Presentóse'l XV Festival Intercélticu d'Avilés

Ayeri presentóse nel Centru Cultural Niemeyer la XV edición del Festival Intercélticu d'Avilés, edición dedicada a Irlanda y ta sofitada pola Embaxada n'España de la República, pesie al sofitu del país vecín el presupuestu d'esta edición ye'l segundo más baxo de tola historia del festival. El gobiernu municipal avilesín aporta 11500€ de sovención al eventu que tien la distinción de ser fiesta de interés turístico regional, nun dexa de llamar l'atención la cuantía d'esa aportación cuando tan perdiendo'l culu por taer a Avilés la Semana Negra lo que-ys supondría a les arques avilesines una inversión añal d'unos 200000€. Tamién ye bien llamativo que, na presentación del eventu, la representación institucional municipal cuerra a cargu de los conceyales de la oposición (PP, FAC, IU), el conceyal de Cultura pesie a cobrar 43000€ añales vuelve a nun tar al altor ético que tien que tener un representante de tolos avilesinos.

Gracies a la collaboración desinteresada de grupos y bandes collacies, la organización, vuelve a presentar una programación de 10 díes.No qu'a folk se refier nun vamos alcontrar nomes de grandes bandes internacionales, pero sí un garrapieyu de grupos que nun avecen a tocar per Asturies: la primer fin de selmana va tar n'Avilés el dúo formáu pol gaiteru irlandés Fiachra O'Regan y la vigulinera quebecuá Sophie Lavoie; a lo llargo'l restu'l festival tamién pasarán pel escenariu d'El Carbayedo'l multiinstrumentista llionés Fran Allegre, los salmantinos Folk On Crest, el gaiteru gallegu Fernando Mosquera y so banda (que tienen previstu grabar el conciertu d'Avilés p'asoleyar un DVD), la banda portuguesa Velha Gaiteira y el grupu de folk-rock madrilán Xtramonio.

Como ye costume nel festival, hai una estensa ufierta de música y baille tradicional con agrupaciones de Bretaña, Escocia, Irlanda, Galicia y Asturies. Na programación cultural paralela destaca l'homenax al premiu nobel de lliteratura irlandés Seamus Heaney, que nun va tar n'Avilés por problemes de salú, pero sí la so poesía en voz de la so cuñada, Anne Devlin.

Más info en www.intercelticu.com

Primeres actuaciones confirmaes del Intercélticu d'Avilés

Yá va confirmándose la presencia nel Festival Intercélticu d'Aviles de delles bandes y grupos, asina, hai unos díes la organización confirmó que la Bagad bretona de Kevrenn Brest St. Mark diba tar tar presente nel festival avilesín, qu'esti añu algama la so XVª edición.
Na estaya folk del festival tamién s'adelantó dalguna novedá, la presencia del duo irlando-quebecuá formáu pola vigulinera de Lac-St-Jean (Quebec) Sophie Lavoie y pol gaiteru de Connemara Fiachra O'Regan. Xente mozo que yá tien una llarga trayeutoria a xocostrines, asina Fiachra ye All Ireland Champion na categoría senior de gaita y xiblates y, va poco, asoleyó'l so primer discu en solitariu tituláu Aisling Gheal. Pela so parte Sophie tien formáu parte del grupu quebecuá L'Attisée, col que tocó n'Irlanda y Francia nos caberos años. N'Avilés presentarán el so primer discu como Sophie&Fiachra, nel que predomina la música baillable d'entrambos países.
Equí vos dexo una de les sos actuaciones pa la televisión irlandesa

XIV Festival Intercélticu d'Avilés

El 16 d'esti mes entama la décimocuarta edición del Festival Intercélticu d'Avilés, una edición que va tar centrada na Plaza'l Carbayeo y que ta llamada a ser la cabera de travesía del desiertu tres iguar los problemes cola SGAE y col conflictu col conceyal de cultura d'Avilés en víes de solución, entá nun hai collaboración plena col ayuntamientu pero yá nun hai enfrentamientu.
Eses circunstancies faen que vuelva ser una edición curtia de presupuestu pero yá allonxada de la precariedá del añu pasáu. Asina, esti añu vamos poder disfrutar con dellos conciertos de música folk, que foi un de les estayes del festival qu'hubo que suprimir nel 2009. El vienres 16 van tar presentes n'Avilés una de les bandes clásiques del rock celta estatal, Triquel. El sábadu, 17 de xunetu, va xubir al escenariu d'El Carbayeo un grupu escocés tamién venceyáu al rock celta o folk-rock que debuta per estes tierres, Skerryvore, al que la prensa escocesa-y colgó la etiqueta de ser los Runrig del sieglu XXI. El domingu 18 sedrá Gwennyn, una de les voces moces que ta dando muncho que falar na Bretaña, la encargada d'animar el festival. Y, pa'l pieslle'l festival na nueche'l vienres 23 de xunetu, un grupu enllenapraos, los Red Hot Chili Pipers.
Naguamos por qu'esta edición valga pa finar colos problemes y torgues que-y punxeron al Intercélticu y que la XVª edición del añu que vien seya yá lo qu'avezaba a ser.
Na web del festival yá podéis alcontrar un programa completu.

