Morrison+Red Hot Chilli Pipers

La primer nueche grande'l Festival Intercélticu pue resumise en poques pallabres: la xente sabía a lo que diba ver y escuchar, y taba entregada dende que salió la primer nota del punteru de la reel pipe de Fred Morrison.
La organización tuvo'l detalle de quitar les silles qu'acostuma a poner delantre l'escenariu, lo que permitió la entrada de más aficionaos na Plaza de Carlos Lobo que quedó pequeña pa la ocasión. El conciertu entamó con puntualidá y col enfotu de Fred por falar un amestu d'español y francés que foi bien recibío pol público. Los fulgurantes sets del escocés a la gaita irlandesa y a la reel pipe, bien secundáu a la guitarra por Mathew Watson, ficieron vibrar al público que siguió gran parte'l conciertu dando palmes. Dempués de baxar del escenariu, la gran presencia física de Fred dexose notar pelos chigres de la zona y fueron munchos los que saludaron y felicitaron al músicu pola actuación.
Pocos minutos dempués los Red Hot ficieron so aparición y desgranaron la mayor parte'l repertoriu del so reciente discu Bagrock to the Masses. Versiones de clásicos del rock por una banda folk d'escelentes músicos, con una estudiada presencia nel escenariu, cuasi podríemos falar de coreografía o representación de los temes versionaos. Nun son una banda del gustu de los aficionaos más tradicionalistes, pero nun hai dulda de que saben lo que faen y faenlo perbién. N'Avilés, como nel mediu mundu que lleven percorríu con esti espectáculu, volvieron metese al público nel bolsu y toos saltamos como llocos cola so música.

Yá ta equí'l Festival Intercélticu d'Avilés

Esta selmana presentóse oficialmente'l programa de la presente edición del Festival Intercélticu d'Avilés y Comarca. Una edición que vien refrendada pola declaración de Fiesta de interés turístico y que presentase como la más ambiciosa hasta la fecha.
La presentación tuvo atapecida pola absurda polémica sobro'l cartelu oficial del festival (tolos años ye obra d'un artista local, Taboada, y esti añu l'ayuntamientu encargó-ylo a otru artista local, Miguel Solís, ensin pautar primero cola asociación qu'entama'l festival, Esbardu. Asina qu'asociación y ayuntamientu presentáronse na rueda de prensa con dos cartelos distintos, hubo amenaza de plante, etc. Mui profesional too vamos.
Pasando de la polémica'l cartelu, que namás-y interesa a quien la creo -esto ye Román-, pasamos a lo que ye interesante de verdá, a los grupos participantes nel festival ente los qu'hai delles sorpreses y falten tamién dalgunos esperaos. Asina, vemos que nun van pasar pela Villa los quebecoises de la Bottiné que veníen sonando nos mentideros folkis del país como posible cabeza de cartelu del festival dende va meses. Confirmase la esperada presencia de los Red Hot Chilli Pipers, trunfadores de la pasada edición y de la banda de gaites de la Marina Francesa Bagad Lann Bihoué. Amás, van tar presentes n'Avilés Fred Morrison, los Tannahill Weavers y los irlandeses Beoga.
Muncha presencia escocesa que davezu tien bona acoyida nel festival avilesín. Equí tenéis un adelantu'l programa que diremos completando pasín ente pasu:

Vienres 18 de xunetu

- LA BANDINA LA CURUXA (ASTURIES)
- “NUECHE EN DANZA”
* Plaza de Carlos Lobo

Sábadu 19 de xunetu

- RED HOT CHILLI PIPERS (ESCOCIA)
- FRED MORRISON (ESCOCIA)
* Plaza de Carlos Lobo

Domingu 20 de xunetu

- STUART CASSELS (ESCOCIA)
- BAGAD LANN BIHOUÉ (BRETAÑA)
* Plaza de Carlos Lobo

Llunes 21 de xunetu

- MERZHIN (BRETAÑA)
- FALANUNCADUCA (ASTURIES)
* Plaza de Carlos Lobo

Martes 22 de xunetu

- BAGAD LANN BIHOUÉ (BRETAÑA)
- ANABEL SANTIAGO & M. LEE WOOLF (ASTURIES)
* Plaza de Carlos Lobo

Miércoles 23 de xunetu

23′00h) BARDOS DEL MUNDU CELTA
(NUECHE DE GAITES DE LOS PAISES CELTAS)
* Plaza de Carlos Lobo

Xueves 24 de xunetu

23′00h) DRUIDES DEL MUNDU CELTA.
(NUECHE DE DANCES DE LOS PAISES CELTES)
* Plaza de Carlos Lobo

Vienres 25 de xunetu

23′00h) SESTAFERIA. MARCHA CELTA
Camín: Parche - C/ Cámara - C/ Doctor Graíño - Pza. Vaticano - C/ Juan XXIII - Complexu Deportivu Avilés.
23′30h) LLUNA CELTA. LA GRAN NUECHE DE LOS CELTAS.
-MARISA VALLE ROSSO (Tonada)
-RUBEN ALBA (Gaita)
-MARCOS GARCIA (Curdión)
-GRUPOS DE MUSICA Y BANDAS DE GAITAS DE LOS PAISES CELTES
-GRUPOS DE DANZA Y BAILLE TRADICIONAL DE LOS PAISES CELTES
*Complexu Deportivu Avilés (El Quirinal)

Sábadu 26 de xunetu

- TANNAHILL WEAVERS (ESCOCIA)
- BEOGA (IRLANDA)
*El Parche