Los Chieftains en México

Los Chieftains estrenen discu, tituláu San Patricio y dedicáu esta vegada esplorar les conesiones ente la música tradicional irlandesa y la mexicana. N'esti nuevu proyeutu cunten cola collaboración de Ry Cooder y bona parte de los meyores músicos tradicionales del México d'anguaño, como Linda Ronstadt o Los Tigres Del Norte.

La escusa pa entamar la ellaboración del discu ye la deserción d'unos 200 irlandeses del exércitu de los Estaos Xuníos durante la guerra contra México nos años 1846-48, los soldaos irlandeses refugaron disparar a los sos hermanos católicos y acabaron lluchando, y morriendo, del llau mexicanu nes files del Batallón San Patricio... pero meyor que yo desplicalo esti video

Música y chigres

Queda un mes pa San Patriciu, una perbona escusa pa colgar equí estos videos atropaos de Youtube, onde s'entemez la guapura de la música tradicional col incomparable marcu del chigre, igual nun soi mui orixinal pero, si esti recursu facilón val pa enllenar programes enteros de televisión, tamién me valdrá a min pa nun forzar les neurones. Que vos preste.

La primera de 2010...

Dempués del parón navidiegu, camentaba entamar con un resume de lo que foi'l 2009, pero tanto tiempu de folganza y dieta hipercalórica dexáronme más remolón de lo de costume... Gracies a los dioses entá tenemos ehí esa caxa de sorpreses que ye YouTube, salvaor de guionistes de televisión ensin idegues y blogueros remolones.
Yo tuve la suerte d'alcontrar esti video onde pue vese a E.J. Jones interpretando un set que fina cola Muñeira de Casu. Jones ye multinstrumentista que toca en delles bandes del sudoeste d'Estaos Xuníos, amás, de ser un renomáu artesanu gaiteru, son mui afamaes les sos smallpipes que comercializa baxo'l nome de Tidy Cottage Smallpipes.

Música ensin pallabres, nun faen falta.

Video de Capercaillie actuando na Radio Galega

Delles vegaes alcuéntranse perehí coses bien curioses, que dan bien de vueltes hasta dar con nós. Ún d'esos casos ye esti video de Capercaillie actuando pa los conciertos qu'entama Radio Galega, cola collaboración de Xosé Manuel Boudiño al Low Whistle y colgau en Youtube por un aficionáu escocés al que-y damos les gracies dende equí.

Yérase una vez.. PLANXTY

Delles vegaes chando una güeyada en YouTube alcuéntranse coses interesantes, anque tardes n'atopales porque la cantidá de la información audiovisual ye inabarcable, la calidá de la información disponible ya ye otru cantar...
El casu ye que güei tuvimos suerte y fuimos quien a atopar esti prestosu documental de la RTE dedicáu a una de les primeres bandes de folk contemporánees, una de les más grandes, PLANXTY.
El documental ñarra la hestoria de la banda al traviés d'entrevistes a los sos componentes, sofitaes por cortes de vieyos videos del míticu grupu irlandés. Naguo por que vos preste lo mesmo que me prestó a min.