Acaben les guerres céltiques n'Avilés?

Sigún lleímos esta selmana na prensa local, los dos festivales de música folk d'Avilés (L'Intercélticu y el Beltaine) anden en conversaciones de paz pa nun repetir la situación vergoñosa del añu pasáu. Nun sé si d'estes conversaciones va salir un únicu y gran festival de música celta (que sedría lo deseyable n'actual situación económica) que punxera a Avilés y a Asturies nel mapa de los grandes eventos d'esta mena, si namás traten de coordinar entrambos festivales o qué sé yo...
El casu ye que se sentaron a falar, ye un entamu.

Esbardu salda les deudes cola SGAE

L'Asociación Cultural Esbardu, d'Avilés, dio anuncia ayeri de que saldará los 25000€ de deuda que tenía cola SGAE pola organización del Festival Intercélticu d'Avilés dende l'añu 2005. Esta deuda facía imposible a Esbardu recibir suvenciones públiques pa desendolcar les sos actividaes. La cabera aición de la SGAE foi anunciar, va pocos díes, la so intención de subastar la marca Festival Intercélticu d'Avilés propiedá de la asociación avilesina y embargada pola sociedá d'autores.
A lo llargo de güei Juan Casas, direutor del Festival, desplicará en rueda de prensa la forma de la se fadrá efeutivu'l pagu. Queda agora la dulda de qué va pasar colos dos festivales folk d'Avilés, que yá dieron anuncia de que diben cellebrase esti mes de xunetu, la lóxica diz que entrambes partes tendríen que sentase a negociar una cellebración conxunta embaxo'l paragües de la marca Festival Intercélticu d'Avilés, que ye la que tien la distinción de fiesta d'interés turístico... Pero conociendo l'ansia intervencionista y testerona de dellos conceyales albidró lo peor.

Xuacu Amieva, güei nel Intercélticu d'Avilés

Esta nueche ye una de les más prometeores del Beltaine d'Avilés, tan programaos conciertos de los escoceses LAU y de La Bandina a les 23 hores, pero delles hores enantes, a les 19:45, nel guapu marcu d'una ilesia románica'l sieglu XIII, la de Santu Tomás, va actuar ensin amplificación denguna'l mayestru de mayestros, Xuacu Amieva.
Esta actuación de Xuacu nun tien dala cosa que ver col Beltaine, ye una sorpresa de fuera de programa del Festival Intercélticu d'Avilés, l'orixinal, que ta ufriendo petisos conciertos desenchufaos na ilesia de Santu Tomás de Cantorbery gracies a la collaboración desinteresada de músicos tradicionales qu'actuaren notres ediciones del Intercélticu. Asina'l martes pudimos sintir a la gran Mari Luz Cristóbal Caunedo, güei a Xuacu Amieva y mañana al gaiteru escocés John Stewart.
Los que teis interesaos n'acudir, dir con tiempu la ilesia nun ye mui grande.

XIII Festival Intercélticu d'Avilés

L'asociación Esbardu entama la XIII edición del Festival Intercélticu d'Avilés que, por motivos conocíos por toos, va a ser una versión mini de lo qu'aveza a ser el FIA. Pesie a nun cuntar con denguna subvención el festival, que na cabera edición algamó la distinción de Fiesta de Interés Turístico Regional, va llevase alantre anque con dellos cambios. El más llamativu d'esos cambios ye'l treslladu de la sede a la Plaza'l Carbayo, nel barriu mariñán de Sabugo, d'esti mou Esbardu nagua por nun interferir colos actos del Beltaine; el festival va durar namás 5 díes y la presencia de grupos d'otros países amenorgase tamién pola falta de presupuestu.
A lo llargo d'esta selmana va dir presentándose pasu ente pasu la programación completa'l festival dende la so web http://fia.esbardu.org/ Ente los actos más llamativos podemos solliñar las clases maxistrales de gaita gallega y gaita escocesa que van dar Serafín Rodríguez de la Banda de Gaitas Charamuscas y l'escocés John Stewart.

