Skerryvore: los Runrig del sieglu XXI?

Asina definió'l periódicu escocés The Herald a esti grupu formáu nel añu 2004 na islla de Tiree, un afalagu que pon el llistón bien alto pa una banda que ta entamando a dar los sos primeros pasos nos circuitos internacionales de folk y, si tenemos un poco de suerte, vamos poder ver esti branu n'Asturies.
Skerryvore partió de los raigaños musicales de les sos natives islles Hébrides que, pasu ente pasu, foi fusionando con rock y funk hasta llegar a la so consolidación musical cola publicación del so segundo discu On The Road, asoleyáu en 2007 que pasó de les 10000 copies vendíes. un récord falando de músiques d'esta mena. Agora van presentar el so tercer trabayu discográficu en xunetu, presentación qu'igual-ys val pa llegar hasta nós si se confirmen los rumores que tengo sintíos perehí.
Pero lo meyor pa conocelos va ser escuchar la so música y naguar por que se confirmen los rumores

Emily Smith presenta Too Long Away n'Asturies

La cantautora ya virtuosa del curdión pianu de Dumfriesshire presenta n'Asturies el so tercer discu, Too Long Away, de la man de Caxastur y los sos conciertos de Músiques del Sieglu XX.
Aclamada pola crítica dende que nel 2002 ganó'l prestixosu premiu BBC Young Traditional Musician of the Year, Emily Smith pasará per Uviéu y Xixón, el 9 y 10 d'avientu, p'amosanos el so talentu como autora ya intérprete de la música tradicional del sudoeste d'Escocia amás de dexanos delles pingarates de la poesía de Robert Burns. Equí vos dexo unes muestres de lo que mos espera

Duncan Chisholm da cursu de vigulín en Galicia

Duncan Chisholm ya Iain MacFarlane van dan dar un cursín de vigulín escocés en Santiago de Compostela. ün de los vigulineros más renomaos del folk célticu d'anguaño, fundaor del míticu grupu de folk-rock Wolfstone. Banda cola qu'asoleyó 9 discos y cola que percorrió'l mundiu. Nel 97 entamó la so carrera en solitariu col discu Redpoint, al que siguió nel 2001 The Door Of Saints, onde ta mui presente la so querencia polos sones de la nuesa música tradicional. Pa 2010 cunta con publicar el so tercer album en solitariu.

Pa más info sobre'l cursín podéis dirixivos a esta web http://www.masterclassdemusicatradicional.info/

Phil Cunningham & Aly Bain nel Filarmónica d'Uviéu

La discográfica avilesina Norte-Sur Records trainos un regalu de Nadal adelantáu, a los xeniales Phil Cunnigham y Aly Bain al Teatru Filarmónica d'Uviéu el prósimu 20 de payares. El duu escocés va cuntar cola collaboración de dos vieyos collacios asturianos nesta velada, Jose Tejedor y Chus Pedro, que yá trabayaren a les órdenes de Phil na grabación del primer discu de los Hermanos Tejedor.
Norte-Sur Records ta más centrada notros estilos musicales ayenos al folk, pero va tiempu yá truxo a actuar a Avilés a la gaitera Kathryn Tickell, nun conciertu onde la afición nun respondió como yera d'esperar. Si nun m'enquivoco tamién tuvo daqué que ver cola visita de Maddy Prior a Piedrasblancas. Agora vuelven a apostar por pesos pesaos del folk célticu y nesta ocasión nun teatru capitolinu, nun vaya ser que pase como cola Tickell que munchos nun fueron ver porque Avilés quedába-ys a desmano.
Presta ver xente tan profesional y serio como Béznar Arias trabayando nun mundiu tan amateur como ye'l del folk asturianu, un aplausu pa él.

Video de Capercaillie actuando na Radio Galega

Delles vegaes alcuéntranse perehí coses bien curioses, que dan bien de vueltes hasta dar con nós. Ún d'esos casos ye esti video de Capercaillie actuando pa los conciertos qu'entama Radio Galega, cola collaboración de Xosé Manuel Boudiño al Low Whistle y colgau en Youtube por un aficionáu escocés al que-y damos les gracies dende equí.

Feleyu presenta Canteros n'Escocia

Va ser nel Shetland Folk Festival nel que los Felpeyos tengan la oportunidá de presentar el so últimu discu énte'l publico escocés. El festival de folk de les Isles Shetland vien cellebrándose dende 1981 y ye ún de los más prestixosos d'Escocia, nun tién ánimu de llucru y ta entamáu por voluntarios cola fin de presentar n'aquelles remotes isles el meyor folk mundial.
Nesta edición comparten cartelu cola banda asturiana perconocíos nomes como Cara Dillon, Shooglenifty, Dáimh, The Brock Maguire Band (de los cofundadores de Moving Cloud Paul Brock y Manus Maguire), los daneses Zar, las francocandienses Gadelle...
Pa los que tengan curiosidá, ésta ye la información que da'l festival a mou de presentación na so web de Felpeyu:

With Asturian roots, Felpeyu is a well-established and yet refreshing act on the Spanish traditional music scene having toured extensively in their home country as well France, Portugal, Australia, Italy, Scandinavia, Canada, Poland and Lebanon. The band's musical approach rests upon a solid rhythm section of bouzouki, bass and bodhran alongside the box, fiddle, wooden flute and Asturian bagpipes - played by some of the region's most musically respected musicians. They write new lyrics for ancient tunes, compose new music for traditional lyrics and arrange instrumental sets that are so energetic audiences can rarely resist dancing to them!

With four albums to date ("Felpeyu", "Tierra", "Yá!" and "Canteros"), this exciting band continue to contribute hugely to the preservation and promotion of Asturian culture. Travelling to Shetland are Fernando Oyágüez on Bouzouki, vocals; Dudu Puente on NS Bass Cello, Lead vocals; Xuan Nel Expósito on Box accordion; Moisés Suárez on Guitar; Ruma Barbero on Bodhran. Lisardo Prieto on Fiddle & vocals and Diego Pangua: Gaita, wooden flute.

Chris Stout, el vigulín qu'aportó del Norte

Continuen los conciertos entamaos por Cajastur, el prósimu invitáu sedrá Chris Stout, vigulineru de les Shetlands qu'actuará'l día 4 d'avientu enXixón.

Esti graduáu pola Royal Scottish Academy of Music and Drama en vigulín clásicu tien yá tres de sí una importante carrera na música tradicional, asina, foi elexíu en Escocia meyor músicu mozu nel añu 1990 y lo que d'aquella yera una promesa agora yá ta confirmáu como d'un de los meyores vigulineros salíos d'aquelles nortiegues isles, lo que ye muncho si chamos una güeyada a los músicos salíos de les Shetlands.
Nel conciertu de Xixón tará respaldáu por Ian Stevenson a la guitarra y Neil Harland al contrabaxu.

BBC ALBA

La radio y televisión pública británica va llanzar un nuevu canal en gaélicu escocés, igual que nel estáu de les autonomíes vamos... El nuevu canal nomase BBC Alba y pa promocionalu ta circulando pela rede un guapu videu per onde s'asomen cares y voces bien conocíes pa los aficionaos al folk escocés. Equí vos lo dexo, de xuru que conocéis a más d'ún.