Posible programación del Festival Intercélticu d'Avilés Bis

A 23 díes del entamu del festival nun se conoz nin cartelu nin programación oficial. L'otru día yá vos fale de lo que me parez que mos alcontremos nesta situación y yá dixi que nun yera de recibu la xetión tan xostrona d'un eventu que ta declaráu d'Interés Turístico Regional. Nos caberos 12 meses asitimos a una aición coordinada ente la SGAE y la conceyalía de Cultura d'Avilés pa finiquitar el festival orixinal y los sos organizadores, Esbardu, los esgrimíos fueron motivos económicos (falta de pagu de los drechos d'autor) y la necesidá de dar un saltu de calidá na organización (los avilesinos pagamos-ys unes vacaciones en Bretaña a dellos conceyales pa que s'asesoraren de cómo se facía l'Interceltique de Lorient).
A 24 de xunu de 2009 esi saltu de calidá na organización traduzse nun festival que nun pue remanar el so nome d'Intercélticu d'Avilés, y al qu'hubo que pone-y otru rocambolescu. Traduzse nun festival organizáu por un trabayor de la estaya de festexos d'Avilés ensin denguna esperiencia cola música tradicional nin cola organización d'eventos d'esta triba y al que-y endosaron el panchu va poques selmanes, asesoráu, eso sí, por Rubén Arias. Traduzse nun festival ensin cartelu y ensin programación oficial a 23 díes de la inauguración. Con estos saltos de calidá igual salimos toos escalabraos.
Dempués de percorrer la rede, podemos dar un avance de la programación, que repito, nun ye oficial y ta ensin confirmar:

• Vienres 17 de xunetu, Banda de Gaites Llacín, que camentamos presentarán el so espectáculu Xideces.
• Sábadu 18 de xunetu, Liam O'Flynn y The Piper's Call Band.
• Domingu 19 de xunetu, Fraser Fifield Trio.
• Xueves 23 de xunetu, La Bandina.
• Sábadu 25 de xunetu, Hermanos Tejedor y Pennoù Skoulm.

Estos datos tan referíos namás a la música folk, desconocemos que grupos de folklore y bandes de gaites pueden tar o non invitaes al festival. Contratar 2 o 3 grupos de folk d'una selmana pa otra nun ye abegosu, pero colos grupos folklóricos ye otru tema, alcontrar agospiu pa 20 o 25 persones y contratalos cuando'l calendariu ya acostuma a tar peslláu ye otru telar y, a la fin, estes agrupaciones son les que dan vida a un festival, les que-y dan convivencia y xermandía. Una de les señes d'identidá que siempre caltuvo l'orixinal Intercélticu d'Avilés.
Dicho too esto nun creáis que me diba prestar el fracasu d'esti nuevu festival, deseyo tola suerte'l mundiu a los sos organizadores pero barrunto que tan faciendo mal les coses, permal, que lleven 12 meses faciéndoles mal y que son testerones, como bonos asturianos que son.

San Patricio n'Avilés

El santu irlandés aporta a Avilés dempués d'una selmana de muncho trabayu pel restu del mundu. El prósimu día 21 de marzu, na plaza de Valdecarzana, la Asociación Esbardu, encargaráse de celebrar al santu con gaites, xuegos tradicionales y xinta popular, pa la nueche habrá conciertu de folk (la banda entá ta por confirmar).
Pa los que nun tuvieron abondo'l martes, equí tienen una bona oportunidá d'estirar la folixa irlandofila un poquín más.

Dos por ún, Intercélticu d'Avilés en rebaxes

Esta selmana pasada hubo novedaes nel contenciosu que caltienen l'A. C. Esbardu, organizadora del mayor festival de música tradicional del país, col Ayuntamientu d'Avilés, principal patrocinador del mencionáu eventu. Pela parte de los organizadores fixose público la creación d'una xestora que sedría, d'equí p'alantre la encargada d'entamar el Festival col sofitu profesional d'una asesoría encargada de velar pola integridá económica del eventu y garantizar la so tresparencia, puesta en dulda dende dellos despachos del consistoriu.
De la otra banda, ñegan la llegalidá de tolos pasos que ta dando Esbardu pa organizar la XIII edición del festival, y vuelven dicir que-y se tan embargando sobenciones a la asociación (nesti casu 6000€ concedíos pol conceyu de Castrillón), y va más p'alló al afirmar que la marca Festival Intercélticu d'Avilés y Comarcal, rexistrada por Esbardu va años, foi tamién embargada. La posibilidá de que esto se fixere foi plantegada pol representante de la SGAE (únicu acreedor del festival) n'Asturies l'añu pasáu, pero polo que podemos saber a día de güei nun se llevó a cabu, polo que la afirmación del conceyal de cultura nun ye más qu'otra salida de pata de bancu d'esti ínclitu personax, como pudimos comprobar visitando la web de la Oficina Española de Patentes y Marcas, onde queda bien nidio que la marca ye propiedá d'Esbardu y que ta en vigor.
La conceyalía de cultura avilesina declaró que vien trabayando na prósima edición del festival dende'l pasáu mes de payares, la xestora vien faciendo poco menos que lo mesmo y Esbardu dixo que diben facer el so festival col sofitu l'ayuntamientu o ensin él, polo que nesti intre podemos afirmar qu'entrambos organizadores tan trabayando en dos programaciones alternatives pa esti branu.